Egei, O Taha̱
Hibru O Kedia̱moko͡u
Nala̱ma Ne̱i̱
Tawale Ta̱
O taha̱ kuguo ko͟͡u nala̱ma, Juda o kedia̱moko͡u ne̱i̱. Juda obiyei kedia̱ hu̱ tabe Hibru. O ilo kelege dia̱moko͡u hagi̱ ne̱di kaha̱ degeimo͡u, kuguo ko͟͡u kuhe nala̱ma ne̱i̱, Yesuko͡u damale̱yodei ke̱ to͡u fogouye domo͡u. O kuguo ko͟͡u nala̱i̱ kaha̱ hu̱ ke̱me di ta tewe mei. Tewe oyene tewe mei.
Kuguo Hibru ko͟͡umaha̱ ta̱ sibige̱ tano͡u tano͡u olo͡u fe̱i̱be kuhe̱:
Ta̱ Hiye 1–2
Yesuha̱ge e̱sol o kedia̱me gaba feleido dala.
Ta̱ Hiye 3:1–4:13
Yesuha̱ hu̱ hiyedo kaha̱ge Mosesha̱ hu̱ hiye ke̱me gaba feleido dala.
Ta̱ Hiye 4:14–10:39
Yesu e̱me hebenito͡u be Godiha̱ midiho̱ ebele kaha̱ mogo͡u du daladi hiye o degei dala.
Ta̱ Hiye 11–13
Di Godiko͡u damale̱yodemaba, nele̱do dege tafalaguame.
Yesuha̱ge e̱sol o kedia̱me gaba feleido dala
1
(Ta̱ Hiye 1–2)
Godiha̱ e̱ Dihi tobo͡u mo͡u hagua, dimoko͡u hehegiei
1 Afudo, Godiha̱ ta̱ ke̱ di ko͡u guai o kedia̱moko͡u yoma hehegiemo͡u hagueibe, yo͟͡u habage-degele-duguo-tobo͡u di-o tano͡u tano͡u kedia̱moko͡u tobo͡u mo͡u dia̱ kuhe̱ hehegieimo͡u haguasiei. 2 Ifisi, uwage sawisiei ke̱ hafe̱i̱ degeimo͡u, Godiha̱ yo͟͡u e̱ Dihi tobo͡u mo͡u hagua, dimoko͡u hehegiei. Afu, e̱ Dihi hagueli mei kelegebe, Godiha̱ nele̱yeno͡u, e̱ Dihiha̱ agudiobo͡u sa sibige̱ ko͟͡ubo͡u de milo͡u goumo͡u, Godiha̱ge e̱me sa hiye ko͟͡umaha̱ bi olo͡u fe̱i̱ ke̱ mo͟͡uyadomo͡u makai. 3 Godibe hoho̱no͡u. E̱ Dihiha̱ge e̱ Ayeha̱ hoho̱ hiyedo ke̱ dimoko͡u hoho̱guono͡u dala. E̱me e̱ Ayeno͡u tefei dala. E̱ ta̱be nele̱ hiyedo kaha̱ degeimo͡u, bima̱i̱ olo͡u fe̱i̱ ke̱ne nele̱do dege dalagua. Kegemo͡u, Dihi e̱ haguamo͡u, dibe Godiha̱ dihi̱le koko͡u do̱u̱do degemabadomo͡u, midiho̱ kasaga̱i̱ di milo͡u gadi kaha̱ hebe ke̱ e̱ igile muguomo͡u, e̱me hebeniko͡u folo, Hiye O Godiha̱ dobogo͟͡u deleko͡u duwo.
Godiha̱ Dihiha̱ge e̱sol o kedia̱me gaba feleido dala
4 Hu̱, Aye Godiha̱ e̱ Dihiko͡u ti ke̱me hu̱ hiyedo, e̱sol o kedia̱ hu̱ gabai dala. Nebe ke̱no͡u tefei, Godiha̱ Dihi e̱me gaba folodo dalamo͡u, e̱sol o kedia̱me e̱ hayedu dalagua. 5 Damale̱do, o taha̱ kuguoko͡u nala̱i̱be, Godiha̱ ko͡u gue tobou ke̱ nala̱i̱ dala,
Na̱me mayo͟͡u ma̱ Dihi. Ifibe a̱me ne̱ Aye degei. Buk Song 2:7
Haba ta toboube,
A̱me e̱ Aye degeiba, e̱me ma̱ Dihi degeleyodei. 2 Samuel 7:14
Godiha̱ge e̱sol o kedia̱moko͡u be ta̱ kege ta tobo͡u li mei. 6 Haba tabe, Godiha̱ e̱ Dihi Wolo ke̱ tobo͡u mo͡u sa sibige̱ kuoko͡u haguei kelegebe, Godiha̱ ko͡u gue tobou,
Ma̱ e̱sol o kedia̱ge yubu sugulo fiya duwoli, e̱moko͡u diho̱ baga̱ tobo͡u mabeedei. Lo 32:43
7 Godiha̱ge e̱sol o kedia̱moko͡u be ko͡u gue tobolo͡u,
A̱ degeiye, ma̱ e̱sol o kedia̱me ma̱ nele̱yeno͡u wi baga suluguadi.* 1:7 Wibo͡u, duobo͡u, fi̱bo͡u ke̱me Grik ta̱ege tano͡u fe̱i̱ ‘pneuma’-yode tobo͡u di.
Ma̱ dabai degele idi o kedia̱me douye wobolo͡u sulugua saga̱i̱ degedi.* 1:7 Dabai 7:30Buk Song 104:4
8 Ke̱no͡u si Godiha̱ge e̱ Dihiko͡u be ko͡u gue tobou,
Na̱me Godi, na̱ o sasa̱i̱ wolo͡u daladibe, no͟͡u kegeno͡u daladi.
Na̱ ne̱ o sasa̱i̱ wo͡u ma daladibe, midiho̱ do̱u̱do koko͡u no͡u wo͡u ma daladi.
9 Na̱ge ta̱ dudiyo mei midiho̱ ke̱me dafadi. Midiho̱ do̱u̱do milo͡u gadi ke̱no͡u si na̱ hoho̱ degedi.
Kegei kaha̱ degemo͡u, ne̱ Godi a̱ ne̱ hu̱ hiye folodo tiba, na̱me hiyedo hoho̱bolo͡u dalayadomo͡u, a̱ ne̱ widioko͡u gusege hue̱i̱ kuhe so͡u gu.* 1:9 Juda o kedia̱ dio͟͡u dia̱ wolo͡u dalale hiye o ebele maka degele idibe, gusege hue̱i̱ e̱ widileto͡u so͡u gulo idi, e̱ hu̱ hebele fogulo ile kaha̱ degemo͡u.
Na̱ hoho̱bolo͡u be nogo dia̱ hoho̱bolo͡u ke̱ saga̱i̱ mei, gaba folodo dalayodei. Buk Song 45:6-7
10 Godiha̱ haba e̱ Dihiko͡u tobou,
Na̱me Hiye O. Yomogo͡u do, na̱ sa sibige̱ ko͟͡u milo͡u gai kaha̱, sa sibige̱ ko͟͡u nele̱do dege dala kuhe̱.
Agudio ke̱ne, no͟͡u ne̱ dobogo͟͡uyeno͡u milo͡u gai.
11 Sa sibige̱bo͡u, agudiobo͡u de makoma mei degele.
Na̱no͡u si makolo mei, na̱me no͟͡u kegeno͡u dalale.
Sa sibige̱bo͡u agudiobo͡u ko͟͡ume yukuei ko͡u ye kagi fegema mei degedi ke̱no͡u tefele kagi fegema mei degele.
12 Obe yukuei ka̱i̱ dile tigama ma̱mo͡u, haba gehe̱ ka̱di saga̱i̱ ke̱no͡u tefele, na̱ sa sibige̱bo͡u agudiobo͡u de boho͡u gama, gehe̱ degele.
Na̱no͡u si boholo͡u mei.
Na̱ dalalebe sadebebo͡u mei, na̱me no͟͡u kegeno͡u dalaleyodei. Buk Song 102:25-27
13 Tabe, Godiha̱ e̱ Dihiko͡u ko͡u gue tobou,
Na̱ ma̱ dobogo͟͡u deleko͡u duwo ke̱me kegeno͡u ibe deba, habage a̱ ne̱ ho o kedia̱ mo͟͡umaba, ne̱ abogo͟͡u hayedu kefeguloyodei. Buk Song 110:1
Godiha̱ge e̱ e̱sol o kedia̱moko͡u be ta̱ kege ta tobo͡u li mei. 14 E̱sol o kedia̱me ta to͡u bo͡u mei, dia̱me fi̱no͡u. Dia̱me Godiha̱ dabai degedi o. Godiha̱ tobo͡u mo͡u ya, Godi yo͟͡u mamo͡u la̱mo͡u degeli o sasa̱i̱ kedia̱ dogo͡u gulo idi.