Nan Umunaay Suyat Juan
Nan Mipangkop Sannaja Suyat
Sa'ad nan umuna suyat Juan gway osa sasan apostol Hesus, agwad nan chugwa napatokay iwhakana. Iwhakawhakana san nanuyatana gway whayu otjan nan ooncha tot achicha misiyan an Apudyus ja san Ana'na gway Hesu Kristu. Ingwhilinna hos an chicha ta achicha tuttugwaon nan wha'on kus ustuway sussuyu tan sachi nan mangipasiyan an chicha an Apudyus. Sa'ad nannaja wha'on kus ustuway sussuyu, simsimmo'cha ekay gway manggwanaon lagwing nan anna ad asna luhung. Sija nan ananchaon achi kun mawhalin gway nangngachan as Hesus as kadto'ay taku tan achi anu mijamung as Apudyus san lagwingay anna ad asna luhung. Ananchaon taakun nu achin chanan namati manchu'kan nan whersucha ja achicha manisiwhayu. Gwon wha'on kus tuttuwa chi.
Sija nan sa'ad nan sungwhat Juan iwhagwhakana gway tuttuwa nangngachan taku as Hesu Kristu. Ipaakammuna hos gway losanay mamati an Hesu Kristu ja mangipatog an Apudyus maserpu whayu nan ooncha gway manisiwhayucha.
Chanan Hu'yona
Nan Ukud Gway Merpugwan Nan Whijag
Nan Iingkaw San Padcha Ja Nan Manghulingot 1:5–2:29
Chanan Anana' Apudyus 3:1-10
Nan Manisiwhayugwan Chanan Anana' Apudyus 3:11-24
Nan Mangilasinan San Ispilitun Apudyus Ja Wha'on Kus Nerpu An Apudyus 4:1-6
Nan Lajad Apudyus Ja Nan Lajad Chanan Iingkaw An Apudyus 4:7–5:5
Nan Mangipano'no' San Mipangkop An Hesus 5:6-12
Nan Whijag Gway Maid Kun Pungpungna 5:13-21
1
Nan Ukud Gway Merpugwan Nan Whijag
(2 Pedro 1:16-18)
1 Sa'ad chay nisisikud san chaan nan luhung ma'gwaan gway chingngormi gway inilami ja inognanmi san imami, sija nan isuyat'u an cha'aju gway sija as Hesu Kristu gway mipangkop san Ukud gway merpugwan nan whijag. 2 Sa'ad as sija gway merpugwan nan whijag impailan Apudyus kun inilami ja ipano'no'mi ad anna ahosay ipaakammumi an cha'aju nan whijag gway maid kun pungpungnaay nisisikud gway nihuyun an Apudyus gway Ama, kun nipaila an cha'ami. 3 Sa'ad chay inilami ja chingngormi ipaakammumi hos an cha'aju tot ma'aosossaan aju hos an cha'ami. Ad na'aosossaan ta'u an Apudyus gway Ama ja nan Ana'na gway Hesu Kristu. 4 Sija nan isuyatmi nannachaja an cha'aju tot sa'ad nan lagsa'mi maid kun man'uyangana.
Sa'ad As Apudyus Sija Nan Silaw
(Juan 1:4; 8:12; 9:5; 12:46; Roma 3:10-20)
5 Annaja nan chingngormi san Ana'na ad ipaakammumi an cha'aju gway sa'ad as Apudyus sija nan silaw ja maid kun puyus manghulingot an Sija. 6 Nu anan ta'uwon ma'aosossaan ta'u an Apudyus ja sissijaay isun chi manghulingot nan mawhiwhijakan ta'u, tuliyan ta'u ja wha'on ta'u kus mawhiwhijag san atuttugwaan. 7 Gwon nu isun chi padcha nan mawhiwhijakan ta'u gway isun Apudyus gway agwad san padcha, ma'aosossaan ta'u san gwaschi osa ad sa'ad nan chayan Hesus gway Ana'na, chayusan chita'u san losanay whersu.
8 Sa'ad nu anan ta'uwon maid whersu ta'u, longag ta'u nan alallilagwon ta'u ad sa'ad nan atuttugwaan maid ku an chita'u. 9 Gwon nu iwhawhagka ta'u nan whersu ta'u an Apudyus kapu san inapudnuna ja inalintogna, ligwatana chanan whersu ta'u ja chayusana chita'u san losanay inergwing ta'u. 10 Nu anan ta'uwon achi ta'u hummersu mangngagnon ta'u tuliyan as Apudyus ad sa'ad nan ukudna wha'on kus ingkaw an chita'u.