5
Tudtuchu Sasan Mangipangpangu Sasan Namati Ja Sasan Man'amernus
1 Anna nan iwhaka' an cha'ajuway mangipangpangu sasan namati. Osaa' ahos gway mangipangpangu. Inila' nan napalikatan Kristu ja mitapiya' ahos san mipailaay inachajawna. 2 Anna amma' iwhaka an cha'ajuway aygwananju chanan takun Apudyus as isun nan mampaspastur gway aygwanana chanan kernerona. Oonju na wha'on kusan mapilit aju gwon oonjuway merpu san somsomo'ju tan sijana nan whayugwon Apudyus. Oonjuway wha'on kusan mangkamkam aju gwon ikakadto'juway mansilwhi. 3 Achi aju amas isun chi apapu gway mangwhauwhaun sasan naatod an cha'ajuway aygwananju gwon cha'aju nan managwatancha. 4 Ad sa'ad nu mampaila as Kristu gway isun nan pangat chanan mangipangpangu sasan namati, agwad nan makanabju gway sissija as ingkaingkana gway mitapi aju san michajagwana.
5 Ad cha'aju ahosay whanwhananog, chumngor aju sasan mangipangpangu an cha'aju. Ja sa'ad as cha'aju losan, achi aju mamangpangas ad nangwhiwhinnachang aju san gwaschi osa. Tan anan nan nilistaay Ukud Apudyus,
“Lagwingon Apudyus chanan napangas gway achi chumngor
gwon ipailana nan inawhayuna sasan wha'on kus napangas.”*5:5 Mawhasa san Proverbio 3:34.
6 Sija nan paituyay aju san ayobhongan Apudyus tan humu'nag nan chimpuway michajaw aju. 7 Itayo'ju an Apudyus nan losanay chachagsonju tan aygwanana cha'aju.
8 Maserpu tingngilonju longagju ja manergwad aju. Sa'ad as Satanas gway ahursuju mantangka isun nan layon gway mangka'aka'ajay mananaanap as anona. 9 Umchi aju an sija, isi'adju nan pammatiju tan akammujuway amasnat ahos nan palikat gway mapadpachasan nan susunudju san pammati sannaja luhung.
10 Ad lumaus ad nan mapalikatanju san sina'itanay chimpu, sa'ad as Apudyus gway amod nan inawhayuna gway namili an cha'aju, itapina cha'aju san maid kun pungpungnaay inachajawna kapu san na'aosossaananju an Kristu Hesus. Oona cha'aju as maid man'uyanganju, whadngana cha'aju ta achi manobhoobhos nan somsomo'ju, papigsaona cha'aju ja pagchotona nan pammatiju. 11 Mantuyay as Apudyus as ingkaingkana. Amen.
Nan Mangudchi Iwhakan Pedro
12 Kapu san whachang Silvano gway ingwhilang'us mantayo'anay sunud san pammati, nanuyata' as abahobwha an cha'aju ta papigsao' nan somsomo'ju ja iwhaka' gway tuttuwa nannaja inawhayun Apudyus. Kapu san inawhayuna ituttuyuyju san pammatiju ingkana san pungpungna.
13 Ininonju gway anan chanan susunud san pammati ad Babilonia†5:13 Sa'ad nan Babilonia, anan nan uchumay takuwon sija nan Babilonia ad Eufrates. Nan uchum ananchaon Egipto gwinnu Roma. Nan uchum ahos whayangna ili gway ummajan chachay ijIsrael gway napapilitay niijoy san uchumay ili. gway isujuway pinilin Apudyus. Ininonju hos gway anan Marcos gway ana''u san pammati. 14 Mangkinninga aju as mangipailaay manisiwhayu aju.
Ilugwayu' gway pawhayugwon Apudyus nan whijagju losanay na'aosossaan an Kristu.