Nan Mi'aggwaay Suyat Pablo Sasan iTesalonica
Nan Mipangkop Sannaja Suyat
Sa'ad chanan namati ad Tesalonica, ta'on nu naagwatcha nan umunaay suyat Pablo an chicha, agwad pay achicha maagwatanay ustu mipangkop san managkulinan Kristu, kapu tan mati'awcha san anan nan uchumon naahus managkulin as sija. Sija nan insuyat Pablo nanna mi'aggwaay suyatna tot ipaakammuna an chicha gway sa'ad as sija gway humursu san losanay lintog Apudyus, mampaila gway umuna an Kristu. San mampailana, choo umamod nan whersun chanan taku ad sijanat nan chimpuway humu'nakan Kristu.
Ingwhakan ahos Pablo an chichaay ta'on nu malikatancha kapu san pammaticha, anusancha san pammaticha ja ooncha nan whayu. Tinudtuchugwana hos chichaay achicha mansachusachut gwon kumakotchaotay manterwhasu gway isun cha Pablo.
Chanan Hu'yona
Nan Lugyukin Nan Suyat 1:1-2
U'umon Apudyus Chanan Taku San Managkulinan Kristu 1:3-12
Nan Mipangkop San Mi'aggwaay Umaliyan Apu Hesus 2:1-12
Chanan Pinilin Apudyus Gway Mataku 2:13-17
Nampawhachang Cha Pablo Sasan iTesalonica Ta Ilugwayuwancha Chicha 3:1-15
Nan Anungus Nan Iwhakan Pablo 3:16-18
1
1 Cha'ami na gway Pablo, Silas ja Timoteo nanna nanuyat an cha'ajuway iTesalonica gway maayuayusay namati an Apudyus gway nitapi an Sija gway Ama ta'u ja an Apu Hesu Kristu.
2 Ilugwayumi gway ipailan Apudyus gway Ama ta'u ja as Apu Hesu Kristu nan inawhayucha ja pawhayugwoncha nan whijagju.
U'umon Apudyus Chanan Taku San Managkulinan Kristu
3 Susunud san pammati, maserpu patinajunmiyay ijaman cha'aju an Apudyus. Annaja nan ustuway oonmi kapu tan pumigpigsa nan pammatiju ja choo ekay umamamod nan lajadju san gwaschi osa an cha'aju. 4 Sija nan cha'ami nan mangichajaw an cha'aju sasan uchumay maayuayus gway namati an Apudyus. Iwhakami an chicha nan ininonjuway nanganus ja namopotpot san pammatiju ta'on nu mapachapachasanju nan losanay palikat ja likat.
5 Usayon Apudyus nannaja palikat as mangipaila gway ustu nan iyu''u'umna. Oona cha'aju as miwhilang san Mantuyajana kapu san mapalpalikatanju. 6 Oon Apudyus nu ngachan nan ustu. Sija nan mangiwhayus san likatju sasan mamalikat an cha'aju 7 ad sa'ad as cha'ajuway mapalpalikatan, pakin'ona nan likatju ad isuna hos an cha'ami. Ma'gwa nannaja san managkulinan Apu Hesus gway merpud langit gway huyunna chanan a'anghelna gway anna nan ayobhongancha. 8 Umalis sija gway napali'gwosan san kumikillaub gway apuy ad chinusana chanan achi kun mamigwhig an Apudyus ja achi kun chumngor san Whayuway Chamag gway mipangkop an Apu ta'uway Hesus. 9 Ichamancha nan chusa gway matangkaancha as ingkaingkana, misiyancha san agwachan Apu ja san pigsana gway maid kun mijisugwana. 10 Ma'gwa nan annaja san sachi erkaw gway umaliyana tot michajaw as sija kapu sasan takuna ja mataag chanan losanay namati. Mitapi aju an chicha kapu tan tinuttuwaju nan impano'no'mi an cha'aju.
11 Annaja nan kapuna gway patinajunay ilugwayuwanmi cha'aju tot mangngachan aju miwhilang san namiliyan Apudyus ta'u an cha'aju ja tot kapu san ayobhongana ma'gwa nan gwaschi whayuway whayugwonju oon ja losanay terwhasuju kapu san pammatiju. 12 Ilugwayumi nannaja tot michajaw nan ngachan Apu ta'uway Hesus kapu an cha'aju ja michajaw aju kapu an sija. Ma'gwa nannaja kapu san inawhayun Apudyus ja as Apu Hesu Kristu.