Nan Suyat Pablo Sasan iColosas
Nan Mipangkop Sannaja Suyat
Sa'ad nannaja suyat, insuyat Pablo sasan namati ad Colosas gway osa ili san Asia Minor. Wha'on kus Pablo nan nangiluki sannaja kimung chanan namati, achina kun ini''ila chicha. Ahus ekas Epapfras gway iColosas as akammuna gway inagwisnaay namati. Ad kapu an Epapfras agwad chanan namati. San iningkagwan Pablo san whawhalluchan ummoy as Epapfras an sija kun ingwhakana gway agwad chanan mangisussuyu san wha'wha''onay sussuyu sasan namati ad Colosas. Nan isussuyucha, nu whayugwon nan osa taku akammugwon gway ustu as Apudyus ja ma'awhijag an sija as ingkaingkana, wha'on kus umanay nan ahus ekay pammati an Kristu. Maserpu anu gway patiyoncha nan uchumay ugukali ja inggwan nan takuway whilin ad maserpu hosay manchajawcha sasan a'anghel.
Kapu sannaja, insuyat Pablo nannaja sasan namati ad Colosas tot akammugwoncha nan atuttugwaan mipangkop an Hesu Kristu. Ingwhakana san suyatna gway kapu an Hesus inggwan Apudyus nan losan. Ad sachi nan nangipailaay nangatngatu as sija san losanay a'anghel ja nan uchum ahosay achi kun maila. Agwad ahos an sija nan ina'Apudyus Amana ad maid kun uchum as merpugwan nan assahu whijag chanan namati nu achi ahus as sija. Sija nan sa'ad chanan namati maserpu achicha suyuton chanan whilin ja lintog gway inggwan chanan taku, ahus as Kristu as maserpu chumngoyancha ja panu'choncha.
Chanan Hu'yona
Nan Lugyukin Nan Suyat 1:1-2
Nan Lugwayun Pablo Sasan Namati Ad Colosas 1:3-14
Nan Inangatun Nan Saad Kristu Ja Nan Inggwana 1:15-23
Nan Nansilsilwhiyan Pablo Sasan Namati 1:24–2:5
Nan Asasaad Chanan Namati Kapu San Na'aosossaanancha An Kristu 2:6-15
Nan Tudtuchu Ta Achi Maallilaw San Wha'wha''onay Sussuyu 2:16-23
Nan Sikud Ja Nan Assahu Whijag Nan Osa Namati 3:1–4:6
Nan Pungpung Nan Suyat 4:7-18
1
1 As Pablo na gway anna nanuyat an cha'aju, huyun'ud asna as Timoteo gway sunud ta'u san pammati. Chinutu'ana' an Apudyus as man'apostol Kristu Hesus.
2 Nanuyat ami an cha'aju gway iColosas gway takun Apudyus ja napudnu gway susunud gway na'aosossaan an Kristu.
Ilugwayu' gway ipailan Apudyus gway Ama ta'u ja as Apu Hesu Kristu nan inawhayucha an cha'aju ja pawhayugwoncha nan whijagju.
Nan Lugwayun Pablo Sasan Namati Ad Colosas
3 Patinajun amiyay manjaman an Apudyus gway Aman Apu ta'uway Hesu Kristu san mangilugwayugwayuwanmi an cha'aju 4 kapu tan chingngormi nan mipangkop san pammatiju an Kristu Hesus ja nan lajadju san losanay takun Apudyus. 5 Mantuttuyuy nan pammatiju ja lajadju kapu san namnamaonju nan niterterpon gway atchon Apudyus an cha'aju ad langit. Chingngorju nannaja san nugwan san nisuyu an cha'aju nan atuttugwaan gway Whayuway Chamag.
6 Ad sa'ad nannaja Whayuway Chamag gway mipangkop an Kristu nipaakammu sasan taku san angsanay ili kun nangwhanag as whayu san whijag nan losanay namati sannaja Whayuway Chamag. Ad sachi nan isun nan na'gwa an cha'aju manipud san chamuway nangngoyanju ja nangagwatanju san atuttugwaanay mipangkop san inawhayun Apudyus.
7 As Epapfras gway patpatkonmiyay huyunmi gway mansilsilwhi an Kristu nan nangiwhaka an cha'aju an chana. Napudnus sija gway nangisa'up an cha'ami. 8 Sija ahos nan nangipaakammu an cha'ami san lajadju sasan takun Apudyus kapu san Ispilitun Apudyus gway agwad an cha'aju.
9 Sija nan malluki san nangngoyanmisna, intuttuttuyuymiyay mangilugwayu an cha'aju tot akammugwonjuway ustu nan whayugwon Apudyus gway pa'gwa an cha'aju kapu san mangatchana an cha'aju san laing ja aammugwan gway merpu san Ispilitun Apudyus. 10 Sijana nan lugwayumi tot san mawhijakanju masom as Apu Hesus gway mangwhanag as manggwaanju san losanay whayu ja machogwan nan aammugwanju san mipangkop an Apudyus.
11 Ilugwayu' ahos tot papigsaon cha'aju an Apudyus san maid kun mijisugwanaay ayobhongana tot ijattomju ja anusanju nan losan gway agwad nan lagsa'ju. 12 Ilugwayu' ahos tot manjaman aju an Apudyus gway Ama gway nanggwa an cha'aju as miwhilang gway ma'atagwid san ingwhawhagkan Apudyus gway atchona sasan takuna gway mitatappi an sija san agwachan nan mantuyajana gway padcha. 13 Insaya'na chita'u san ayobhongan Satanas*1:13 San Griego nan nilista “manghulingot” kun intapina chita'u san mantuyajan nan patpatkonaay Ana'na. 14 Kapu san Ana'na, gwinajagwajaan chita'u, pijaona ukuchon niligwatana chanan whersu ta'u.
Nan Inangatun Nan Saad Kristu Ja Nan Inggwana
15 As Hesus nan ustu'ustu maillan
nan ina'Apudyus Apudyus gway achi kun maila.
Nisisikud as sija san chaan ma'gwa nan luhung
ja sija nan angatuwan san losanay inggwan Apudyus.
16 Tan impa'gwan Apudyus an Kristu
nan losanay agwad ad langit ja asna luta,
chanan maila ja achi kun maila
ancha chanan losanay anna ayobhonganaay mantuyay ad asna luta ja langit.
Na'gwa nan losan kapu an sija
tot losancha pachajagwan as sija.
17 Nisisikud as sija san chaan ma'gwa nan losan
ad sija nan mangipasissija san losan san ustuway naurnusancha.
18 Sija nan wha''ag gway nan pijaona anan sija nan mangituyay sasan namati
gway mijalig as longagna.
Sija nan merpugwan nan assahu whijag chanan namati,†1:18 San Griego sa'ad nan nilista “sija nan lapu.”
sija nan ummuunnaay nataku san otoy
ta sija nan mangngachan angatuwan san losan.
19 Tan pinangkop Apudyus gway sa'ad nan ustu'ustu ina'Apudyusna
agwad san Ana'na.
20 Ad kapu an Kristu, simsimmo' Apudyus gway ipagkulin nan losan an sija –
chanan ingkaw san luta ja ingkaw ad langit.
Ipagkulin Apudyus nan losan an sija
kapu san ummigwangan nan chayan Kristu san natojana san krus.
21 Sa'ad as cha'aju san nugwan nisiyan aju an Apudyus ja ahursu cha'aju an sija kapu san lagwingay somsomo'ju ja lagwingay o'oonju. 22 Gwon san sana impagkulin Apudyus nan ma'ahubuyunana an cha'aju kapu san natojan Kristu tot it'onna cha'aju san whersu, oona cha'ajus maid a'gwaniyanju ja maid asu'unanju san mangilana. 23 Ad sachi nan ma'gwa nu ituttuyuyju san pammatiju gway ainnugwanju napigsa san pammatiju ja achiju ijakajay mannamnama san ingwhawhagkan Apudyus gway atchona an cha'aju kapu san Whayuway Chamag gway chingngorju. Nannaja Whayuway Chamag sachi nan nipaakammu san losan sanna luta. Ad as sa'on gway Pablo, nachutu'ana'ay mangipaakammu san Whayuway Chamag.
Nan Nansilsilwhiyan Pablo Sasan Namati
24 Ad sa sana ta'on nu maliglikatana' kapu san humayugwanju kochangnaay nayagsa'a'. Ad kapu san liglikat'u chachi nan pachakus nan liglikat gway simsimmo' Kristu gway mapalikatana' san mansilwhiya' an cha'ajuway namati gway ma'gwaniyon longag Kristu. 25 Nangngachana' mansilsilwhi an cha'aju kapu san terwhasu inatod Apudyus an sa'on san humayugwanju tot ipaakammu'ay ustu nan ukudna. 26 Nannaja atuttugwaanay ukud achi kun nipaakammu san nawhajakay chimpu ja san amanaay lunap gwon san sana nipaakammu sasan takuna. 27 Simsimmo' Apudyus gway ipaakammu sasan takuna nan amochay inawhayun nan pangkopna gway pawhayugwona nan whijag chanan wha'on kus Hudyu. Annaja nan nitatayuway pinangkopna ipaakammu: ituttuyuy Kristu gway ma'awhijag an cha'aju. Sija nan aagkammujuway namnamaonjuway mitapi san michajagwana ad langit.
28 Ipaakammumi as Kristu san losanay taku, tudtuchugwanmi ja suyuwanmi nan losanay taku gway usayonmi nan laing gway inatod Apudyus an cha'ami tot ipayangmi nan gwaschi osa gway maid man'uyangana san ma'aosossaanancha an Kristu. 29 Sa'ad tot ma'gwa' nannaja, ipapati' ja igka' nan lobhong'uway manggwa san terwhasuway mipangkop san Whayuway Chamag. Ma'gwa' nannaja kapu san pigsa gway nerpu an Kristu gway humachang an sa'on.