Nan Suyat Pablo Sasan iGalacia
Nan Mipangkop Sannaja Suyat
Sa'ad nan Whayuway Chamag gway impaakammun Pablo, iwhilang Apudyus nan osa taku as maid kun whersuna kapu ekay san pammatina an Hesu Kristu. San ummoyna nangipaakammugwan san Whayuway Chamag mipangkop an Hesu Kristu sasan ilin chanan wha'on kus Hudyu ad Galacia gway sa'up nan Asia Minor, nayagsa'chaay nammangili an sija kun angsan chanan namati. Gwon san sachi chimpu, agwad nan hungkuy nan Hudyu gway namati an Kristu gwon wha'on kus ustu nan isussuyucha mipangkop san ininon chanan wha'on kus Hudyu gway miwhilang an Apudyus as maid kun whersucha. Nawhajag kus a'it san lummajagwan Pablo ad Galacia, iningkaw nan ummoy ad Galacia gway nallagwing san insuyun Pablo. Ananchaon wha'on kus tuttuwa apostol as sija tan wha'on kus osas sija sasan nasagwayan as chugwa apostoles gway nihuyohuyog an Apu Hesus san iningkagwanad asna luta. Anancha hoson wha'on kus tuttuwaay iwhilang Apudyus nan osa taku as maid kun whersuna kapu ekay san pammati. Gwon maserpu mampasuglit kahos ja suyutona nan uchum pajay lintog Moses. Anancha hoson lagwing nan insuyusuyun Pablo sasan namati an Kristu mipangkop san nagwajagwajaancha tot wha'on kus maserpu suyutoncha nan lintog. Tan ananchaon nu amaschi, umamamod anu gway humersucha. Chana nan insuyusuyun chanan Hudyu sasan maayuayus gway namati an Apudyus ad Galacia.
Chingngorn kun Pablo gway angsan chanan namatiyay maalallilaw sannachaja wha'on kus ustu misussussuyu, illistana nannaja suyat tot managkulinona chicha san tuttuwa pammaticha an Kristu. San ummuna chugwa kapitulu, inta'chorna nan ina'apostolna. Ingwhakana nan namiliyan Apudyus an sija gway mangisuyu san Whayuway Chamag sasan wha'on kus Hudyu kun uyay chanan apostoles ad Jerusalem whinigwhigcha nan ina'apostolna. San kapitulu tuyu ja opat, impaagwatna gway sa'ad nan mangiwhilangan Apudyus san taku as ustu san mangilana wha'on kus kapu san manuyutan san lintog, ahus nan pammati ekay an Kristu. Sasan mangudchiyay chugwa kapitulu, sinungwhatana chanan manggwamanggwanaon lagwing nu magwajagwajaan nan taku san ayobhongan nan lintog. Tinudtuchugwana hos chicha tot mampaituyaycha san Ispilitun Apudyus ta mapawhayu nan ininoncha mawhijag ja achicha suyuton nan lagwingay pijaon nan somsomo'cha.
Chanan Hu'yona
Nan Lugyukin Nan Suyat Ja Maid Kun Uchum As Whayuway Chamag As Misuyu 1:1-10
Nan Nangi'alintokan Pablo San Ina'apostolna 1:11–2:21
Nan Nangiwhilangan Apudyus San Osa Taku As Ustu San Mangilana 3:1–4:31
Nan Gwajagwajan Chanan Namati An Kristu Ja Nan Annungcha Gway Mampaituyay San Ispilitun Apudyus 5:1–6:10
Nan Anungus Nan Suyat 6:11-18
1
1 As Pablo na gway apostol gway nanuyat sannaja. Wha'on ku sasan taku gwinnu kapu san taku nan nanutu' an sa'on as osa apostol gwon chinutu'ana' an Hesu Kristu ja as Apudyus gway Ama gway nanaku an Hesus san natojana. 2 Losanay susunud san pammati gway annad asna an sa'on, mitapicha gway manggwanaon ininonju gway losanay maayuayus gway namati ad asnatay ailiilid Galacia. 3 Ilugwayu' gway ipailan Apudyus gway Ama ta'u ja as Apu Hesu Kristu nan inawhayucha an cha'aju ja pawhayugwoncha nan whijagju. 4 Inatod Kristu nan whijagna gway matoy tot machayusan ta'u san whersu tot kapu an sija agwad ininon ta'u mangijakay san lagwingay ayanggwa gway o'oon nan taku san sana chimpu. Inggwana na kapu tan sachi nan whinayun Apudyus gway Ama ta'u 5 gway machajaw as ingkaingkana. Amen.
Maid Kun Uchum As Whayuway Chamag
6 Mataaka' tan chaan kunekayya nanchu'kanjus Apudyus gway namili an cha'aju as mantakuna kapu san inawhayun Kristu kun sinuyutju nan ayasiyay sussuyu gway sa'ad chachay mangisuyu ananchaon sijana nan Whayuway Chamag. 7 Gwon nan inatuttugwaana sa'ad nan isussuyucha wha'on kus sija nan Whayuway Chamag mipangkop an Kristu. Sijama ananta nan anna chanan uchumay manguyaw an cha'aju ja whayugwoncha sawhaliyon nan Whayuway Chamag gway mipangkop an Kristu. 8 Nu agwad osa uyay pay nu cha'ami gwinnu osa anghel gway merpud langit as mangiwhaka an cha'aju as sawhali san Whayuway Chamag gway ingwhakami an cha'aju, chusaon Apudyus as sija as ingkaingkana. 9 Ingwhakami na san nugwan ad anna asino' iwhaka gway nu agwad mangiwhaka an cha'aju as sawhali san Whayuway Chamag gway inagwatju, chusaon Apudyus as sija as ingkaingkana! 10 Achiju pa ananon sija ekay whayugwo' nan tachunana' sasan taku. Wha'on! Sija whayugwo' nan masoman Apudyus an sa'on, wha'on ku sasan taku. Nu sija anapo' nan masoman chanan taku, wha'ona' kus mansilsilwhi*1:10 Nan niigka san Griego “mudchachu.” an Kristu.
Nan Nangi'alintokan Pablo San Ina'apostolna
11 Susunud, iwhaka' an cha'ajuway sa'ad nan Whayuway Chamag gway ingwhaka' an cha'aju, wha'on kus nerpu san taku. 12 Tan wha'on kus inaya' nanna sussuyu san nerpugwan ta'u ja maid kun takus nangisuyu an sa'on gwon as Hesu Kristu nan nangipaakammu gway ustu an sa'on. 13 Chingngorju nan sikuchay ingwhihwhijag'u san chamuway nangipapatiya' san pammati ja ukalin nan Hudyu. Amod nan namalikat'u sasan maayuayus gway namati an Apudyus ja inigka' nan losanay ayobhonga' gway manangka an chicha. 14 Amod nan nanggwa' gway nanuyut san sussuyu mipangkop san pammatin nan Hudyu nu san aachugwan sasan aissugwa'ay Hudyu tan amod nan nangipapatiya' san ukalin chanan nerpugwan ta'u nu san uchum.
15 Gwon anna nan pangkop Apudyus an sa'on tan uyay san chaan'u mijana'an, pinilinas sa'on ja chinutu'ana' ahos gway mansilwhi an sija kapu san inawhayuna. 16 Whinayun Apudyus gway ipaakammu an sa'on nan Ana'na tot iwhaka' nan Whayuway Chamag mipangkop an sija sasan wha'on kus Hudyu. Achiya' kun ummoy nampatudtuchu san sinusnatay taku. 17 Achiya' kun ummoy ad Jerusalem ta ma'aapapata' sasan apostoles gway ummuna nu sa'on gwon ta'on nu amaschi naanooja' ad Arabia gwot nanagkulina' ad Damasco.
18 Lummaus kunan tuyu tagwon san nappung Hesus nampailan an sa'on, ummoja' ad Jerusalem ta iya' ilan ja agakammugwon as Pedro.†1:18 San Griego “Cefas” nan nilista ad isuna nannaja taku gway as apostol Pedro. Isuna hos san 2:9, 11, 14. Kun iningkagwa' an sija as nasagwayan as lima erkaw. 19 Gwon maid kun inila' sasan uchumay apostoles, ahus as Santiago gway sunud Apu Hesus. 20 Nan isuyat'uwanna an cha'aju tuttuwa, akammun Apudyus gway achiya' kun mantutulli. 21 Sachi ad, ummoja' sasan ili gway sa'upon nan Siria ja Silicia.
22 San sachi chimpu maid kun ini''ilacha an sa'on chanan maayuayus gway namati an Kristu ad Judea. 23 Ahus ekas chingngorcha nan chamag gway, “Sa'ad chay namalpalikat an chita'u gway namati say nerrus, iwhakawhakana san sana nan mipangkop san Whayuway Chamag gway pinachasna tangkaan san chamu.” 24 Kun chinaychajawchas Apudyus kapu san na'gwa an sa'on.