8
As Hesus Nan Angatuwanay Pachi Ta'u
1 Nan puntun nannaja ukuukucho' anna nan osaay angatuwan gway pachi ta'u gway ma'atuyay an Apudyus ad langit gway amod nan ayobhongana. 2 Mansilsilwhis sija as osa pachi ad aschi san ikaw gway Nat'on as Ingkagwan Apudyus gway sachi nan kadto'ay manchajagwan ad langit gway insaad Apudyus, wha'on kus insaad nan taku.
3 Tan nan gwaschi osa angatuwanay pachi nachutu'an as sija gway mangichatun san ajam ja losanay ayasin nan chatun gway maatod an Apudyus. Ad sija nan sa'ad nannaja angatuwanay pachi ta'u maserpuway agwad ahos ichatunna. 4 Nu agwad pay as sija ad asna luta, wha'on kun otjan as pachis sija tan agwad chanan papachi gway manchatun gway sachi nan anana san Lintog. 5 Sa'ad nan mansilwhiyancha as pachi managwatan ekay ja isun chi aninigwan nan ma'ma'gwa ad langit. Isuna hos an Moses san agwiyay isaadna kunan turcha gway manchaychajagwancha, ingwhakan Apudyus an sija gway manggwana, “Ilam ta ammam agwaton nan isun chay impaila' an si'a san iningkagwam say whilig.” 6 Gwon san sana nan inapachin Kristu napatpatog san nampachiyan chachay ummuna papachi. Ad isun ahos nan a''opgwa tuyag gway isa'usa'na an Apudyus ja san taku gway napatpatog san chachaanay tuyag kapu tan na'gwa nannaja san sinumamod whayuway ingwhawhagkan Apudyus.
7 Tan sa'ad nan sachi ummunaay intuyag Apudyus nu maid uyangna, achi otjan maserpu nan mi'aggwa intuyag Apudyus. 8 Tan inilan kun Apudyus gway anna nan nan'uyangan chanan takuna, anana,
“Humu'nag nan chimpuway manggwaa' as a''opgwa tuyag
sasan ijIsrael ja iJudea.
9 Nannaja a''opgwa tuyag wha'on kus isun chay tuyag
gway inggwa' sasay aammacha
san chimpuway inamma' chicha ilagwa ad Egipto
kapu tan wha'on kus napudnucha san intuyag'u an chicha.
Sija nan achi' kun chingchingngor chicha.
Sa'on gway Apudyus nan nangiwhaka.
10 Tan annaja nan ituyag'u sasan ijIsrael
san umaliyay chimpu:
Patinajunay pasomsomo''u an chicha chanan lintog'u
as isun chi amas nilista san somsomo'cha.
Ad sa'on nan whigwhikoncha as Apudyuscha
ja chicha nan mangngachan taku'.
11 Ad wha'on kus maserpu mansinnuyu nan man'a''ailijan ja mansusunud ananon,
‘Akammugwonju as Apudyus’.
Tan losancha akammugwon as sa'on
manipud sasan awhawhaanay taku ingkana sasan angatuwan.
12 Tan ligwata' nan lagwingay o'ooncha
ja sa'ad chanan whersucha achi' kun sosom'on.”*8:12 Mawhasa san Jeremias 31:31-34.
13 San nangiwhagan Apudyus san mipangkop san a''opgwa tuyag, pijaona ukuchon inggwana nan umuna tuyakan as nappung nan ausayana. Ad akammu ta'uway losanay nappung nan ausayana mumaid.