Nan Impaakammun Hesu Kristu An Juan
Nan Mipangkop Sannaja Nibyu
Sa'ad nan impaakammun Hesu Kristu an Juan mipangkop san ma'gwa san umali erkaw, nilista san chimpuway napalpalikatan chanan namati kapu san pammaticha an Apu Hesu Kristu. Sa'ad nan apatkanay pangkop Juan gway nangilista sannaja papigsaona nan somsomo'cha ta ipapatichaay mamati ta'on nu napalpalikatancha.
Nan aachugwanay hu'yon nanna nibyu chanan impaipailan Hesu Kristu an Juan gway isun chi ininop gway anna nan pijaona anan. Sa'ad chanan namati san chimpun Juan naagwatancha nin nan pijaona anan nannachaja isun chi ininop gwon san sana malikatan ta'u mangagwat san uchum an chicha. Ta'on nu amaschi agwad ahos chanan uchumay illistan Juan gway maagwatan ta'u. Nan osa agwatna, nan pijaona anan nan ata laing, nan sakkud mijalig san ayobhongan ad nan i'i mijalig san inapigsa. Naya'a ahos gway maagwatan nan apatkanay miwhakawhaka sannaja nibyu gway sija nan mangawha'an Apudyus san losanay ahursuna kapu an Kristu ja san mangatchana san makanab nan mantayo'anay takuna gway iingkaw an sija as ingkaingkana. San mangudchiyay kapitulu, agwad nan mampayagsa' gway mipangkop san assahu langit ja luta ja nan assahu ili gway Jerusalem gway merpud langit.
Chanan Hu'yona
Nan Lugyukin Nan Suyat 1:1-8
Nan Chamuway Nipaila An Juan Gway Amas Ininop 1:9-20
Chanan Suyat Sasan Maayuayus Gway Namati San Pituway Ili 2:1–3:22
Nan Manchaychajagwan An Apudyus Ad Langit 4:1-11
Nan Nayu'utay Papil Ja Nan Uyhunay Kernero 5:1-14
Nan Pitu Pa'ot Nan Nayu'utay Papil 6:1–8:5
Nan Pituway Tangkujub 8:6–11:19
Nan Huwhai, Dragon Ja Nan Chugwa A'oogjatay Ajam 12:1–13:18
Nan Uyhunay Kernero Ja Nan 144,000 Gway Takuna 14:1-5
Nan Maapitan Nan Atakutaku San Luta 14:6-20
Nan Pituway Chujug Gway Napnu San Chusa 15:1–16:21
Nan Huwhaiyay Nangaabwhaju San A'oogjatay Ajam 17:1-18
Nan Natangkaanan Nan Babilonia Ja Naawha'an Nan Losanay Ahursun Apudyus 18:1–20:10
Nan Mangudchiyay Mangu'uman Apudyus San Atakutaku 20:11-15
Nan Assahu Langit, Luta Ja Jerusalem 21:1–22:5
Nan Anungus Nan Suyat 22:6-21
1
1 Annaja nan impaakammun Hesu Kristu gway inatod Apudyus an sija tot ipaakammuna sasan mansilsilwhi an sija gway ma'gwa ekajay ma'gwa san wha'on kus mawhajag. Ad sija nan ingwhaun Hesu Kristu nan anghelna gway umalina ipaakammu an sa'on gway Juan gway osa mansilsilwhi an sija. 2 Impano'no''u nan losanay inila'. Impano'no''u nan mipangkop san ukud Apudyus ja nan impaakammun Hesu Kristu. 3 Piyan nan mangiwhasa sasan nipadtu ukud san uchum ja chanan manchongor ancha mamopotpot sasan nilista sanna nibyu tan takangay nan chimpu ma'gwaan chana.
Nan Suyat Juan Sasan Maayuayus Gway Namati San Pituway Ili
4-5 As Juan na gway anna nanuyat,
An cha'ajuway maayuayus gway namati san pituway ili san Asia.*1:4-5 Sa'ad nanna “Asia” osa sasan angsanay ili gway sina'up nan Roma san agwi san chimpun nan nanuyatan Juan.
Ipailan Apudyus, Ispilituna ja as Hesu Kristu nan inawhayucha an cha'aju ja pawhayugwoncha nan whijagju. As Apudyus iingkaw san sana ja sikud gway iniingkaw san chaan ma'gwa nan losan ja iingkaw as ingkaingkana. Nan Ispilituna pitu†1:4-5 Sannaja nibyu sa'ad nan whilang gway pitu na'assi'assin niwhaka. Nan pijaona anan nan pitu san manomsom'an chanan Hudyu, ustu'ustu, gwachagwad gway maid kun uyangna. nan mipaillan nan ayobhongana gway agwad as sija san sangun nan tukaw Apudyus gway mangituyay. As Hesu Kristu sija nan napudnu mangipano'no' san mipangkop an Apudyus. Sija nan ummuna nataku san otoy ad achi kun puyus matoy asin ja sija nan mangituyay sasan ali san luhung.
Ipatpatog chita'u an sija ja gwinajagwajaana chita'u san machusaan ta'u sasan whersu ta'u kapu san chayana gway ummigwang san natojana. 6 Kun nangngachanona chita'us taku gway ituyajana ta ma'atuyay ta'u an sija ja nangngachanona chita'us papachi gway mansilwhi an Apudyus gway Amana. Machajaw as Hesu Kristu ja mantuyay as ingkaingkana! Amen.
7 Chongyonju nannaja! Umali as Hesu Kristu gway agwad san hunot.‡1:7 Mawhasa san Daniel 7:13.
Ad mailan nan losanay taku as sija
uyay chachay namadju' an sija san krus.§1:7 Mawhasa san Zacarias 12:10.
Losanay taku san na'aya'ayasiyay ili
maniwhilcha kapu san manusaana an chicha.
Kadto' na ma'gwa! Amen.
8 Anan Apu gway Apudyus, “Sa'on nan Alpha*1:8 Nan pijaona anan nan “Alpha”, umuna. ja nan Omega.†1:8 Nan pijaona anan nan “Omega”, mangudchi. Sa'on nan iingkaw san sana ja sikud gway iniingkaw san chaan ma'gwa nan losan ja sa'on nan iingkaw as ingkaingkana. Amod nan ayobhonga' san losan.”
Nan Chamuway Nipaila An Juan Gway Amas Ininop
9 As Juan na gway sunudju san pammati ja huyunjuway mapalpalikatan ja huyunju sasan takuway ituyajan Apudyus ancha huyunju ma'iijattom san likat kapu san na'aosossaan ta'u an Hesus. Niijoja' san ma'gwaniyon Patmos gway whana'iyutay ili gway napali'gwosan san whaywhay kapu san nangipaakammugwa' san ukud Apudyus ja san impaakammun Hesu Kristu. 10 San osa erkaw gway manchaychajagwan an Apudyus tiningngila' san Ispilitun Apudyus kun chingngor' san odchoka' nan towhakay kinga gway amas tangkujub 11 gway manggwana, “Ilistam nan mailam san osa nibyu ad impagwitnu sasan maayuayus gway namati sasay pitu ili gway Efeso, Esmirna, Pergamo, Tiatira, Sardis, Filadelfia ja Laodicea.”
12 Gwot nantuliliya' tot ila' nan kumingakinga an sa'on. Mantuliliya' kun inila' chanan pitu huyagwanay papattangan‡1:12 Sa'ad nannaja papattangan na'gwa san huyagwan gway natuud nan kaobna. san silaw. 13 Ad san kagwan chachay papattangan san silaw, agwad nan amas ilan chi taku gway nallayagkoyloy ja insasa'yoyna san whayu'ungna nan huyagwanay ayapaw. 14 Ad sa'ad nan huu'na puta' gway amas apos ja hunot nan aputa'na ad nan atana amas kumikillaub gway apuy. 15 Sa'ad nan i'ina amas hunnahunnagway hulinsi gway nabser san apuy. Ad nan kingana amas ahungog chi umajaajas gway chacha''or chanum. 16 Inoognana san chigwananay imana chanan pitu whituwon ja san tupo'na lumosgwayosgwa nan ispadaay nansupang nan tachomna. Ad nan hoserna isun nan initay sumiling san amochay pigsana.
17 Inila' kus sija nallu'huwha' gway achi kun nangkichu san sanguna. Gwon iyochonna nan chigwananay imana an sa'on gway manggwana, “Achi'a umogjat. Sa'on nan Umuna ja Mangudchi san losan. 18 Sa'on nan Mawhiwhijag! Natoja' gwon ilam, annaa' gway matattaku san sana as ingkaingkana. Sa'on nan singwhijang gway manaku sasan natoy ja ad Hades gway ikaw chanan natoy.
19 “Sija nan ilistam chanan iillam gway ma'ma'gwa san sana ja chanan ma'gwa san umaliyay erkaw. 20 Nan pitu whituwon gway inilam san chigwananay ima' ja pituway huyagwanay papattangan san silaw, achi kun nipaakammu nan pijaona anan san nugwan gwon annaja ipaakammu' an si'a san sana. Sa'ad chanan pitu whituwon chicha nan a'anghel gway mangijaachug sasan maayuayus gway namati sasay pituway ili ja sa'ad chanan pitu huyagwanay papattangan san silaw chachi nan maayuayus gway namati san pituway ili.”
*1:4-5 1:4-5 Sa'ad nanna “Asia” osa sasan angsanay ili gway sina'up nan Roma san agwi san chimpun nan nanuyatan Juan.
†1:4-5 1:4-5 Sannaja nibyu sa'ad nan whilang gway pitu na'assi'assin niwhaka. Nan pijaona anan nan pitu san manomsom'an chanan Hudyu, ustu'ustu, gwachagwad gway maid kun uyangna.
‡1:7 1:7 Mawhasa san Daniel 7:13.
§1:7 1:7 Mawhasa san Zacarias 12:10.
*1:8 1:8 Nan pijaona anan nan “Alpha”, umuna.
†1:8 1:8 Nan pijaona anan nan “Omega”, mangudchi.
‡1:12 1:12 Sa'ad nannaja papattangan na'gwa san huyagwan gway natuud nan kaobna.