7
Namer'aan Chanan 144,000 Gway IjIsrael
1 Sa'ad nan nisu'nub gway inila' opatay anghel gway nasi'asi'adcha san opatay sungun nan luhung. Totoppaponcha nan opatay tungnin gway merpu san opatay sungun nan luhung tot achi pumujupuy san luta, san whaywhay gwinnu agwannasnatay agwachan nan aju. 2 Kun inila' nan sawhali anghel gway nguma''anga''atu merpu san chumungitan nan init gway inoognana nan mermer'an nan mawhiwhijakay Apudyus. Pin'agwanas towhag chanan opatay anghel gway chicha nan nangatchan Apudyus san ayobhonganay manangka san luta ja whaywhay. 3 Anana, “Achiju tangkaan nan luta, whaywhay gwinnu chanan ay'aju ingkanas mer'aanmi jan nan itung chanan mansilsilwhi an Apudyus ta'u.”
4 Kun chingngor' nan whilang nan namer'aan gway 144,000. Nerpucha san kana' chanan nasagwayan as chugwaay ana' Israel.
5-8 Man'asawwayan as chugwa lihu nan nerpu san kana' cha Juda, Ruben, Gad, Aser, Neftali, Manases, Simeon, Levi, Isacar, Zabulon, Josep ja an Benjamin.
Nan Achi Kun Mawhilang Gway Takuway Nansisillup San Puta'
9 Sachi kun iningkaw nan inila' gway chachama takuway maid kun osas ma'awhilang san inaachucha. Nerpucha san na'aya'ayasi tribu, ili ja apapat. Summisi'adcha san sangun nan tukaw nan mangituyay ja nan Uyhunay Kernero. Puta' nan silupcha ja nanoodchoncha sasan tuhun nan palma. 10 Kun impa'uychaay nan manggwana, “As Apudyus ta'uway tummutu'chu san tukaw ja nan Uyhunay Kernero, chicha nan nanaku an chita'u.” 11 Losanay a'anghel agwadcha hos san sachi gway nili'gwoscha nan tukaw nan mangituyay, chanan chacha''or mangipangpangu ja chanan opatay mawhiwhijag. Kun nampalintumongcha san sangun nan tukaw kun nanchajawcha an Apudyus. 12 Anancha,
“Amen! Manjaman ta'u an Apudyus gway mansilsilwhiyan ta'u.
Machaychajaw as sija kapu san inangatuna, ayobhongana,
kapu san inalaingna ja kapu san inapigsana.
Whigwhikon ta'u ja chajagwon ta'u as sija as ingkaingkana. Amen.”
13 Kun nanimus nan osa sasan chacha''or gway mangipangpangu an sa'on gway manggwana, “Ngachan nannachaja nasilsilupan san man'aputaa'? Agwan nan nerpugwancha?”
14 Kun ana' an sija, “Apu, maid kun akammu', si'a nan mangakammu.”
Kun anana an sa'on, “Annachaja chanan lummasat san amochay palikat. Sina'sa'ancha chanan silupcha kun impaputa' nan chayan nan Uyhunay Kernero gway ummigwang kapu san natojana nan silupcha.*7:14 Sina'sa'ancha chanan silupcha kun impaputa' nan chayan nan Uyhunay Kernero nan silupcha. Pijaon nina anan, kapu san natojan Hesus nan nangichatunana san whijagna as chusan nan whersucha, niligwatan Apudyus ja chinayusana nan whersucha.
15 Sanat nan kapunaay agwadcha san sangun nan tukaw Apudyus ad inerkaw
ja nilawhi gway mansilwhicha an Apudyus san ingkagwana.
Sa'ad chay agwachay tummutu'chu san tukaw ituttuttuyuynaay
hurnan ja whantajan chicha.
16 Achicha kun puyus asin mawhitil ja mauwaw.
Achicha kun puyus ki'naon asin nan init ja maid kun i'alin nan amochay atung nan init san longagcha.
17 Tan sija mangaaygwan an chicha nan Uyhunay Kernero
gway summisi'ad san sangun nan tukaw nan mangituyay.
Ichayanna chicha san obob gway mangatod san whijag.
Ad Apudyus nan mamunad san losanay luwacha.”
*7:14 7:14 Sina'sa'ancha chanan silupcha kun impaputa' nan chayan nan Uyhunay Kernero nan silupcha. Pijaon nina anan, kapu san natojan Hesus nan nangichatunana san whijagna as chusan nan whersucha, niligwatan Apudyus ja chinayusana nan whersucha.