19
Nan Nayagsa'ay An'antad Langit
1 Nappung kun chay anghel kuminga chingngor' nan amas towhakay kingan chanan angsanay taku gway agwad ad langit gway manggwana,
“Machaychajaw as Apudyus!
Sija nan manaku an chita'u, sija nan achajagwan ja anna ayobhongana
2 kapu tan sa'ad nan iyu''u'umna tuttuwa ja ustu.
Chinusana nan machamchamag gway huwhaiyay naukor
gway nangagwis san losanay taku sanna luta tot mitapicha ma'awhersu san whersuna.
Ingwhayus Apudyus chanan mansilsilwhi an sija say huwhaiyay naukor tan intoyna chicha.”
3 Inasincha gway manggwana,
“Machaychajaw as Apudyus!
Ad sa'ad nan asu' nan sachi masmaskob gway ili nguma''anga''atu as ingkaingkana.”
4 Kun nallu'hub chachay chugwampuyu ja opatay chacha''or mangipangpangu ja chachay opatay mawhiwhijag kun nanchajawcha an Apudyus gway tummutu'chu san tukawna gway manggwana,
“Amen! Machaychajaw as Apudyus!”
Nan Kagaja San Hoyay Nan Uyhunay Kernero
5 Kun iningkaw nan kinga nerpu san tukaw nan mangituyay gway manggwana,
“Chajagwonju nan Apudyus ta'u,
cha'aju losanay mansilsilwhi an sija
ja cha'ajuway umogjat an sija, nawhawha man gwinnu nangatu!”
6 Sachi kun chingngor' nan amas kingan chanan angsanay taku gway agwad ad langit ja isun nan ahungog nan chacha''orray chanum ancha isun nan amod na pigsana ichur gway manggwana,
“Machaychajaw as Apudyus
kapu tan nalluki nantuyay as Apu gway Apudyus ta'u
gway amod nan ayobhongana san losan!
7 Mallagyagsa' ta'u
ja chajagwon ta'u nan inangatuna
ancha chajagwon ta'us sija kapu tan niwhatug nan mamyajan nan Uyhunay Kernero
kun nansasagkana nan asawwona.
8 Kun nijujas sija gway mansilup
san puta'ay luput gway nagwa san lino.”
(Sa'ad nan lino luput gway por'as ja mammusiling gway mijalig san ustu gway o'oon chanan takun Apudyus.)
9 Sachi kun anan nan anghel an sa'on, “Ilistam nannaja: Piyan chanan naajakan gway ma'a'an san hoyay nan Uyhunay Kernero.” Kun anana hos an sa'on, “Tuttuwa nannachaja ukud gway ingwhakan Apudyus.”
10 Kun nallu'huwha' san whatug nan i'ina gway nanchajaw an sija. Gwon anana an sa'on, “Achim oon nat! Mansilsilwhiya' an Apudyus gway isum ja isun chanan susunudnu san pammati gway chicha nan namopotpot san atuttugwaanay impaakammun Hesus. Apudyus nan chajagwom!” Tan sa'ad nan atuttugwaan gway impaakammun Hesus sachi nan impaakammun nan Ispilitun Apudyus sasan profeta.
Nan Nangaabwhaju San Puta'ay Awhaju
11 Sachi kun inila' nan langit gway niigkat kun iningkaw nan puta'ay awhaju ja nan nangaabwhaju gway maagwakan as Mantayo'an ja Tuttuwa tan ustu nan iyu''u'umna ja ma'akuwhatana san ahursuna. 12 Sa'ad nan atana amas kumilakilab gway apuy ad nan wha''agna angsan nan whana'iyutay whayangatna. Agwad nan ngachanna nilista an sija gway maid kun mangakammu, ahus as sija as mangakammu. 13 Nansisillup san lagkoyloy gway luput gway nachayachayaan ad nan ngachanna maagwakan as, “Nan Ukud Apudyus.”
14 Ad sa'ad chanan angsanay surchachud langit gway nasilsilupancha san por'as ja puta'ay luput gway nagwa san lino nangaabwhajucha san man'aputaa'ay awhaju, misu'su'nubcha an sija. 15 Kun lummagwa san tupo'na nan ispada gway nansupang nan tachomna gway sachi nan islongna san ailiili ad intuyajana chicha gway maid kun achakuna.*19:15 Mawhasa san 2:26-28 Nan i'amanna manusa sasan ayawhanna isun nan mausutan nan ubas san uussutan san ubas gway sachi nan mijalikan nan chusa kapu san amochay lingun Apudyus gway amod nan ayobhongana san losan. 16 Ad nilista san lagkoyloy gway silupna ja urpurna nan ngachan gway:
Ali gway nangatngatu sasan Ali ja Apu gway nangatngatu sasan Aappu
17 Sachi kun inila' nan osa anghel gway summisi'ad san sinag nan init kun impo'awna san losanay mammanu' gway asitatajap san yawhas gway manggwana, “Gwayyu ta maayus aju ad nangan aju san angsanay ma'an gway isakanan Apudyus! 18 Umali aju ta anonju nan lachag chanan ali, chanan papangat chanan surchachu, chanan napipigsa ma'akuwhat, chanan awhaju ja chanan nangaabwhaju, nan losanay taku gway chanan wha'on kus mudchachu ja mudchachu ancha nawhawha man gwinnu nangatuway taku.”
19 Gwot inila' chay ummuna a'oogjatay ajam gway lummosgwa san whaywhay ja chanan ali san luta ja chanan surchachucha gway naayuschaay manguwhat say nangaabwhaju san puta'ay awhaju ja sasay surchachuna. 20 Gwon nadpap chay a'oogjatay ajam ja nitapi chay wha'wha''on gway profeta gway nanggwa san mataakanay mangimatunan san sangun chay a'oogjatay ajam. Sachi nan nangallilawna sasan taku gway namer'aan san mer'an chay a'oogjatay ajam ja chachay nanchajaw san tagtagkuna. Ad sa'ad chay a'oogjatay ajam ja chay wha'wha''onay profeta, matattakuchaay nitoper san lohong gway kumilakilab san asupre. 21 Ad sa'ad chanan nahunanay surchachucha napapatoycha san ispada gway lummagwa san tupo' chay nangaabwhaju san puta'ay awhaju. Kun nantopokay nanghusug chanan mammanu'ay nanpo' san lachagcha.