11
Nan Achakun Apudyus Sasan IjIsrael
1 Anan nin nan uchumay manimuson, adja nilagwing Apudyus chanan takuna? Wha'on! Tan ijIsraela' kahos gway kana' Benjamin gway kana' Abraham. 2 Wha'on kus nilagwing Apudyus chanan takuna gway pinilina manipud san chamu. Jo'o achiju akammu nan anana san Ukud Apudyus san nalliliyan Elias an Apudyus san mipangkop sasan ijIsrael. 3 Anana, “Apu, intoycha chanan profetam, sa'ad chanan pupuuyan san ajamay chatun an si'a iwwa''icha kun ahusa' as nahunan ad whayugwoncha hosay otojon sa'on.”*11:3 Mawhasa san 1 Ar-Ari 19:1-18. 4 Gwon ngachan nan insungwhat Apudyus an sija? Anana, “Nangihunana' as pitu lihu gway taku' gway achi kun nanchajaw an Baal gway sinang'apudyus.”†11:4 Mawhasa san 1 Ar-Ari 19:18. 5 Ad isuna hos san sana chimpuway agwad chanan a'itay nahunan gway ijIsrael gway namati an Apudyus gway pinilina kapu san inawhayuna. 6 Ad nu kapu san inawhayuna nan namiliyana an chicha, pijaona anan wha'on kus kapu san whayuway inggwa'inggwacha. Tan sa'ad nu kapu san whayuway inggwa'inggwacha nan namiliyana an chicha, wha'on kus miwhilangay inawhayun Apudyus nan namiliyana an chicha.
7 Ad annaja nan pijaona anan chachay niwhaka. Sa'ad nan anaanapon eka chanan aachugwanay ijIsrael gway ininoncha miwhilang as ustu san mangilan Apudyus, achicha kun naaya gwon chanan pinilin Apudyus nan namachas. Ad sa'ad chanan uchumay ijIsrael impawhatun Apudyus nan somsomo'cha. 8 Napano'no'an san nilista Ukud Apudyus gway anana,
“Inggwan Apudyus chicha as achi kun ma'asomsomo'.
Sija nan ingkana san sana amachas na'uyap gway achicha kun ma'ailasin san ustu
ja amachas natuyong gway achicha kun magngor nan mipangkop an sija.”‡11:8 Mawhasa san Isaias 29:10; Deuteronomio 29:4.
9 Anan Dabid an Apudyus,
“Madpapcha otjan san ma'ayagyagsa'ancha
gway isun nan mammanu'ay na'na san ilug gwinnu ajamay na'na san whitu.
Ad nan mangwhanakana machusacha.
10 Humulingot otjan nan somsomo'cha tot maid maagwatancha.
Mapalikatancha otjan as maid pungpungna gway isun nan osa taku gway mawhi'ug ekay san amod nan chagson nan ochonna.Ӥ11:10 Mawhasa san Salmo 69:22-23.
11 Anan nin nan uchumon sa'ad san achin chanan ijIsrael namatiyan an Kristu, adja sachi nan misiyanancha an Apudyus as ingkaingkana? Wha'on kun! Kapu san achicha namatiyan sachi nan natakuwan chanan wha'on kus ijIsrael tot maapos chanan ijIsrael ad namaticha hos. 12 Sa'ad tan hummersu chanan ijIsrael ja nan'uyangcha san pammati sachi nan nangwhanag as amochay hummayugwan chanan wha'on kus ijIsrael. Ad amod pay whayu nu gwachagwad nan whilang chanan ijIsrael gway mamati.
Nan Matakuwan Chanan Wha'on Kus IjIsrael
13 San sana cha'ajuway wha'on kus ijIsrael nan mangiwhaga' an chana. Sija nan sa'ad tan apostola' sasan wha'on kus ijIsrael, ipatog'us amod nannaja mansuyuwa' an cha'aju 14 tot tugwakay maapos chanan ailija'ay Hudyu ad tinakun Apudyus nan uchum an chicha. 15 Tan sa'ad nan nallagwingan Apudyus san aachugwan sasan ailija' sachi nan na'ahubuyunana san angsanay taku san luhung. Ad nan ma'gwa nu agwaton Apudyus chichaay ijIsrael, mijalig san matakuwan chanan natoy.
16 Nu nichatun an Apudyus nan chamuway pi''in nan tinapay, nan singhu'oray tinapay nichatun ahos an Apudyus. Ad nu nichatun an Apudyus nan lamut nan aju, nichatun ahos chanan pangana. Ad isuna hos gway sa'ad tan niwhilangay ugwan Apudyus chanan nerpugwan chanan ijIsrael, nan kana'cha niwhilangay ugwana hos. 17 Mijalig ahos chanan ijIsrael san ammana nimuya aju gway olibu ad sa'ad chanan achi kun namati isucha nan uchumay pangana naspa'. Ad sa'ad as cha'ajuway wha'on kus ijIsrael, mijalig aju san aju gway olibu gway maag ekay tummuhu. Ad nitapi aju ma'augwa san whayuway atchon Apudyus an chichaay ijIsrael gway isuju chanan panga gway nisugtup san aju gway ammana nimuya. 18 Achiju whanwhaniton chanan ijIsrael gway nilagwing Apudyus gway amachas naspa'ay panga. Somsom'onjuway wha'on kus cha'aju nan mamijag san lamut gwon lamut nan mamijag an cha'aju gway panga. 19 Tugwakay agwad manggwana an cha'ajuwon, “Istay manchi naspa' chanan panga tot mawhalin amiyayay misugtup.” 20 Tuttuwa chi. Kapu san achicha namatiyan naspa'cha gwon as cha'aju kapu san pammatiju inainnugwanju. Achi aju mamangpangas gwon manannad aju. 21 Tan nu maid kakan Apudyus gway nanpa' sasan ijIsrael gway isun chanan sikud gway panga, kanuya ajuman as achina sopa'on. 22 Sija nan maila ta'u nan inawhayun Apudyus uyay ahos nan amod gway manggwana mangu'um. Amod na manggwana mangu'um sasan mangijakajay mamati an sija gwon naanus as sija an cha'aju nu ainnugwanju mamatiyay whayu' Apudyus an cha'aju. Tan nu wha'on, sa'ad ahos as cha'aju masopya' aju. 23 Ad sa'ad ahos chanan ijIsrael nu mangwhalwhaliwcha ja mamaticha, misugtupcha san sikuchay agwachancha. Tan mawhalinay asin Apudyus isugtup chicha. 24 Tan sa'ad as cha'aju gway mijalig san pangan nan maag ekay tummuhu olibu gway naspa', nisugtup aju san ammana nimuyaay olibu ta'on nu achi mawhalin. Chanan ijIsrael nan isun nan nimuya olibu ad amamod mallasu nan mangisugtupan Apudyus sannachaja naspa' gway panga san nerpugwancha olibu.
Nan Achakun Apudyus San Losan
25 Susunud, anna nan achi kun nipaakammu atuttugwaan san nugwan gway whayugwo'ay maakammugwanju ta achiju ananon nalaing aju sasan ijIsrael. Nan achi mammingatan chanan ijIsrael wha'on kus sissija gwon asi ekay mampatingka nu gumachagwad nan whilang chanan wha'on kus ijIsrael gway mamati. 26 Ad sachi ad, sa'ad nan losanay ijIsrael matakucha. Tan nilista san Ukud Apudyus gway anana,
“Merpud Sion*11:26 Mawhasa san Roma 9:33 nan manaku sasan taku
ad inaanna nan inergwing chanan kana' Jacob.
27 Ad annaja nan tuyag'u an chicha
gway ligwata' nan whersucha.Ӡ11:27 Mawhasa san Isaias 59:20-21; Jeremias 31:31, 34.
28 Mipangkop ad san mallagwingan chanan ijIsrael san Whayuway Chamag, miwhilangchaay ahursun Apudyus gway sachi nan hummayugwanjuway wha'on kus ijIsrael. Mipangkop ad san namiliyan Apudyus an chicha sissija ipatpatogna chicha kapu san ingwhawhagkana sasan aammacha. 29 Tan achin ku Apudyus whawhagwiyon nan namiliyana an chicha ja nan mangatchana san whayu. 30 Sa'ad as cha'aju, achi aju kun chinumngor san agwi an Apudyus gwon san sana pachasonju nan achakun Apudyus an cha'aju kapu san achin ku chanan ijIsrael chinumngoyan an sija. 31 Ad isuna hos nan ma'gwa an chichaay ijIsrael gway ta'on nu achicha kun mamati san sana kapu san nangachakugwan Apudyus an cha'aju, humu'nag nan chimpuway achakugwan ahos Apudyus chicha nu mamaticha. 32 Tan achin ku Apudyus whinijangan nan losanay taku gway achicha kun matingngil nan longagchaay humersuwhersu tot papachasna an chicha nan achakuna.
Apudyus Nan Machaychajaw
33 Ka amod ekay achaku, silib ancha inalaing Apudyus! Maid kun ma'aipaagwat san simsimmo'na oon ja maid kun ma'aagwat nu kaman inggwana nan inggwana! 34 Tan nan nilistaay Ukud Apudyus anana,
“Ngachan nan nangakammu san somsomo' Apudyus
gwinnu ngachan nan nangngachan manudtuchu an sija?”‡11:34 Mawhasa san Isaias 40:13.
35 “Gwinnu ngachan nan agwad naatodna an Apudyus
ta suwhalitan Apudyus as sija?Ӥ11:35 Mawhasa san Job 41:11.
36 Tan as Apudyus sija nan nanggwa san losan ja kapu an sija mantuttuttuyuy nan losanay inggwana. Inggwana nan losan as michajagwana. Machaychajaw as sija as ingkaingkana. Amen.
*11:3 11:3 Mawhasa san 1 Ar-Ari 19:1-18.
†11:4 11:4 Mawhasa san 1 Ar-Ari 19:18.
‡11:8 11:8 Mawhasa san Isaias 29:10; Deuteronomio 29:4.
§11:10 11:10 Mawhasa san Salmo 69:22-23.
*11:26 11:26 Mawhasa san Roma 9:33
†11:27 11:27 Mawhasa san Isaias 59:20-21; Jeremias 31:31, 34.
‡11:34 11:34 Mawhasa san Isaias 40:13.
§11:35 11:35 Mawhasa san Job 41:11.