1 Pii dakeme namwa rangeme dee lakandelyamano ingyuo pelyase? Wambu lapo pepa pase minyuo paeyo karaminyi doko wai soo namwa pepa pyao nakama jeramase? Panda nakamame namwa pyao jeramiyokose? 2 Nakamame namwa mona retelyaminyi dokona akipamo mee pepa pase minyuo papyuo kararamase? Wambu nakamana yulu kandapala namwana lao kapa serami. 3 Koraisa baa range pepa dake pyapala namwa keta minyuo pupwa leya doko silyamano. Pyanjilyi ipwange dokome Mosese kana dolapo nyiya dokona makande minyuo pyasi pali nalyamo. Anatu lete karengena Imambu dokome isa wambunya mona anda dokona pyao reteya.

4 Yesu Koraisa keta namwa Anatu kapa ingingi lao poraiyuo suu pyapala pii doo letamano. 5 Namwa yulu doko mora pisipyamopa range pirama ingya nalyamo. Yulu pilyamano porai renge doko Anatumi jilyamo. 6 Anatu baame iki namwa kana minyuo lenge enenge kapa pyuo inginyi pyambuya. Kana minyuo lenge enenge doko pepana pyasi lowa daa. Imambu dokome pingi. Lowa pyasi palamo dokome kumungi renge sipuro epenge. Ipyamopape Imambu dokome lete renge minyuo epenge.

7 Anatumi Lowa doko kana dolapona pyao retapala Mosese maiyamo dokopa banya yanga paupau lenge renge doko Mosesena lenge kambu dokona yanganyi peeya. Dokome lenge aumiyasa Mosesena lenge kambu kandalana saka nayami. Enakana dokopa Mosesena lenge kambu mee ingiya. Lowana yulumi kumungi renge minyuo epeya doko yanga paupau lengende epeyali 8 Imambunya yulu doko kamame yanga paupau lengende epeyali. 9 Mosesena Lowa dokome wambu koo piyami dokona kata lasaka piya. Imambu dokome wambu rolae pilyaminyi dupwa yanganyi nembelyamo. Banya yanga paupau lenge doko ama wakasa andake. 10 Epapu dakepa yanga paupau andake letamo yanga paupau wambo lao kareyamo doko nyuo yambe pyapyamo pana nalyamo doko kandelyamano. 11 Lowa doko ee kana mendasipa iki paleyamopape yanga paupau lao epeya. Doko suu pyao Imambunya karalu karara doko ama yanga paupau wakasa ingyuo lapyali.

12 Namwame doko angi pira lao suu pyapala dokome paka nalyamano. 13 Namwa Mosese dopale daa. Moseseme Isaraele wambumi yanga paupau lenge kakondelyamo lao kanda nana lao lenge kambu yambe piya. 14 Isaraele wambu dupwana suu pingi pali naya. Nakamame yuu gii dokona piso epo epapu dakepa kana minyuo pii leyamo buku wambarae yaka lenge dokopa nakamana suu pingi doko yambe pilyamosa angingyuo sepa nange. Wambu mendeme Yesu kando nyingi dokopa iki wambu dokona suu pingi doko yambe pyakami nange. 15 Epapu Mosesena Lowa yaka laminyipa nakamana suu pingi yambe pilyamo. 16 Anatunya pii poo pyasi dokona lao, Moseseme Kamongo mona kapu kyuo maiyamopa banya lenge pendakae leya. 17 Kamongo lapu doko Imambu dokona lapusa pilyamo. Kamongona Imambu doko wambu keta eparamopa manda rao kararama. 18 Dokona lao namwana lenge kambu dupwana mende yambe pyaa napyamopa karamano dokome Kamongona yanga paupau lenge doko nyepala namwa yanga paupau lao baa yale manda manjinyi pyambulyamo. Yanga paupau lenge jilyamo Kamongo doko baa Imambu.