KOLOSI
Yuu Esia Maina dokona yuu taone Kolosi yuu Epesasa neta pyakaenge dorena singi dokona Elyambu Pingi wambu dupwa Poleme pepa pase dake pyao maiya. Kolosi dokona waili pii keyange doko wambo Poleme wara pii naya. Wara pii nayamopape baa wambu dupwana lao suu pyapala nyisapuli yaka lao Epesasa wambu lapo nakama nyisala pena leya. Yuu Esia dokona yuu lapo Orome gapomaneme isiyamo dupwana Epesasa taone mupwa siya. Kolosi Elyambu Pingi dokona akali lapo pii kyai lao karaminyi leyaminyi doko Poleme siya. Mana lenge dupwame dopa lao, Nakamame Anatu angi kando nyerami lao imambu wakale lapope kamongo lapope lakandarami ingilyamo, leyami. Dee mende opetae lao, Nakama yanenge kalomarami dee nengepe yulu wakale lapope dupwana lowa lasi palamo dupwa minyaro kararami, leyami.
Pole baame Anatunya waili pii keyange dokome kyambo mana pii kyai dupwa lao anamasi minyuo isa nembalana suu pyapala pepa dake piya. Renge angi palyuo doko Yesu Koraisa baa rangeme wambu kapa lete wai pyao nyera ingilyamo. Wambu dupwa mana pii kyai dupwa kimbu moko minyuo kararami ramo Yesu Koraisa yaki nyeramisa pira, Poleme lao piya. Anatumi Yesu Koraisa keta yakepe yuupi bange peparae singipi dupwa wasiya. Wasapala baame yuu muu peparaena rekya lasi siyamo doko Koraisa keta dee nyuo mendakiya. Wambu dupwa Yesu Koraisapa pakao karo lete wai pyao nyinginya renge nyerami ingilyamo. Anatumi Yesu Koraisa keta yulu ama andake wakasa piyamosa Kurisene wambu dupwa apa pyuo pii lao nenge rambo lao kararami lao Poleme pyao reteya.
Tikikasa baame Polena pepa pase Kolosi wambu dupwa minyakamyuo peya. Peyamopa akali mende role pyao peyambi doko Onisimasa lenge akali mendena yulu pyakamingi akali. Akali Onisimasana lao Poleme pepa pase mende akali Pilimone pyao maiya.
Buku Dakena Pii Palamo Dusipa
1. Pii kanda soo leya 1:1-8
2. Yesu Koraisa baa apiyakale dee banya yulu dokona letamo 1:9—2:19
3. Yesu Koraisa keta letena renge enenge nyilyamano 2:20—4:6
4. Pii lao oto leya 4:7-18
1
Anatumi masiyamuli pyuo namba Pole Koraisa Yesunya aposele inginyi pyambuyamopa namba namwana yangonge Timotipame nakama Kolosi dokona Anatunya wambu namwana yangonemoo ingyuo Koraisa keta baa maso minyuo karaminyi dokona pepa peyakalyambano. Namwana Rakane Anatumi nakama keta mona keyange palyuo ipingi rengepe mona kyuu lao singi rengepe retakana lao yako letambano.
Anatu Kando Sangyu Lao Loma Siya
3-4 Nakama Koraisa Yesu kapa ingingi lao suu pyapala Anatunya wambu yango mona maiyuo karaminyi doko soo karamano. Renge dokona namwana Kamongo Yesu Koraisana Rakane Anatu dokona kaeya nao ateŋa letamano. Anatunya waili pii keyange rolae doko kanda soo sepeyaminyipa keyange keta palirami doko soo gisiyami. Yake pandana bange keyange sakalyamo dokona mona kare kare karapala Anatu kapa ingingi lao suu pyapala wambu yango mona reto karaminyi. Waili pii keyange nakama siyami dokoko epapu yuu muu dupwana raeyo pelyamo. Anatumi mona keyange palyuo ipingi renge doko angi soo nyepeyaminyi mange dokopa piso epo pii doko nakama keta andapala jingi ingyuo lyingi. Nakama keta jingi lyiya dopako pyuo wambu peparae keta epapu jingi lyilyamo. Akali Ipaporasa namwa role pyao Koraisana yulu doko namwa nyiso pyuokondali pyuo karamo. Baa wamba nakama mana lamaiyuo karapala epeya. Imambu nakama nyisiyamopa wambu yango mona retelyaminyi doko namwa langiya.
Renge dokona sepala dokopa piso epo yuu peparae kaeya nao ateŋa lakalyamano. Nakama mona angi palipala imambunya yulu dupwa soo gisapala dokome 10 Anatu nakama pimili lao suu pilyamo dupwa kando nyeparami dokona loma sakao petamano. Kando nyepala dokopa Kamongome nakama yulu pimili lao rae mairali dupwa pyuo kararami. Nakama Anatunya yulu dupwa soo nyepala yulu keyange doko jingi keyange lyingi dopale pyuo kararami. 11 Dokonako ingyuo banya porainya renge wakasa dokome nakama porainyi pyambwaramopa randa malu eparamo dokopa mona kuki palyuo rae maiyuo kararami. 12 Anatumi banya wambu dupwame nyerami lao banya sii pingi panda dorena bange keyange retakaya. Nakama banya wambu ingyuo petaminyi dupwa role pyao mokwa soo nyerami lao kata wapwakaya. Dokona Rakane kando sangyu lao karalapape. 13 Baame namwa iminjinginya kareyama dokona neta nyepala banya Ikinyingi mona retenge doko keta namwa banya isingi panda dorena kareya. 14 Baako keta namwa kiiramo nyepala namwana koo dupwa nyuo kame sakaya.
Koraisa Baa Peparaena Kyawa Ingyuo Karamo Pii Doko
15 Namwa Anatu kapa kanda nange dokona
Koraisa baa Anatu yale isa komba pyao karamo
baame wasiyamo dupwa peparaena mupwa ingyuo karamo.
16 Baa ketako yake bange dee
isa bange dupwapeko wasisi silyamo.
Bange kandenge dee mendeme kanda nangepe
Imambu dupwape kiŋi dupwape
kamongo dupwape gapomane dupwape
baa ketako pyuo ingiyamopa banyako silyamo.
17 Bange peparae ene wasapa nayamopa
baa wambo ingyuo karalu karenge.
Dee baameko bange peparae serali panda dupwana reto
simuo pyao minyaro karamo.
18 Elyambu Pingi doko banya yongo ingingi.
Baa dokona akali kyawa ingyuo karamo.
Banya yongo dokoko baa dokona piso renge kuiyuo epeya.
Kumapala sipurao lete parami dupwana
baa kanda soo lete epeya.
Epo baa peparaena mupwa ingyapala karamo.
19 Anatumi suu piyamuli pyuo banya Ikinyingi Yesu
baa range ingyuo karengenyili pyuo
baa keta maralyiyamopa isa komba pyao nyiya.
20 Anatumi yuu muu peparaena
rekya lasi siyamo doko banya Ikinyingi keta dee nyuo mendakiya.
Yesumi isa mamandona ranjama kulimbuo kumuo paleya
dokome Anatumi yake yuupi peparae
baa keta sukusa nyiya.
Anatumi Nakama Kando Nyiyamo
Pii Doko
21 Nakama suu pingi kwaenge dokome ene alembole yulu koo pyuo kareyaminyipa Anatupa yanda pimwaiyuo rekya lao wakale ingyuo kareyami. 22 Kareyaminyipape Koraisame isa wambunya yanenge nyepala kumuo jiyasa Anatumi nakama pipya kando nyiya. Kando nyiyamo dokome nakama banya lenge kambu dorena koo keta pali nao yapasi keyange ingyuo kararami. 23 Dokona lao nakamana kapa ingingi lao suu pingi doko yake nyii napala poraiyuo karalapape. Yesu epapala keyange pyakara lao waili pii keyange doko yake nyii nao mona kare kare karalapape. Pii doko wambu yuu muu dupwana peparae silyaminyi. Doko namba Poleme pii dokonako kendemande ingyuo lao karo.
Pole Baa Elyambu Pingi Wambu
Dupwa Nyisiya
24 Namba nakama nyisapusa randa nyilyu dokome rae maiyuo nyilyu. Elyambu Pingi doko Koraisana yongo ingilyamo dokona lao baa randa nyiya. Randa nyiyamo pinjingi koko pyasi doko namba nyilyu. 25 Anatumi banya pii peparae langirono dokona lao namba Elyambu Pinginya isingi akali lao rombo palyiya. 26 Pii doko kai wamba yalu pisi singi doko epapunya banya wambu dupwa keta panasi silyamo. 27 Anatumi banya suu pingi neta renge yalu pisi doko, banya wambupi Juu daa rara wakale dupwape keta nyuo panara lao suu piya. Pii wambo yalu piyamopa see nayami doko Koraisa nakama keta palamo. Dokome Anatunya yanga paupau lenge panda nyerami. 28 Dokona namwa wambu peparae Koraisana kingi boo pyao lao singi renge wakale wakale dupwa mana lamailyamano. Dokome nakama mendaki mendaki lao mona palenge wambu ingyuo Yesupa pakao Anatunya lenge kambu dorena kararami. 29 Yulu doo iki pinya lao suu pyapala Koraisana porainya renge dokome namba paka pyao sipyamo yulu andake doko randa nao pyuo karo.