ESATA
Akeyaꞌvilaga Pesiya kotegamo maiꞌnaya vayaꞌai ala kini vekaꞌapimo Sekisiꞌa maiꞌniye. Kini vekamo Sekisiꞌa aꞌamo ha faino ataleteno Esataꞌmo Yu aꞌmafaꞌnemo lekana paino ateꞌnigeno Kuvini a kanomo hamaleꞌniye. Esataꞌmo avuꞌamoꞌmo Motekaiꞌa yagaino ateꞌniye. Kini vekamo Sekisiꞌa mago vekamo hogote gamani vekamo maisiyafeꞌmo agiꞌamo Hemaniꞌa lekana paino ateꞌniye. Hemaniꞌa Motekaifeꞌmo alagi ohauꞌnigeno, Motekaiꞌe muki nofi vayaꞌaꞌeꞌmo naipeletiꞌmo apaisugeꞌa faligae, huno agesa afiꞌniye. Afiꞌniyaꞌmofeꞌmo Esataꞌa anauꞌamo Sekisifeꞌmo ani kavafeꞌmo ha paiꞌnigeno Sekisiꞌa, Hemaniꞌmo avalelitutapa posi yosaleꞌmo aneꞌmu aetapa asaigeno falino, huno hapa paiꞌniye. Esataꞌa vayaꞌamo hapa maeꞌnigeꞌa kame vayaꞌapiꞌeꞌmo kame huꞌa aeꞌa apaka seꞌnageno Motekaiꞌa Hemani aimuꞌyaleꞌmo maiꞌneno Yu vayaꞌaiteꞌmo alagepa huno yagaino apateꞌniye.
1
Kuvini a kanomo Vasitiꞌa kini vekamo Sekisi geꞌamo oꞌafiꞌniya gemae
1-2 Pesiya kotegamo Sekisiꞌa kini vekamo maiꞌniye. Agaemo Susa taonifiꞌmo gamani yafa lafi kegiꞌyafiꞌmo yagaino neꞌapateya siateꞌmo fai maiꞌnenoꞌaeꞌmo muki vayaꞌmo vani hataleti tuveti seveniꞌa polovenisifiꞌmo maiꞌnaya vayaꞌaiteꞌmo yagaino apateꞌnenoꞌaeꞌmo Itiya kotegatiꞌmo aepa faiteno uno Itiyopiya kotegaꞌeꞌmo yagaino apateꞌniye. Loleꞌe magoꞌe kafugamo kini vekamo maiꞌneno yagaino neꞌapatenoꞌaeꞌmo muki ala apaki vayaꞌmo muki kotega maiꞌnaya vayaꞌaifenagi aliꞌyaꞌamo neꞌaliya vayaꞌaifenagi gamani vayaꞌaifenagi huno alopa yagita huteno ge huꞌniye. Pesiya ami vayaꞌaifenagi Mitiya ami vayaꞌaifenagi yagaiꞌa neꞌapataya vayaꞌaifenagi ala vayaꞌaifenagi huno ge huꞌnigeꞌa eꞌa maiꞌnae. Ani neꞌyaꞌmo magoꞌe huno apamime apamime uꞌnigeꞌa sigisiꞌa kaimo neꞌa maiꞌnagenoꞌaeꞌmo ani kini vekamoꞌa muki noꞌafi konali yaꞌamogi kagemi yaꞌamogi muki alu ya alu yaꞌamogi huno alino apave liꞌniye. Ani yaꞌmo ageꞌnayana alagepa yaꞌmo haneꞌnigeno mago hogote yaꞌmo haneꞌnigeꞌa ageꞌnae.
Ani alopa neꞌyaꞌmo ago neꞌa hano hutagenoꞌaeꞌmo kini vekamoꞌa mago alu alopa neꞌyaꞌmo agaiꞌa no haopaꞌaleꞌmo lafi kegiꞌya yuꞌilagamo yagita huꞌniye. Ani neꞌyaꞌmo Susa taonifiꞌmo gamani yafa lafi kegiꞌyafiꞌmo muki maiꞌnaya vayaꞌmo ala vayanagi ina agufa vayanagi huꞌa eꞌa neꞌnae. Ani neꞌyaꞌmo neme neme uꞌa magoke salemo maiꞌnae. Ani neꞌyaꞌmo neꞌnaya haopaleꞌmo alagepa hiꞌyalamuꞌmo haneꞌniya haopaleꞌmo akeyaꞌvilaga vayaꞌmogimo haesa huge yaveyave huge oko huge huꞌniya yafaꞌe alaveꞌyogana agufa yafaꞌeꞌmo aliꞌa mopafiꞌmo kale kaeꞌa hiꞌyalamuꞌmo hu maleꞌnae. Ani neꞌyaꞌmo negefeꞌmo huꞌapaeꞌmo ani yateꞌmo yaveyave lavolavoletiꞌe oko lavolavoletiꞌeꞌmo asai maleteꞌa alagepa nofitetiꞌmo ki maleꞌnae. Vegovego siluva keteꞌmo lavolavomo asai maleteꞌa yafa posimo faiꞌa ateꞌnaya posileꞌmo nofi ki maleꞌnae. Ani neꞌyaꞌmo nesaya aupilaga yateꞌmo alagepa goli siamo malege alagepa siluva siamo malege huꞌa maleli uꞌeꞌa hu maleꞌnae. Vayaꞌmogimo aniꞌmo nesaya kapumo aeto agufaꞌe goli kapumo aliꞌnae. Kini vekamoꞌa asole nofi alagafati aniꞌmo alino ani vayaꞌmo lakino apamiꞌniye. Nofi alagafati aniꞌmo na magi kapumo lakita negaune, huꞌa huꞌnafi hapauꞌniya agufa ani kapumo lakiꞌa neꞌnae. Kini vekamoꞌa noꞌafiꞌmo aliꞌyaꞌamo neꞌaliya vayaꞌaeꞌmo, muki vayaꞌamogimo anifeꞌmo hapauꞌnisiyaꞌmoꞌmo kapuꞌapifiꞌmo aniꞌmo lakitapa apamiyo, huno hapa paiꞌniye. Ani afinaꞌmo Kuvini a kanomo Vasitiꞌa ina kava huno muki aꞌne anagaꞌagekeꞌmo kini vekamo nopiꞌmo alopa neꞌyaꞌmo nesayafeꞌmo yagita huno apateꞌnigeꞌa eꞌa neꞌnae.
10 Ani alopa neꞌyaꞌmo neꞌnaya afinaꞌmo napa seveni afinaꞌmo kini vekamoꞌa nofi alagafati aniꞌmo lusi aniꞌmo neteno aiseꞌamo negi maleꞌniye. Maleteno hogote vayaꞌmo noꞌafiꞌmo aliꞌyaꞌamo neꞌaliya vayaꞌmo seveniꞌa vayaꞌaifeꞌmo ge huꞌnigeꞌa eꞌnae. Apakiꞌapimo Mehumaniꞌagi Misitaꞌagi Hamonaꞌagi Mikitaꞌagi Amakitaꞌagi Setaꞌagi Kakasiꞌagi huꞌa maiꞌnae. 11 Kini vekamoꞌa, Kuvini a kanomo Vasitiꞌmo utapa avalelita eyo, huno hapa paiꞌniye. Ani Kuvini a kanomo Vasitiꞌmo egefeꞌmo, kuvini kakolitamo alino agenopaleꞌmo maleno aliteno eno, huno hapa paiꞌniye. Ani kuvini a kanomo alagepa agufamo haneꞌniya a kanomo maiꞌniyaꞌmofeꞌmo kini vekamoꞌa muki gamani vayaꞌe muki ani alopa neꞌyateꞌmo eꞌnaya vayaꞌmogiꞌeꞌmo kanale agufaꞌamo alinineno apavelisigeꞌa agesayafeꞌmo hauꞌniye. 12 Noꞌafiꞌmo aliꞌyaꞌamo neꞌaliya vayaꞌmogimo kini vekamoꞌa hapa paiꞌniya gemo uꞌa ha paiꞌnayaꞌmonanafa Kuvini a kanomo Vasitiꞌa oꞌafiꞌniye. Oꞌafiꞌnigeno ani gemo kini vekamoꞌa afitenoꞌaeꞌmo lusi kava huno ge neꞌnigeno aipamo leꞌniye. 13 Kini vekamoꞌa huꞌniya kavaꞌamo haneꞌniyana muki vayaꞌaiteꞌmo alagepa huno yagaino apatege keꞌaepa gemo afige huno maisiyafeꞌmo aipa agesamo aliꞌa api aiꞌa huꞌa atesaya vayaꞌaifeꞌmo ge huno apafi nekeya agufa kavaꞌmo haneꞌniye. Ani agufa kavaꞌamo haneꞌniyaꞌmofeꞌmo kuvini a kanomoꞌmo huꞌniya kavafeꞌmo ava gemo afitenoꞌaeꞌmo ani ageteꞌa afiꞌnaya vayaꞌaifeꞌmo keya aeno ge huꞌniye. 14 Ina kava huvo, huꞌa ha nepaiya vayaꞌai apakiꞌapimo Kasenaꞌagi Setaꞌagi Atimataꞌagi Tasisiꞌagi Melesiꞌagi Masenaꞌagi Memukaniꞌagi huꞌa maiꞌnae. Ani seveniꞌa vayaꞌmo Pesiya vayapatiꞌmo maige Mitiya vayapatiꞌmo maige huꞌa maiꞌneꞌa hogote gamani vayaꞌmo maiꞌnae. 15 Inagi agaemo ani vayaꞌaifeꞌmo ina ge huno hapa paiꞌniye. Kuvini a kanomo Vasitiꞌa nagaetegamo egefeꞌmo hisiya kavafeꞌmo noꞌnifiꞌmo aliꞌyaꞌnimo neꞌaliya vayaꞌmo aliꞌna apateꞌnogeꞌa uꞌa ha paiꞌnayaꞌmonanafa geꞌnimo ago amagino ataleꞌniye. Ani kavatefeꞌmo keꞌaepa gemoꞌmo na yane, huno huꞌniye. Lagaemo Kuvini ategamo na agufa kavaꞌmo hugune, huno apafi geꞌniye.
16 Inagi ala vekamo Memukaniꞌa kini vekaꞌe ha neꞌmaya gamani vayaꞌefeꞌmo ina ge huno hapa paiꞌniye. Kini vekae, huꞌna, afiyo. Kuvini a kanomo Vasitiꞌa kini vekamogalegageꞌmo ani agufa hosu kavaꞌmo osuꞌniyaꞌmonanafa agaemo muki gamani vayakalegaꞌe kagaemo muki yagaika neꞌapatana vayaꞌaitegaꞌeꞌmo ani agufa hosu kavaꞌmo huꞌniye. 17 Kagaemo muki haopalegamo yagaika neꞌapatana aꞌne anagaꞌmogimo kuvini a kanomoꞌmo huꞌniya kavafeꞌmo ava gemo afiteꞌapaeꞌmo ina ge huꞌa hugae. Kini vekamo Sekisiꞌa Kuvini a kanomo Vasitifeꞌmo, eno, huno ge huꞌniyaꞌmonanafa geꞌamo ago amagino ataleꞌniye, huꞌa hugae. 18 Ani gemo huteꞌa anauꞌapimogi geꞌapimo oꞌafisageꞌapaeꞌmo kaveta hugae. 19 Kini vekae, kahauꞌnisiyaꞌmoꞌmo mani agufa gemo huteka ge huka atalegeno muki vayaꞌaitegamo uneno hino. Vasitiꞌa halate magoꞌe huno eno oꞌnagegaiye. Ani agufa lokiya gemo huka Pesiya vayaꞌe Mitiya vayaꞌeꞌmo keꞌaepa geꞌapimo haneꞌniya mukufiꞌmo vayaꞌmogimo aeꞌa kalo paeꞌa oꞌatalesayafeꞌmo avoꞌmo kae malegeno haneno. Avoꞌmo kae maletesagekaeꞌmo Vasiti aimuꞌyaleꞌmo mago aeno aga seꞌnisiya a kanomo kuvini a kanomo maisiyafeꞌmo lekana paika ato. 20 Mani gemoꞌmo muki neꞌyagaina kotegamo aino atagu faeno uneno hisigeꞌapaeꞌmo muki aꞌne anagaꞌmogimo afiteꞌa anauꞌapimogi geꞌapimo afigae. Aꞌnemogimo apaki haneꞌniya anauꞌapimogi geꞌapiꞌe apaki ohaneꞌniya anauꞌapimogi geꞌapiꞌeꞌmo afaꞌa afigae, huno ha paiꞌniye.
21 Kini vekaꞌe muki neꞌyagaiya vayaꞌmogiꞌeꞌmo ani gemo afiteꞌapaeꞌmo ani geeꞌmo hapauꞌnigeno kini vekamoꞌa Memukaniꞌa huꞌniya gemo akame huꞌniye. 22 Inagi kini vekamoꞌa avoꞌmo kaeno atalegeno muki neꞌyagaiya kotegamo uneno huꞌniya gemo ina ge huno alu apake alu apakefatiꞌmo avoꞌmo kaenoꞌaeꞌmo, Vemogigeꞌmo afamo anagaꞌapileꞌmo yagaiꞌa apateyo, huno avoꞌmo kae maleꞌniye.