Labar Jigan gɛn Isa al‑Masi gɛn
Matiye
Kupm mɛtn taar taaɗjeki ɗoobm gɛn dooy Labar Jigan gɛn Isa al‑Masi gɛn Matiye
Taar jiga gɛn Isa al‑Masi kɛn Matiye raaŋin̰o se, naan̰ raaŋ jee al‑Masige tun Yaudge. Naaɗe Yaudge se ɓo jeel ɔk mɛtn Kitapm kɛn Raa dɔɔko ute jeege do dɔkin̰ se. Matiye taaɗ jeege tu ɔɔ Isa se, naan̰ ɓo debm kɛn utu Ꞌtɛɗn kaasn nakgen kɛn Kitapm Raa dɔɔko ute jeege do dɔkin̰a taaɗn se. Taa naan̰ se ɓo maakŋ taarin̰ kɛn naan̰ raaŋ se, daayum naan̰ lee tuun tɔl taar Kitapm Raa dɔɔko ute jeege do dɔkin̰ se maak ki. Kaaɗ kɛn Matiye raaŋo Labar Jigan gɛn Isan ese se, jee al‑Masigen Yaudge se, kꞋtuurɗe tuur naatn maakŋ ɓeege tun Yaudge lee tusn maak ki gɛn keem Raa. Naaɗe se lee tusu ɔɔ jee kɛn Yaudge ey se kic ɓo naaɗe took ɔkɗe ute naaɗe. Gɛn Matiye ki num, Isa ɓo mɛl kɛn lee dooy jeege ute tɔɔgin̰a do nakge tun kɛn Raa jen ro ki. Isa se taaɗɗen ɗoobm kiji kɛn naaɗe an jeel kɔkŋ ko taargen maakŋ Kitap kɛn Raa dɔɔko ute jeege do dɔkin̰ se. Isa se naan̰ ɓo al‑Masi kɛn Yaudge iŋg aak kaak kaamin̰ se. Kɛn naan̰ jaay taaɗɗen taa maakŋ Gaar Raa se, naan̰ ɗeekɗen ɔɔ: Raa se naan̰ ɓo gaarge ɔɔ naan̰ baagga kɔsn gaara do jeege tun do naaŋ ki ara. Maakŋ kitapin̰ ki se Matiye taaɗ mɛtn taar Isan dooy jeege ute taargen jɛrl jɛrl gɔtɔ kaam mii aan gɔɔ kɛn naan̰ dooy jeege do kɔs ki se (kon̰ 5‑7).
1
Mɛtjil Isa *al‑Masi
(Lk 3.23‑38)
1 Kɛse ɓo mɛtjil Isa al‑Masige. Naan̰ *goon Daud ɔɔ goon *Abraam.
2 Abraam ooj Isak, Isak ooj *Yakub ɔɔ Yakub ooj Juda ute gɛnaan̰gen gaabge*Gɛnaan̰gen gaabgen se ɓo kɛn ɓaaɗo tɛɗ taa ɓee gaan *Israɛlgen sik‑kaar‑dio..
3 Juda ɓo ooj Pɛrɛz ute Zɛra†Naaɗe se rɔŋgɔge. ɔɔ gaangen se Tamar ɓo kon̰ɗe.
Pɛrɛz ooj Esrom. Esrom ooj Aram.
4 Aram ooj Aminadab. Aminadab ooj Naason. Naason ooj Salmon.
5 Salmon ooj Booz ɔɔ ko Booz se ron̰ Raab.
Booz se ɓo ooj Obed ɔɔ ko Obed se ron̰ Rut.
6 Obed ooj Jɛsɛ. Jɛsɛ se ɓo ooj Gaar *Daud.
Daud se ɓo ooj Salomon do mɛnd Uri ki.
7 Salomon ooj Roboam. Roboam ooj Abiya. Abiya ooj Asa.
8 Asa ooj Yozapat. Yozapat ooj Yɔram. Yɔram ooj Ozias.
9 Ozias ooj Yɔtam. Yɔtam ooj Akaz. Akaz ooj Ɛzɛkias.
10 Ɛzɛkias ooj Manase. Manase ooj Amon. Amon ooj Jɔsias.
11 Jɔsias ooj Yekonia ute gɛnaan̰gen gaabge
ɔɔ kaaɗ kɛn se ɓo gaan *Israɛlge kꞋtɔs kꞋɓaanɗe ɓulu taa naaŋ Babilon ki‡Aak 2Gar 24.12‑16..
12 Kɛn naaɗe ɓaa aan Babilon ki se jaay ɓo,
Yekonia ooj Salatiɛl ɔɔ Salatiɛl ooj Zorobabɛl.
13 Zorobabɛl ooj Abiud. Abiud ooj Ɛliakim. Ɛliakim ooj Azor.
14 Azor ooj Sadok. Sadok ooj Akim. Akim ooj Ɛliud.
15 Ɛliud ooj Ɛliɛzɛr. Ɛliɛzɛr ooj Matan. Matan ooj Yakub.
16 Yakub ooj Yusup. Yusup se ɓo gaabm Mari ɔɔ Mari se ɓo ooj Isan kɛn kꞋdaŋin̰ al‑Masi se.
17 Mɛtjilɗegen iin̰ do Abraam ki bini aan do Daud ki se, aas mɛtjili sik‑kaar‑sɔɔ. Kɛn iin̰ do Daud ki bini kꞋtɔs kꞋɓaanɗen ɓulu taa naaŋ Babilon ki se, aas mɛtjili sik‑kaar‑sɔɔ. Kɛn naaɗe ɓaan Babilon ki jaay bini aan do al‑Masi ki se, kic ɓo aas mɛtjili sik‑kaar‑sɔɔ.
Koojn̰ Isa *al‑Masi
(Lk 2.1‑21)
18 Te ɗoobm gay jaay jꞋoojn̰ Isa al‑Masi: kon̰ Mari se mɛnd kɛɛsn Yusup, num kɛn naan̰ ɓaa te ron̰ ki ey sum ɓo, Mari tɛɗ mɛndkaama ute tɔɔgŋ *Nirl Salal. 19 Gaabm kɛɛsin̰ Yusup se, debm kɛn lee tɛɗ nakge te ɗoobin̰a ɔɔ je an̰ kɔɔɗn mɛtin̰ naan jeege tu eyo. Taa naan̰ se ɓo naan̰ je an̰ rɛsɛ taa nam Ꞌbooy taarɗe eyo.
20 Kaaɗ kɛn naan̰ utu iŋg saap saap do taar kɛn se, gaŋ *kɔɗn Mɛljege Raa maakŋ nin̰ ki se teec naanin̰ ki taaɗin̰ ɔɔ: «Yusup, naai se mɛtjil *Daud, ɔn̰te ɓeere Mari se ɔkin̰ Ꞌtɛɗn mɛndi, taa Mari se aam te Nirl Salal. 21 Naan̰ se utu Ꞌkoojn̰ goon gaaba ɔɔ goon se naai an̰ daŋ Isa§Ron̰ Isa je ɗeekŋ ɔɔ: Mɛljege aaj jeege., taa naan̰ ɓo debm utu kɔɔɗn do jeen̰ge maakŋ *kusin̰ ki.»
22 Nakgen paacn̰ tɛɗ se, taa taar Mɛljege Raa taaɗo do dɔkin̰ ute taar debm taaɗ taar teeco taar Raa ki ron̰ Ezayi se aanga ɗoobin̰ ki kɛn ɔɔ: 23 ꞋBooyki! Goon mɛnd kɛn gaaba ɓaa te ron̰ ki eyo, utu Ꞌtɛɗn mɛndkaama ɔɔ koojn̰ goono ɔɔ goon se jeege an̰ daŋ Emanuel.*Aak Eza 7.14. Ro Emanuel se je ɗeekŋ ɔɔ: *Raa ute naajege.
24 Kɛn Yusup jaay iin̰ maakŋ bin̰ ki se, naan̰ took taar kɔɗn Mɛljege Raa taaɗin̰o se. Gɔtn se, Mari se naan̰ ɔkin̰ tɛɗn mɛndin̰a. 25 Num gaŋ naan̰ baate ɓaa ron̰ ki bini Mari oojn̰ maak ki. Ɔɔ goon jꞋoojin̰ se, Yusup ɔndin̰ ron̰ Isa.