Prè̤dônyǎphú Tahe
Acts of the Apostles
Tè̤hébè Ré̤ Dố Nyě
Prè̤dônyǎphú dố Li Prè̤dônyǎphú akǔ yětahe nuôma ari-akyǎ ícû̌ plehyǎ ná Li Luka prè́. Liyě a rǎ hésoluô̌ pé̤ ǔ ná Jesǔ a khǒpacè̤̌ dố kalúlố tahenuô, Thè́ Sǎsè̌ Byacè zṳ̌ pé̤ èthǐ klyá phútě, a dônyǎ pasǐcuốluô̌ pé̤ ǔ ná Jesǔ a tè̤thè́krṳ̂̌mila ari-akyǎ rò a cáhtya dônyǎ dố “Vǐ̤ Jerusalem, Judaké̤, Samaria ké̤ rò a dônyǎpasǐ cuốtuố̤ dố hekhu tadû” (1:8) phútě nuôma, liyětôba atè̤rǎ hésoluô̌ pé̤ ǔ tè̤ritè̤kyǎ amuố̤klò̤́ ma yětahe hò́. Yěma Krístuphú cáhtya me̤ tè̤phyétè̤me̤ dố Judaphú tahe aklè̌ htuô̌rò Krístuphú a tè̤zṳ̂́tè̤nyá̤ yětahenuô, a cáhtya cuốnuô̌ lò̌hò́ dố Judaphú tahe aklè̌ hò́, rò a oè́htya ná oè́htya lò̌hò́ hekhu tôba hò́. Prè̤rǎli thè́zṳ̂́ dyéluô̌ tǎ̤te̤ pé̤ pó̤ prè̤hốli tahe ná Krístuphú yětahenuô, a kíré̤ me̤pyékyǎ Roma ahtyěaké̤ má̤to, htuô̌to Krístuphú a tè̤zṳ̂́tè̤nyá̤ yěnuô, a me̤lốbǎhtya pé̤ lò̌ prè́ Judaphú tahe a tè̤cò́bucò́bè̌ prè́.
Ǔ dônyǎ Jesǔ a tè̤thè́krṳ̂̌mila rò a luô̌cuốpasǐ lyá̤htya ná lyá̤htya, htuô̌to Prè̤dônyǎphú tahe cuố me̤-ohtwǒhtya pé̤ ǔ prè̤zṳ̂́etè̤plò́mṳ tahe yěnuô, li yětôba rǎluô̌ pé̤ tè̤ritè̤kyǎ a khǎshyékhǎrya̤ a khǎlé̤khǎbya thuô̌pho. Yěthuô̌cô ma kryá꤮ maǐtěhérò, (1) Jesǔ ka̤ kahtya htuô̌ dố mò́khu rò Krístuphú a tè̤cò́bucò́bè̌ cáhtya duhtyalyá̤htya dố vǐ̤ Jerusalem akǔ. (2) Èthǐ cuốlě me̤ lyá̤ htya tuố̤dố Palestine ké̤ rò (3) èthǐ cuốlě me̤ plehyǎ tavǐtava̤ tuố̤ lahyǎ dố Mèditarinean htyěòdu akhǎshyé rò me̤ cuốtuố̤ lahyǎ dố Romaké̤.
Li Prè̤dônyǎphú a tè̤phyétè̤me̤ dố a luô̌dulố ma má̤hò́ Thè́ Sǎsè̌ me̤tè̤ yěnuô hò́. Bí pwè̌ dố ǔ è́ ná Pentecosto bè rò ǔ pwè̌ dố vǐ̤ Jerusalem akǔ nuôtônyě akhè̌nuô, Thè́ Sǎsè̌ Byacè o ná a taryěshyosò̌ rò a hyǎlya̤ dố prè̤zṳ̂́etè̤phú nuôtahe alo̤ rò li yětôba héso lò̌plǐ ná Thè́ Sǎsè̌ Byacè zṳ̌klyázṳ̌klǒ, dyéhè̌dyére prè̤zṳ̂́etè̤ plò́mṳphú tahe ná prè̤zṳ̂́etè̤plò́mṳ a khuklò́dukhusuhtǔ tahe. Krístuphú tahe a tè̤hésodônyǎ tahe nuôma apro̤prya̤ shyosò̌ nyacò́. Tè̤me̤htwǒhtya ané̤ tôcô htuô̌ tôcô dố Li Prè̤dônyǎphú akǔ yětahe nuôma pè̤ myáhtye ná tè̤pro̤prya̤ shyosò̌ yětahenuô a o dố prè̤zṳ̂́enyá̤etè̤ tahe a tè̤ohtwǒprè̤ tahe akǔ, ná prè̤zṳ̂́etè̤ plò́mṳphú tahe a tè̤bò́thyóbò́lǎ ní̤ lǔ akǔ yěnuôprè́.
Tè̤hébè tôtó̤ ná tôtó̤
Byacè Jesǔ a tè̤mekyǎngó̤ dố khyělố ná a tè̤ò́lya̤. 1:1-14
Kayǎ dố a htya Juda khǎlé̤ 1:15-26
Tè̤cuố dônyǎluô̌ pé̤ ǔ dố vǐ̤ Jerusalem akǔ 2:1-8:3
Tè̤cuố dônyǎluô̌ pé̤ ǔ dố Judaké̤ ná Samaria ké̤ 8:4-12:25
Paulu a tè̤phyétè̤me̤ 13:1-28:31
A. Htelě cuốme̤ Cò́marya a tè̤phyétè̤me̤ aré̤lố tôphuố 13:1-14:28
B. Okúokyá myáhtye tǎ̤sû lǔ dố vǐ̤ Jerusalem akǔ 15:1-35
C. Cuố me̤ Cò́marya a tè̤phyétè̤me̤ nyě̤phuốtôphuố 15:36-18:22
D. Cuốme̤ Cò́marya a tè̤phyétè̤me̤ thuô̌phuốtôphuố 18:23-21:16
E. Ǔ dò́o Paulu dố htò̌kǔ dố vǐ̤ Jerusalem ná vǐ̤ Caesarea ná vǐ̤ Roma tahe avǐ̤kǔ 21:17-28:31
1
1 Thárádu Theophilo, cáhtya bí Byacè Jesǔ me̤ Cò́marya* 1:1 Cò́phrya atè̤me̤ nuôtônyě rò a tuố̤dố Cò́marya è́ka̤ kahtya lǔ nuôtônyě ari-akyǎ ná a tè̤ithyóithya lò̌꤮ plǐ tahenuô vǎ rǎmárǎdyǎ htuô̌lò̌hò́ dố li aré̤lố nuôtôba akǔ hò́. 2 Bí ǔ è́ka̤ kahtya tyahí è dố mò́khu híto nuô, dố Thè́ Sǎsè̌ Byacè a tè̤pro̤tè̤prya̤ akhu-akhyěrò a mekyǎ a Prè̤dônyǎphú dố a nwóhtya htuô̌hò́ lǔ nuôtahe ná èthǐ ki bè me̤tè̤ tahe ari-akyǎ. 3 A khyáthyěhtuô̌ ané̤ rò a ihtòhtwǒprè̤ ka̤khyě dố tè̤thyě htuô̌rò dốkhyě anyě lwǐ̤shyě akǔnuô, a dyéluô̌ pé̤ ané̤ ná a khǒpacè̤̌ tahe è́phuốlǎ, htuô̌rò a hésodônyǎ pé̤ èthǐ ná Cò́marya ahtyěaké̤ ari-akyǎ. A khǒpacè̤̌ tahe myáhtye è rò athè́plò rare pǎ lahyǎ to. Èthǐ zṳ̂́e sǎprè̤́nyacè̌ cò́ ná a htwǒprè̤ má̤lakǒ cò́. 4 Tôphuốkhè̌ bí a eǒ tố̤kuô̌ ná a khǒpacè̤̌ yětahe akhè̌nuô, a mekyǎ èthǐ, “Htecuốkyǎ tǎ lahyǎ hí dố Jerusalem vǐ̤yě akǔnuô tǎ hímé̤. Opò̤́tadû lahyǎ bínuô tuố̤dố thǐ ní̤bè shyězṳ́ dố vǎ héso-one htuô̌hò́ thǐ ná vǎphè̌ ò́lya̤ dố a ki dyé thǐ pǎnuô ní꤮.” 5 Htuô̌to a hépó̤ èthǐ, “Giovanni plwǒ pé̤ ǔ ná htyě, manárò nyě̤tyato pǎnuô ǔ ki plwǒ pé̤ thǐ ná Thè́ Sǎsè̌ Byacè pǎ.”
Ǔ È́ka̤ Kahtyakyǎ Jesǔ Dố Mò́khu
6 Bí Prè̤dônyǎphú tahe hyǎ myáhtye tǎ̤sû khyěthyá lǔ dố Jesǔ o akhè̌nuô, a sudyǎ Jesǔ, “Byacè, khǒnyá̤yěma shuốkhè̌ bèhò́ dố nè̤ kíré̤ dyéka̤khyě hò́ Israelphú tahe ahtyěké̤ nuô hò́ è̌?”
7 Rò Jesǔ hésû èthǐ, “Tè̤shuốtè̤khè̌ ná mò̤́nyěmò̤́thè̌ tahe nuôma a htwǒhtyadû ná phè̌ a taryěshyosò̌ prè́. A ki htwǒhtya bíkhè̌tě pǎ nuôma, thǐ lo thè́gně má̤to. 8 Manárò bí Thè́ Sǎsè̌ Byacè hyǎlya̤hò́ dố thǐlo̤ pǎ akhè̌nuô, thǐ ki lốbǎ ná tè̤shyotè̤sò̌ pǎ rò thǐ ki htwǒhtya pé̤ vǎ prè̤khyáthè́ tahe dố vǐ̤ Jerusalem akǔ, ná Juda tôké̤꤮ lè̤̌, ná Samaria ké̤ htuô̌to a ki tuố̤ cò́dố hekhusǐba lò̌ cò́ pǎ,” a héphúnuô.
9 Jesǔ hébè htuô̌rò bí a khǒpacè̤̌ tahe tṳ́htyamyá è akhè̌nuô, Cò́marya è́ka̤ kahtyakyǎ lǔ dố mò́khu. Ò́luố̤ tôba kuô̌bíkyǎ lǔ rò èthǐ myáhtye pǎ lǔ to.
10 Bí èthǐ tṳ́htya sǒtapa̤ pǎ dố mò́lè̤̌ akhè̌nuô, kayǎthè́nyě̤ kû̌thyání̤ hyeca̤bǔ rò hyǎokahtò htyaluô̌khyé pé̤ dố èthǐ akhǎshyé. 11 Rò a hé èthǐ, “Galileaphú thǐ꤮ thǐ cuố ihtòo tṳ́htya lahyǎ dố mò́lè̤̌ bíyě me̤tě? Jesǔ dố thǐ myáhtye ǔ è́ka̤ kahtyakyǎ è dố mò́khu yětôprè̤nuô a ki hyǎlya̤ thyá khyěthyá phú thǐ myáhtye a ka̤kahtya khǒnyá̤yěnuô pǎ.” 12 Htuô̌rò a khǒpacè̤̌ tahe o dố Oliva sokhu rò a ka̤khyě khyěthyá lahyǎ dố vǐ̤ Jerusalem. Vǐ̤ Jerusalem yěnuôma a oye̤ ná soyě aklǐ zè̤thuô̌thyó ná shyéthuô̌thyó prè́. 13 Èthǐ ka̤tuố̤ dố vǐ̤ Jerusalem akǔ rò a cuốhtyanuô̌ dố hi dố èthǐ lé̤cuốokuố ní̤dyé taplô̤taplyáphú yěnuôtômě dố akhunuô tôtó̤. Rò èthǐ yětahema kryá꤮ ǔpě hérò Petru, Giovanni, Jakomo, Andrea, Philipu, Thomazo, Bartholomeo, Matteo, Alphaeo aphúkhǔ Jakomo, Simonè dố a mo̤ ní̤dyé ahtyěaké̤ yětôprè̤ ná Jakomo aphúkhǔ Juda thǐtahe prè́. 14 Èthǐ yětahenuô a hyǎ myáhtye tǎ̤sû tǎ̤plò́ tamǒmǒ ná prè̤mò dố aruôtahe ná Jesǔ amuố̤ Maria ná Jesǔ a puố̤prè̤khǔ tahe rò èthǐ kwǐcò́bè̌ ró̤lò̌ lǔ bínuô.
Nwóhtya Kayǎ Dố A Tǒhtya Juda Akhǎlé̤
15 Tônyěkhè̌nuô, prè̤zṳ̂́etè̤phú dố a phû꤮ o aprè̤ tôzè̤nyě̤shyě yěnuô a hyǎ okúokyá lǔ. 16 Rò Petru ihtòhé, “Puố̤vyá̤ thǐ꤮, lisǎsè̌ héone htuô̌hò́ Juda dố a zṳ̌ pé̤ ǔ klyá rò a nò̌pṳ̂́ ǔ ná Jesǔ yě ari-akyǎ. Rò Thè́ Sǎsè̌ Byacè nò̌hébè Khwí Davi ná èrièkyǎ yětahe nuôma a tǒbè lốhtyabǎhtya nyǎ prè́. 17 È ma a otố̤nò́kuô̌ dố pè̤ aplò́amṳkǔ tôprè̤ rò ǔ nwóhtya kuô̌ è dố a ki me̤tố̤kuô̌ tè̤ ná pè̤.”
18 (Rû̌ dố Juda me̤ní̤ dố tè̤mǔmyá̤ricyá̤ akǔ yěnuô a ipri̤ ná prè́ tôlé̤ rò a latǎ̤thyě hò́pò̤́phè́ dyé bínuô rò aphuô̌aprǎ̤ tahe tǎ̤hte lò̌. 19 Kayǎ o dố vǐ̤ Jerusalem tahe ní̤huô̌ lahyǎ tè̤me̤-ané̤ yě rò a è́ lahyǎ khǎlé̤ yětôpho amwi̤ ná angó̤ ní̤dû. Rò èthǐ è́ ná “Akeldama,” angó̤lasá ma a hé ná “Tè̤thwi ké̤lá̤khu”)
20 “Ǔ rǎo dố Li Htuthè́htya akǔnuô rò a hé,
‘Ahi ki oryá̤kyǎ dû pǎ ní꤮ ǔ ki nuô̌o tǎ dố hiyě akǔnuô tôprè̤꤮ tǎmé̤ ní꤮.’✡ 1:20 Li Htuthè́htya 69:25
“Htuô̌rò a hépó̤,
‘Ǔ ki nuô̌me̤dû akhǎlé̤ tôprè̤ pǎ ní꤮.’✡ 1:20 Li Htuthè́htya 109:8
21-22 “Phúnuôrò kayǎ tôprè̤prè̤ tǒbè nuô̌ otố̤kuô̌ ná pè̤ rò a ki khyá kuô̌ athè́ ná Byacè Jesǔ thyěihtò htwǒprè̤ ka̤khyěyě ari-akyǎ. Kayǎ dố pè̤ kíré̤ nwóhtya taple è yětôprè̤ nuôma, bí Jesǔ cuốtố̤khè̌tố̤ kuô̌pǎ ná pè̤ bí hekhuyě akhè̌, htuô̌to cáhtya bí Giovanni plwǒ pé̤ ǔ htyě tuố̤ hyǎ dố Cò́marya è́ka̤ kahtyakyǎ Byacè Jesǔ dố mò́khunuô, è ma bínuôkhè̌ a tǒbè má̤dû kayǎ dố a otố̤cuốtố̤ kuô̌ ná pè̤ pwǒ̤꤮ phuố tôprè̤,” Petru hé phúnuô.
23 Rò èthǐ hésoluô̌htya kayǎ thè́nyě̤ dố amwi̤ ná Joseph, kayǎ tahehe è́ lǔ ná Barsabba (Má̤torò Justo) ná Mathia. 24 Htuô̌rò èthǐ kwǐcò́bè̌ lahyǎ, “Kố꤮ Byacè꤮ nè̤ thè́gně dûhò́ kayǎ thè́plò a tè̤tane̤ tahe akhu-akhyě, dố kayǎ yěthè́nyě̤ aklè̌nuô nè̤ nwóhtya htuô̌hò́ è bítě tôprè̤, 25 htuô̌to kayǎ dố nè̤ nwóhtya htuô̌hò́ è yětôprè̤ thyáphú a ki phyéní̤ Prè̤dônyǎphú Juda dố a vǐkyǎ kyǎ a tè̤phyétè̤me̤ yětôprè̤ akhǎlé̤ nuô, dyéluô̌htya pé̤ pè̤ khǒnyá̤. Juda ma a thyěhò́ rò a cuố dûhò́ klyá dố a tǒkò cuố ná lǔ nuôhò́.” 26 Htuô̌rò thyáphú èthǐ ki nwóhtya dố yěthè́nyě̤ aklè̌ tôprè̤ nuôrò èthǐ bò́ lahyǎ tè̤byǎbwí tôcô rò a tǎ̤tǒ dố Mathia rò ǔ sunuô̌ tố̤kuô̌ è dố Prè̤dônyǎphú shyétôprè̤ aplò́amṳyě akǔ.