ꤜꤤ꤬ꤡꤢ꤭ꤏꤢꤧ꤭ ꤢ꤬ꤞꤢꤧ꤭ ꤔꤢ ꤜꤤ꤬ꤡꤢ꤭ꤏꤢꤧ꤭ ꤢ꤬ꤜꤟꤛꤢꤩ꤭ ꤒꤢ꤬ꤟꤢꤩ꤬ ꤊꤢ꤬ꤛꤢ꤭ꤜꤟꤤ꤬ꤍꤟꤥ ꤕꤚꤟꤢꤧ꤬ꤞꤤꤖꤢꤧꤍꤟꤥ 5

ꤡꤛꤣꤞꤢꤦ ꤒꤢꤧ꤭ ꤢꤨ꤭ꤖꤢꤨꤢꤨ꤭ꤗꤢꤩ꤭ ꤗꤟꤢꤩ

1 ꤊꤣ꤮ ꤠꤢ꤭ꤖꤢꤨ, ꤘꤛꤢ꤬ꤞꤢꤨ꤬ꤘꤛꤢ꤬ꤞꤢꤧ ꤊꤟꤌꤣ꤭ ꤠꤢ꤭ꤒꤟꤢꤧ꤬ꤞꤤꤖꤢꤧ ꤛꤢꤩ꤭꤯

ꤔꤟꤤꤘꤢ꤭ ꤒꤟꤢ꤭ꤒꤟꤢꤩ꤬ ꤊꤟꤌꤣ꤭ ꤠꤢ꤭ꤍꤟꤥ ꤘꤣ ꤢ꤬ ꤘꤛꤢꤩꤞꤢꤧꤑꤢꤩ꤭ꤕꤜꤥ꤭ꤖꤢꤧ ꤔꤟꤢꤧ꤬ ꤛꤢꤩ꤭꤯

2 ꤒꤢꤦꤗꤢ꤬ ꤔꤟꤢꤧ꤬ ꤙꤢꤧ꤬ ꤥ꤬ꤓꤝꤟꤥ꤭ꤕꤚꤟꤢꤧ꤬ ꤒꤝꤟꤥꤚꤛꤢ ꤖꤢꤨꤒꤢꤩ꤭ ꤔꤌꤣ꤬, ꤔꤟꤢꤧ꤬ ꤊꤟꤢꤦ ꤒꤢ꤬ꤔꤟꤢꤩ꤬ꤕꤜꤥ꤭ꤖꤢꤧ ꤕꤢ꤭꤯

ꤔꤟꤢꤧ꤬ꤒꤟꤢꤧ꤬ꤟꤢꤩꤙꤢꤧ꤬ ꤊꤟꤢꤦ ꤘꤛꤢꤩꤜꤟꤌꤣ꤭ꤘꤢꤦ꤬ ꤔꤢ ꤔꤟꤢꤧ꤬ꤒꤟꤢꤧ꤬ꤞꤢꤧꤋꤢꤨ꤬ꤞꤢꤧꤑꤢꤩ꤭ ꤥ꤬ ꤔꤌꤣ꤬ꤕꤢ꤭꤯

3 ꤕꤚꤟꤢꤧ꤬ꤗꤢꤪ꤬ ꤘꤣ ꤢ꤬ ꤡꤛꤣꤞꤢꤦ ꤢꤨ꤭ꤠꤟꤢꤧ꤬ ꤔꤌꤣ꤬ꤒꤣ꤬ꤕꤚꤟꤢꤧ꤬ ꤢ꤬ꤋꤢ꤭ꤢꤨ꤬ ꤗꤢ꤬ ꤢ꤬ꤏꤢꤦ꤭ꤊꤢ꤬ꤢꤦ꤮ ꤞꤛꤢꤡꤢꤪꤔꤢ ꤠꤛꤢꤓꤛꤢꤩ꤭꤯

ꤢ꤬ ꤟꤢꤩꤙꤢꤧ꤬ ꤤ꤬ꤜꤥ꤬ ꤢꤨ꤭ ꤗꤢ꤬ ꤢ꤬ ꤙꤢꤕꤜꤝꤤ꤭ ꤜꤣꤊꤜꤢꤪ꤭ ꤡꤢꤪ ꤔꤢ ꤢꤪꤜꤤꤠꤢ꤬ꤓꤛꤢꤩ꤭꤯

4 ꤘꤣꤋꤛꤢꤩ꤭ꤜꤣ ꤗꤢ꤬ ꤢ꤬ꤋꤢꤧ꤬ꤒꤢ꤬ꤚꤢ ꤞꤛꤢꤡꤢꤪꤔꤢ ꤢ꤬ꤡꤢꤦ꤬ꤢ꤬ꤕꤜꤟꤢꤧ꤯

ꤢ꤬ ꤗꤟꤢꤩ꤬ꤓꤛꤢ꤭ ꤔꤟꤢꤧ꤬ ꤞꤛꤢꤡꤢꤪꤔꤢ ꤔꤢꤧ ꤘꤣ ꤢ꤬ꤓꤛꤢ꤭ ꤔꤛꤢꤩ꤭ꤋꤥꤔꤛꤢꤩ꤭ꤊꤛꤢꤩ꤭꤯

5 ꤊꤜꤛꤢ ꤘꤣ ꤢ꤬ ꤡꤛꤣ ꤔꤌꤣ꤬ꤗꤢ꤬ ꤢ꤬ ꤡꤛꤣꤒꤥ꤭ ꤘꤣ ꤒꤟꤢꤧ꤬ꤞꤛꤢꤩ꤭꤯

ꤢ꤬ ꤞꤢꤨ꤭ꤡꤛꤣ ꤢꤨ꤭ ꤘꤣ ꤜꤟꤌꤣ꤭ꤊꤟꤢꤩꤔꤢꤩꤘꤢꤪ꤭꤯

6 ꤢ꤬ ꤙꤢꤩ꤬ꤞꤢꤨ꤬ꤙꤢꤩ꤬ꤞꤢꤧ ꤊꤟꤌꤣ꤭ ꤒꤟꤢꤧ꤬ꤓꤝꤟꤥ꤭ꤕꤚꤟꤢꤧ꤬ ꤔꤢ꤬ꤘꤢꤨ꤬ꤜꤢꤧ꤭ꤓꤢꤨ꤭ ꤥ꤬ꤗꤟꤥ꤬ꤥ꤬ꤖꤝꤤ꤭ ꤢ꤬ꤊꤜꤛꤢ ꤔꤌꤣ꤬ꤒꤣ꤬ꤙꤥ꤭ ꤒꤥ꤬꤯

ꤢ꤬ ꤜꤢꤩ꤭ꤓꤥ꤭ꤜꤢꤩ꤭ꤜꤟꤛꤢ꤬ ꤘꤣ ꤊꤜꤛꤢꤞꤢꤦ ꤒꤢ꤬ꤘꤣ꤬ꤚꤢꤪ ꤢ꤬ ꤞꤢꤧꤑꤢꤩ꤭ ꤔꤟꤤꤘꤛꤢꤩ ꤒꤥ꤬꤯

7 ꤖꤢꤨꤔꤌꤣ꤬ꤚꤢꤪ ꤋꤥ꤭ꤑꤟꤢꤛꤢꤩ꤭ ꤠꤢ꤭ꤖꤢꤨ ꤞꤤ꤭, ꤔꤟꤤꤘꤢ꤭ ꤊꤟꤌꤣ꤭ ꤠꤢ꤭ꤍꤟꤥ,

ꤠꤤ꤭ꤊꤛꤢ꤭ ꤒꤢꤧ꤭ ꤠꤢ꤭ꤜꤟꤢ꤭ ꤗꤟꤢꤩ ꤔꤤ꤮꤯

8 ꤥ꤬ꤒꤢ꤬ꤖꤢ꤭ꤐꤛꤢꤩ꤬ ꤔꤢ ꤕꤚꤟꤢꤧ꤬ꤗꤢꤪ꤬ ꤖꤢꤨꤔꤌꤣ꤬ꤒꤢ꤬ꤟꤢꤩ꤬ ꤔꤤ꤯

ꤡꤛꤣꤖꤢꤦ꤬ ꤒꤢꤧ꤭ ꤘꤣ ꤢ꤬ꤟꤤ꤬ꤊꤢ꤬ꤘꤢ꤭ ꤋꤢ꤭ꤏꤛꤢꤩ ꤗꤟꤢꤩ꤯

9 ꤔꤟꤢꤧ꤬ ꤊꤤ꤬ ꤡꤛꤣ ꤚꤢꤪ, ꤢꤨ꤭ ꤘꤛꤢ꤬ꤘꤢꤨ꤬ ꤕꤢ꤭ ꤔꤟꤢꤧ꤬ ꤒꤥ꤬꤯

ꤔꤟꤢꤧ꤬ ꤊꤟꤢꤦ ꤞꤛꤢꤩ꤭ ꤔꤢ꤬ꤡꤟꤢꤧꤊꤛꤢ꤭ ꤘꤣ ꤊꤢ꤬ꤛꤢ꤭ꤡꤟꤛꤢꤩ꤭ꤡꤟꤢꤦ꤬ ꤢ꤬ꤒꤢ꤬ꤋꤢꤨ꤬ꤊꤢꤨ꤭ ꤕꤢ꤭꤯

10 ꤏꤤ꤭ꤕꤚꤟꤢꤩꤏꤤ꤭ꤗꤟꤛꤢ꤬ ꤊꤟꤢꤦ ꤖꤛꤢꤩꤜꤟꤢꤪ꤭ ꤔꤟꤢꤧ꤬ꤒꤟꤢꤧ꤬ꤘꤢꤨ꤬ꤐꤟꤢꤓꤛꤢ꤬ꤞꤢꤧ꤭ ꤒꤢ꤬ꤟꤢꤩ꤬ ꤕꤢ꤭꤯

ꤒꤟꤢꤧ꤬ ꤘꤣ ꤔꤟꤢꤧ꤬ ꤢꤩ꤬ꤚꤟꤛꤢ꤬ ꤚꤢꤪ ꤔꤟꤤꤙꤢꤧ꤬ ꤒꤢ꤬ꤟꤢꤩ꤬ ꤔꤌꤣ꤬ ꤢ꤬ ꤓꤝꤟꤥ꤭ꤜꤟꤢꤪ꤭ ꤕꤚꤢꤧ ꤢꤨ꤭ꤚꤟꤌꤣ꤬ꤒꤟꤢꤧ꤬ ꤕꤢ꤭꤯

11 ꤙꤤ ꤔꤟꤢꤧ꤬ ꤏꤝꤤꤏꤢꤧ꤭ ꤡꤟꤛꤢꤩ꤭ꤡꤟꤢꤦ꤬, ꤚꤢꤪ ꤔꤟꤢꤧ꤬ꤗꤟꤢꤪꤑꤢꤩ꤭ ꤒꤢ꤬ꤘꤢꤦ꤬ ꤟꤢꤪꤕꤢ꤭ ꤢ꤬ꤋꤢꤧ꤭ꤔꤌꤣ꤬,

ꤔꤟꤢꤧ꤬ ꤊꤟꤢꤦ ꤒꤢ꤬ꤢꤟꤌꤣ꤭ꤒꤢ꤬ꤏꤢꤧ꤭ ꤔꤢꤪ ꤕꤢ꤭꤯

12 ꤚꤢꤪ ꤔꤟꤢꤧ꤬ ꤊꤟꤢꤦ ꤟꤢꤩ ꤘꤢꤦ꤬ ꤔꤢ, “ꤢꤨ꤭ ꤤ꤬ꤞꤛꤥꤚꤛꤢꤊꤟꤢ꤬ ꤠꤢ꤭ ꤚꤢꤪ ꤠꤢ꤭ ꤖꤛꤢꤩꤏꤢꤦ꤬ ꤊꤟꤌꤣ꤭ꤢꤨ꤭ ꤒꤥ꤬ꤗꤢ꤬ ꤗꤟꤢꤩ꤬ꤒꤢꤩ꤭?

ꤠꤢ꤭ ꤞꤢꤧꤓꤢꤩ꤬ꤔꤛꤢ꤬ꤡꤢꤪ ꤢꤨ꤭ꤒꤟꤢꤧ꤬ꤞꤢꤧꤕꤚꤝꤟꤥ꤭ꤞꤢꤧꤜꤟꤤ꤬ ꤠꤢ꤭ ꤔꤌꤣ꤬ꤗꤢ꤬ ꤗꤟꤢꤩ꤬ꤒꤢꤩ꤭?

13 ꤠꤢ꤭ ꤡꤟꤢꤨ꤭ꤢꤩ꤬ꤊꤟꤌꤣ꤭ ꤠꤢ꤭ꤞꤢꤚꤢ ꤒꤢ꤬ꤟꤢꤩ꤬ ꤢ꤬ꤍꤟꤥ ꤒꤥ꤬꤯

ꤠꤢ꤭ ꤔꤟꤤꤘꤢ꤭ꤊꤟꤌꤣ꤭ ꤕꤚꤟꤢꤧ꤬ꤤ꤬ꤞꤛꤥ ꤠꤢ꤭ ꤒꤢ꤬ꤟꤢꤩ꤬ ꤢ꤬ꤒꤢ꤬ꤜꤟꤢ꤭ ꤒꤥ꤬꤯

14 ꤠꤢ꤭ ꤊꤟꤢꤦꤚꤟꤢꤩ ꤗꤟꤢꤩ꤬ꤒꤢ꤬ꤚꤟꤢꤧ꤭ꤔꤟꤤ ꤒꤢ꤬ꤜꤤ꤮ ꤡꤢꤪꤟꤢꤪ ꤠꤢ꤭ꤔꤟꤢꤩ ꤘꤣ ꤊꤢ꤬ꤛꤢ꤭ꤙꤢꤧꤗꤟꤢꤨ꤬ ꤢ꤬ꤗꤢꤧ꤬ꤞꤢꤧ꤬ꤑꤢꤩ꤭ ꤟꤢꤪ꤯”

15 ꤡꤢꤪ ꤔꤢ ꤔꤟꤢꤧ꤬ꤗꤢꤩ꤭ ꤔꤟꤤꤘꤢꤦ꤬꤯

ꤥ꤬ꤒꤟꤣ ꤕꤚꤢꤧ ꤒꤢꤦ꤮ ꤔꤢ ꤢꤧ꤬ ꤔꤤ꤯

16 ꤖꤢꤨꤋꤢꤨ꤭, ꤔꤟꤢꤧ꤬ ꤒꤥ꤭ ꤐꤢꤦ꤭ꤒꤟꤢ꤭ꤊꤛꤢ꤭ꤘꤢꤩ꤭ ꤓꤛꤢꤩ꤭ꤏꤢꤧꤚꤛꤢ ꤘꤣ ꤊꤜꤛꤢꤊꤢꤨ꤭ ꤒꤥ꤬꤯

ꤔꤟꤢꤧ꤬ ꤒꤥ꤭ ꤡꤛꤣꤥ꤬ꤗꤛꤢꤩ꤭ꤒꤟꤣ ꤔꤢ ꤕꤚꤟꤢꤧ꤬ꤗꤢꤪ꤬ ꤘꤣ ꤢ꤬ꤚꤟꤌꤣ꤬ ꤒꤥ꤬꤯

17 ꤔꤟꤢꤧ꤬ ꤗꤢ꤬ ꤒꤢꤦ꤮ ꤔꤟꤢꤧ꤬ꤗꤢꤩ꤭ ꤢ꤬ꤑꤢꤩ꤭ ꤕꤚꤢꤧ꤯

ꤡꤛꤣꤥ꤬ꤗꤛꤢꤩ꤭ꤒꤟꤣ ꤒꤢꤧ꤭ ꤔꤢ ꤕꤚꤟꤢꤧ꤬ꤗꤢꤪ꤬ ꤘꤣ ꤢ꤬ꤚꤟꤌꤣ꤬ ꤒꤣ꤬ꤖꤟꤌꤣ꤮ ꤗꤟꤢꤩ꤯

18 ꤞꤢꤧꤊꤚꤟꤢꤦ꤭ꤞꤢꤧꤜꤟꤢꤪ꤭ ꤒꤟꤣꤊꤟꤌꤣ꤭ ꤔꤢ ꤔꤟꤢꤧ꤬ꤗꤢꤩ꤭ ꤔꤟꤤꤘꤢꤦ꤬ ꤔꤌꤣ꤬꤯

ꤒꤢ꤬ꤚꤟꤢꤨ꤮ ꤞꤢꤧꤊꤚꤟꤢꤦ꤭ꤞꤢꤧꤜꤟꤢꤪ꤭ ꤒꤟꤣ ꤔꤢ ꤔꤟꤢꤧ꤬ꤗꤢꤩ꤭ ꤘꤣ ꤔꤟꤢꤧ꤬ ꤋꤥ꤭ꤗꤟꤢꤧ꤭ ꤔꤟꤤ ꤜꤢꤨ꤭ ꤘꤣ ꤔꤟꤢꤧ꤬ꤔꤢ꤬ꤡꤟꤢꤧ ꤕꤢ꤭ ꤢ꤬ꤋꤢꤧ꤭ ꤔꤌꤣ꤬ꤒꤣ꤬ꤕꤚꤟꤢꤧ꤬ ꤔꤤ꤯

19 ꤢ꤬ ꤗꤟꤌꤣꤒꤝꤟꤥ ꤞꤛꤢꤡꤢꤪ ꤔꤢ ꤊꤚꤢꤪꤗꤟꤌꤣ, ꤢ꤬ ꤞꤢꤧꤘꤥ꤭ ꤞꤛꤢꤡꤢꤪꤔꤢ ꤒꤢ꤬ꤋꤛꤢꤩ꤭ꤗꤟꤌꤣ꤯

ꤢ꤬ꤔꤢꤨ ꤊꤟꤢꤦ ꤗꤟꤢꤩ꤬ ꤞꤢꤧꤕꤜꤢꤪ꤬ꤗꤤ꤭ ꤘꤢꤦ꤬ ꤔꤟꤢꤧ꤬ ꤕꤝꤟꤥ꤭꤮ ꤒꤣ꤬ꤖꤟꤌꤣ ꤔꤤ꤮꤯

ꤢ꤬ꤒꤟꤢꤧ꤬ꤗꤟꤥ꤬ ꤊꤟꤢꤦ ꤡꤝꤤ꤬ꤔꤟꤤꤓꤢꤪꤔꤟꤤꤘꤢꤦ꤬ ꤔꤟꤢꤧ꤬ ꤕꤝꤟꤥ꤭꤮ ꤒꤣ꤬ꤖꤟꤌꤣ ꤔꤤ꤮꤯

20 ꤊꤣ꤮ ꤠꤢ꤭ꤖꤢꤨ, ꤔꤟꤢꤧ꤬ ꤡꤛꤣ ꤔꤢꤪ꤭ ꤡꤝꤤ꤬ꤔꤟꤤꤓꤢꤪꤔꤟꤤ ꤘꤛꤢꤩ ꤔꤟꤢꤧ꤬ꤔꤟꤢꤩ ꤔꤢ ꤕꤚꤟꤢꤧ꤬ꤗꤢꤪ꤬ ꤘꤣ ꤢ꤬ ꤡꤛꤣꤞꤢꤦ ꤢꤨ꤭ꤖꤢꤨꤢꤨ꤭ꤠꤟꤢꤧ꤬ ꤔꤌꤣ꤬ꤒꤣ꤬ꤕꤚꤟꤢꤧ꤬ ꤗꤟꤢꤩ꤬ꤒꤢꤩ꤭?

ꤔꤟꤢꤧ꤬ ꤡꤛꤣ ꤥ꤬ꤗꤛꤢꤩ꤭ꤒꤟꤣ ꤢꤨ꤭ꤗꤢꤩ꤭ ꤗꤟꤢꤩ꤬ꤒꤢꤩ꤭?

21 ꤡꤢꤪꤗꤢ꤬ꤚꤛꤢ꤬ ꤗꤛꤢꤓꤛꤢꤩ꤬ꤜꤟꤢꤪ꤭ ꤔꤟꤢꤧ꤬ ꤗꤟꤢꤩ꤬ ꤒꤟꤢꤧ꤬ ꤕꤝꤟꤥ꤭꤮ ꤒꤣ꤬ꤡꤣ꤬꤯

ꤢ꤬ ꤡꤢꤩ꤭ꤗꤛꤢꤜꤟꤢꤪ꤭ ꤔꤟꤢꤧ꤬ꤊꤜꤛꤢ ꤕꤝꤟꤥ꤭꤮ ꤒꤣ꤬ꤙꤥ꤭꤯

22 ꤊꤢ꤬ꤛꤢ꤭ꤚꤤ꤬ꤡꤟꤛꤢ ꤢ꤬ꤒꤟꤢꤧ꤬ꤞꤢꤦ ꤔꤌꤣ꤬ ꤢ꤬ꤞꤛꤢꤔꤢ ꤢ꤬ ꤤ꤬ꤏꤛꤢ ꤒꤢ꤬ꤗꤢꤪ꤭ ꤚꤢꤪ ꤢ꤬ ꤕꤟꤢꤪꤙꤢꤧ꤬ꤔꤟꤤ ꤋꤛꤢꤩ꤭ꤘꤢꤦ꤬ ꤔꤢ ꤢ꤬ꤔꤟꤢꤩ꤯

ꤢ꤬ꤒꤟꤢꤧ꤬ꤥ꤬ꤚꤢ꤬ ꤔꤌꤣ꤬ ꤢ꤬ꤞꤛꤢꤔꤢ ꤢ꤬ ꤖꤛꤢꤩ ꤏꤢꤨ꤬ꤕꤜꤛꤢꤩ꤬ ꤚꤢꤪ ꤢ꤬ ꤡꤢꤪ꤭ꤊꤜꤟꤢꤪ꤬ꤗꤢ꤬ ꤔꤟꤤꤘꤛꤢꤩ ꤋꤛꤢꤩ꤭ꤘꤢꤦ꤬ ꤔꤢ ꤢ꤬ꤔꤟꤢꤩ ꤔꤌꤣ꤬ ꤟꤢꤪ꤯

23 ꤢꤧ꤬ꤞꤤ꤭ ꤋꤢꤪ꤭ꤔꤟꤤꤙꤢꤧ ꤘꤛꤢꤩ ꤢ꤬ꤔꤟꤢꤩꤒꤥ꤬ ꤚꤢꤪ ꤢ꤬ ꤊꤟꤢꤦ ꤞꤛꤢꤩ꤭ꤜꤟꤢꤪ꤭ ꤕꤢ꤭꤯

ꤢꤧ꤬ꤞꤤ꤭ ꤗꤟꤢꤩ꤬ꤒꤢ꤬ꤊꤢꤧ꤬ ꤒꤢ꤬ꤜꤝꤥ꤮ ꤏꤢꤦ꤭ꤜꤢꤦ꤭ ꤚꤢꤪ, ꤢ꤬ ꤊꤟꤢꤦ ꤞꤛꤢꤩ꤭ꤗꤟꤢꤩꤊꤛꤢ꤭ ꤕꤢ꤭꤯

5:1 5:1 ꤕꤚꤟꤢꤧ꤬ꤞꤤꤖꤢꤧꤍꤟꤥ ꤁:꤈, ꤂:꤁, ꤄:꤁, ꤄:꤂꤀, ꤂꤂:꤁꤇

5:3 5:3 ꤕꤚꤟꤢꤧ꤬ꤞꤤꤖꤢꤧꤍꤟꤥ ꤂:꤁꤆, ꤆:꤂꤄, ꤇:꤅, ꤂꤂:꤁꤄

5:5 5:5 ꤕꤚꤟꤢꤧ꤬ꤞꤤꤖꤢꤧꤍꤟꤥ ꤂:꤁꤈, ꤇:꤂꤇

5:7 5:7 ꤕꤚꤟꤢꤧ꤬ꤞꤤꤖꤢꤧꤍꤟꤥ ꤄:꤁, ꤇:꤂꤄

5:8 5:8 ꤕꤚꤟꤢꤧ꤬ꤞꤤꤖꤢꤧꤍꤟꤥ ꤇:꤂꤅

5:12 5:12 ꤕꤚꤟꤢꤧ꤬ꤞꤤꤖꤢꤧꤍꤟꤥ ꤁:꤇, ꤁:꤂꤅, ꤁, ꤂꤉, ꤁꤂:꤁

5:15 5:15 ꤊꤢ꤬ꤚꤤ꤬ꤞꤢꤨ꤬ ꤢ꤬ꤚꤟꤢꤩꤜꤣ ꤒꤣ꤬ꤙꤢ꤬ ꤇:꤂

5:18 5:18 ꤟꤢꤩꤏꤥ꤬ꤘꤣ꤬ꤑꤢ꤭ꤒꤟꤢꤧ꤬ ꤉:꤉, ꤗꤢ꤬ꤜꤢ꤬ꤋꤤ ꤂:꤁꤄

5:19 5:19 ꤕꤚꤟꤢꤧ꤬ꤞꤤꤖꤢꤧꤍꤟꤥ ꤂:꤁꤆, ꤅:꤃, ꤆:꤂꤄, ꤇:꤅, ꤂꤃:꤂꤇

5:21 5:21 ꤓꤢꤨ꤬ꤞꤢꤧꤓꤛꤢ꤬ ꤁꤁꤉:꤁꤆꤈, ꤕꤚꤟꤢꤧ꤬ꤞꤤꤖꤢꤧꤍꤟꤥ ꤁꤅:꤃, ꤡꤛꤣ꤬ꤚꤢ꤬ꤗꤤꤛꤣ꤬ ꤁꤆:꤁꤇, ꤃꤂:꤁꤉, ꤟꤤꤙꤚꤢꤨ ꤄:꤁꤃

5:22 5:22 ꤓꤢꤨ꤬ꤞꤢꤧꤓꤛꤢ꤬ ꤇:꤁꤅, ꤕꤚꤟꤢꤧ꤬ꤞꤤꤖꤢꤧꤍꤟꤥ ꤁:꤃꤁

5:23 5:23 ꤡꤛꤥꤙꤢ ꤄:꤂꤁, ꤃꤆:꤁꤂