28
ꤒꤟꤢꤧ꤬ꤊꤝꤤ꤭ꤡꤢꤪꤙꤢꤧ꤭ ꤘꤣ ꤜꤟꤢꤩꤗꤟꤢꤩ꤬ꤡꤝꤟꤥ ꤢ꤬ꤑꤢꤩ꤭
1 ꤊꤣ꤮ ꤡꤢꤪꤗꤢ꤬ꤚꤛꤢ꤬ ꤒꤢ꤬ꤡꤟꤢꤨꤕꤚꤟꤢꤧ꤬, ꤠꤢ꤭ꤜꤟꤢꤪꤘꤢꤨ꤬, ꤠꤢ꤭ ꤊꤝꤤ꤭ꤞꤢꤧꤐꤟꤢꤪ꤬ꤓꤛꤢ꤬ ꤔꤟꤢꤧ꤬꤯
ꤡꤟꤛꤢꤩ ꤊꤢ꤬ꤢꤪ꤭ ꤒꤢꤧ꤭ ꤔꤟꤢꤧ꤬ꤋꤢ꤭ꤜꤟꤢꤧ꤬ ꤗꤟꤢꤩ꤯
ꤔꤟꤢꤧ꤬ ꤊꤤ꤬ ꤘꤛꤢꤒꤢ꤬ꤊꤜꤝꤥ꤬ ꤟꤢꤩꤗꤢ꤬, ꤠꤢ꤭ ꤞꤛꤢꤊꤛꤢ꤭ ꤟꤢꤪ ꤔꤢ ꤊꤢ꤬ꤛꤢ꤭ ꤜꤢ꤬ꤒꤟꤢ꤭ꤔꤟꤌꤣ꤭ ꤘꤣ ꤜꤟꤌꤣ꤭ꤊꤟꤢꤩꤔꤢꤩꤘꤢꤪ꤭ ꤔꤌꤣ꤬꤯28:1 ꤓꤢꤨ꤬ꤞꤢꤧꤓꤛꤢ꤬ ꤃꤀:꤃, ꤁꤄꤃:꤇
2 ꤙꤤ ꤠꤢ꤭ ꤐꤟꤥꤓꤛꤢ꤬ꤒꤥ꤭ ꤠꤢ꤭ꤒꤢ꤬ꤋꤢꤨ꤬ ꤘꤣ ꤔꤟꤢꤧ꤬ ꤋꤢ꤭ꤜꤟꤢꤩꤡꤢ꤭ꤏꤢꤧ꤭ ꤓꤛꤢ꤬ꤜꤣ꤭ꤜꤣ꤮ ꤢ꤬ꤋꤢꤧ꤭ꤔꤌꤣ꤬, ꤔꤟꤤꤘꤢ꤭ ꤠꤢ꤭ ꤊꤝꤤ꤭ꤞꤢꤧꤐꤟꤢꤪ꤬ꤓꤛꤢ꤬ ꤔꤟꤢꤧ꤬ ꤒꤟꤢꤧ꤬ꤗꤟꤢꤩ꤬ꤡꤝꤟꤥ ꤛꤢꤩ꤭꤯
3 ꤡꤤ꤬ꤚꤛꤢ꤬ꤒꤟꤣ ꤊꤟꤌꤣ꤭ ꤒꤢꤧ꤭ ꤠꤢ꤭ ꤔꤢ ꤊꤢ꤬ꤛꤢ꤭ꤊꤢ꤬ ꤊꤢ꤬ꤛꤢ꤭ꤕꤜꤟꤛꤢ꤬, ꤕꤚꤟꤢꤧ꤬ꤗꤟꤢꤩ꤬ ꤒꤟꤢꤧ꤬ꤗꤢꤨ꤭ꤗꤟꤛꤢꤚꤤ꤬ꤡꤟꤛꤢ, ꤕꤚꤟꤢꤧ꤬ꤞꤢꤧꤕꤜꤢꤪ꤬ꤗꤢꤨ꤭ꤗꤛꤢꤚꤤ꤬ꤡꤟꤛꤢ ꤘꤣ ꤢ꤬ ꤡꤟꤛꤢꤩꤟꤢꤩꤙꤢꤧ꤬ꤗꤟꤥ꤬ꤚꤛꤢꤏꤢꤦ꤬ ꤡꤟꤛꤢ ꤢ꤬ꤟꤤ꤬ꤋꤢ꤭ꤏꤢꤪ꤭ꤋꤢ꤭ꤏꤛꤢꤩ ꤔꤌꤣ꤬ꤒꤢ꤬ꤟꤢꤩ꤬ ꤒꤢꤧ꤭ ꤗꤟꤢꤩ꤯28:3 ꤓꤢꤨ꤬ꤞꤢꤧꤓꤛꤢ꤬ ꤂꤆:꤉
4 ꤗꤟꤢꤩ꤬ꤜꤟꤛꤢꤩ꤭ ꤊꤟꤢ꤬ꤋꤛꤢꤩ꤭ꤏꤢꤦ꤬ ꤢꤧ꤬ꤞꤤ꤭ ꤖꤢꤨ ꤢꤧ꤬ꤞꤤ꤭ ꤗꤟꤢꤩ꤬ꤒꤟꤢꤧ꤬ ꤔꤢ ꤢꤧ꤬ꤞꤤ꤭ ꤗꤟꤢꤩ꤬ ꤒꤟꤢꤧ꤬ꤗꤢꤨ꤭ꤗꤟꤛꤢꤚꤤ꤬ꤡꤟꤛꤢ ꤔꤌꤣ꤬ꤒꤢ꤬ꤟꤢꤩ꤬꤯
ꤗꤟꤢꤩ꤬ꤜꤟꤛꤢꤩ꤭ ꤊꤟꤢ꤬ꤋꤛꤢꤩ꤭ꤏꤢꤦ꤬ ꤢꤧ꤬ꤞꤤ꤭ ꤖꤢꤨ ꤢ꤬ꤒꤢ꤬ꤋꤢꤨ꤬ ꤗꤟꤢꤩ꤬ ꤒꤟꤢꤧ꤬ ꤔꤌꤣ꤬꤯
ꤘꤛꤢꤩꤊꤟꤢ꤬ꤋꤛꤢꤩ꤭ ꤢ꤬ꤋꤝꤥꤢ꤬ꤊꤢꤧ꤬ ꤖꤢꤨ ꤢꤧ꤬ꤞꤤ꤭ ꤒꤥ꤭ꤊꤢꤪ꤬ꤔꤟꤤꤙꤢꤧ꤬ ꤔꤌꤣ꤬꤯28:4 ꤓꤢꤨ꤬ꤞꤢꤧꤓꤛꤢ꤬ ꤆꤂:꤁꤂, ꤒꤤ꤬ꤗꤢ꤬ꤞꤢꤩ꤬ ꤔꤛꤢꤩ꤭ꤙꤢ꤬ ꤒꤣ꤬ꤙꤢ꤬ ꤄:꤁꤄, ꤒꤟꤢꤧ꤬ꤘꤛꤢꤩꤜꤟꤌꤣ꤭ꤓꤛꤢ꤬ ꤁꤈:꤆, ꤂꤂:꤁꤂
5 ꤢꤧ꤬ꤞꤤ꤭ ꤒꤢ꤬ꤔꤟꤢꤩ꤬ ꤊꤟꤌꤣ꤭ ꤡꤢꤪꤗꤢ꤬ꤚꤛꤢ꤬ ꤒꤢ꤬ꤡꤟꤢꤨꤕꤚꤟꤢꤧ꤬ ꤢ꤬ꤒꤟꤢꤧ꤬ꤗꤟꤢꤩ꤬ ꤔꤢ ꤢ꤬ꤒꤢ꤬ꤋꤢꤨ꤬ ꤢ꤬ꤒꤟꤢꤧ꤬ꤗꤟꤢꤩ꤬ ꤔꤌꤣ꤬ꤒꤢ꤬ꤟꤢꤩ꤬ ꤒꤥ꤬꤯28:5 ꤛꤢ꤬ꤏꤛꤢꤛꤢ꤬ ꤅:꤁꤂
ꤖꤢꤨꤔꤌꤣ꤬ꤚꤢꤪ ꤡꤢꤪꤗꤢ꤬ꤚꤛꤢ꤬ ꤒꤢ꤬ꤡꤟꤢꤨꤕꤚꤟꤢꤧ꤬ ꤊꤟꤢꤦ ꤡꤤ꤬ꤚꤛꤢ꤬ ꤢꤧ꤬ꤞꤤ꤭, ꤗꤟꤢꤩ꤬ꤕꤛꤢꤩꤊꤛꤢ꤭ ꤜꤟꤢꤪ꤭ꤕꤜꤤ꤭ ꤢꤧ꤬ꤞꤤ꤭ ꤒꤢ꤬ꤡꤟꤢꤨꤕꤚꤟꤢꤧ꤬꤯
6 ꤡꤢꤪꤗꤢ꤬ꤚꤛꤢ꤬ ꤒꤢ꤬ꤡꤟꤢꤨꤕꤚꤟꤢꤧ꤬ ꤔꤟꤤꤘꤢ꤭ ꤟꤢꤪ ꤠꤢ꤭ ꤊꤝꤤ꤭ꤓꤛꤢ꤬ ꤒꤟꤢꤧ꤬ꤗꤟꤢꤩ꤬ꤡꤝꤟꤥ ꤢ꤬ꤋꤢꤨ꤬ꤢ꤬ꤋꤛꤢꤩ꤭, ꤓꤢꤨ꤬ꤞꤢꤧꤓꤛꤢ꤬ ꤢꤧ꤬꤯
7 ꤡꤢꤪꤗꤢ꤬ꤚꤛꤢ꤬ ꤒꤢ꤬ꤡꤟꤢꤨꤕꤚꤟꤢꤧ꤬ ꤗꤢ꤬ ꤠꤢ꤭ꤟꤢꤧ꤭ꤠꤢ꤭ꤚꤢꤩ꤬, ꤠꤢ꤭ꤊꤢ꤬ꤒꤛꤢ꤬꤯
ꤠꤢ꤭ ꤞꤢꤧꤜꤟꤢꤧ꤬ꤓꤛꤢ꤬ꤔꤟꤤ ꤒꤢꤦ꤮ ꤜꤢꤨ꤭꤯
ꤢ꤬ ꤗꤟꤢꤩ꤬ꤡꤝꤟꤥ ꤠꤢ꤭ ꤚꤢꤪ ꤠꤢ꤭ ꤞꤢꤧꤊꤚꤟꤢꤦ꤭ꤞꤢꤧꤜꤟꤢꤪ꤭꤯
ꤠꤢ꤭ ꤊꤟꤢꤦ ꤓꤢꤨ꤬ꤞꤢꤧ ꤟꤢꤩꤙꤝꤤꤒꤢ꤬ꤚꤛꤢꤩ꤭ ꤢꤧ꤬ ꤔꤢ ꤍꤟꤥꤤ꤬ꤚꤥ꤭꤯28:7 ꤓꤢꤨ꤬ꤞꤢꤧꤓꤛꤢ꤬ ꤁꤈:꤂, ꤅꤉:꤁꤇, ꤆꤉:꤃꤀
8 ꤡꤢꤪꤗꤢ꤬ꤚꤛꤢ꤬ ꤒꤢ꤬ꤡꤟꤢꤨꤕꤚꤟꤢꤧ꤬ ꤗꤢ꤬ ꤒꤟꤢꤧ꤬ꤟꤢꤧ꤭ꤒꤟꤢꤧ꤬ꤚꤢꤩ꤬ ꤘꤣ ꤢ꤬ꤊꤢ꤬ꤛꤢ꤭ ꤒꤢ꤬ꤟꤢꤩ꤬ ꤢ꤬ꤑꤢꤩ꤭꤯
ꤢ꤬ ꤒꤢ꤬ꤊꤟꤢꤧ꤬ꤙꤤꤔꤟꤤ, ꤢ꤬ ꤗꤟꤢꤩ꤬ꤏꤤ꤭ꤕꤜꤢꤧꤊꤟꤢ꤬ꤔꤟꤤ ꤢ꤬ꤋꤝꤤ ꤘꤣ ꤢ꤬ ꤔꤝꤥꤓꤛꤢ꤬꤯28:8 ꤓꤢꤨ꤬ꤞꤢꤧꤓꤛꤢ꤬ ꤂꤀:꤆
9 ꤗꤟꤢꤩ꤬ꤏꤤ꤭ꤕꤜꤢꤧꤊꤟꤢ꤬ꤔꤟꤤ ꤔꤟꤢꤧ꤬ꤊꤢ꤬ꤛꤢ꤭, ꤏꤢꤪ꤭ꤚꤤ꤬ꤏꤢꤪ꤭ꤙꤢꤨ꤭ꤔꤟꤤ ꤔꤟꤢꤧ꤬ꤢꤨ꤬ꤡꤢꤧ꤭ꤒꤢ꤬ꤐꤟꤢꤧ꤯
ꤓꤝꤟꤥ꤭ ꤘꤢꤦ꤬ ꤕꤚꤟꤢꤧ꤬ꤊꤟꤢꤩ꤭ ꤢꤧ꤬ꤞꤤ꤭ ꤞꤛꤢꤔꤢ ꤢꤨ꤭ ꤊꤟꤢꤩ꤭ ꤞꤤꤗꤟꤤ ꤒꤣ꤬ꤕꤚꤟꤢꤧ꤬ ꤔꤌꤣ꤬, ꤗꤛꤢꤋꤝꤢꤧ꤬ ꤒꤢ꤬ꤊꤟꤢꤧ꤬ꤙꤤꤚꤛꤢ ꤔꤟꤤꤘꤢꤦ꤬ ꤢꤧ꤬ꤞꤤ꤭ ꤒꤢ꤬ꤡꤟꤢꤨꤕꤚꤟꤢꤧ꤬ ꤔꤤ꤮꤯28:9 ꤋꤝꤤ ꤢ꤬ꤚꤟꤢꤩꤜꤣ ꤒꤣ꤬ꤙꤢ꤬ ꤈:꤅꤁, ꤓꤢꤨ꤬ꤞꤢꤧꤓꤛꤢ꤬ ꤈꤀:꤁, ꤛꤢ꤬ꤏꤛꤢꤛꤢ꤬ ꤄꤀:꤁꤁
28:1 28:1 ꤓꤢꤨ꤬ꤞꤢꤧꤓꤛꤢ꤬ ꤃꤀:꤃, ꤁꤄꤃:꤇
28:3 28:3 ꤓꤢꤨ꤬ꤞꤢꤧꤓꤛꤢ꤬ ꤂꤆:꤉
28:4 28:4 ꤓꤢꤨ꤬ꤞꤢꤧꤓꤛꤢ꤬ ꤆꤂:꤁꤂, ꤒꤤ꤬ꤗꤢ꤬ꤞꤢꤩ꤬ ꤔꤛꤢꤩ꤭ꤙꤢ꤬ ꤒꤣ꤬ꤙꤢ꤬ ꤄:꤁꤄, ꤒꤟꤢꤧ꤬ꤘꤛꤢꤩꤜꤟꤌꤣ꤭ꤓꤛꤢ꤬ ꤁꤈:꤆, ꤂꤂:꤁꤂
28:5 28:5 ꤛꤢ꤬ꤏꤛꤢꤛꤢ꤬ ꤅:꤁꤂
28:7 28:7 ꤓꤢꤨ꤬ꤞꤢꤧꤓꤛꤢ꤬ ꤁꤈:꤂, ꤅꤉:꤁꤇, ꤆꤉:꤃꤀
28:8 28:8 ꤓꤢꤨ꤬ꤞꤢꤧꤓꤛꤢ꤬ ꤂꤀:꤆
28:9 28:9 ꤋꤝꤤ ꤢ꤬ꤚꤟꤢꤩꤜꤣ ꤒꤣ꤬ꤙꤢ꤬ ꤈:꤅꤁, ꤓꤢꤨ꤬ꤞꤢꤧꤓꤛꤢ꤬ ꤈꤀:꤁, ꤛꤢ꤬ꤏꤛꤢꤛꤢ꤬ ꤄꤀:꤁꤁