Barʉ́wa ya ncholo ya
Yooháani
Mʉlongooryo
Barʉ́wa ɨhɨ, yaandɨkwa nɨ mutumwi Yooháani kati ya myaaka ya 85-100 keende Yéesu ˆavyaalwa. Yooháani aandɨka barʉ́wa ɨhɨ kwa mpuka ya vaantʉ ˆvamuruma Yéesu. Vaantʉ ava, Yooháani ajáa aveenda maatʉkʉ vii ja vaana na vijeengi vyaachwe (2:1, 7, 12, 18, 28; 3:7, 21; 4:1, 7).
Barúwii ɨhɨ, Yooháani avakalaamya vaantʉ ˆvamuruma Yéesu vatuube kʉva kɨɨntʉ kɨmwɨ na Mʉlʉʉngʉ hamwɨ na Yéesu Kirisitʉ (2:24-27; 4:12-16). Kei avalʉma kutu vareke teerera masáare ya vasíiti Kirisitʉ ˆvarɨ mpukii ya vaantʉ ˆvamuruma Yéesu (2:18-23).
Yooháani avakumbusikya vaantʉ ˆvamuruma Yéesu kʉvasea, yeeye iikala hamwɨ na Yéesu. Yeeye amoona kwa miiso yaachwe, amʉteera kwa matu yaachwe na amʉkwaata kwa mɨkono yaachwe (1:1-4). Sa jeyyo, yeeye amʉmányire Yéesu nɨ mʉʉntʉ wa kɨkomi ajáa na nɨ Mwaana wa Mʉlʉʉngʉ. Na kei avasea, Mʉlʉʉngʉ atʉheera suusu ˆtamuruma Yéesu nkaasʉ ya sikʉ ˆjisiina ʉhero, na nkaasʉ ɨhɨ nɨ kwa mwaana waachwe Yéesu Kirisitʉ ɨrɨ (5:5, 11-12).
Cho kiimikirirya, Yooháani avawyɨɨra vaantʉ ˆvamuruma Yéesu vasaakwa sikʉ joosi vamweende Mʉlʉʉngʉ na vatuube kwiiyenda voovo kwa voovo.
ˆVyeene Kɨtáabu ɨkɨ Chagavwa
Yéesu noo Isáare ˆrɨrɨ nkaasʉ 1:1-4
Vaantʉ ˆvamuruma Yéesu vave vaantʉ va kɨweerʉ, karɨ vatuube weerʉ tʉkʉ 1:5–2:27
Vaantʉ ˆvamuruma Yéesu viiyende kwa kweenda kwa Kirisitʉ 2:28–4:6
Vaantʉ ˆvamuruma Yéesu vave kɨɨntʉ kɨmwɨ na Mʉlʉʉngʉ na vɨndooyerenʼya mɨtɨma yoosi 4:7–5:12
Vaantʉ ˆvamuruma Yéesu vatúryaa nkaasʉ ya sikʉ ˆjisiina ʉhero kʉrɨ Yéesu 5:13-21
1
Isáare ra Nkaasʉ
1 Ɨkɨ noo ˆcheene toovavariyʉrɨra. Kɨra ˆkɨjáa kɨmwaarɨ baa ncholo✡Laanga Ncholo 1:1; Yooháani 1:1-3. sɨ ɨnaanda, kɨra ˆtakɨteera, kɨra ˆtachoona na miiso yiiswi, kɨra ˆtakɨlaanga, ˆtakɨkwaata na mɨkono yiiswi noo Isáare ra nkaasʉ ya sikʉ ˆjisiina ʉhero. 2 Nkaasʉ ɨyo yavariyʉlwa, na suusu twɨɨyona, na tookoonekya kɨkomi na tookaarya nkaasʉ ya sikʉ ˆjisiina ʉhero, ɨyo ˆɨjáa na Taáta na ˆyavariyʉlwa kʉrɨ suusu.✡Laanga Yooháani 1:14. 3 Toovawyɨɨra nyuunyu kɨra ˆtachoona na ˆtateera, sa nyuunyu mʉve kɨɨntʉ kɨmwɨ na suusu. Na kʉva kɨɨntʉ kɨmwɨ kwiiswi nɨ kʉva kɨɨntʉ kɨmwɨ na Taáta na Mwaana waachwe YéesuKirisitʉ. 4 Aya nɨ kʉyaandɨka tiise sa kʉvyeenda kwiiswi voosi,*kʉvyeenda kwiiswi voosi: Nakáala jɨɨngɨ ja kalɨ jasea, Kʉvyeenda kwaanyu. kukiimane.
Kʉyeendera Kɨweerwii
5 Masáare ˆtateera fuma kwaachwe, na ˆtoovawyɨɨra nyuunyu, noo aya, Mʉlʉʉngʉ nɨ kɨweerʉ na kʉrɨ yeeye kusiina kilwiirya chochoosi tʉkʉ.
6 Koonɨ taséire nɨ kɨɨntʉ kɨmwɨ tʉrɨ ne na kʉnʉ tooyeendera kilwiiryii, nɨ ʉloongo toolʉʉsa, na sɨ tootʉmama kɨra cha kɨmáárɨ tʉkʉ. 7 Maa kaa, koonɨ tooyeendera kɨweerwii ja yeeye ˆvyeene arɨ kʉrɨ kɨweerʉ, nɨ kɨɨntʉ kɨmwɨ ˆtʉrɨ suusu kwa suusu na sakami ya Yéesu Mwaana waachwe nɨ tujirʉla yiise na ʉvɨ woosi.
8 Koonɨ taséire tusiina ʉvɨ tʉkʉ, tookiikoovera suusu veeneevyo na kɨra kɨkomi sɨ kɨrɨ kʉrɨ suusu tʉkʉ. 9 Koonɨ talúusire ʉvɨ wiitʉ kʉrɨ yeeye, yeeye nɨ wo kiilaangiwa na nɨ mʉwoloki, yeeye sea arɨ ʉvɨ wiitʉ wasírire na tujirʉla arɨ na kʉsova ʉwoloki koosi.
10 Koonɨ taséire sɨ tabweeyya ʉvɨ tʉkʉ, toomʉbweeyya yeeye ave mʉloongo na isáare raachwe sɨ rɨrɨ kʉrɨ suusu tʉkʉ.