Barʉ́wa ya ncholo ya Paúli kwa
Vatesaloníike
Mʉlongooryo
Barʉ́wa ya ncholo kwa Vatesaloníike yaandɨkwa nɨ mutumwi Paúli (1:1). Paúli aandɨka barʉ́wa ɨhɨ hamwɨ na Siliváano na Timotéeo kati ya myaaka ya 51-52 keende Kirisitʉ ˆavyaalwa.
Paúli afika múuji wa Tesaloníike ʉko Makedonía mpɨɨndɨ ja lʉyeendo lwaachwe lwa kavɨrɨ lo koovariyʉla Masáare Maaja ya Yéesu. Sa viintʉ kʉjáa na uturikiri mʉkʉʉlʉ, Paúli sɨ achaala ʉko Tesaloníike kwa mpɨɨndɨ ndɨɨhɨ tʉkʉ (Mɨrɨmo ya Vatumwi 17:1-10). Paúli aandɨka barʉ́wa ɨhɨ kʉvaheera mʉtɨma vaantʉ ˆvamuruma Yéesu ʉko Tesaloníike.
Barʉ́wa ɨhɨ, yatɨɨte ʉlairiri ˆʉrɨ foo wa ˆvyeene vaantʉ ˆvamuruma Yéesu vasaakwa viikale. Paúli avaheera mʉtɨma kʉsea, voovo nɨ vaantʉ va kɨweerʉ na viikinkime, na sɨ va kilwiirya na ʉreevi tʉkʉ. Sa jeyyo, vanehe ʉvɨ woosi (5:4-8, 16-22). Kei, Paúli alʉʉsa masáare ˆyarɨ foo ya ˆvyeene Yéesu Kirisitʉ arɨ kʉʉja lwa kavɨrɨ joo vasʉmʉla vaantʉ ˆvamuruma, no kaambʉka hamwɨ ne na kurumwii (4:12–5:3).
ˆVyeene Kɨtáabu ɨkɨ Chagavwa
Lʉmbɨ na dʉʉmbɨ ya Paúli sa kuruma kwa Vatesaloníike 1:1-10
Mɨrɨmo ˆmyeene Paúli abweeyya ʉko Tesaloníike na mpɨɨma yaachwe yo lʉmana novo 2:1–3:13
Paúli yoovaheera mʉtɨma viikale ko mweerya mʉtɨma Mʉlʉʉngʉ na vaantʉ 4:1-12
Kʉʉja kei kwa Yéesu Kirisitʉ 4:13–5:11
ˆCheene chasaakwa kwa vaantʉ ˆvamuruma Yéesu na lʉmbɨ yo herererya 5:12-28
1
Lʉmbɨ
1 Barʉ́wa ɨhɨ, yafúmire kʉrɨ nɨɨnɨ Paúli, Siliváano na Timotéeo. Nɨ kʉvaandɨkɨra tiise nyuunyu mpuka ya vaantʉ ˆmumuruma Yéesu ʉko múuji wa Tesaloníike. Nyuunyu mʉrɨ va Mʉlʉʉngʉ Taáta na va Yéesu Kirisitʉ Mweenevyoosi.
Nduwo na mwiikalo mʉʉja fuma kwa Mʉlʉʉngʉ jive na nyuunyu.
Dʉʉmbɨ sa Kumuruma Yéesu kwa Vaantʉ va Tesaloníike
2 Sikʉ joosi tamʉdʉ́ʉmbaa Mʉlʉʉngʉ sa nyuunyu voosi, na mpɨɨndɨ joosi ˆtoomʉloomba Mʉlʉʉngʉ, tavalʉ́ʉsaa kweene. 3 Suusu tavakʉ́mbʉkɨraa sikʉ joosi mbere ya Mʉlʉʉngʉ na Taáta, sa ˆvyeene moónekyaa kumuruma Yéesu kwa nteendo jaanyu, ˆvyeene kweenda kwaanyu kwavabwéeyyaa mʉtʉmame mɨrɨmo ko manyɨka, na ˆvyeene kwa uyimiriryi mwamwiiláangyaa Mweenevyoosi wiitʉ Yéesu Kirisitʉ.
4 Vanaviitʉ ˆmweendwa nɨ Mʉlʉʉngʉ, suusu tamányire, Mʉlʉʉngʉ avasaawʉla nyuunyu mʉve vaachwe. 5 Sa mpɨɨndɨ ˆtʉkavaretere Masáare Maaja, sɨ tavaretera masáare matʉhʉ vii tʉkʉ. Maa kaa, masáare ayo, yavariyʉlwa kwaanyu kwa njɨra ya ngururu ya Mʉtɨma Mʉʉja na nɨ ya kɨmáárɨ. Nyuunyu mwamányire ˆvyeene suusu twiikaláa meenyu sa tʉvaambirirye nyuunyu. 6 Baa neembe ayo Masáare yavaretera uturikiri ˆwahʉʉmba, nyuunyu mwayahokera Masáare ayo kwa cheerʉ fuma kwa Mʉtɨma Mʉʉja, kwa njɨra ɨyo, mwatutuubirirya suusu na mwamutuubirirya Mweenevyoosi. 7 Jeyyo, mwaava vaantʉ ˆvabooha vo tuubiririwa nɨ vaantʉ ˆvamuruma Yéesu va Makedonía na Akáaya. 8 Sa kootweera nyuunyu, Masáare ya Mweenevyoosi yooteereka sɨ kwa vaantʉ va Makedonía na Akáaya vii tʉkʉ, maa kaa, kumuruma kwaanyu Mʉlʉʉngʉ kwatéerekire kɨra haantʉ. Sa jeyyo, sɨ toohangaɨka kʉlʉʉsa kɨɨntʉ tʉkʉ sa kumuruma kwaanyu Mʉlʉʉngʉ. 9 Kɨra haantʉ ˆtʉrɨ doma, vaantʉ voolʉʉsa ˆvyeene mwatʉteengya ˆtʉkʉʉje na meenyu. Kei voolʉʉsa ˆvyeene mwareka kwiinamɨra vidabalaíyo, mʉkamʉvalandʉkɨra Mʉlʉʉngʉ wa kɨkomi ˆarɨ nkaasʉ, sa mʉmʉtʉmamɨre. 10 Kei, voolʉʉsa ˆvyeene moowoojera kʉʉja kwa Mwaana wa Mʉlʉʉngʉ fuma kurumwii, noo kʉsea, Yéesu. Ʉhʉ Yéesu, Mʉlʉʉngʉ amʉfʉfʉla na yeeye atʉlamurirya fuma irya ra Mʉlʉʉngʉ ˆrookʉʉja.