Barʉ́wa ya kavɨrɨ ya
Yooháani
Mʉlongooryo
Barʉ́wa ɨhɨ, nɨ ya kavɨrɨ ˆyaandɨkwa nɨ mutumwi Yooháani. Yooháani aandɨka barʉ́wa ɨhɨ nkufi kwa mpuka ya vaantʉ ˆveene avɨɨmɨrɨráa. Mpuka ɨyo, yeeye ɨɨyanɨrɨra íyo na vaana vaachwe (1:1). Yooháani iiwyɨɨra mpuka ɨyo ituube kʉteerera ʉlairiri wa Yéesu wo kiiyenda voovo kwa voovo (1:5-6). Kei Yooháani avalʉma kutu vandootaanga ukiindya wa Kirisitʉ na ukiindya wa ʉloongo. Ukiindya ʉwo mʉvɨ, wareetwa nɨ vakooveri vara ˆvamusiita Yéesu nɨ Masía na ʉʉja kwa mʉvɨrɨ wa mʉʉntʉ (1:7-8).
ˆVyeene Kɨtáabu ɨkɨ Chagavwa
Lʉmbɨ 1:1-3
Mwiikalo wo kiiyenda 1:4-6
Kusiita vara ˆvamusiita Kirisitʉ 1:7-11
Masáare yo herererya 1:12-13
1
Lʉmbɨ
1 Lʉmbɨ kufuma kwa moosi mʉlongooli wa vaantʉ ˆvamuruma Yéesu. Nɨ kwaandɨkɨra niise weewe íyo ˆʉsaawʉlwa nɨ Mʉlʉʉngʉ hamwɨ na vaana vaako. Nɨɨnɨ kɨmaarɨ naveenda. Maa kaa, sɨ nɨɨnɨ vii tʉkʉ ˆnaveenda, baa vaantʉ vɨɨngɨ voosi vamányire kɨmáárɨ. 2 Suusu taveenda, sa takwaatya kɨmáárɨ mitimii yiitʉ na veera kɨrɨ mʉʉmo kwa sikʉ ˆjisiina ʉhero. 3 Nduwo, riiso ra wʉʉja na mwiikalo mʉʉja fuma kwa Mʉlʉʉngʉ Taáta na fuma kwa Yéesu Kirisitʉ, Mwaana wa Taáta kʉva jiri na suusu kʉrɨ kɨmáárɨ na kwiiyenda.
Kɨmáárɨ na Kwiiyenda
4 Neeriwa mʉtɨma maatʉkʉ vii kʉteera vamwɨ va vaana vaanyu ˆvamwaarɨ vootuuba njɨra ya kɨmáárɨ, ja ˆvyeene Mʉlʉʉngʉ Taáta atʉlairirya. 5 Haaha íyo nooloomba twiiyende. Sɨ noovaandɨkɨra ʉlairiri mufya tʉkʉ, maa kaa, nɨ ʉlairiri ʉʼʉra tʉjáa tatɨɨte keende ncholo.✡Laanga Yooháani 13:34. 6 Kweenda noo ʉkʉ, yasaakwa suusu twiikale ko tuuba ndairiri ja Mʉlʉʉngʉ. Na ʉhʉ noo ʉlairiri ˆmwateera keende aho ncholo, moosaakwa voosi mwiikale ko kiiyenda.
7 Vakwaata ˆvarɨ foo vara sɨ ˆvaséaa, Yéesu noo Masía na ʉʉja na mʉvɨrɨ wa mʉʉntʉ, vafʉ́mɨɨre aha weerwii.✡Laanga 1 Yooháani 4:2-3. Mʉʉntʉ ˆalʉ́ʉsaa jeyyo nɨ mʉkwaata na nɨ musíiti Kirisitʉ. 8 Haaha nyuunyu mwiiyɨmɨrɨre neeja karɨ jɨ mʉtaahe kɨra ˆmwakɨtʉmamɨra tʉkʉ, maa kaa, mʉpate kʉnáálo yaanyu ˆyakiimana.✡Laanga 1 Vakoríinto 3:10-15.
9 Ʉra sɨ ˆakwáatyaa ukiindya wa Kirisitʉ, maa kaa, akʉʉreka, ʉwo asiina Mʉlʉʉngʉ tʉkʉ. Maa kaa, ʉra ˆakwáatyaa ukiindya ʉwo, avatɨɨte voosi, Taáta na Mwaana. 10 Haaha koonɨ mʉʉntʉ uújire na kwaanyu na avaretere ukiindya ˆwiísimire na ʉhʉ, mʉteengyi na kaayii jaanyu tʉkʉ na muluumbyi tʉkʉ. 11 Mʉʉntʉ yoyoosi ˆarɨ mʉteengya kʉva arɨ hamwɨ na nteendo mbɨ ja ʉwo mʉʉntʉ.
Lʉmbɨ jo Kiimikirirya
12 Natɨɨte masáare ˆyarɨ foo yo vawyɨɨra, maa kaa, sɨ noosaaka bweeyya jeyyo na wíino na karatáasi tʉkʉ. Kɨrɨ vyoova jeyyo, nookiilaangya kʉʉja ndɨrɨ na kwaanyu ndʉʉsɨke na nyuunyu miiso kwa miiso, sa kweerya mɨtɨma kwiiswi kukiimane.
13 Vaana va irʉʉmbʉ raako ˆasaawʉlwa, vakulúumbiirye.