Barʉ́wa ya kavɨrɨ ya
Peéteri
Mʉlongooryo
Barʉ́wa ya kavɨrɨ ya Peéteri yaandɨkwa nɨ mutumwi Peéteri kati ya myaaka ya 64-67 keende Kirisitʉ ˆavyaalwa. Peéteri aandɨka barʉ́wa ɨhɨ kwa vaantʉ voosi ˆvamuruma Yéesu (1:1). Aandɨka mpɨɨndɨ ˆajáa mʉnyololwii yoowoojera kʉʉlawa, kʉnʉ yookiiririkana ˆvyeene Yéesu ajáa alʉʉsa inkwya yaachwe ɨrɨ kʉva (1:14; Yooháani 21:18-19).
Kɨɨntʉ kɨkʉʉlʉ alʉʉsa barúwii ɨhɨ, nɨ kʉvalʉma kutu vaantʉ ˆvamuruma Yéesu ʉvɨ ˆwalookya mʉnʉmʉʉnʉ wa vakiindya va ʉloongo (2:1-22). Vyasaakwa vaantʉ ˆvamuruma Yéesu vareke ukiindya waavo na vakwaatye ukiindya wa kɨmáárɨ wa Mʉlʉʉngʉ na wa Kirisitʉ, ʉra ˆvakiindiwa nɨ vatumwi vara ˆvakiindiwa nɨ Yéesu mweeneevyo (1:16-18). Ava vatumwi nɨ vara ˆvamoona, vayeendanʼyáa na vateereráa ukiindya wa Yéesu mweeneevyo (1:16-18). Avawyɨɨra yoovasea, vasaakwa vɨndookʉmbʉkɨra ukiindya wa kɨmáárɨ ˆmweene ʉréetaa kʉmʉtaanga Mʉlʉʉngʉ na Mwaana waachwe Yéesu Kirisitʉ (1:12-14; 3:1-2).
Barúwii ɨhɨ, Peéteri asiita ʉloongo ʉra ˆwarɨɨngɨrɨráa wa vaantʉ ˆvoosea, Kirisitʉ sɨ arɨ hɨndʉka tʉkʉ (3:3-7). Alumirirya kʉsea sikʉ ya Mweenevyoosi kʉʉja ɨrɨ ja mwiívi, na Mʉlʉʉngʉ nɨ woojera iise ko yimirirya sa sɨ yoosaaka mʉʉntʉ baa ʉmwɨ arɨmɨre tʉkʉ, kɨrɨ vyoova jeyyo vaantʉ voosi vamʉvalandʉkɨre na vareke ʉvɨ waavo (3:9-10).
ˆVyeene Kɨtáabu ɨkɨ Chagavwa
Lʉmbɨ 1:1-2
Koonekya ˆvyeene Mʉlʉʉngʉ avaanɨrɨra no vasaawʉla 1:3-11
Ʉláali na mʉtwe wa nkongojima ya Kirisitʉ 1:12-21
Vakiindya va ʉloongo 2:1-22
Sikʉ ya kʉʉja kwa Mweenevyoosi 3:1-18
1
Lʉmbɨ
1 Barʉ́wa ɨhɨ yafúmire kʉrɨ nɨɨnɨ Simóoni Peéteri, mʉtʉmami na mutumwi wa YéesuKirisitʉ. Nɨ kʉvaandɨkɨra niise nyuunyu ˆveene kwa njɨra ya ʉwoloki wa Yéesu Kirisitʉ Mʉlʉʉngʉ na Mʉlamuriri wiitʉ, mwahokera kuruma kwa iyoombe ikʉʉlʉ ja kwiiswi. 2 Nduwo na mwiikalo mʉʉja jivakʉngʼʉntɨrɨkɨre nyuunyu ja ˆvyeene mookʉla kwa kʉra kʉmʉtaanga Mʉlʉʉngʉ na Yéesu Kirisitʉ Mweenevyoosi wiitʉ.
Mwaanɨrɨrwa na Mwasaawʉlwa nɨ Mʉlʉʉngʉ
3 Kwa ngururu jaachwe ja kɨmʉlʉʉngʉ, atʉheera viintʉ vyoosi ˆtʉsáakaa sa nkaasʉ, na kwiikala mwiikalo ˆutúubaa kɨra Mʉlʉʉngʉ ˆasáakaa. Yeeye abweeyya jeyyo kwa njɨra ya suusu yo mʉtaanga yeeye ˆatwaanɨrɨra, kwa njɨra ya nkongojima yaachwe nkʉʉlʉ na wʉʉja waachwe. 4 Kwa njɨra ɨyo, atʉheera kwiichuunga kwaachwe kʉkʉlʉkʉʉlʉ na kwa kɨkomikoomi, sa ko tweera kwiichuunga ʉko, tʉreke ʉvɨ woosi ˆmweene ʉrɨ kʉrɨ ɨhɨ weerʉ, ˆwaréetwaa nɨ ʉláku woosi na tʉve tadómanʼyaa na ˆvyeene Mʉlʉʉngʉ arɨ.
5 Sa jeyyo, kʉrɨ kuruma kwaanyu manyiki koongererya wʉʉja, hamwɨ na wʉʉja, ongereryi ʉmanyi. 6 Kei kʉrɨ ʉmanyi, ongereryi kwiiyɨmɨrɨra, kwiiyɨmɨrɨra kwaanyu kʉve na kuyimirirya kʉkʉʉlʉ mpɨɨndɨ ja uturikiri, na kʉrɨ kuyimirirya ongereryi mwiikalo ˆutúubaa kɨra Mʉlʉʉngʉ ˆasáakaa. 7 Hamwɨ na mwiikalo ˆutúubaa kɨra Mʉlʉʉngʉ ˆasáakaa, ongereryi kwiiyenda kɨndʉʉ, na kwa kweenda ʉko, ongereryi kweenda kwawoloka. 8 Sa koonɨ mʉrɨ na viintʉ ivi ˆviri foo na kutuuba koongererya, vabweeyya viri mutuube manyɨka na mʉve na kʉnáálo kwa kʉra kʉmʉtaanga Mweenevyoosi wiitʉ, Yéesu Kirisitʉ. 9 Maa kaa, mʉʉntʉ yoyoosi ˆasiina ivi viintʉ, ʉwo nɨ mʉhoku, noo kʉsea ʉwo sɨ oónaa kʉlɨ tʉkʉ, sa yeeye arimirya kʉra kujirʉlwa ʉvɨ waachwe woosi.
10 Sa jeyyo vanaviitʉ, manyiki kʉbweeyya kɨra kɨɨntʉ koonekya nɨ kɨmáárɨ Mʉlʉʉngʉ avasaawʉla na avaanɨrɨra, sa koonɨ mʉbwéeyyiirye jeyyo sɨ mʉrɨ kiikunguvala uvii vii kaa tʉkʉ. 11 Kwa njɨra ɨyo, hokerwa mʉrɨ neeja Ʉtemii wa sikʉ ˆjisiina ʉhero wa Yéesu Kirisitʉ, Mweenevyoosi na Mʉlamuriri wiitʉ.
Ʉláali na Mʉtwe wa Masáare ˆYarɨ Mpeho
12 Haaha, vakumbusikya ndɨrɨ masáare aya sikʉ joosi, baa neembe mʉyamányire na yiisikana kwa kɨra kɨkomi ˆmʉrɨ nocho. 13 Nookoona nɨ ʉwoloki kuviinukya ko vakumbusikya masáare aya mpɨɨndɨ ˆnkaarɨ kɨvaandii ɨkɨ, noo kʉsea muvirii waanɨ. 14 Sa nɨ taanga niise, sikʉ ˆjookʉʉja chaangʉ aha mbere, kɨvaanda chaanɨ vɨɨkwa kɨrɨ ivarwii ja ˆvyeene Mweenevyoosi wiitʉ, Yéesu Kirisitʉ aanyónekiirye. 15 Naanɨ bweeyya ndɨrɨ kɨra ˆkɨrɨ dahɨka kwaandɨka, sa ˆndɨrɨ looka, mʉdahe kʉmbʉkɨra masáare aya sikʉ joosi.
16 ˆTʉkavawyɨɨre lʉvɨro lwa kʉʉja kwa Mweenevyoosi wiitʉ, Yéesu Kirisitʉ, sɨ tavaa mbuwo jo vaanga kwa ʉweere tʉkʉ, maa kaa, tavawyɨɨra ʉkʉ́ʉ́lʉ ʉra ˆtoona kwa miiso yiiswi. 17 Yeeye aheewa nyemi na nkongojima fuma kwa Mʉlʉʉngʉ Taáta, sawúti ˆɨkʉʉje kwa Nkongojima Nkʉʉlʉ yoosea, “Ʉhʉ nɨ Mwaana waanɨ ˆnamweenda, neériwaa mʉtɨma nɨ yeeye.” 18 Suusu veeneevyo tɨɨteera sawúti ɨhɨ ˆngʼeene ɨjáa yafuma kurumwii mpɨɨndɨ ˆtʉjáa ne luulwii lʉra lʉʉja.✡Laanga Matáayo 17:5; Maáriki 9:7. 19 Kei tatɨɨte ɨrɨ isáare ra ʉláali na mʉtwe ˆrɨrɨ kɨɨntʉ cho kiilaangya mʉnʉmʉʉnʉ. Ɨro isáare koonɨ mʉrɨláangire ja kɨmʉrɨ ˆkɨlávalavaa haantʉ ˆharɨ na kilwiirya, nɨ vyabooha moobweeyya fʉʉrʉ kʉmwaae, na Kirisitʉ noo kʉsea, nyényeeri ya mʉtóondo ɨtʉle mitimii yaanyu. 20 Mweeri ya vyoosi moosaakwa mʉtaange, kusiina ʉláali na mʉtwe wa Masáare ˆYarɨ Mpeho ˆmweene wavariyʉlwa nɨ mʉláali na mʉtwe, ja ˆvyeene mʉláali na mʉtwe mweeneevyo asaakáa tʉkʉ. 21 Sa kusiina ʉláali na mʉtwe ˆwʉʉ́jaa kwa kweenda kwa vaantʉ vii kaa tʉkʉ, maa kaa, vaantʉ valʉ́ʉsaa yara ˆyafúmaa kwa Mʉlʉʉngʉ kʉnʉ voolongoolwa nɨ Mʉtɨma Mʉʉja.
✡1:18 Laanga Matáayo 17:5; Maáriki 9:7.