Barʉ́wa ya kavɨrɨ ya Paúli kwa
Vatesaloníike
Mʉlongooryo
Barʉ́wa ya kavɨrɨ kwa Vatesaloníike yaandɨkwa nɨ mutumwi Paúli (1:1). Vamanyi va masáare valʉ́ʉsaa Paúli aandɨka barʉ́wa ɨhɨ mpɨɨndɨ kiduudi keende ˆaandɨka barʉ́wa ya ncholo, noo kʉsea kati ya myaaka ya 51-52 keende Kirisitʉ ˆavyaalwa. Aandɨka barʉ́wa ɨhɨ viintʉ ˆajáa akaarɨ Koríinto.
ˆVyeene vyoónekanaa, vaantʉ vamwɨ va Tesaloníike vajáa vakwaatya masáare ya ʉloongo ˆyaseáa kʉʉja lwa kavɨrɨ kwa Yéesu kwahʉmʉla (2:1-2). Miiririkano ɨhɨ ɨjáa ɨmwaarɨ baa kwa vaantʉ ˆvamuruma Yéesu va Eféeso (2 Timotéeo 2:18). Sa jeyyo, Paúli aandɨka barʉ́wa ɨhɨ kʉvatuurya mɨtɨma Vatesaloníike kʉrɨ kuruma kwaavo, noo kʉsea, Yéesu akaarɨ hɨndʉka lwa kavɨrɨ. Kei avasea vɨɨme neeja kʉrɨ ukiindya waachwe (2:15-17). Vanehe vaantʉ ˆvamuruma Yéesu vavira na vatuube tʉmama mɨrɨmo yaavo ko manyɨka (3:6-15).
ˆVyeene Kɨtáabu ɨkɨ Chagavwa
Paúli yoomʉdʉʉmba Mʉlʉʉngʉ na yoovaloombera Vatesaloníike 1:1-12
Ʉvɨ lookerera ʉrɨ de Mweenevyoosi ʉʉje 2:1-12
Ʉlairiri wɨɨngɨ na kʉvalʉma kutu 2:13-17
Paúli yoovaloomba Vatesaloníike vɨndoomʉloombera 3:1-5
Vaantʉ ˆvamuruma Yéesu vanehe uvira na lʉmbɨ jo kiimikirirya 3:6-18
1
Lʉmbɨ
1 Barʉ́wa ɨhɨ, yafúmire kʉrɨ nɨɨnɨ Paúli, Siliváano na Timotéeo. Nɨ kʉvaandɨkɨra tiise nyuunyu mpuka ya vaantʉ ˆmwamuruma Yéesu ʉko múujii wa Tesaloníike. Nyuunyu mʉrɨ vaantʉ va Mʉlʉʉngʉ Taáta wiitʉ na va Yéesu Kirisitʉ Mweenevyoosi. 2 Nduwo na mwiikalo mʉʉja fuma kwa Mʉlʉʉngʉ Taáta wiitʉ, na kwa Yéesu Kirisitʉ Mweenevyoosi wiitʉ, jive na nyuunyu.
Ʉlamu Sikʉ Kirisitʉ ˆArɨ Hɨndʉka
3 Vanaviitʉ, tasaakwa tʉmʉdʉʉmbe Mʉlʉʉngʉ sikʉ joosi sa nyuunyu. Toobweeyya jeyyo, sa kumuruma kwaanyu Yéesu na kwiiyenda nyuunyu kwa nyuunyu, kookʉla. 4 Sa jeyyo, tookiivaa vipeembe mbere ja mpuka ja vaantʉ ˆvamuruma Mʉlʉʉngʉ sa kuyimirirya kwaanyu na kuruma kwaanyu ˆkweene mʉrɨ noko, baa neembe moolʉmana na uturikiri na ʉfafu.
5 Ayo yoónekyaa ʉlamu wa Mʉlʉʉngʉ nɨ wa kɨkomi. Sa jeyyo, nyuunyu valwa mʉrɨ vawoloki kwɨɨngɨra Ʉtemii wa Mʉlʉʉngʉ. Na sa ʉwo Ʉtemi, mooturikiriwa. 6 Mʉlʉʉngʉ alámʉlaa kwa ʉwoloki, yeeye kʉvalaɨra arɨ chiirʉ vara ˆvoovaturikirya. 7 Nyuunyu ˆmootʉrɨkɨra, Mʉlʉʉngʉ vahumulukya arɨ hamwɨ na suusu. Mʉlʉʉngʉ bweeyya arɨ jei mpɨɨndɨ Yéesu Mweenevyoosi ˆarɨ kʉʉja fuma kurumwii, hamwɨ na mirimʉ yaachwe miija ˆɨrɨ na ngururu, 8 na mooto ˆʉkórɨɨre. Yeeye valaɨra arɨ chiirʉ vara sɨ ˆvamʉmányire Mʉlʉʉngʉ, na vara sɨ ˆvarɨ matu kwa Masáare Maaja ya Mweenevyoosi wiitʉ, Yéesu. 9 Avo valaɨra arɨ chiirʉ kwa imalo ra sikʉ ˆjisiina ʉhero, na kerwa varɨ fuma ngururwii ya nkongojima ya Mweenevyoosi. 10 Kʉlaɨrwa chiirʉ ʉko, kʉʉja kʉrɨ sikʉ Mweenevyoosi ˆarɨ hɨndʉka noo bweeyyiriwa nkongojima nɨ vaantʉ voosi ˆvamuruma. Nyuunyu kʉva mʉrɨ vamwɨ vaavo, sa nyuunyu mwaruma isáare riiswi ˆreene tavaretera.
11 Sa jeyyo, tavalóomberaa mpɨɨndɨ joosi, Mʉlʉʉngʉ avabweeyye mʉdahe valwa mwɨɨma neeja kʉrɨ kʉvaanɨrɨra kwaachwe. Kei tooloomba Mʉlʉʉngʉ kwa lʉvɨro lwaachwe akiimikirirye masáare yoosi maaja ˆmeene moosaaka tʉmama, na mɨrɨmo yaanyu yoosi ya kuruma. 12 Tooloomba jeyyo, sa irina ra Mweenevyoosi rɨndoobweeyyiriwa nkongojima sa nyuunyu. Kei, nyuunyu mʉndoobweeyyiriwa nkongojima nɨ yeeye, kwa nduwo ya Mʉlʉʉngʉ na ya Yéesu Kirisitʉ Mweenevyoosi wiitʉ.