7
Vaantʉ va Mʉlʉʉngʉ Hona Varɨ
1 Ayo ˆyakalooke, nkoona mirimʉ miija ɨne, yiímire vichurii vine vya weerʉ, ˆɨkɨ́tɨɨre mpeho ɨdɨɨre wuva fuma mavaru yoosi mweeri ya ɨsɨ, mweeri ya mayɨya, na mweeri ya mʉtɨ wowoosi. 2 Aho, maa nkoona murimʉ mʉʉja wɨɨngɨ wookaambʉka fuma itʉʉmba ˆʉrɨ na mʉtooso wa Mʉlʉʉngʉ ˆArɨ Nkaasʉ. Ʉwo murimʉ mʉʉja ʉkɨɨtʉrɨra isóso kwa sawúti nkʉʉlʉ ɨra mirimʉ miija ɨne ˆmyeene ɨjáa yaheewa lʉvɨro lo saambʉla ɨsɨ na mayɨya. 3 Ʉkasea, “Karɨ mʉsaambʉle ɨsɨ, mayɨya au baa mɨtɨ tʉkʉ, mpaka tʉhʉmʉle kʉvavaa mʉtooso vatʉmami va Mʉlʉʉngʉ wiitʉ vipáamii vyaavo.”
4 Aho, nkateera hesáabu ya vara vaantʉ ˆvavawa mʉtooso, fuma nkolo joosi ja Isiraéeli, avo nɨ mayana igana rɨmwɨ, makumi yanɨ na ine (144,000) vajáa.
5 Kufuma lʉkolo lwa Yʉ́ʉda vavawa mʉtooso, mayana ikimi na yavɨrɨ (12,000),
kufuma lʉkolo lwa Rʉ́beni, mayana ikimi na yavɨrɨ,
kufuma lʉkolo lwa Gáadi, mayana ikimi na yavɨrɨ,
6 kufuma lʉkolo lwa Ashéeri, mayana ikimi na yavɨrɨ,
kufuma lʉkolo lwa Nafutáali, mayana ikimi na yavɨrɨ,
kufuma lʉkolo lwa Manáase, mayana ikimi na yavɨrɨ,
7 kufuma lʉkolo lwa Simeóoni, mayana ikimi na yavɨrɨ,
kufuma lʉkolo lwa Láawi, mayana ikimi na yavɨrɨ,
kufuma lʉkolo lwa Isakáari, mayana ikimi na yavɨrɨ,
8 kufuma lʉkolo lwa Sabulóoni, mayana ikimi na yavɨrɨ,
kufuma lʉkolo lwa Yooséefu, mayana ikimi na yavɨrɨ,
na kufuma lʉkolo lwa Bénjamini, mayana ikimi na yavɨrɨ yajáa yavawa mʉtooso.
Iyɨɨmbɨ ra Vaantʉ ˆValamuririrwa
9 Aya ˆyakalooke, maa nkoona iyɨɨmbɨ ra vaantʉ, kusiina mʉʉntʉ ˆarɨ daha kʉvavala tʉkʉ. Vaantʉ fuma kɨra ɨsɨ, kɨra lʉkolo, kɨra ndʉʉ, na fuma kɨra ndʉʉsɨka viímire mbere ya rɨra ichuumbi ra kɨtemi na mbere ya Mwaana wa Muundi. Vaantʉ avo, viivɨ́kɨɨre nkáancho njerʉ, na matáampi ya mɨtéende vakwáatɨrɨɨre mɨkonwii yaavo. 10 Vakalʉʉsa na sawúti nkʉʉlʉ voosea,
“Ʉlamuriri wafúmaa kwa Mʉlʉʉngʉ wiitʉ,
yeeye ˆiíkalaa ichuumbii ra kɨtemi,
na kwa Mwaana wa Muundi.”
11 Mirimʉ miija yoosi ɨjáa yɨɨma mavaru yoosi, kʉrɨɨngɨrɨra rɨra ichuumbi ra kɨtemi, vara vawosi makumi yavɨrɨ na vanɨ (24), na vira viúumbe vine ˆviri mooyo. Vakalaala ɨsɨ na ɨnda mbere ya ichuumbi ra kɨtemi, maa vakamwiinamɨra Mʉlʉʉngʉ, 12 voosea,
“Kɨkomi!
Adʉʉmbwe, aheewe nkongojima, aheewe tooti,
aheewe dʉʉmbɨ, nyemi,
lʉvɨro na ngururu,
Mʉlʉʉngʉ wiitʉ kwa sikʉ ˆjisiina ʉhero.
Kɨkomi!”
13 Aho, ʉmwɨ wa vara vawosi makumi yavɨrɨ na vanɨ akaanjurya, “Ava vaantʉ ˆviivɨ́kɨɨre nkáancho njerʉ nɨ vala ani? Ʉmányire nɨ hai ˆvafúmire wʉʉ?”
14 Maa nkamʉsea, “Ee mʉkʉ́lʉ, weewe wamányire.” Maa akaansea, “Ava noo vara vaantʉ ˆvafuma uturikirii mʉkʉʉlʉ. Voovo vafula ɨngo jaavo sakamii ya Mwaana wa Muundi, maa jikeera chwee.
15 Sa jeyyo, nɨ mbere ya ichuumbi ra kɨtemi ra Mʉlʉʉngʉ varɨ,
voomʉtʉmamɨra Mʉlʉʉngʉ Kaayii yaachwe Njija chɨrɨrɨ chobu,
na yeeye ˆiíkyɨɨre ichuumbii ra kɨtemi,
kova arɨ itibu mweeri yaavo.
16 Kɨkomi sɨ vakaavirwe nɨ njala vii kaa tʉkʉ,
kɨkomi sɨ vakɨɨne nyóota vii kaa tʉkʉ.
Mwaasʉ sɨ ʉkavalunguriirye tʉkʉ,
baa irʉtɨra sɨ rɨkavachimikire tʉkʉ.
17 Sa Mwaana wa Muundi,
ˆiíkalaa katɨkatɨ ya ichuumbi ra kɨtemi,
kʉva arɨ muríisi waavo.
Yeeye valongoola arɨ
na mpulii ja maaji ya nkaasʉ.
Na Mʉlʉʉngʉ vahonola arɨ kɨra miísoori yaavo.”