1 Na halalik, ine a munaur a pas ning a tumusi tetek mulo. Pa te na naur a pas rop ne, a anuknuk ulak mulo ana ututnala, sur a nuknukimulo ir tostos. 2 3:2 Jut 1:17A mang sur mulor nuk pas na warwara ning a propetla ane God la ka warwara nigo tar onoi, pa mulor nuk pasi otleng a warkurai ana nundala a Leklek pa Tena Alaun, ning a aposella la ka atai tar mulo onoi.

3 3:3 1 Timoti 4:1; Jut 1:18A ningnigo na utna, mulor tasmani mang, ana ararop a pukakiarla, dingla na tena morot lar hanot pa lar mur ka na laulau a nuknukinla. Lar morot laulau, 4 3:4 Matiu 24:48pa lar atongi mang, “Kanaha ma a tinan ot ulak ane Iesu, ning i lele tar onoi? Turpasi ana raula ning na tumtubundala nating la mat, a ututnala i tur larot ning e God i akes tar la ana kamkam a akakes.”

5 3:5 Stat 1:6-9Ika ning la atongi larning, la duman seni mang, natnating ot, e God i akes a bakut pa rakrakan hanua ana anuna warwara ot. I akes a rakrakan hanua ana malum, pa i masa ot miting na malum. 6 3:6 Stat 7:11; 2 Pita 2:5I sune a lomom pa i alaulau a rakrakan hanua ne ana malum. 7 Ana warwara otne e God i tong akes a bakut pa rakrakan hanua ne dala oroi diau, sur dia harnanai sur a pukakiar a warkurai, ning a iah ir alaulau diau, pa a taraila otleng ning bel la tol a toltol ning e God i mang suri.

8 3:8 Buk Song 90:4Na halalik, gong mulo duman ning a utna ne: Ning a pukakiar i arlar ana ning a rip a rau tetek a Leklek, pa ning a rip a rau i arlar ka ana ning a pukakiar teteki. 9 3:9 Habakuk 2:3; 1 Timoti 2:4A Leklek bel i wowon sur ir tolsot pas anuna lele mang ir ulak, larning dingla na tarai la nuki. I kes nanan pas mulo, anasa bel i mang sur tik ir hirua. I mang sur a taraila rop lar lingir a nuknukinla.

10 3:10 Luk 12:39; 1 Tesalonika 5:2; Matiu 24:29, 35Ika a pukakiar anuna Leklek ir hanot arlar ana tena kinkinau. A bakut ir rorom ana tnan unga, pa na akakes kanisaot onoi lar laulau ana tnan iah, pa rakrakan hanua pa ututnala rop ning kaning ia, lar rorom*3:10 Ana dingla na buk ana warwara Grik di tumusi larne, “lar rorom”, pa ana dingla otleng di tumusi larne, “lar hangan rop ana iah.” . 11 Ning a ututnala rop ne lar laulau larne, esi na ngas a lalaun ning mulor muri? I wakak ning anumulo a lalaun ir totoh, pa mulor tol a toltol ning e God i mang suri, 12 ning mulor harnanai sur a pukakiar ane God, pa mulor aboso a pukakiar sur ir hanot kapit. Ana pukakiar ning, e God ir tun sen a bakut, pa na ututna saot na bakut ir polo ana tnan laplapang a iah, pa ir rorom. 13 3:13 Aisaia 65:17; 66:22; Tatatai 21:1, 27Ika, dala harnanai sur a utna ning e God ka lele tar onoi: a tona langit pa tona rakrakan hanua otleng, ning a tostos a toltol ir kes onoi.

14 Na halalik, ning mulo kes harnanai sur a pukakiar ning, mulor rakrakai sur a magiramulo bel ta dur ono, pa bel dir tiu sot pas mulo on ta rongo, pa mulor kes na balmolmol taum oe God. 15 3:15 Rom 2:4Mulor nuk pasi, a Leklek belot i hanot, anasa i harnanai sur a taraila lar lingir a nuknukinla pa ir alaun pas la. A warwara ne, e Pol otleng, a tasindala, ka tumus tari nating tetek mulo. I tumusi ana tastasmai ning e God i saran tari tana. 16 Ting na nuna bukla rop, ning i warwara ana ututnala ne, anuna warwara i arlar ana saning ia ka atong tari. Dingla na warwara ning i tumusi, i ngangaten sur dir tasman a kamkamna. Pa dingla na tarai ning bel la talapor wakak onoi, pa anunla a tortorot i gulgule ka, anunla a papak onoi i rongo ka, arlar ana nunla a papak ana dingla na warwara otleng ting na Buk Tabu. Pa la ot lar hirua onoi.

17 3:17 Mak 13:33; 1 Korin 10:12Ika mulo, na halalik, mulo ka tasman a ututnala ne. I maining mulor tai alar mulo, sur gong a tarai na kutus warkurai lar ben rongon mulo sur anunla na asaer ning i rongo, pa mulor punga kusun a rakrakai a keskes ning onone mulo ka kes onoi. 18 I wakak sur mulor gomo tingui na marmaris ane Iesu Karisito anundala a Leklek pa Tena Alaun, pa mulor gomo otleng ana numulo a tastasmai onoi. Dalar atong aleklek pasi, onone pa lamur pa bel ir rarop! Amen.