1 Na tastasimitol, ning a warwara otleng ning mitol ir atai mulo onoi, mang mulor nunung o mitol, sur a warwara anuna Leklek ir han sarara kapit pa a tarai lar hanrawai i larning mulo hanrawai i. 2 Pa mulor nunung o mitol sur e God ir alaun mitol kusun a laulau a tarai, anasa bel a taraila rop la tortorot.

3 Ika a Leklek i momol, pa ir arakrakai mulo pa ir tai alar mulo otleng kusun e Satan. 4 Mitol tortorot ana Leklek mang kaning ot mulo tol a ututnala ning mitol ka atai tar mulo onoi, pa bel mulor manah na toli larning.

5 Mitol nunung a Leklek sur ir nigon a nuknukimulo sur mulor tasman momol a marmaris ane God pa mulor tasman otleng a tuntunur rakrakai ana mamahatla ning e Karisito ka asangan tari tetek dala.

6 Na tastasimitol, mitol nunung mulo ana risana Leklek e Iesu Karisito, sur mulor han masik kusun na tastasindala ning la ngoro pa bel la mur a asasaerla ning mitol atai mulo onoi. 7 Mulo ot mulo ka tasmani mang i wakak ning mulor mur a wakak a toltol ning mitol ka tol tari namatamulo. Anasa, ning mitol kes taum o mulo, palao mitol bel i ngoro. 8 Bel mitol ien oros pas ta utna na hangan tan tik ning bel mitol lou i. Mitol titol rakrakai ana moromla pa a kabakiarla ana kumitol, sur gong mitol saran a mamahat tetek ta halimulo sur ir nangan mitol. 9 I tostos ning mitol ar nunung mulo sur mulor nangan mitol. Ika bel mitol toli. Mitol titol rakrakai ot sur mitol ar tai alar mitol, sur mitol ir asangan a wakak a toltol ne tetek mulo sur mulor muri. 10 Ning mitol kes napirim mulo, mitol saran a warkurai ne tetek mulo: Ning tik bel ir titol, gong i hangan.

11 Mitol longori mang dingla o mulo la ngoro. Bel la titol, la molot ka ana subaran la ana utna ning bel anunla. 12 Ana risana Leklek e Iesu Karisito mitol sairas a ngas a taraila ning, pa mitol nunung la, sur lar mur a molmol a lalaun pa lar titol sur anla ta utna na hangan ning lar ieni. 13 Pa tetek mulo na tastasimitol, mulor rakrakai sur mulor tol a tostos a toltol, pa gong a palaomulo i ngol onoi.

14 Ning tik bel i longor ana numitol a warwara ana pas ne, mulor nuk akesi. Gong mulo lasan taum onoi, sur ir oroi lalan anuna lalaun pa ir meme onoi. 15 Ika gong mulo oroi larning anumulo a hirua, mulor atumarang pasi ka arlar larning a tasimulo.

16 Mitol nunung a Leklek ning a kamkama bal molmol, sur i ot ir tabar mulo ana bal molmol ana pukakiarla rop pa ana urmatana keskes ning mulo barati. A Leklek ir kes taum o mulo rop.

17 Anuk siklik warwara na marmaris ne, iau ot e Pol, a tumusi tetek mulo ana kuk. Ine a akinalang ana nuka bukla rop. A sira tumtumus ot larne.

18 A marmaris ana nundala Leklek e Iesu Karisito ir kes taum o mulo rop.