A Wakak a Warwara ane God 2 Timoti 1

A munaur a Pas

ane Pol tetek

e Timoti

A warwara talapor nigo

Ning e Pol i kes ting na karabus to e Rom i tumus a pas ne. E Timoti i a tena titol taum oe Pol, pa lamur i hanot a tena tai alar ana lotu to e Epeses.

E Pol i tasmani mang milau ma ir mat, pa i tumus a pas ne. I mang sur ir arakrakai a tortorot ane Timoti. I atai i otleng mang gong i manah ana warawai ana Wakak a Warwara.

A tinan ana Munaur a Buk Timoti:

A kamkama buk ne (1:1-2)

E Pol i gas oe Timoti pa i mang sur ir rakrakai ana titol (1:3—2:13)

A toltol anuna momol a tena titol (2:14-26)

A toltol anuna taraila ana ararop a pukakiar (3:1-9)

E Pol i arakrakai e Timoti (3:10—4:5)

E Pol i warwara ono i ot (4:6-18)

A ararop a warwara ane Pol tetek e Timoti (4:19-22)

1 Iau e Pol, a aposel ane Karisito Iesu ana nuknuk e God, sur ar atatai ana lalaun ning ka lele tari tetek dala ning dala ane Karisito Iesu. 2 A tumus a pas ne tetek u Timoti a wakak a natuklik ana tortorot. A marmaris pa wakak a toltol pa balmolmol, ta e God a Tamandala, pa e Karisito Iesu anundala Leklek ir kes hom.

E Pol i arakrakai a tortorot ane Timoti

3 A atong wakak tetek e God, esaning a titol teteki ana nuknuk ning bel ta rongo na matana e God, arlar ana tumtubuk tagun nating. A atong wakak teteki ana moromla pa kabakiarla ning a araring sur u. 4 A nuk pas u kale ning u domos iau, pa a mang kol sur ar oroi u sur ar bukus ana gasgas. 5 A nuk pas anum a momol a tortorot, ning i arlar ana tortorot ana naur a hane ne, e tubum e Lois pa e tnam e Iunis. A tasmani mang a ngasa tortorot ne, ka kes otleng hom. 6 I maining a atai u kale sur ur alaun ulak a artabar ning e God i tabar u onoi ana pukakiar ning a suah tar naur a kuk saot hom. 7 Anasa e God bel i tabar dala ana ingun a matmataut. I tabar dala ana Talngan Tabu ning i saran a rakrakai tetek dala, pa marmaris, pa toltol ning taktakai i warkurai tostos pas anuna lalaun.

8 Pa gong u meme sur ur atatai ana Leklek anundala, pa gong u meme hok ning a kes te na karabus ana risana. Ika, ur sang sur u otleng ur kilang kankan ana Wakak a Warwara taum hok. Pa e God ot ir saran a rakrakai tetek u ning ur titol. 9 I ot ka alaun pas dala, pa ka kabah pas dala sur dala anuna totoh na tarai. Bel i kamkamna ana nundala wakak a titol. I kamkamna ot ana nuknukna, pa anuna marmaris, ning i saran tari tetek dala oe Karisito Iesu, nating ot ning belot i akes a rakrakan hanua. 10 Pa onone, dala ka oroi a marmaris ane God tetek dala ana tinan ot ana nundala Tena Alaun e Karisito Iesu, esaning i kamar sen a rakrakai ana minat. Pa ana Wakak a Warwara i atalapor a lalaun tikin.

11 E God ka aslang pas iau sur ar tena warawai ana Wakak a Warwara ne, ar aposel onoi par tena asaer otleng onoi. 12 Ine a kamkamna ning a kilang kankan larne. Ika, bel a meme, anasa a tasman esaning a tortorot onoi. I momol kol, a tasmani mang ir tolsot pasi sur ir tai alar a titol ning i saran tari tak, tuk ana pukakiar a warkurai.

13 Ur mur a tostos a asaer ning u ka longor tari tak, pa ir arlar ana wakak a manar sur ur muri ning ur asaer a tarai. Pa ur tur rakrakai ana tortorot pa marmaris anundala ning dala kes taum oe Karisito Iesu. 14 Ana rakrakai ana Talngan Tabu ning i kes ondala, ur tai alar wakak a Wakak a Warwara ning e God ka saran tari tam.

15 U tasmani mang a tena tortorotla rop ning la kes to na papar Esia la ka han kusun iau. E Pigelus pa e Hermogenes naur onla. 16 A araring sur e God ir maris e Onesiporus latamana, anasa e Onesiporus i sira agasgas iau, pa bel i meme hok ning a kes ting na karabus. 17 Ning i hanot te e Rom i tai amon sur iau, tuk ning i pastek iau. 18 A araring sur a Leklek ir maris e Onesiporus ana pukakiar a warkurai. U tasman wakak a titol ning ka tol tari tetek iau tumo e Epeses.

1:2: 1:2 Aposel 16:11; 1 Timoti 1:2

1:3: 1:3 Aposel 23:1

1:5: 1:5 Aposel 16:1

1:6: 1:6 1 Timoti 4:14

1:7: 1:7 Rom 8:15

1:8: 1:8 Epeses 2:8-9; Taitus 3:5

1:10: 1:10 Hibru 2:14

1:11: 1:11 1 Timoti 2:7

1:14: 1:14 1 Timoti 6:20