A Wakak a Warwara ane God Galesia 1

A Pas ane Pol tetek a tarai

Galesia

A warwara talapor nigo

E Pol i tumus a pas ne tetek a tarai ning la kes ting na hananuala tumo na papar Galesia. Lanigo e Pol i han taltal ting na hananuala tumo na papar Galesia pa i warawai ana Wakak a Warwara tetek la. A tarai a lotu tumo e Galesia bel a tarai Juda, pa e Pol i atai la mang, ning lar tortorot ka oe Iesu e God ir alaun pas la. Pa bel al ngas ulak ma sur e God ir alaun pas la onoi.

Lamur a tarai Juda la hanot pa la atongi mang, a warwara ane Pol bel i tostos. La atongi mang, a tarai a lotu lar mur a Warkuraila ane Moses, sur lar tostos na matana e God, pa dir kot talilis a tarai a lotu rop. A kot talilis i arlar ana asilang mang la ka arlar ana tarai Juda pa lar mur rop a Warkuraila ane Moses pa anuna tarai Juda.

Ning e Pol i longori i balakut kol. I atongi mang, anunla asaerla bel i tostos. Sakana dala tostos anasa dala mur a Warkuraila ane Moses, a minat ane Iesu ir utna oros ka, pa bel ir tolsot sur ir kepsen anundala na toltol laulau. E Pol i warwara rakrakai tetek a tarai Galesia te na pas ne. I mang sur lar han masik kusun a asaerla anuna asasongo na tena asaerla, pa lar ulak sur a tortorot ka oe Iesu.

A tinan ana buk Galesia:

Ning a Wakak a Warwara ka (1:1-10)

E Pol i hanot a aposel momol (1:11—2:21)

E God ir alaun dala kamna ka ana nundala tortorot oe Iesu, bel kamna ning dala mur a Warkuraila (3:1—4:31)

Dala langolango kusun a rakrakai ana toltol laulau pa dalar mur a nuknuk ana Talngan Tabu (5:1—6:10)

A ararop a warwara ane Pol tetek la (6:11-18)

1 Iau e Pol, a aposel, a tumus a pas ne tetek mulo. Bel ta barsan mite lapiu i aslang pas iau, pa bel otleng a tarai la sune iau sur ar aposel. E Iesu Karisito ot pa e God a Tamana, dia aslang pas iau. E God, esaning i akamtur ulak pas e Iesu kusun a minat. 2 Pa a tastasikla rop ning mila kes taum te, la malmaling taum hok te na pas ne tetek mulo a tarai a lotu rop ting na papar Galesia.

3 A marmaris pa a balmolmol ta e God a Tamandala pa a Leklek e Iesu Karisito ir kes omulo. 4 E Iesu i saran anuna lalaun sur anundala na toltol laulau, sur ir alangolango dala kusun a toltol laulaula ning a tarai la toli ana raula ne. I saran anuna lalaun mang ot lar a nuknuk ana nundala God a Tamandala. 5 Dalar rakan alekleki, pa bel ir rarop. Amen.

Takai ka a Wakak a Warwara

6 A kulkulan kol mang belot i bongnani, pa mulo ka han masik kusun e God, ning i kabah pas mulo ana marmaris ane Karisito. Pa onone mulo ka talingir sur a maskana asaer. 7 A asaer ning, bel a Wakak a Warwara, ika onone dingla na tarai la aloklokron mulo pa la mang sur lar lingir a Wakak a Warwara oe Karisito. 8 Ning mila ot, o ta angelo otleng misaot na langit ir warawai ana maskana asaer, ning bel i arlar ana Wakak a Warwara mila warawai tetek mulo onoi, i wakak ning ir hirua tikin ana warkurai ane God. 9 Ia ka atai nigon tar mulo, pa onone ar atong ulaki mang, ning tik ir warawai tetek mulo anal asaer ning bel i arlar ana Wakak a Warwara ning mulo ka kibas pasi, i wakak sur ir hirua tikin ana warkurai ane God!

10 Bel a mang sur a tarai lar agasgas pas iau, a mang ka sur e God ot ir gas hok. Bel a mang sur ar agasgas ka a tarai. Ning ar agasgas ka a taraila, iau bel a tena titol oros ane Karisito.

E God ot i kabah pas e Pol sur ir aposel

11 Na tastasikla, a mang sur mulor tasmani mang a Wakak a Warwara ning a warawai onoi, bel a asaer anuna tarai mite lapiu. 12 Bel a kibasi tana tarai, pa bel otleng di asaer iau onoi. E Iesu Karisito ot i atalapori tak.

13 Mulo ka longor tar anuk a ngas a lalaun tagun nating, ning a tur rakrakai ana lotu Juda, pa a alaulau kol a tarai a lotu ane God, pa a tohoi sur ar kamar sen la. 14 A tur rakrakai ana lotu Juda, pa anuk a tastasman ana lotu i itna tana halalikla rop ning anumila na rau i arlar. A rakrakai kol, sur ar mur wakak a toltolla anuna tumtubuk tagun nating. 15-16 Ika, ning belot di agon iau, e God ka aslang pas iau, pa ana nuna marmaris, i kabah pas iau. Pa i gas sur ir asangan e Iesu e Natnalik tetek iau, sur ar warawai onoi tetek a taraila ning bel a tarai Juda. Bel ta barsan i asaer iau onoi. 17 Pa bel a han usaot e Jerusalem tetek la ning la ka aposel nigo tak sur lar asaer iau. Ika a han kakat uto e Arebia*, pa lamur a ulak utumo e Demaskas.

18 Lamur tana natol a rau, a bot han usaot e Jerusalem sur ar tasman e Pita, pa a kes taum onoi ning a bonot pa pisir dilima na pukakiar. 19 Bel a oroi ta aposel otleng, e Jems ka a tas a Leklek. 20 Oroi i! A lele na matana e God mang asaning a tumusi tetek mulo bel ta asasongo!

21 Lamur a han utumo na papar Siria, pa papar Silisia. 22 Ika a tarai a lotu ane Karisito tumo e Judia bel la tasman iau. 23 La longor ka a warwara hok mang, “A barsan ning i mang sur ir alaulau dala, onone i warawai kama ana tortorot oe Iesu, ning nating i mang sur ir kamar seni.” 24 Pa la rakan aleklek pas e God anasa hok.

1:4: 1:4 Galesia 2:20

1:7: 1:7 Aposel 15:1, 24

1:8: 1:8 1 Korin 16:22

1:10: 1:10 1 Tesalonika 2:4

1:11: 1:11 Matiu 16:17

1:13: 1:13 Aposel 8:3

1:14: 1:14 Aposel 22:3

1:15-16: 1:15-16 Aisaia 49:1; Galesia 2:7

*1:17: 1:17 E Arebia a hanua bel.

1:18: 1:18 Aposel 9:26

1:21: 1:21 Aposel 9:30