1 Kabakiar kobot ning ot, a leklek a tena artabarla tetek e God, a ningnigola, pa a tena asaerla tagun a warkurai taum ana tarai a kiwung rop, la warwara taum. La dot pas naur a kuna e Iesu, la ben pasi pa la saran tari ta e Pailat. 2 E Pailat i dekeni mange, “U a King anuna tarai Juda?” Pa e Iesu i kelesi mange, “Lar ot ning u ka atongi.” 3 A leklek a tena artabarla tetek e God la arup e Iesu ana galis a utna. 4 E Pailat i deken ulaki mange, “Bel anum ta warwara na arkeles? Oroi, a galis a utna kol la arup u ono.” 5 Ika e Iesu bel i kelesi ana ta warwara, pa e Pailat i kulkulan.

6 Ana lotula rop na Han Lakai, e Pailat i sira pak sen ta mainla ning i dodot ning a tarai la nunung suri. 7 Ning a barsan a risana e Barabas i kes ana rumai a dodot. A halinla ning la harum taum ana matanitu, pa la umkol a taraila ana arsakai. 8 Ning a kunum a tarai la hanot tetek e Pailat, la nunungi mang ir pak sen ulak ta mainla ning i dodot. 9 Pa e Pailat i deken la mange, “Mulo mang sur ar pak sen a ‘king anuna tarai Juda’ tetek mulo?” 10 I atongi manglarne anasa ka tasmani mang a leklek a tena artabarla tetek e God la saran tar e Iesu teteki ana nuknuk laulau. 11 Ika a leklek a tena artabarla tetek e God la angongos a kunum a tarai sur lar nunung e Pailat sur ir pak sen tar e Barabas tetek la. 12 E Pailat i deken ulak la mange, “Asa ning ar toli o esane ning mulo atongi mang a king anuna tarai Juda?” 13 Pa la kukuk rakrakai mange, “Sai ahati saot na rakai kutus!” 14 E Pailat i deke mang, “Sur asa? Esi na rongo ning ka tol tari?” Ika la kukuk rakrakai ka mange, “Sai ahati saot na rakai kutus!” 15 E Pailat i mang sur ir agasgas a taraila, pa i pak sen e Barabas tetek la. Ning di ka dapis tar e Iesu, e Pailat i saran seni sur lar sai ahati saot na rakai kutus.

16 A tarai a harum la ben e Iesu utisaui ana woroh ana tnan rumai anuna ningnigo, pa la kabah arop pas a kunum a tarai a harum. 17 La apipis tari ana kubar a kaen, la gonoi pas a inau ning a suksukna pa la suah tari ana pukulna arlar ana kukuh anuna king.*A kukuh pa kubar a kaen dia tai arlar ana mermer anuna king. 18 Pa la turpas a arkabah teteki mange, “U a king anuna tarai Juda!” 19 La dapis a pukulna ana rakai, la namsani, la kes ana bokona hanla pa la saran a hanrawai teteki. 20 Ning la ka morot pas onoi, la paksen a kubar a kaen kusuni. La apipis ulaki taum ana nuna kaenla, pa la ben purumi sur dir sai ahati saot na rakai kutus.

21 Ting na ngas a tena harumla la pastetek pas ning a barsan a risana e Saimon, a te Sairini, e tamana e Aleksander pa e Rupus, i han kusun ning a hanua sur ir han usaot e Jerusalem. La angongosi sur ir los a rakai kutus ane Iesu.

22 La ben e Iesu sur a pukna ning di atongi e Golgata, a kamkamna “Pukna na Lasa na Pukulna.” 23 La saran a wain tana, ning di suah taumi ana mira, ika bel i gangi. 24 La sai ahat tari saot na rakai kutus. La asauran pas anuna na kaenla ana pilai laki, sur esi onla ir los ta kaen.

25 La sai ahati saot na rakai kutus ana sihuk a mais a kamis ana kobot. 26 La tumus a warwara na ararup onoi saot na rakai kutus manglarne,

29 Pa la ning la han bolos e Iesu, la hanani pa la halalen pukulunla teteki. Pa la atongi mange, “U ma ning u atongi mang ur regen sen a rumai a artabar, pa ur tol ulak pasi ana natol a pukakiar, 30 purum kusun a rakai kutus pa ur alaun u.” 31 A leklek a tena artabarla tetek e God taum ana tena asaerla tagun a warkurai la otleng la morot o e Iesu. La awara artalai tanla mange, “I alaun pas a taraila masik, ika i ot bel ir alaun lar pasi. 32 Ning i a Karisito, a King anuna tarai Israel, ono otne ir purum kusun a rakai kutus, sur dalar oroi, pa dalar tortorot onoi.” Pa diau otleng, ning di sai ahat tar diau ana naur a rakai kutus ting na pirna, dia hanani.

33 Ana mais a kamis tostos, a hanhanua rop i mormorom tuk ana natola mais a kamis ana rah. 34 Ana natola matanakamis ana rah ning, e Iesu i kukuk rakrakai mange, “Eloi, Eloi, lema sabakatani?” A kamkam a warwara ne i manglarne, “Anuk a God, anuka God, i mangasa ning u han kusun iau?” Buk Song 22:1

35 Dingla na tarai ning la tur milau, la longori pa la atongi mange, “Longori, i arkabah sur e Elaija.” 36 Ning a barsan i dun pa i los pas ning a utna i sira dop akes a malum. I amurung pasi ana wain ning i nginngin, i suah i ana rakai pa i tuslani usaot sur e Iesu ir gang. Pa i atai la mange, “Nanani, dalar oroi, sur ning e Elaija ir hanot sur ir los purum pasi kusun a rakai kutus, o bel.” 37 E Iesu i kukuk rakrakai pas, pa i suah sen a malwasna.

38 A kaen na alalar kutus tingui na rumai a artabar i taksilir potor, turpasi misaot tuk tumot lahin. 39 A ningnigo anuna tena harumla i tur salanigo ta e Iesu, i longor e Iesu i kukuk, pa i oroi a ngas a minat anunai, pa i atongi mange, “I momol ot, a barsan ne a Nat e God.”

40 Dingla na gurarala otleng la ororoi miting na bakbak. Ting na arpotor inla, e Maria Magdalen, pa e Salome pa e Maria otleng tana e Josep pa e Jems a barman. 41 Ditol ne ditol murmur e Iesu ning i kes Galili, pa ditol sira nangani. Pa a galis a gurarala otleng, ning la han taum onoi usaot e Jerusalem, la kes tingia.

42-43 Ning a barsan a risana e Josep, a te Arimatea, takai tagun a tarai a kiwung, a tnan barsan ning a tarai la hanrawai i, i harnanai sur a matanitu ane God. Ning a rah ma ana pukakiar asang, a pukakiar lanigo ana Pukakiar Sabat, i han tetek e Pailat, bel i matmataut, pa i nunung sur a minat e Iesu. 44 E Pailat i kulkulan ning i longori mang e Iesu ka mat. I kabah pas a ningnigo anuna tena harumla, i dekeni mange, “E Iesu ka mat?” 45 Ning ka mananos pas tana ningnigo ne, i malmaling sen a minat e Iesu tetek e Iosep. 46 E Josep i lou pas a wakak a kaen, i los purum pas e Iesu, pa i poroi pasi ana kaen ning. Lamur i akas tari ting na kulam a minat, ning di ka kot tari ting na ris a hat, pa i lingir alar a taman na kulam a minat ana tnan hat. 47 E Maria Magdalen pa e Maria, tana e Josep, dia oroi a pukna ning di aborbor e Iesu ono.