A Pas ane Pol tetek
E Pilimon
A warwara talapor nigo
E Pol i kes ting na rumai a dodot tumo e Rom anasa i warawai ana Wakak a Warwara. Ning i kes tingia, i tumus diat a pas. Takai tetek a tarai Epeses, takai tetek a tarai Pilipai, takai tetek a tarai Kolosi pa takai otleng tetek e Pilimon.
E Pol i tumus a pas ne tetek e Pilimon. E Pilimon a leklek a barsan miting na hanua Kolosi, pa a tena tortorot otleng. Anuna ning a tena titol oros, a risana e Onesimus, i liu pas kusuni. Lamur di doti pa dia arpastetek ma e Pol ting na rumai a dodot. E Pol i warawai teteki pa i lingir a nuknukna. Ning di pak sen e Onesimus, e Pol i mang sur ir ulak tetek anuna ningnigo e Pilimon, pa i tumus a pas ne tetek e Pilimon sur e Onesimus ir losi teteki. I atai i mang gong i balakut tetek e Onesimus, ir gas pasi, anasa ka lingir tar a nuknukna pa i tortorot o e Iesu arlar o e Pilimon.
A tinan ana buk Pilimon:
A kamkama a buk ne (1-3)
A wakak a toltol ane Pilimon (4-7)
E Pol i mang sur e Pilimon ir gas pas e Onesimus (8-22)
A ararop a warwara ane Pol tetek e Pilimon (23-25)
1
1 Iau, e Pol, a kes ting na rumai a dodot anasa a tortorot o e Karisito Iesu. Miau ma e Timoti a tasindala, mia tumus a pas ne tetek u Pilimon, a wakak a halimila ana titol, 2 pa tetek e Apia a tasindala hane, pa tetek e Arkipus a halindala na harum ana Wakak a Warwara, pa tetek a tarai a lotu ning mulo sira han taum ting na num a rumai. 3 A marmaris pa bal molmol ta e God a Tamandala, pa Leklek e Iesu Karisito ir kes taum hom.
A marmaris pa a tortorot ane Pilimon
4 Ning a nunung, a sira nuk pas u, pa a atong wakak tetek e God hom, 5 anasa a longori mang u mang sur a tarai rop ane God, pa u tortorot ana Leklek e Iesu. 6 A nunung mang ur apuasa anuma tortorot o e Karisito tetek a tarai, sur ur mananos kol ana wakak a ututnala rop anundala ning kaning o e Karisito. 7 Tasiklik, ning a longori mang u mang sur a tarai ane God pa u agasgas anunla a lalaun, a gas kol, pa i arakrakai iau otleng.
A nunung ane Pol sur e Pilimon ir malmaling pas e Onesimus
8 Ning a utna a mang kol sur ur toli. Bel a matmataut sur ar warwara rakrakai tetek u onoi, anasa o e Karisito. 9 Ika a nunung wowon u, anasa a mang sur u. Onone ia ka bun, pa a kes te na rumai a dodot anasa a tortorot o e Karisito Iesu. 10 A nunung u sur ur malmaling pas e Onesimus, a natuklik ana tortorot. Iau e tamana, anasa a warwara talapor o e Karisito teteki ning i kes ting na rumai a dodot pa i tortorot. 11 Lanigo bel i tolsot pas ta titol, ika anone, i a wakak a tena titol ma, tetek u pa tetek iau.* A rising Onesimus a kamkamna mang “i topas ot a titol.’
12 Onone a sune ulak seni tetek u. I arlar ana balak rop i han taum ono i. 13 A mang sur ir kes kama napirik, sur ir keles u Pilimon, ana tai alar tetek iau, ning a kes ting na rumai a dodot anasa ana Wakak a Warwara. 14 Ika bel a mang sur ar angongos pas u sur ur nangan iau, a mang sur u ot ur toli ona num a gasgas. Bel ar tol ta utna tuk ning u ot ur malmaling. 15 Ngandek e Onesimus i kes siklik pas kusun u, sur i ma ning ir kes tikin ulak taum hom. 16 Onone bel ir arlar ulak ma ona tena titol oros, ir arlar o e tasimlik momol ana tortorot. A mang suri, ika anuma marmaris teteki ir itna kol, anasa i anuma tena titol pa tasimlik otleng ana Leklek.
17 Ning u nuki mang da halna, ur gas ulak pas e Onesimus, arlar larning ur gas pas iau ot. 18 Ning ka tol tar ta toltol laulau tetek u o i kibas pas anum ta utna, iau ar kelesi tetek u. 19 Iau e Pol a tumus a warwara ne ana kuk ot: ar keles tar a dinau ning tetek u. Bel ar atong ta utna tam, u ot u ka tasmani mang a tona lalaun ning u kibas pasi i kamkamna ot hok, pa i arlar ana dinau tetek u. 20 Momol, tasiklik, ana risana Leklek, a mang sur ur tol asaning ia ka atong tari tam. U a tasiklik o e Karisito, ur agasgas anuka lalaun. 21 Ning a tumus a pas ne, a tasman momoli mang ur longor ot ana nuk a nunung tetek u, pa a tasmani otleng mang ur tol a utna ning i itna kol tana utna ning a nunung u suri.
22 Ning a utna otleng, a nunung u sur ur sang ta tuka rumai tetek iau. A tortorot mang e God ir alangolango sen iau kusun a rumai a dodot sur ar han ulak tetek mulo. Ine a wana numulo na nunung.
A ararop a warwara na marmaris
23 E Epapras, esaning i dodot taum hok anasa ana tortorot o e Karisito Iesu, i saran anuna marmaris tetek u. 24 Pa la otleng ne, e Mak, e Aristarkus, e Demas pa e Luk. Mila na halalinla taum ana titol.
25 A marmaris ana Leklek Iesu Karisito ir kes ana ingumulo.