4
དཀོན༌མཆོག༌ ཐུགས༌ཐད༌ཅེས༌སི༌ མི༌ཚེ༌ ཕུད༌ཅེས༌།
4:1 ནེ༌ 12
1 སྟིང༌ཇུག༌པའེ༌ཀ༌ ཅེས༌པའེ༌ སྤུན༌གུན༌, དཀོན༌མཆོག༌ ཐུགས༌ཐད༌ཅེས༌སི༌ ཕིའ༌ ང༌ཞའེ༌ ཁྱོ༌ཞའ༌ ལབས༌ཁན༌ ནང༌ཞིན༌ མི༌ཚེ༌ ཕུད༌ཅེས༌ལ༌ ཞུའད༌། འོ༌ན༌ ཁྱོ༌ཞའེ༌ ཏེན༌ན༌ ཙོགས༌སི༌ མི༌ཚེ༌ ཕུད༌ཨིན༌ ཨིན༌ནོག༌, ཨིན༌ནའང༌ ཏ༌ ཏ༌རུང༌ངའང༌ མང༌ང༌ ཏེ༌ཙོགས༌སི༌ མི༌ཚེ༌ ཕུད༌ཅེས༌ལ༌ ང༌ཞའེ༌ གཙོ༌བོ༌ ཡེ༌ཤུའི༌ ཚན༌ནི༌ ནང༌ང༌ ཁྱོ༌ཞའ༌ སྤོས༌པ༌ ཏང༌ཨིན༌ ཞུ༌ཝ༌ ཞུའད༌། 2 གཙོ༌བོ༌ ཡེ༌ཤུའི༌ ཝང༌ངི༌ ནང༌ང༌ ང༌ཞའེ༌ ཁྱོ༌ཞའ༌ ཏང༌ཁན༌ནི༌ ལབ༌ཞ༌གུན༌ ཁྱོ༌ཞའ༌ གྱུས༌ཨིན༌ནོག༌། 3 དཀོན༌མཆོག༌གི༌ ཐུགས༌དོད༌པོ༌ ནི༌, ཁྱོ༌ཞའ༌ དམ༌པ༌ ཡོང༌གོ༌ཤེས༌པོ༌ ཨིན༌, ཏེ༌བོའེ༌ཕིའ༌ ཁྱོ༌ཞ༌གུན༌ ལུས༌བྲེལ༌ ངན༌པ༌གུན༌ནེ༌ ཐག༌རིང༌ང༌ དུག༌ཤིག༌། 4-5 ཏེ༌ནེ༌ ཞན༌མ༌ དཀོན༌མཆོག༌ མ༌ཤེས༌ཁན༌ནི༌ ཏད༌པ༌ མེད༌ཁན༌གུན༌ ཙོགས༌ལ༌ ལུས༌བྲེལ༌ ངན༌པའེ༌ དོད༌པ༌ མ༌ཡོང༌ང༌, ཁྱོ༌ཞའ༌ རེ༌རེའ༌ དམ༌པ༌ དང༌ རྩི༌ཝ༌ཅན༌ནི༌ མི༌ཚེ༌ཞིག༌གི༌ ནང༌ང༌ རང༌རང༌ངི༌ ཟུགས༌པོ༌གུན༌ ཅུན༌ཏེ༌ བོར༌ཅེས༌ ཤེས༌ཨིན༌།
6 སྤུན༌ནི༌ ཞིད༌མད༌ ཉམ༌པོ༌ ལུས༌བྲེལ༌ བོར༌ཏེ༌, རང༌ངི༌ སྤུན༌ལ༌ ངན༌པ༌ ཡ༌ གོབ༌སྐོར༌ ཏང༌ མ༌གོས༌། ཏེ༌ཙོགས༌སི༌ ལས༌ ཅོ༌ཁན༌གུན༌ལ༌ གཙོ༌བོའེ༌ ཆད༌པ༌ སལ༌ལ༌ ཛད༌ཨིན༌ ཟེར༌ཏེ༌, ཁྱོ༌ཞ༌གུན༌ལ༌ སྔུན༌ལ༌ ང༌ཞའེ༌ སྤང༌པུད༌པིན༌། 7 དཀོན༌མཆོག༌གི༌ ང༌དང༌གུན༌ ཚི༌ཏུ༌ མི༌ཚེ༌ཞིག༌ མན༌པ༌, དམ༌པ༌ མི༌ཚེ༌ཞིག༌ ཕུད༌ཅེས༌ལ༌ བོད༌ད༌ ཛད༌ཏེ༌ ཨིན༌ནོག༌། 8 ཏེ༌བོའེ༌ཕིའ༌ ཏེ༌ ལབ༌ཞའ༌ ཁའ༌ ཉན༌ན༌མེད༌ ཟེར༌ཁན༌གུན༌ནི༌, མིའི༌ ལབ༌ཞ༌ མན༌པ༌, དཀོན༌མཆོག༌གི༌ ལབ༌ཞའ༌ ཁའ༌ མ༌ཉན༌ན༌ ཨིན༌ནོག༌། དཀོན༌མཆོག༌ ནི༌ ཁྱོ༌ཞའ༌, ཁོང༌རང༌ངི༌ དམ༌པའེ༌ ཐུག༌ཉིད༌ སལ༌ལ༌ ཛད༌ཁན༌བོ༌ ཨིན༌ནོག༌།
9 ཏ༌ ཅིག༌ དང༌ ཅིག༌ག༌ ཅམས༌པ༌ ཅོ༌ཅེས༌སི༌ སྐོར༌ལ༌ ཁྱོ༌ཞའ༌ ཅའང༌ བྲི༌གོས༌ མེད༌པ༌ ཨིན༌ནོག༌, ཅིའ༌ཟེར༌ན༌ དཀོན༌མཆོག༌ ཁོང༌རང༌ངི༌ ཁྱོ༌ཞ༌གུན༌ལ༌ ཅིག༌ དང༌ ཅིག༌ག༌ ཅམས༌པ༌ ཅོ༌ཅེས༌པོ༌ ལབ༌བ༌ ཛད༌ཏེ༌ ཨིན༌། 10 ཡང༌ དེན༌བའ༌ ཁྱོ༌ཞ༌གུན༌ནི༌ མ༌ཀེ༌དོ༌ནི༌ཡཱའེ༌ ཡུལ༌ གང༌པོའེ༌ ནང༌ང༌ ཡོད༌ཁན༌ནི༌ སྤུན༌ ཚང༌མ༌, ཏེན༌ན༌ ཅམས༌པ༌བོ༌ ལྟན༌ཏེ༌ ཨིན༌ནོག༌། ཨིན༌ནའང༌ ང༌ཞའེ༌ ཅེས༌པའེ༌ སྤུན༌གུན༌, ཏ༌ འི༌ སང༌ མང༌ང༌ ཅོ༌ཅེས༌ལ༌, ང༌ཞའེ༌ སྤོས༌པ༌ ཏང༌ཨིན༌ ཞུ༌ཝ༌ ཞུའད༌།
11 ཁྱོ༌ཞའེ༌ མིག༌ཞི༌བོ༌ ནི༌ ཞི༌དེ༌ཅན༌ནི༌ མི༌ཚེ༌ ཕུད༌ཅེས༌, རང༌ངི༌ ལས༌ དང༌ བྲེལ༌ བོར༌ཏེ༌ ཞན༌མའེ༌ ལས༌སི༌ ནང༌ང༌ ཐེས༌སྟོག༌ མི༌ཏང༌ཅེས༌ དང༌, རང༌ངི༌ ལག༌པ༌ བད༌ཏེ༌ མི༌ཚེ༌ ཕུད༌ཁན༌ཞིག༌ ཡོང༌གོ༌ཤེས༌ ཨིན༌ནོག༌, ཀ༌ཟུག༌ ང༌ཞའེ༌ ཁྱོ༌ཞ༌གུན༌ལ༌ ལབས༌ཏེ༌ ཨིན༌པིན༌།
12 ཏེ༌ཟུག༌ ཅོ༌ན༌ ཁྱོ༌ཞ༌གུན༌ནི༌ མི༌ཚེ༌ ཕུད༌ཚུལ༌བོའ༌, ཏད༌པ༌ མེད༌ཁན༌གུན༌ནི༌ མང༌ང༌ རྩི༌ཝ༌ ཐོབ༌ཨིན༌, ཡང༌ ཁྱོ༌ཞ༌གུན༌ལ༌ སྒོས༌དོམ༌གུན༌ནི༌ ཕིའ༌ ཞན༌མའེ༌ཀ༌ སྟེན༌ཏེ༌ དུག༌ མི༌གོས༌།
སོན༌ཏེའ༌ ལང༌ང༌ ཛད༌ཅེས༌སི༌ རེ༌ཝ༌།
4:13 ནེ༌ 18
13 ཏ༌ ཅེས༌པའེ༌ སྤུན༌གུན༌, ཁྱོ༌ཞའ༌ ཤི༌ཁན༌གུན༌ལ༌ བྱུང༌ཅེས༌པོ༌ ཧ༌གོ༌གོ༌ཤེས༌སི༌ ང༌ཞའེ༌ དོད༌པ༌ ཅོའད༌། ཏེ༌ནེ༌ ཁྱོ༌ཞ༌གུན༌ལ༌ སོན༌ཏེའ༌ ལང༌ཅེས༌སི༌ ནང༌ང༌ རེ༌ཝ༌ མེད༌ཁན༌གུན༌ ཙོགས༌སི༌ ཚེར༌ཁ༌ མི༌ཡོང༌། 14 ཡེ༌ཤུ༌ ཀྲོངས༌ཏེ༌ ཡང༌སྐྱར༌ སོན༌ཏེའ༌ ཞངས༌ཁན༌བོའ༌ ང༌དང༌ངི༌ ཏད༌པ༌ ཅོས༌ པ༌སང༌, ཡེ༌ཤུའི༌ཀ༌ ཏད༌པ༌ བོར༌ཏེ༌ ཤི༌ཁན༌གུན༌, དཀོན༌མཆོག༌གི༌ སོན༌ཏེའ༌ ལང༌ང༌ ཛད༌ཏེ༌, ཡེ༌ཤུ༌ ཉམ༌པོ༌ ཁྱོང༌ང༌ ཛད༌ཅེས༌པོའང༌ ང༌དང༌གུན༌ནི༌ ཏད༌པ༌ ཅོའ༌ནོག༌།
15 གཙོ༌བོ༌ ཡེ༌ཤུའི༌ མོལ༌ཁན༌བོ༌ ང༌ཞའེ༌ ཁྱོ༌ཞ༌གུན༌ལ༌ ཤད༌དད༌, གཙོ༌བོ༌ ལོགས༌ཏེ༌ ཕེབས༌སི༌ ཏུས༌ལ༌, ང༌དང༌ སོན༌ཏེའ༌ ཡོད༌ཁན༌གུན༌, ཏན༌ཏན༌ལ༌ ཤི༌ཁན༌གུན༌ནི༌ སང༌ སྔུན༌ལ༌ ཁོང༌ང༌ ཐུག༌ག༌ མི༌ཆའ༌། 16 སྐད༌ ཆེན༌མོའེ༌ ནང༌ང༌ བཀའ༌, ཕོ༌ཉའེ༌ སྤོན༌བོའེ༌ སུང༌སྐད༌ དང༌ དཀོན༌མཆོག༌གི༌ ཏུང༌སྐད༌ ཉམ༌པོ༌, གཙོ༌བོ༌ ཁོང༌རང༌ ནམ༌ཁའ༌ནེ༌ བབས༌ཨིན༌, ཏེ༌ནེ༌ མ༌ཤི༌ཀའེ༌ཀ༌ ཏད༌པ༌ བོར༌ཏེ༌ ཤི༌ཁན༌གུན༌ སྔུན༌ལ༌ སོན༌ཏེའ༌ ལང༌ང༌ ཛད༌ཨིན༌། 17 ཏེ༌ སྟིང༌ནེ༌ ཇིག༌རྟེན༌ནི༌ཀ༌ ང༌དང༌ སོན༌ཏེའ༌ ལུས༌ཏེ༌ ཡོད༌ཁན༌གུན༌ སྲིན༌ནི༌ཀ༌ ཏེ༌གུན༌ ཉམ༌པོ༌ གཙོ༌བོ༌ ཡེ༌ཤུ༌ ཇལ༌ཅེས༌ལ༌ སྟག༌ག༌ ཛད༌ཨིན༌, ཡང༌ ང༌དང༌གུན༌ གཙོ༌བོ༌ ཉམ༌པོ༌ ཏུས༌གྱུན༌ དུག༌ཨིན༌། 18 ཏེན༌ན༌བོའེ༌ཕིའ༌ ཁྱོ༌ཞ༌གུན༌ནི༌ ཏེ༌ ལབ༌ཞ༌གུན༌ ཅིག༌ དང༌ ཅིག༌ག༌ ཤད༌ཏེ༌ སྤོས༌པ༌ ཏོང༌ཤིག༌།