1 ཏེ༌ སྟིང༌ནེ༌ པ༌འུ༌ལུ༌ ཨེ༌ཐེན༌ གྱལ༌ས༌ནེ༌ ཀོ༌རིན༌ཐི༌ གྱལ༌ས༌ སྐྱོདས༌། 2 ཏེ༌རུ༌ པ༌འུ༌ལུའ༌ པོན༌ཏུས༌སི༌ ནང༌ང༌ སྐྱེས༌ཁན༌, ཨ༌ཀུའི༌ལའ༌ ཟེར༌ཁན༌ནི༌ ཡ༌ཧུ༌དཱ༌པ༌ཞིག༌ ཐུག༌, ཁོ༌ ཁོ༌རང༌ངི༌ ན༌མ༌ པིརི༌སི༌ལ༌ ཉམ༌པོ༌ ངེ༌ཐུབ༌ཅིག༌རང༌ ཨི༌ཏྲི༌ལི༌ ཡུལ༌ནེ༌ ཀོ༌རིན༌ཐི༌ གྱལ༌ས༌ ཡོངས༌ཏེ༌ ཨིན༌པིན༌, ཅིའ༌ཟེར༌ན༌ རོམ༌མི༌ གྱལ༌པོ༌ ཀོལོ༌དི༌འས༌སི༌ ཡ༌ཧུ༌དཱ༌པ༌ ཚང༌མ༌ རོམ༌ གྱལ༌ས༌ནེ༌ བིང༌ཏེ༌ ཆ༌གོས༌ ཟེར༌ཏེ༌ བཀའ༌ ཏངས༌ཏེ༌ ཨིན༌པིན༌། 3 ཨ༌ཀུའི༌ལའ༌ དང༌ པིརི༌སི༌ལ༌ གུན༌ ཙོགས༌ལ༌ པ༌འུ༌ལུའང༌ ཀུར༌ ཙེམས༌ཅེས༌སི༌ ལས༌ ཛད༌ཁན༌ ཨིན༌པ༌, པ༌འུ༌ལུ༌ ཁོང༌གུན༌ནི༌ ཁང༌པ༌ ཞུགས༌ཏེ༌ ཁོང༌གུན༌ ཉམ༌པོ༌ ལས༌ ཅོས༌། 4 ཤབ༌བད༌ རིམས༌སི༌ ཁོང༌ ཡ༌ཧུ༌དཱ༌པའེ༌ དུ༌ཁང༌ང༌ སྐྱོད༌ཏེ༌ ཡ༌ཧུ༌དཱ༌པ༌ དང༌ གིརིས༌པ༌ གུན༌ལ༌ ཁོང༌ངི༌ ལོན༌བོའི༌ཀ༌ ཏད༌པ༌ ཁྱོང༌ཅུག༌ཅེས༌སི༌ རྩོན༌གྲུས༌ ཅོ༌ཨིན༌ ཁོང༌གུན༌ ཉམ༌པོ༌ གྲོས༌དུར༌ ཛད༌དད༌པིན༌།

5 སི༌ལས༌ དང༌ ཏི༌མོ༌ཐི༌ མ༌ཀེ༌དོ༌ནི༌ཡཱ༌ནེ༌ ལེབ༌བ༌ཅིག༌, པ༌འུ༌ལུའི༌ རང༌ངི༌ ཏུས༌ གང༌པོ༌ ཆོས༌ཤད༌ཨིན༌ ཡ༌ཧུ༌དཱ༌པ༌གུན༌ལ༌ ཡེ༌ཤུ༌ ནི༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ ཨིན༌ཁན༌བོའེ༌ སྤང༌པོ༌ ཏང༌ཅེས༌སི༌ ནང༌ང༌ ཕུདས༌། 6 ཨིན༌ནའང༌ ཡ༌ཧུ༌དཱ༌པ༌གུན༌ནི༌ པ༌འུ༌ལུའ༌ གྱབ༌གལ༌ ཅོས༌ཏེ༌ ཁོང༌ངི༌ སྐོར༌ལ༌ ངན༌པ༌ ཟེར༌པ༌ ཁོང༌ངི༌ ཁོང༌རང༌ངི༌ ནམ༌ཟའ༌བོ༌ སྲུགས༌ཏེ༌ ཁོང༌གུན༌ལ༌ སྤང༌པུད༌ཨིན༌ མོལས༌, "སྡིག༌པ༌ ཅོ༌ཅེས༌པོའེ༌ ཁྱོ༌ཞའ༌ ཆད༌པ༌ ཕོག༌ན༌ ཁྱོ༌ཞ༌རང༌ངི༌ སྐྱོན༌ ཨིན༌, ངའེ༌ མན༌། ཏ༌ནེ༌ཕར༌ལ༌ ང༌ ཡ༌ཧུ༌དཱ༌པ༌ མན༌ཁན༌གུན༌ལ༌ ཆོས༌ཤད༌ད༌ ཆའད༌།"

7 ཏེ༌ནེ༌ ཁོང༌ ཡ༌ཧུ༌དཱ༌པའེ༌ དུ༌ཁང༌ནེ༌ བིང༌ཏེ༌ དཀོན༌མཆོག༌ག༌ ཅོལ༌ཁན༌ནི༌ མི༌ ཏི༌ཏུས༌ ཡུས༌ཏུས༌ ཟེར༌ཁན༌ནི༌ ཁང༌པ༌ སྐྱོདས༌, ཀ༌བོ༌ དུ༌ཁང༌ངི༌ ལྡོའེ༌ཀ༌ ཡོད༌པིན༌། 8 ཏེ༌ དུ༌ཁང༌ངི༌ འུ༌སྐྱོང༌ ཀིརིས༌པུས༌ ཟེར༌ཁན༌ དང༌ ཁོའེ༌ ནང༌ཚངས༌ གང༌པོའེ༌ གཙོ༌བོའེ༌ཀ༌ ཏད༌པ༌ ཁྱོངས༌, ཁོང༌གུན༌ མན༌པ༌ ཀོ༌རིན༌ཐི༌པ༌ མང༌པོ༌ཞིག༌གིའང༌ པ༌འུ༌ལུའི༌ ཆོས༌ ཚོར༌ཏེ༌ ཏད༌པ༌ ཁྱོངས༌, ཡང༌ ཁྲུས༌ལེནས༌།

9 ཞག༌ཤིག༌ ཚན༌ལ༌ ཞལ༌ཟིགས༌ཤིག༌གི༌ ནང༌ང༌ གཙོ༌བོ༌ ཡེ༌ཤུའི༌ པ༌འུ༌ལུའ༌ མོལས༌, "ཇིགས༌ མ༌ཇིགས༌, ཅུབ༌ཅད༌ཏེ༌ མ༌དུག༌ག༌ ཆོས༌ ཤོད༌། 10 ང༌ ཁྱོ༌རང༌ ཉམ༌པོ༌ ཡོད༌ ཡང༌ སུ༌ཞིག༌གིའང༌ ཁྱོ༌རང༌ང༌ ནོད༌སྐྱལ༌ མི༌ཉན༌, ཅིའ༌ཟེར༌ན༌ འི༌ གྱལ༌སའེ༌ ནང༌ང༌ ངའེ༌ཀ༌ ཏད༌པ༌ ཅོ༌ཅེས༌ལ༌ ངའེ༌ མི༌ མང༌པོ༌ཞིག༌ ལྡམས༌ཏེ༌ ཡོད༌།" 11 ཏེ༌བོའེ༌ཕིའ༌ པ༌འུ༌ལུ༌ ཏེ༌རུ༌ ལོ༌ ཅིག༌ ནང༌ ཕེད༌ དཀོན༌མཆོག༌གི༌ བཀའ༌ ཤད༌ཨིན༌ ཞུགས༌།

12 གལ༌ལི༌འོ༌ ཟེར༌ཁན༌བོ༌ ཨ༌ཀ༌ཡཱ༌ ཡུལ༌ཇོངས༌སི༌ ཀའ༌ལོན༌ འིན༌ནི༌ ཏུས༌ལ༌, པ༌འུ༌ལུའི༌ གྱབ༌གལ༌ལ༌ ཡ༌ཧུ༌དཱ༌པ༌གུན༌ ཅིག༌ སོང༌ཏེ༌ ཁོང༌ ཟུམས༌ཏེ༌ ཁྲིམས༌ཁུང༌ང༌ ཁྱེརས༌། 13 ཁོང༌གུན༌ནི༌ ཉད༌ཀལ༌ཏེ༌ ཟེརས༌, "འི༌ མི༌བོའེ༌ མི༌གུན༌ལ༌ དཀོན༌མཆོག༌ག༌ ཅོལ༌ཅེས༌སི༌ ཏེ༌ཟུག༌ ཚུལ༌ རིག༌གི༌ ལབ༌ཞའ༌ ཏང༌དུག༌, ཀ༌བོ༌ ང༌ཞའེ༌ བཀའ༌ཁྲིམས༌སི༌ གྱབ༌གལ༌ ཨིན༌ནོག༌།"

14 པ༌འུ༌ལུའི༌ མོལ༌ཅེས༌ ཅོའ༌ཅིག༌, གལ༌ལི༌འོའེ༌ ཡ༌ཧུ༌དཱ༌པ༌གུན༌ལ༌ ཟེརས༌, "གལ༌ཏེས༌ འི༌ མི༌བོའེ༌ རོམ༌པའེ༌ བཀའ༌ཁྲིམས༌ དང༌ གལ༌ཁན༌ནི༌ མི༌འོས༌པ༌ ཆུ༌ངུན༌ ཡ༌ ཆེན༌མོ༌ཞིག༌ ཅོས༌ཏེ༌ ཡོད༌པིན༌ན༌ ངའེ༌ ཁྱོ༌ཞའེ༌ སྐྱོན༌རྗོད༌ ཅོ༌ཁན༌བོ༌ ཉན༌ཅེས༌རག༌པ༌, 15 ཨིན༌ནའང༌ ཁྱོ༌ཞའེ༌ ཉད༌གལ༌བོ༌ ནི༌ ཁྱོ༌ཞ༌རང༌ངི༌ བཀའ༌ཁྲིམས༌, མིང༌ དང༌ སྤེ༌ར༌ གུན༌ནི༌ སྐོར༌ལ༌ ཨིན༌ནོག༌, ཏེ༌གུན༌ ཁྱོ༌ཞ༌རང༌གུན༌ནི༌ ཐག༌ཅོད༌། ངའེ༌ ཏེ༌ ཙོགས༌གུན༌ནི༌ཀ༌ ཁྲིམས༌ཅད༌ ཏང༌ང༌མེད༌།" 16 ཏེ༌ཟུག༌ ཟེར༌ཏེ༌ ཁོའེ༌ ཁོང༌གུན༌ ཁྲིམས༌ཁུང༌ནེ༌ ཕིངས༌ཏེ༌ ཏངས༌།

17 ཏེ༌ནེ༌ ཁོང༌གུན༌ནི༌ དུ༌ཁང༌ངི༌ འུ༌སྐྱོང༌ སོས༌ཐེ༌ནེས༌ ཟེར༌ཁན༌བོ༌ ཟུམས༌ཏེ༌ ཁྲིམས༌ཁུང༌ངི༌ ནང༌ང༌ སྲན༌ཏྲེ༌ རྡུངས༌, ཨིན༌ནའང༌ གལ༌ལི༌འོའེ༌ ཏེ༌བོའེ༌ཀ༌ སྣང༌ང༌ མ༌ཏངས༌།

18 ཏུས༌བན༌ཤིག༌ ཀོ༌རིན༌ཐིའ༌ ཞུགས༌ཏེ༌ སྟིང༌ནེ༌ པ༌འུ༌ལུའི༌ ཏད༌པ༌ཅན༌གུན༌ལ༌ སྟིང༌ཇུག༌གི༌ ཇུ༌ ཞུས༌ཏེ༌ གྲུ༌ཟིང༌ང༌ ཞོན༌ཏེ༌ སི༌རི༌ཡཱའེ༌ ཡུལ༌ཇོངས༌ལ༌ སྐྱོདས༌, ཁོང༌ ཉམ༌པོ༌ པིརི༌སི༌ལ༌ དང༌ ཨ༌ཀུའི༌ལ༌ ཡོད༌པིན༌། གྲུ༌ཟིང༌ངི༌ ནང༌ང༌ ཆའེ༌སང༌ སྔུན༌ལ༌ དཀོན༌མཆོག༌ག༌ ཁ༌ཆད༌ ཛད༌ཏེ༌ ཡོད༌ཁན༌བོའེ༌ ཞས༌ཏེ༌ པ༌འུ༌ལུའི༌ ཀེན༌ཅེརེ༌འ༌ ཟེར༌སའེ༌ ནང༌ང༌ ཁོང༌རང༌ངི༌ སྲ༌ བྲགས༌།

19 ཁོང༌གུན༌ ཨེ༌ཕེ༌སས༌ལ༌ ལེབ༌བ༌ཅིག༌ པ༌འུ༌ལུའི༌, ཨ༌ཀུའི༌ལའ༌ དང༌ པིརི༌སི༌ལ༌ ཚོའེ༌ ཐའ༌མ༌ བོརས༌ ཡང༌ ཁོང༌ ཡ༌ཧུ༌དཱ༌པའེ༌ དུ༌ཁང༌ང༌ སྐྱོད༌ཏེ༌ ཡ༌ཧུ༌དཱ༌པ༌གུན༌ ཉམ༌པོ༌ སུང༌རབས༌སི༌ སྐོར༌ལ༌ གྲོས༌དུར༌ ཛདས༌། 20 ཁོང༌གུན༌ནི༌ པ༌འུ༌ལུའ༌ ཏ༌རུང༌ མང༌ང༌ ཞུགས༌ ཟེར༌ཏེ༌ ཞུ༌ཝ༌ ཕུལས༌པ༌, ཁོང༌ མ༌ཞུགས༌། 21 ཨིན༌ནའང༌ ཁོང༌ དུ༌ཁང༌ནེ༌ བིང༌ཏེ༌ སྐྱོད༌ ཟ༌ནེ༌ མོལས༌, "གལ༌ཏེས༌ དཀོན༌མཆོག༌གི༌ ཐུག༌གོངས༌ ཡོད༌ན༌ ང༌ ཁྱོ༌ཞ༌གུན༌ ཡོད༌ས༌ ཡང༌སྐྱར༌ ཡོང༌ཨིན༌།" ཏེ༌ནེ༌ ཁོང༌ གྲུ༌ཟིང༌ང༌ ཞོན༌ན༌ ཛད༌ཏེ༌ ཨེ༌ཕེ༌སས༌ནེ༌ སྐྱོདས༌། 22 ཚོའེ༌ ཐའ༌མའེ༌ གྱལ༌ས༌ ཀཱེ༌སར༌རིའ༌ ལེབ༌བ༌ཅིག༌, ཁོང༌ ཡེ༌རུ༌ཤ༌ལེམ༌མ༌ སྐྱོད༌ཏེ༌, ཏེ༌རུ༌ ཡོད༌ཁན༌ནི༌ ཏད༌པ༌ཅན༌གུན༌ལ༌ ཐུག༌། ཏེ༌ནེ༌ ཨན༌ཏི༌ཡོག༌ གྱལ༌ས༌ ཆོགས༌ལ༌ སྐྱོདས༌།

23 ཨན༌ཏི༌ཡོག༌ག༌ ཏུས༌བན༌ཤིག༌ ཞུགས༌ཏེ༌ སྟིང༌ནེ༌, ཁོང༌ གཱ༌ལ༌ཏི༌ཡཱ༌ དང༌ ཕིརིག༌འེ༌ཡཱ༌ གྱལ༌ཁག༌གི༌ ཡུལ༌ ཚང༌མ༌ལ༌ སྐྱོད༌ཏེ༌, ལོབ༌ཕྲུགས༌གུན༌ནི༌ ཏད༌པ༌ སྟན༌པོ༌ ཅོའ༌ ཛདས༌།

24 ཏེན༌ན༌ ཏུས༌ལ༌ ཨ༌ལེག༌ཟན༌དེར༌པ༌ ཨ༌པོ༌ལོས༌ ཟེར༌ཁན༌ནི༌ ཡ༌ཧུ༌དཱ༌པ༌ཞིག༌, ཨེ༌ཕེ༌སས༌ལ༌ ལེབ༌, ཁོ༌ གྱལ༌ལ༌ སིལ༌ཁན༌ སྤེ༌ར༌ ཏང༌ང༌ ཁས༌པ༌ ཡང༌ ཁོའ༌ ཡ༌ཧུ༌དཱ༌པའེ༌ སུང༌རབས༌སི༌ ནང༌ང༌ ཧ༌གོ༌ ཐར༌ཁྱེལ༌ ཡོད༌པིན༌། 25 ཁོའ༌ གཙོ༌བོའེ༌ ཐར༌པའེ༌ ལམ༌མི༌ སྐོར༌ལ༌ ལབ༌ཞའ༌ ཐོབ༌ཏེ༌ སེམས༌ཤུགས༌ དང༌ སྟོབས༌ ཆེན༌མོ༌ ཉམ༌པོ༌ ཡེ༌ཤུའི༌ སྐོར༌ལ༌ ཤད༌ཁན༌གུན༌ དེན༌བ༌ ཨིན༌པིན༌, ཨིན༌ནའང༌ ཁོའ༌ ཡོ༌ཧཱ༌ནན༌ནི༌ སལ༌ཁན༌ནི༌ ཁྲུས༌ ཅིག༌པོའེ༌ སྐོར༌ མ༌ནེ༌ གྱུས༌མེད༌པིན༌། 26 ཁོའེ༌ དུ༌ཁང༌ངི༌ ནང༌ང༌ དཀོན༌མཆོག༌གི༌ བཀའ༌ མ༌ སྟོབས༌ཤུགས༌ ཉམ༌པོ༌ ཤད༌ཅེས༌ གོ༌ཟུགས༌། པིརི༌སི༌ལ༌ དང༌ ཨ༌ཀུའི༌ལའ༌, ཨ༌པོ༌ལོས༌སི༌ ཆོས༌ཤད༌ཁན༌བོ༌ ཚོར༌ར༌ཅིག༌, ཁོང༌གུན༌ནི༌ ཁོ༌ འ༌ཟམ༌ཤིག༌ག༌ ཁྱེར༌ཏེ༌ དཀོན༌མཆོག༌གི༌ ཐར༌པའེ༌ ལམ༌མི༌ སྐོར༌ གང༌པོ༌ དང༌ མང༌ང༌ སལ༌པོ༌ ཅོས༌ཏེ༌ ཧ༌གོ༌ཅུགས༌།

27 ཨ༌པོ༌ལོས༌སི༌ ཨ༌ཀ༌ཡཱ༌ སྐྱོད༌ཅེས༌སི༌ དོད༌པ༌ སྔོན༌ ཅུགས༌པ༌ ཏེ༌རུ༌ ཡོད༌ཁན༌ནི༌ ཏད༌པ༌ཅན༌གུན༌ནི༌ ཁོའ༌ ཆ༌ཅེས༌ལ༌ སྤོས༌པ༌ ཏངས༌ཏེ༌ ཨ༌ཀ༌ཡཱ༌ ཡོད༌ཁན༌ནི༌ ལོབ༌ཕྲུགས༌གུན༌ལ༌ ཨ༌པོ༌ལོས༌ལ༌ གའ༌སུས༌ ཞུ༌ཅེས༌ལ༌ ཨི༌གེ༌ བྲིས༌། ཏེ༌རུ༌ ལེབ༌བ༌ཅིག༌, གཙོ༌བོའེ༌ ཐུག༌རྗེ༌ གྱུད༌ཏེ༌ ཏད༌པ༌ ཁྱོངས༌ཁན༌གུན༌ལ༌ ཁོང༌ མ༌ ཕན༌ཐོགས༌ཅན༌ གྱུར༌། 28 ཁོང༌ངི༌ མི༌མངས༌སི༌ དུན༌ལ༌ ཡ༌ཧུ༌དཱ༌པ༌གུན༌ལ༌, ཡེ༌ཤུ༌ ནི༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ ཨིན༌ཁན༌བོ༌ དམ༌པའེ༌ སུང༌རབས༌ གྱུད༌ཏེ༌ ལྟན༌ཨིན༌, ཁོང༌གུན༌ལ༌ ཕམས༌ཀལ༌ལད༌པིན༌།