28
མལ༌ཏྲ༌ ཚོ༌ལིང༌ང༌ ལེབ༌།
28:1 ནེ༌ 10
1 ཁམ༌ཟང༌ ཉམ༌པོ༌ ས༌ སྐམ༌པོའེ༌ཀ༌ བིངས༌ཏེ༌ སྟིང༌ནེ༌ ང༌ཞའ༌ ཏེ༌ ཚོ༌ལིང༌བོའ༌ མལ༌ཏྲ༌ ཟེར༌ཁན༌ གྱུས༌སོང༌། 2 ཏེ༌ ཡུལ༌མི༌གུན༌ནི༌ ང༌ཞའ༌ མ༌སྲན༌ཏྲེ༌ སྙིང༌རྗེ༌ སྟནས༌། ཆར༌པ༌ ཏང༌ཅེས༌པོའེ༌ ཀྲང༌མོ༌ སྲན༌ཏྲེ༌ ཡོད༌པ༌, ཏེ༌ མི༌གུན༌ནི༌ མེ༌ ཏངས༌ཏེ༌ ང༌ཞའ༌ གའ༌སུས༌ གྱལ༌ལ༌ ཅོས༌།
3 པ༌འུ༌ལུའི༌ ཤིང༌ བན༌ཤིག༌ རུགས༌ཏེ༌ མེའ༌ ཏབ༌ཅེས༌ ཅོའ༌ཅིག༌, མེ༌ ཚད༌དི༌ ཞས༌ཏེ༌ ཏེ༌ ཤིང༌ངི༌ ཕྲོ༌ནེ༌ ཏུག༌རུལ༌ཞིག༌ བིང༌ཏེ༌ པ༌འུ༌ལུའི༌ ལག༌པ༌ སོ༌ག༌ ཏབས༌ཏེ༌ དུགས༌། 4 ཚོ༌ལིང༌ངི༌ མི༌གུན༌ལ༌ རུལ༌བོའེ༌ པ༌འུ༌ལུའི༌ ལག༌པ༌ སོ༌ག༌ ཏབས༌ཏེ༌ ཐོང༌ང༌ཅིག༌, ཅིག༌ དང༌ ཅིག༌ག༌ ཟེརས༌, "འི༌ མི༌བོ༌ ཏན༌ཏན༌ལ༌ མི༌སད༌ཞིག༌ ཨིན༌ནོག༌། ཁོ༌ གྱ༌ཚོའེ༌ ནང༌ནེ༌ ཐར༌ཏེ༌ ཨིན༌ནའང༌ ཁྲིམས༌ཅད༌ ཛད༌ཁན༌ནི༌ དཀོན༌མཆོག༌གི༌ ཁོ༌ སོན༌ཏེའ༌ ལུས༌ ཅུག༌ག༌ མ༌ཛད༌ད༌ ཨིན༌ནོག༌།" 5 པ༌འུ༌ལུའི༌ རུལ༌བོ༌ སྲུགས༌ཏེ༌ མེ༌ ནང༌ང༌ ཕངས༌ སལ༌པ༌ ཁོང༌ང༌ ཅའང༌ མ༌སོང༌། 6 ཏེ༌ མི༌གུན༌ནི༌ པ༌འུ༌ལུའི༌ ཟུགས༌པོ༌བོ༌ སྲངས༌ཨིན༌ ཡ༌ ཧུན༌མེད༌ལ༌ སའེ༌ཀ༌ གྱེལ༌ཏེ༌ ཤིའ༌ནོག༌ སམ༌། ཏུས༌ མང༌པོ༌ཞིག༌ སྲུངས༌ཏེ༌ སྟིང༌ནེའང༌ པ༌འུ༌ལུའ༌ ཅའང༌ མ༌སོང༌པ༌ ཁོང༌གུན༌ནི༌ སམ༌ཁན༌བོ༌ གྱུར༌ཏེ༌ འི༌ མི༌བོ༌ དཀོན༌མཆོག༌ཤིག༌ ཨིན༌ནོག༌ ཟེརས༌།
7 པུབ༌ལི༌འུས༌ ཟེར༌ཁན༌བོ༌ ཏེ༌ ཚོ༌ལིང༌ངི༌ ནང༌ང༌ ས༌ཀྱད༌ མ༌ ཆེན༌མོ༌ཞིག༌གི༌ དག༌པོ༌ དང༌ ཏེ༌ ཡུལ༌ལི༌ ཀའ༌ལོན༌ ཨིན༌པིན༌། ཁོའེ༌ ང༌ཞའ༌ ཁོ༌རང༌ངི༌ ཁང༌པའེ༌ ནང༌ང༌ གའ༌སུས༌ ཞུས༌ཏེ༌ ཞག༌ སུམ༌ ཚག༌པ༌ ང༌ཞའ༌ ལྟ༌སྟོག༌ ཅོས༌ཏེ༌ ཐུག༌རྗེ༌ ཛདས༌། 8 པུབ༌ལི༌འུས༌སི༌ ཨ༌བའ༌ ཚད༌ དང༌ ཁྲོལ༌ཅེས༌སི༌ ཟུ༌མོ༌ ཡོངས༌ཏེ༌ མལ༌ཙའེ༌ ནང༌ང༌ དུག༌པིན༌, པ༌འུ༌ལུ༌ ཁོའ༌ ཐུག༌ག༌ལ༌ སྐྱོདས༌། མོས༌ལམ༌ ཞུས༌ ཡང༌ ཁོང༌རང༌ངི༌ ཆག༌ ཁོའེ༌ གོའེ༌ཀ༌ བོར༌ར༌ ཛད༌ཏེ༌ ཁོ༌ ཕན༌ཅུག༌ག༌ ཛདས༌། 9 ཏེ༌བོ༌ ཐོང༌ང༌ཅིག༌ ཏེ༌ ཚོ༌ལིང༌ངི༌ ཞན༌ ནད༌པ༌ ཚང༌མ༌ ཁོང༌ངི༌ དུན༌ལ༌ ཁྱོངས༌, ཡང༌ པ༌འུ༌ལུའི༌ ཁོང༌གུན༌ནའང༌ ཕན༌ཅུག༌ག༌ ཛདས༌། 10 ཏེ༌བོའེ༌ ཞས༌ཏེ༌ ཁོང༌གུན༌ནི༌ ང༌ཞ༌གུན༌ལ༌ མ༌ རྩི༌ཝ༌ ཅོས༌, ཡང༌ ང༌ཞའ༌ ཏེ༌ཀ༌ནེ༌ བིང༌ཅེས༌སི༌ གྲལ༌ ཅོའ༌ཅིག༌, ཁོང༌གུན༌ནི༌ ང༌ཞའ༌ སྒོས༌དོམ༌ ཡོད༌ཁན༌ ཚང༌མ༌ གྲུ༌ཟིང༌ངི༌ ནང༌ང༌ སྐངས༌།
རོམ༌མ༌ ལེབ༌།
28:11 ནེ༌ 16
11 ཟླ༌ཝ༌ སུམ༌མི༌ སྟིང༌ནེ༌ ང༌ཞ༌གུན༌, དགུན༌ཏུས༌ ཕུད༌ཅེས༌ལ༌ ཏེ༌ ཚོ༌ལིང༌བོའེ༌ཀ༌ དུགས༌ཏེ༌ ཡོད༌ཁན༌ནི༌ གྲུ༌ཟིང༌ཞིག༌ག༌ ཞོན༌ཏེ༌ སོང༌པིན༌, ཀ༌བོ༌ ཨ༌ལེག༌ཟན༌དེར༌ནེ༌ ཨིན༌ནོག༌། ཏེ༌ གྲུ༌ཟིང༌ངི༌ གོ༌བོ༌ གིརིས༌པའེ༌ ཚག༌ཕྲུག༌ ལྷ༌ ཀས༌ཏྲར༌ དང༌ པོ༌ལགས༌ ཟེར༌ཁན༌ནི༌ གོའེ༌ ཟོས༌ཏེ༌ ནང༌ང༌ སྐོས༌ཏེ༌ དུག༌པིན༌། 12 ང༌ཞ༌གུན༌ སི༌ར༌ཀུས༌ གྱལ༌ས༌ ལེབ༌, ཡང༌ ཏེ༌རུ༌ ཞག༌ སུམ༌ དུགས༌། 13 ཏེ༌ཀ༌ནེ༌ གྲུ༌ཟིང༌ངི༌ ནང༌ང༌ སོང༌ཏེ༌ ང༌ཞ༌གུན༌ རེ༌གི༌འུམ༌ གྱལ༌ས༌ ལེབ༌, ཡང༌ སྟིང༌མ༌ཞག༌པོ༌ ལྷོ༌ ཆོགས༌ནེ༌ ལུངས༌པོ༌ ཡོངས༌པ༌ ཞག༌ཅིག༌གི༌ སྟིང༌ནེ༌ ང༌ཞ༌གུན༌ པུ༌ཏེའོ༌ལི༌ གྲོང༌ཁྱེར༌ལ༌ ལེབ༌། 14 ཏེ༌རུ༌ ང༌ཞ༌གུན༌ལ༌ ཏད༌པ༌ཅན༌ ཁ༌ཅིག༌ ཐུག༌, ཁོང༌གུན༌ནི༌ ང༌ཞའ༌ ཞག༌པོ༌ རྡུན༌ ཁོང༌གུན༌ ཉམ༌པོ༌ དུགས༌ཅེས༌ལ༌ ཞུས༌། ཏེ༌ སྟིང༌ནེ༌ ང༌ཞའ༌ གྲུལ༌ཏེ༌ རོམ༌མི༌ གྱལ༌ས༌ ལེབ༌།
15 རོམ༌མི༌ ནང༌ང༌ ཡོད༌ཁན༌ནི༌ སྤུན༌གུན༌ལ༌ ང༌ཞའ༌ ཡོང༌དུག༌ ཟེར༌ཏེ༌ གྱུས༌སོང༌ཏེ༌ ཨབ༌པིའུས༌སི༌ ཁྲོམས༌ དང༌, བེས༌ཁང༌ སུམ༌ ཟེར༌ཁན༌ནི༌ གྲོང༌ཁྱེར༌ ཚག༌པ༌ ང༌ཞའ༌ སུས༌ཏེ༌ ཡོངས༌། ཁོང༌གུན༌ ཐོང༌ང༌ཅིག༌ པ༌འུ༌ལུའི༌ སེམས༌ལ༌ སྤོས༌པ༌ སྐྱེས༌ཏེ༌ དཀོན༌མཆོག༌ག༌ ཐུག༌རྗེ༌ཆེ༌ ཞུས༌། 16 རོམ༌མི༌ གྱལ༌ས༌ ལེབས༌ཏེ༌ སྟིང༌ནེ༌ པ༌འུ༌ལུའ༌ ཅིག༌པོ༌ ཁང༌པ༌ཞིག༌གི༌ ནང༌ང༌ དུག༌ཅེས༌ལ༌ གོངས༌པ༌ ཏངས༌ཏེ༌ མག༌མི༌ ཅིག༌ སྲུང༌ང༌ བོརས༌།
རོམ༌མི༌ ནང༌ང༌ པ༌འུ༌ལུའི༌ ཆོས༌ཤདས༌།
28:17 ནེ༌ 31
17 ཞག༌ སུམ༌ ཆ༌ཅིག༌ པ༌འུ༌ལུའི༌ ཡ༌ཧུ༌དཱ༌པའེ༌ འུ༌སྐྱོང༌གུན༌ལ༌ བོདས༌། ཁོང༌གུན༌ ལྡུས༌ས༌ཅིག༌ པ༌འུ༌ལུའི༌ མོལས༌, "ཡ༌ཧུ༌དཱ༌པའེ༌ སྤུན༌གུན༌, ངའེ༌, ང༌དང༌ངི༌ མི༌གུན༌ ཡ༌ ཕ༌མེས༌པོའེ༌ ལུག༌སྲོལ༌གུན༌ནི༌ གྱབ༌གལ༌ མ༌ནེ༌ མ༌ཅོས༌པིན༌, ཏེ༌ནེའང༌ ང༌ ཡེ༌རུ༌ཤ༌ལེམ༌མི༌ ནང༌ང༌ ཟུམས༌ཏེ༌ རོམ༌པའེ༌ ལག༌ག༌ སྟདས༌། 18 རོམ༌པ༌གུན༌ནི༌ ང༌ རྩར༌ཅོད༌ ཏངས༌ཏེ༌ སྟིང༌ནེ༌ ཕུད༌ཅེས༌ལ༌ ཐད༌ ཅིའ༌ཟེར༌ན༌ སྲོག༌གི༌ ཆད༌པ༌ ཕོག༌ཅེས༌སི༌ ལས༌ཤིག༌ ངའེ༌ མ༌ནེ༌ མ༌ཅོས༌པིན༌། 19 ཨིན༌ནའང༌ ཡ༌ཧུ༌དཱ༌པ༌གུན༌ནི༌ ཏེ༌ ཐག༌ཅད༌བོའ༌ གྱབ༌གལ༌ ཅོས༌པ༌, ངའ༌ རོམ༌མི༌ གྱལ༌པོའེ༌ཀ༌ ཁྲིམས༌ཅད༌དི༌ ཕིའ༌ ཞུ༌ཝ༌ ཕུལ༌གོས༌, ངའེ༌ ང༌རང༌ངི༌ མི༌གུན༌ནི༌ཀ༌ སྐྱོན༌ ཀལ༌ཅེས༌ལ༌ ཏེ༌ ཞུ༌ཝ༌ མ༌ཕུལ༌པིན༌། 20 ཨིས༌ར༌ཨེལ༌པ༌གུན༌ནི༌ རེ༌ཝ༌, ཀ༌བོ༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ ཨིན༌, ཁོང༌ སྐྱོད༌ཚར༌ཁན༌བོའེ༌ ནང༌ང༌ ཏད༌པ༌ ཅོས༌པ༌ ངའ༌ འི༌ ལྕག༌ཐག༌ ཉམ༌པོ༌ ཅིངས༌ཏེ༌ ཨིན༌ཁན༌བོ༌ ཧ༌གོ༌ཅུག༌ཅེས༌སི༌ ཕིའ༌ ངའེ༌ ཁྱོ༌ཞའ༌ སྤེ༌ར༌ ཏང༌ང༌ བོད༌ཏེ༌ ཨིན༌།"
21 ཁོང༌གུན༌ནི༌ ལན༌ཏངས༌, "ང༌ཞའ༌ ཉེ༌རང༌ངི༌ སྐོར༌ལ༌ ཡ༌ཧུ༌དཱ༌ནེ༌ ཨི༌གེ༌ མ༌ལེབ༌, ཡང༌ ཡ༌ཧུ༌དཱ༌ནེ༌ ཡོང༌ཁན༌ནི༌ སྤུན༌གུན༌ནི༌ ཉེ༌རང༌ངི༌ སྐོར༌ལ༌ ཅའང༌ ངན༌པ༌ ཤད༌ད༌ ཡ༌ ཟེར༌ར༌ མེ༌རག༌། 22 ཨིན༌ནའང༌ ཀ༌རུང༌ས༌ མི༌གུན༌ནི༌ འི༌ ཆོས༌ སྡེ༌ གྱབ༌གལ༌ལ༌ སྤེ༌ར༌ ཏང༌ཁན༌བོ༌ ང༌ཞའ༌ གྱུས༌ཡོད༌། འི༌བོའེ༌ སྐོར༌ལ༌ ཤད༌ད༌ཛད༌ ང༌ཞའ༌ ཉན༌ཅེས༌ལ༌ ཐད༌ད༌རག༌།"
23 པ༌འུ༌ལུའི༌ སྤེ༌ར༌ ཉན༌ཅེས༌ལ༌ ཁོང༌གུན༌ནི༌ ཞག༌ཤིག༌ ལྡམས༌། ཏེ༌ ཞག༌པོ༌ ལེབ༌བ༌ཅིག༌, པ༌འུ༌ལུ༌ ཞུག༌སི༌ ཁང༌པའ༌ སྔུན༌ནི༌ སང༌ མང༌ང༌ མི༌གུན༌ ཛོམས༌། པ༌འུ༌ལུའི༌ ང༌ཏོག༌ནེ༌ ཕི༌ཏོག༌ ཚག༌པ༌ ཁོང༌གུན༌ལ༌ དཀོན༌མཆོག༌གི༌ གྱལ༌སྲིད༌དི༌ སྐོར༌ལ༌ སྤང༌པོ༌ སལ༌ཨིན༌ ཧ༌གོ༌ཅུགས༌། ཡང༌ མོ༌ཟེས༌སི༌ བཀའ༌ཁྲིམས༌ དང༌ ལུང༌སྟོན༌པ༌གུན༌ནི༌ སྤེ༌ཆ༌གུན༌ གྱུད༌ཏེ༌ ཡེ༌ཤུ༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ ཨིན༌ཁན༌བོ༌ ཧ༌གོ༌ཅུག༌ཅེས༌སི༌ རྩོན༌གྲུས༌ ཅོས༌། 24 ཁ༌ཅིག༌གི༌ ཁོང༌ངི༌ མོལ༌ཁན༌གུན༌ ཚོར༌ཏེ༌ ཏད༌པ༌ ཅོས༌, ཨིན༌ནའང༌ ཁ༌ཅིག༌གི༌ མ༌ཅོས༌། 25 སམ༌ཚུལ༌ སོ༌སོའེ༌ ཞས༌ཏེ༌ ཁོང༌གུན༌ནི༌ ནང༌ང༌ མི༌གྲིག༌ཅེས༌ སོང༌ ཡང༌ ཁོང༌གུན༌ ཏེ༌ཀ༌ནེ༌ བིང༌ཏེ༌ ཆེན༌ ཡོད༌ ཟ༌ནེ༌ པ༌འུ༌ལུའི༌ མོལས༌, "ཡེ༌ཤ༌ཡཱ༌ ལུང༌སྟོན༌པ༌ གྱུད༌ཏེ༌ དམ༌པའེ༌ ཐུག༌ཉིད༌དི༌ ཁྱོ༌ཞའེ༌ ཕ༌མེས༌པོ༌གུན༌ལ༌ དེན༌བ༌ མོལ༌ཏེ༌ ཨིན༌ནོག༌,
26 'འི༌ མི༌རབས༌པོའེ༌ཀ༌ སོང༌ཏེ༌ ཟེར༌,
'ཁོང༌གུན༌ནི༌ ངའེ༌ ཤད༌ཁན༌གུན༌ ཚོར༌ནའང༌ ཧ༌གོ༌ཐུབ༌བ༌ མི༌དུག༌,
ཁོང༌གུན༌ནི༌ ངའེ༌ ཅོ༌ཁན༌གུན༌ ཐོང༌ནའང༌ ང༌ སུ༌ ཨིན༌ཁན༌བོ༌ ངོ༌ཤེས༌ས༌ མི༌དུག༌'
27 ཅིའ༌ཟེར༌ན༌ འི༌ མི༌རབས༌པོའེ༌ སྙིང༌བོ༌ སྐྱོང༌པོ༌ གྱུར༌ཏེ༌ དུག༌,
ཁོང༌གུན༌ལ༌ ཀགས༌པོ༌ ཉམ༌པོ༌ མ༌ ཉུ༌ངུན༌ ཚོར༌དུག༌།
ཡང༌ མིག༌གུན༌ ཙུམས༌ཏེ༌ ཡོད༌པ༌ ཁོང༌གུན༌ནི༌ མིག༌ནེ༌ མི༌ཐོང༌,
ནམ༌ཅོག༌ནེ༌ མི༌ཚོར༌, ཡང༌ སེམས༌ལ༌ ཧ༌མི༌གོ༌
ཏེ༌ མ༌ནེ༌ ཁོང༌གུན༌ ང༌ ཆོགས༌ལ༌ གྱུར༌ཏེ༌
ངའེ༌ ཁོང༌གུན༌ གྱལ༌ཅུགས༌ཏེ༌ ཡོད༌གྲོ༌།"*28:27 ཡེ༌ཤ༌ཡཱའེ༌ སྤེ༌ཆའེ༌ 6:9, 10
28 "ཏེན༌ན༌བོའེ༌ཕིའ༌ དཀོན༌མཆོག༌གི༌ ཐར༌ལམ༌མི༌ ལོན༌བོ༌ ཡ༌ཧུ༌དཱ༌པ༌ མན༌ཁན༌གུན༌ནི༌ཀ༌ ཀལ༌ཏེ༌ ཁོང༌གུན༌ནི༌ ཉན༌ཅེས༌པོ༌ ཁྱོ༌ཞ༌གུན༌ནི༌ ཧ༌གོ༌གོས༌" 29 †28:29 སྔུན༌མའེ༌ གིརིས༌སི༌ སྤེ༌ཆ༌ ཁ༌ཅིག༌གི༌ ནང༌ང༌ འི༌ རྐང༌པ༌བོ༌ ཐུད༌ཏེ༌ ཡོད༌ཏེ༌ ཨིན༌ནོག༌ ཀ༌བོ༌ ནི༌ པ༌འུ༌ལུའི༌ ཏེ༌བོ༌ མོལ༌ལ༌ཅིག༌ ཡ༌ཧུ༌དཱ༌པ༌གུན༌ནི༌ ཛིང༌མོ༌ ཏང༌ཨིན༌ ཏེ༌ནང༌ནེ༌ བིང༌ཏེ༌ སོང༌། 30 པ༌འུ༌ལུ༌ ལོ༌ ཉིས༌ ཁང༌ལ༌ ཤལ༌ཁན༌ནི༌ ཁང༌པའེ༌ ནང༌ང༌ ཞུགས༌, ཡང༌ ཁོང༌ངི༌ ཐུག༌ག༌ ཡོང༌ཁན༌ ཚང༌མ༌ལ༌ གའ༌སུས༌ ཞུའད༌པིན༌། 31 ཁོང༌ངི༌ མ༌ སྤོས༌པ༌ དང༌ ཅའང༌ སྒག༌ཞའ༌ མེད༌པ༌ དཀོན༌མཆོག༌གི༌ གྱལ༌སྲིད༌དི༌ སྐོར༌ལ༌ ཤད༌ཏེ༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ སྐོར༌ལ༌ ལབ༌ཞ༌ སལས༌།།