3
མི༌ཚེ༌ རྩང༌མ༌ཞིག༌ ཕུད༌།
3:1 ནེ༌ 17
1 ཏ༌ དཀོན༌མཆོག༌གི༌ ཁྱོ༌ཞ༌གུན༌ མ༌ཤི༌ཀ༌ ཉམ༌པོ༌ མི༌ཚེ༌ སོ༌མ༌ཞིག༌གི༌ ནང༌ང༌ ལང༌ང༌ ཛད༌ པ༌སང༌, ཁྱོ༌ཞའེ༌ ནམ༌ཁའེ༌ ནང༌ང༌ ཡོད༌ཁན༌གུན༌ནི༌ དོད༌པ༌ བོར༌ཤིག༌ ཀ༌རུ༌ མ༌ཤི༌ཀ༌, དཀོན༌མཆོག༌གི༌ ཆག༌ ཡས༌པའེ༌ ཁྲིས༌སི༌ཀ༌ ཞུགས༌ཏེ༌ ཡོད༌། 2 ཇིག༌རྟེན༌ནི༌ ནང༌ང༌ ཡོད༌ཁན༌གུན༌ནི༌ སྐོར༌ལ༌ སམ༌བ༌ མ༌ཏང༌ང༌, ནམ༌ཁའེ༌ ནང༌ང༌ ཡོད༌ཁན༌གུན༌ནི༌ སྐོར༌ལ༌ སམ༌བ༌ ཏོང༌ཤིག༌། 3 ཅིའ༌ཟེར༌ན༌ ཁྱོ༌ཞ༌གུན༌ སྔུན༌མའེ༌ སྡིག༌ཅན༌ མི༌ཚེ༌ ཕུད༌ཅེས༌སི༌ ནང༌ང༌ ཤི༌ཏེ༌ དཀོན༌མཆོག༌གི༌ ནང༌ང༌ ཁྱོ༌ཞའེ༌ དེན༌བའེ༌ མི༌ཚེ༌བོ༌ མ༌ཤི༌ཀ༌ ཉམ༌པོ༌ སྦས༌ཏེ༌ ཡོད༌། 4 ཁྱོ༌ཞ༌གུན༌ལ༌ མི༌ཚེ༌ སོ༌མ༌ སལ༌ཁན༌ནི༌ མ༌ཤི༌ཀ༌ ལོགས༌ཏེ༌ སྐྱོད༌ད༌ཅིག༌, ཁྱོ༌ཞ༌གུན༌ནའང༌ ཟིར༌རྗིད༌དི༌ ནང༌ང༌ ཁོང༌ ཉམ༌པོ༌ སྔོན༌ཨིན༌།
5 ཏེ༌བོའེ༌ཕིའ༌ ཁྱོ༌ཞ༌གུན༌ནི༌ སྡིག༌པའེ༌ དོད༌པ༌གུན༌ མེད༌ཁན༌ ཅོ༌ཤིག༌། སྤེར༌ན༌ ངན༌པའེ༌ ལུས༌བྲེལ༌, ཟུགས༌སི༌ ཐོག༌ནེ༌ ཁྲེལ༌མེད༌དི༌ ལས༌, ངན༌པའེ༌ ལུས༌བྲེལ༌ལི༌ དོད༌པ༌, དོད༌པ༌ ངན༌པ༌, ནབ༌སེམས༌ ༼ནབ༌སེམས༌ཅན༌གུན༌ནི༌ ཇིག༌རྟེན༌ནི༌ ནོར༌ལ༌ ཆག༌ཤེས༌པོ༌ སྐུན༌དྲ༌ ཅོལ༌ཁན༌ ཙོགས༌ ཨིན༌ནོག༌༽། 6 ཏེན༌ན༌གུན༌ནི༌ ཞས༌ཏེ༌ ཁའ༌ མི༌ཉན༌ཁན༌གུན༌ནི༌ཀ༌ དཀོན༌མཆོག༌གི༌ ཐུགས༌སྲོ༌ བབས༌ཤེས༌ ཨིན༌ནོག༌། 7 ཏུས༌ཤིག༌ག༌ ཁྱོ༌ཞ༌གུན༌ནའང༌ ཏེན༌ན༌ ཙོགས༌སི༌ ངན༌པའེ༌ ལམ༌མི༌ཀ༌ གྲུལ༌ལད༌པིན༌, 8 ཨིན༌ནའང༌ ཏ༌ སྲོ༌ ཡོང༌ཅེས༌, ཁྲག༌ལུང༌, ངན༌སེམས༌, ཞན༌མའེ༌ སྕོད༌པའེ༌ སྐོར༌ལ༌ ངན༌པ༌ ཟེར༌ཅེས༌ དང༌ ཁ༌ངན༌པ༌ ཚང༌མའ༌ ཕང༌གོས༌། 9 ཅིག༌ དང༌ ཅིག༌ག༌ ཟུན༌ མ༌ཏང༌ཤིག༌, ཅིའ༌ཟེར༌ན༌ ཁྱོ༌ཞའེ༌ སྔུན༌མའེ༌ སམ༌ཚུལ༌ དང༌ ལས༌ ངན༌པ༌ གུན༌ ཕངས༌ཏེ༌ ཨིན༌། 10 ཁྱོ༌ཞ༌རང༌གུན༌ལ༌ སྕོད༌པ༌ སོ༌མའེ༌ ཀོས༌ལག༌ སྐོན༌ཤིག༌, ཡང༌ ཁྱོ༌ཞའ༌ ཛད༌ཁན༌ནི༌ དཀོན༌མཆོག༌ ཤེ༌ཤེས༌སི༌ ནང༌ང༌ ལྡན༌ཨིན༌ སོང༌ཏེ༌ ཁྱོ༌ཞའེ༌ སྕོད༌པ༌ ཁོང༌ངི༌ ཙོགས༌ གྱུར༌ཅུག༌ཤིག༌། 11 ཏེ༌ མི༌ཚེ༌ སོ༌མ༌བོའེ༌ ནང༌ང༌ ཁྱོ༌ཞ༌གུན༌ ཡ༌ཧུ༌དཱ༌པ༌ ཡ༌ ཡ༌ཧུ༌དཱ༌པ༌ མན༌ཁན༌, སུན༌ནད༌ ཅོ༌ཁན༌ ཡ༌ མ༌ཅོ༌ཁན༌, ཞན༌ཡུལ༌ལི༌ མི༌, སྕོད༌ལམ༌ མེད༌ཁན༌ནི༌ མི༌, ཚེ༌ཡོག༌ ཡ༌ རང༌ཝང༌ཅན༌ ཨིན༌ཅེས༌པོ༌ ཁག༌ཅན༌ མ༌ནོག༌, ཨིན༌ནའང༌ ཚང༌མའེ༌སང༌ ཁག༌ཅན༌བོ༌ ནི༌ མ༌ཤི༌ཀ༌ ཨིན༌ནོག༌, ཡང༌ ཁོང༌ ང༌དང༌ ཚང༌མའེ༌ ནང༌ང༌ ཞུགས༌ས༌ནོག༌།
12 ཁྱོ༌ཞ༌གུན༌ དཀོན༌མཆོག༌གི༌ ལྡམས༌ཁན༌ནི༌ དམ༌པ༌ དང༌ ཅེས༌པ༌ གུན༌ ཨིན༌ པ༌སང༌, རང༌དང༌རང༌ང༌ སྙིང༌རྗེ༌, ཀའ༌ཀྲིན༌, པས༌མོ༌, ཉམ༌ཤུང༌ དང༌ ཟོད༌པའེ༌ ཀོས༌གུན༌ སྐོན༌ཤིག༌། 13 ཁྱོ༌ཞའ༌ ཞན༌མའེ༌ གྱབ༌གལ༌ལ༌ ཟེར༌རྒྱུ༌ ཡོད༌ན༌, ཟོད༌པ༌ ཅོས༌ཏེ༌ ཏེ༌གུན༌ལ༌ ཤགས༌པ༌ ཏོང༌ཤིག༌། གཙོ༌བོའེ༌ ཁྱོ༌ཞ༌གུན༌ལ༌ ཤགས༌པ༌ སལ༌ཁན༌ ཙོགས༌ལ༌ ཁྱོ༌ཞ༌གུན༌ནིའང༌ ཅིག༌ དང༌ ཅིག༌ག༌ ཤགས༌པ༌ ཏོང༌ཤིག༌། 14 ཚང༌མའེ༌སང༌ ཁག༌ཅན༌ ནི༌, ཁྱོ༌ཞའེ༌ ཁྱོ༌ཞ༌རང༌ང༌ ཅམས༌པའེ༌ ཀོས༌པོ༌ སྐོན༌ཤིག༌, ཀ༌བོའེ༌ ང༌དང༌གུན༌ ཐུན༌བྲེལ༌ སྟན༌པོའེ༌ ནང༌ང༌ བོར༌ར༌ནོག༌། 15 ཡང༌ ཁྱོ༌ཞ༌གུན༌ ཟུགས༌ ཅིག༌གི༌ ཡན༌ལག༌ ཙོགས༌ལ༌ ཞི༌དེ༌ ནང༌ང༌ དུག༌ག༌ལ༌ བོད༌ད༌ ཛད༌ པ༌སང༌, མ༌ཤི༌ཀའེ༌ ཞི༌དེའ༌ ཁྱོ༌ཞའེ༌ སྙིང༌གུན༌ནི༌ ནང༌ང༌ ཝང༌སྲུལ༌ ཅུག༌ཤིག༌། ཏུས༌གྱུན༌ དཀོན༌མཆོག༌ག༌ ཐུག༌རྗེ༌ཆེ༌ ཞུ༌ཤིག༌།
16 མ༌ཤི༌ཀའེ༌ སྟོབས༌ཅན༌ ལོན༌གུན༌ ཁྱོ༌ཞ༌གུན༌ནི༌ སྙིང༌ དང༌ སེམས༌སི༌ ནང༌ང༌ ནས༌ཅུག༌ཤིག༌། དཀོན༌མཆོག༌གི༌ སལ༌ཁན༌ནི༌ ཤེས༌རབས༌ ཚང༌མ༌ ཉམ༌པོ༌ ཁྱོ༌ཞ༌གུན༌ནི༌ ཅིག༌ དང༌ ཅིག༌ག༌ ལབ༌ཞ༌ དང༌ ཁ༌ད༌ ཏོང༌ཤིག༌། དཀོན༌མཆོག༌ག༌ སུང༌གུར༌, གུར༌མ༌ དང༌ སེམས༌ཉིད༌དི༌ ལུ༌གུན༌ ཕུལ༌ ཟ༌ནེ༌, སྙིང༌ནེ༌ ཐུག༌རྗེ༌ཆེ༌ ཞུ༌ཤིག༌། 17 ཡང༌ ཁྱོ༌ཞའེ༌ ཅི༌ཞིག༌ ཟེར༌རད༌ ཡ༌ ཅོའད༌, ཡབ༌ དཀོན༌མཆོག༌ག༌ ཐུག༌རྗེ༌ཆེ༌ ཕུལ༌ཨིན༌ ཏེ༌བོ༌ གཙོ༌བོ༌ ཡེ༌ཤུའི༌ ཝང༌ངི༌ ནང༌ང༌ ཅོ༌ཤིག༌།
ནང༌ཚངས༌གུན༌ནི༌ ཕིའ༌ ལབ༌ཞ༌།
3:18 ནེ༌ 4:1
18 ན༌མ༌གུན༌, ཁྱོ༌ཞའ༌ རང༌ངི༌ མག༌པ༌གུན༌ནི༌ ཝང༌ངི༌ ཡོག༌ག༌ དུག༌ཤིག༌, ཅིའ༌ཟེར༌ན༌ གཙོ༌བོའེ༌ ལོབ༌ཕྲུགས༌ ཨིན༌ཅེས༌པོའེ༌ ཏེ༌ཙོགས༌ ཅོ༌གོ༌ཤེས༌ ཨིན༌ནོག༌།
19 མག༌པ༌གུན༌, རང༌ངི༌ ན༌མའ༌ ཅེས༌པ༌ ཅོ༌ཤིག༌, ཡང༌ ཁོང༌གུན༌ལ༌ ནགས༌ མ༌ལྟན༌ཤིག༌།
20 ཕྲུ༌གུ༌གུན༌, ཕ༌མའེ༌ ཟེར༌ཁན༌ ཚང༌མའ༌ ཁའ༌ཉོན༌ཤིག༌, ཏེ༌བོའ༌ གཙོ༌བོ༌ ཐུགས༌ཐད༌ད༌ནོག༌། 21 ཨ༌བ༌གུན༌ རང༌ངི༌ ཕྲུ༌གུའ༌ མངས༌ཏེའང༌ ལྡམས༌ཏེ༌ མ༌བོར༌ཤིག༌, ཏེ༌ཟུག༌ ཅོ༌ན༌ ཁོང༌གུན༌ནི༌ སྤོས༌པ༌ ཆག༌ག༌ནོག༌།
22 ཡོག༌པོ༌གུན༌, ཁྱོ༌ཞའེ༌ ཇིག༌རྟེན༌ནི༌ སྤོན༌བོ༌གུན༌ནི༌ ཟེར༌ཁན༌ ཚང༌མའ༌ ཁའ༌ཉོན༌ཤིག༌། ཁྱོ༌ཞ༌གུན༌ནི༌ ཁོང༌ངི༌ སྟོད༌པ༌ ཐོབ༌ཅེས༌ ཡ༌ ཁོང༌གུན༌ནི༌ ལྟའ༌ ཟ༌ནེ༌ ཅིག༌པོ༌ མན༌པ༌, གཙོ༌བོའ༌ ཀུས༌པ༌ ཅོ༌ཅེས༌ དང༌ སེམས༌ ཟང༌པོ༌ ཡོད༌ཅེས༌པོའེ༌ ཏེ༌བོ༌ ཅོ༌ཤིག༌། 23 ཅི༌ ལས༌ཤིག༌ ཅོའད༌ནའང༌, སྙིང༌ ཐག༌པ༌ནེ༌ ཅོ༌ཤིག༌། མི༌ མན༌པ༌, གཙོ༌བོའེ༌ ཕིའ༌ ཅོས༌ཏེ༌ ཨིན༌ སོམ༌ཤིག༌། 24 ཨིད༌ཏུ༌ ཅོ༌ཤིག༌ གཙོ༌བོའེ༌ ནོར༌སྐལ༌བོ༌ སོལ༌རས༌སི༌ ཚུལ༌ལ༌ ཐོབ༌ཨིན༌, ཅིའ༌ཟེར༌ན༌ ཁྱོ༌ཞའེ༌ ཞབ༌སྟོག༌ ཞུ༌ཁན༌ནི༌ སྤོན༌བོ༌ ནི༌ གཙོ༌བོ༌ མ༌ཤི༌ཀ༌ ཞུགས༌ཏེ༌ ཨིན༌ནོག༌། 25 གལ༌ཏེས༌ ཁྱོ༌རང༌གུན༌ནི༌ ངན༌པ༌ ཅོ༌ན༌, ངན༌པ༌ ཅོ༌ཁན༌ནི༌ ལན༌བོའ༌ ཆད༌པ༌ ཕོག༌ཨིན༌, ཅིའ༌ཟེར༌ན༌ དཀོན༌མཆོག༌གི༌ སུའང༌ ཆོག༌རིས༌ ཅོའ༌ ཛད༌ད༌ མ༌ནོག༌།