1 ཏེ༌ནེ༌ ལོ༌ ཅུབ༌ཞིའི༌ སྟིང༌ནེ༌, ང༌ ཡང༌སྐྱར༌ ལོགས༌ཏེ༌ ཡེ༌རུ༌ཤ༌ལེམ༌མ༌ བཱར༌ན༌བས༌ ཉམ༌པོ༌ སོང༌པིན༌། ངའེ༌ ཏི༌ཏུས༌སའང༌ ང༌ཞའ༌ ཉམ༌པོ༌ ཁྲིད༌ཏེ༌ ཁྱེར༌པིན༌། 2 དཀོན༌མཆོག༌གི༌ ངའ༌ སྔོན༌ ཅུག༌ག༌ ཛད༌ཁན༌བོའེ༌ ཞས༌ཏེ༌, ང༌ ཏེ༌རུ༌ སོང༌པིན༌, ཡང༌ ཡེ༌རུ༌ཤ༌ལེམ༌མི༌ ཆོས༌ཚོགས༌སི༌ འུ༌སྐྱོང༌ ཨིན༌ཁན༌གུན༌ ཅིག༌པོ༌ ཡོད༌ ཟ༌ནེ༌, ངའེ༌ ཡ༌ཧུ༌དཱ༌པ༌ མན༌ཁན༌གུན༌ལ༌ གའ༌མོའེ༌ ནས༌ཚུལ༌ ཤད༌ཁན༌བོའེ༌ སྐོར༌ལ༌ ཁོང༌གུན༌ལ༌ ཤད༌པིན༌, ཅིའ༌ཟེར༌ན༌ ངའ༌ ངའེ༌ ཅོ༌ཨིན༌ ཡོད༌ཁན༌ ཡ༌ ཅོ༌ཁན༌ནི༌ ཏེ༌ རྩོན༌གྲུས༌གུན༌ གོད༌ལ༌ སོང༌ཏེ༌ མན༌ན༌ཧེ༌, སམ༌ཏེ༌ ཇིགས༌སད༌པིན༌། 3 ཁོང༌གུན༌ནི༌ ངའ༌ ཆོགས༌སྐྱོར༌ ཅོས༌, ཡང༌ ངའེ༌ ཕྲོ༌པ༌ ཡ༌ཧུ༌དཱ༌པ༌ མན༌ཁན༌ ཏི༌ཏུས༌ལའང༌ སུན༌ནད༌ ཅོ༌གོ༌ཤེས༌པོ༌ ཁག༌ཅན༌ མ༌སམ༌།

4 འི༌ ཏྲི༌ཝ༌བོ༌ བྱུང༌, ཅིའ༌ཟེར༌ན༌ མ༌ཤི༌ཀ༌ ཡེ༌ཤུའི༌ ནང༌ང༌ ང༌ཞ༌གུན༌ལ༌ རང༌ཝང༌ ཡོད༌ཁན༌བོ༌ ལྟ༌ཅེས༌ལ༌, ཟུས༌མའེ༌ སྤུན༌ རིག༌ ང༌ཞ༌གུན༌ནི༌ ཆོས༌ཚོགས༌སི༌ ཕྲོའ༌ སང༌ཝའེ༌ ཐོག༌ནེ༌ དྲེས༌ཏེ༌ ཨིན༌ནོག༌། ཡང༌ རང༌ཝང༌བོ༌ ཀོགས༌ཏེ༌ ཁྱེར༌ཏེ༌, ཡ༌ཧུ༌དཱ༌པའེ༌ ཁྲིམས༌གུན༌ནི༌ ཚེ༌ཡོག༌ གྱུར༌ཅུག༌ཅེས༌ལ༌ ཐད༌དུག༌། 5 ཨིན༌ནའང༌ ང༌ཞའེ༌ ཁོང༌གུན༌ནི༌ ཟེར༌ཁན༌གུན༌ལ༌ སྲིབ༌ཅིག༌གི༌ ཕིའང༌, ཁའ༌ མ༌ཆམས༌པིན༌, ཅིའ༌ཟེར༌ན༌ ང༌ཞའེ༌ གའ༌མོའེ༌ ནས༌ཚུལ༌ལི༌ དྲང༌པོ༌བོ༌ ཁྱོ༌ཞ༌གུན༌ནི༌ ཕིའ༌ སྐྱོབས༌ཏེ༌ བོར༌ར༌ལ༌ ཐད༌དད༌པིན༌།

6 ཡང༌ ཡེ༌རུ༌ཤ༌ལེམ༌མི༌ ཆོས༌ཚོགས༌སི༌ འུ༌སྐྱོང༌ ཨིན༌ཁན༌གུན༌ནི༌ ངའེ༌ ལབ༌ཨིན༌ ཡོད༌ཁན༌བོའེ༌ཀ༌ ཅའང༌ ནན༌ཏེ༌ ཟེར༌ཅེས༌ མི༌དུག༌པིན༌ ༼ཏེ༌ཙོགས༌སི༌ ཀོ༌སའེ༌ཀ༌ ཡོད༌ཅེས༌པོའེ༌ ངའེ༌ ཕིའ༌, ཅའང༌ ཁྱད༌ མེད༌, ཅིའ༌ཟེར༌ན༌ དཀོན༌མཆོག༌གི༌ སུ༌ཞིག༌གའང༌ ཆོག༌རིས༌ ཅོའ༌ ཛད༌ད༌ མ༌ནོག༌༽། 7 ཏེ༌བོ༌ མ༌ཚད༌ དཀོན༌མཆོག༌གི༌ པི༌ཏྲར༌ལ༌ ཡ༌ཧུ༌དཱ༌པ༌གུན༌ལ༌, ཆོས༌ཤད༌ཅེས༌སི༌ ཁག༌ ཀལ༌ལ༌ ཛད༌ཁན༌ ཙོགས༌ལ༌, ཡ༌ཧུ༌དཱ༌པ༌ མན༌ཁན༌གུན༌ལ༌, གའ༌མོའེ༌ ནས༌ཚུལ༌ ཤད༌ཅེས༌སི༌ ཁག༌ ངའ༌ སལ༌ལ༌ ཛད༌ཁན༌བོ༌, ཏེ༌ འུ༌སྐྱོང༌གུན༌ནི༌ ཐོངས༌ཏེ༌ ཨིན༌ནོག༌། 8 ཡེ༌ཤུའི༌ སྐུ༌ཚབས༌ པི༌ཏྲར༌ གྱུད༌ཏེ༌, ཡ༌ཧུ༌དཱ༌པ༌གུན༌ནི༌ ནང༌ང༌ ཆག༌ལས༌ ཛད༌ཁན༌ནི༌ ཏེན༌ན༌ དཀོན༌མཆོག༌པོའེ༌, ང༌ ཡེ༌ཤུའི༌ སྐུ༌ཚབས༌ གྱུད༌ཏེ༌ ཡ༌ཧུ༌དཱ༌པ༌ མན༌ཁན༌གུན༌ནི༌ ནང༌ངའང༌, ཆག༌ལས༌ ཛད༌ཏེ༌ ཨིན༌ནོག༌།

9 ཆོས༌ཚོགས༌སི༌ འུ༌སྐྱོང༌ ཚང༌མའེ༌སང༌ ཁག༌ཅན༌ ཐེའ༌ ཛད༌ཁན༌ ཡ༌ཀོབ༌, པི༌ཏྲར༌ དང༌, ཡོ༌ཧཱ༌ནན༌ གུན༌ནི༌ ངའེ༌ ལས༌གུན༌ནི༌ སྐོར༌ ཚོར༌ཏེ༌, དཀོན༌མཆོག༌གི༌ ངའ༌ ཐུག༌རྗེ༌ སལ༌ལ༌ ཛད༌ཏེ༌ ཨིན༌ཁན༌བོ༌ ཧ༌གོ༌། ཡང༌ བཱར༌ན༌བས༌ དང༌ ངའ༌ ཁོང༌གུན༌ནི༌ ཕྲོ༌པ༌ ལས༌ཅེད༌པ༌ ཐེའ༌ཛད༌ཏེ༌, ང༌ཞའ༌ ཡ༌ཧུ༌དཱ༌པ༌ མན༌ཁན༌གུན༌ནི༌ ཕྲོའ༌ ཆོས༌ཤད༌ཅེས༌, ཡང༌ ཁོང༌གུན༌ནི༌ ཡ༌ཧུ༌དཱ༌པ༌གུན༌ནི༌ ཕྲོའ༌ ལས༌ ཅོ༌ཅེས༌ལ༌ ཁའ༌ཆམས༌ས༌ ཛདས༌། 10 ཉལ༌བ༌ཅན༌གུན༌ལ༌ རོགས༌ ཅོ༌ཅེས༌སི༌ ཞུ༌ཝ༌ ཅིག༌པོ༌བོ༌, ཁོང༌གུན༌ནི༌ ང༌ཞའ༌ ཏངས༌། ཏེན༌ན༌ ལས༌པོ༌ ཅོའ༌ལ༌ ངའ༌ རིངས༌སད༌པིན༌།

11 ཨིན༌ནའང༌ པི༌ཏྲར༌ ཨན༌ཏི༌ཡོག༌གི༌ གྱལ༌སའེ༌ ནང༌ང༌ ཡོད༌ ཟ༌ནེ༌, ཁོང༌ངི༌ ཅོས༌ཁན༌བོ༌ ནོར༌ཁྲུལ༌ ཏན༌ཏན༌ ཨིན༌ པ༌སང༌, ངའ༌ ཁོང༌ང༌ ལྡོང༌ངི༌ཀ༌ གྱབ༌གལ༌ ཅོ༌གོས༌། 12 སྔུན༌ལ༌ ཁོང༌ངི༌ ཡ༌ཧུ༌དཱ༌པ༌ མན༌ཁན༌ནི༌ མ༌ཤི༌ཀ༌པ༌གུན༌ ཉམ༌པོ༌ ཁར༌ཇི༌ ཟའད༌པིན༌། ཨིན༌ནའང༌ ཡ༌ཀོབ༌བི༌ ཛ༌འོ༌ ཁ༌ཅིག༌ ཏེ༌རུ༌ ལེབ༌བ༌ཅིག༌, པི༌ཏྲར༌རི༌ ཏེ༌ སྤུན༌ ཡ༌ཧུ༌དཱ༌པ༌ མན༌ཁན༌གུན༌ ཉམ༌པོ༌ བྲེལ༌ མ༌བོརས༌ ཡང༌ ཟན༌ནའང༌ མ༌ཟོས༌, ཅིའ༌ཟེར༌ན༌ ཁོ༌ སུན༌ནད༌ ཅོ༌གོ༌ཤེས༌ ཁག༌ཅན༌ སམ༌ཁན༌ནི༌ ཡ༌ཀོབ༌བི༌ ཛ༌འོ༌གུན༌ནི༌ སྐྱོན༌རྗོད༌ ཅོ༌ཅེས༌ལ༌ ཇིགས༌སད༌པིན༌། 13 ཏེ༌བོའེ༌ བྲས༌བུ༌, ཞན༌ཡང༌ ཡ༌ཧུ༌དཱ༌པ༌ མ༌ཤི༌ཀ༌པ༌གུན༌ པི༌ཏྲར༌རི༌ ཁ༌ཆོས༌སི༌ ནང༌ང༌ དྲེས༌, མ༌ཚད༌ བཱར༌ན༌བས༌སའང༌ ཁོང༌གུན༌ནི༌ ཁ༌ཆོས༌སི༌ ནང༌ང༌ སོང༌།

14 ཁོང༌གུན༌ གའ༌མོའེ༌ ནས༌ཚུལ༌ལི༌ ངོས༌པོའེ༌ ལོན༌བོའེ༌ གྱབ༌ནེ༌ མ༌གྲུལ༌ཁན༌བོ༌, ངའེ༌ ཐོང༌ང༌ཅིག༌, ངའེ༌ ཚང༌མའེ༌ དུན༌ལ༌ པི༌ཏྲར༌ལ༌ ཟེར༌པིན༌, "ཁྱོ༌རང༌ ཡ༌ཧུ༌དཱ༌པ༌ཞིག༌ག༌ སྐྱེས༌ཏེའང༌, ཡ༌ཧུ༌དཱ༌པའེ༌ ཁྲིམས༌གུན༌ ཕངས༌ཏེ༌, ཡ༌ཧུ༌དཱ༌པ༌ མན༌ཁན༌གུན༌ ཙོགས༌ལ༌ མི༌ཚེ༌ ཕུད༌དུག༌། ཏ༌ ཁྱོ༌རང༌ངི༌ འི༌ ཡ༌ཧུ༌དཱ༌པ༌ མན༌ཁན༌ནི༌ སྤུན༌གུན༌ལ༌, ཅི༌ཕིའ༌ ཡ༌ཧུ༌དཱ༌པའེ༌ ལུག༌སྲོལ༌ལི༌ ནང༌ཞིན༌ གྲུལ༌ཅེས༌ལ༌, ཝང༌ ཏང༌ངད༌། 15 ང༌དང༌ ཉིས༌ཀོ༌ ནི༌, སྐྱེས༌པ༌ནེ༌ ཕར༌ལ༌ ཡ༌ཧུ༌དཱ༌པ༌ ཨིན༌ནོག༌། ཞན༌མ༌གུན༌ནི༌ སྡིག༌ཅན༌ ཨིན༌ནོག༌ ཟེར༌ཁན༌ ཡ༌ཧུ༌དཱ༌པ༌ མན༌ཁན༌གུན༌ ཙོགས༌ མ༌ནོག༌། 16 ཨིན༌ནའང༌ ང༌དང༌གུན༌ལ༌ གྱུས༌ཨིན༌ནོག༌, མི༌ཞིག༌ ཁྲིམས༌གུན༌ ཁའ༌ཉན༌ཅེས༌པོ༌ མན༌པ༌, ཡེ༌ཤུ༌ མ༌ཤི༌ཀའེ༌ ནང༌ང༌ ཏད༌པ༌ ཡོད༌ཅེས༌པོའེ༌, དཀོན༌མཆོག༌གི༌ སྐུན༌དུན༌ལ༌, དྲང༌པོ༌ ཐེའ༌ ཛད༌ད༌ནོག༌། ཁྲིམས༌གུན༌ ཁའ༌ཉན༌ཅེས༌པོ༌ མན༌པ༌, མ༌ཤི༌ཀ༌ ཡེ༌ཤུའི༌ ནང༌ང༌ ཏད༌པ༌ ཅོ༌ཅེས༌ གྱུད༌ཏེ༌, དཀོན༌མཆོག༌གི༌ སྐུན༌དུན༌ལ༌ དྲང༌པོ༌ ཐེའ༌ ཛད༌ཅེས༌སི༌ ཕིའ༌, ང༌དང༌གུན༌ནི༌ མ༌ཤི༌ཀ༌ ཡེ༌ཤུའི༌ ནང༌ང༌ ཏད༌པ༌ ཅོས༌ཏེ༌ ཨིན༌ནོག༌། ཅིའ༌ཟེར༌ན༌ སུ༌ཞིག༌གའང༌ ཁྲིམས༌ ཁའ༌ཉན༌ཅེས༌པོའེ༌, དཀོན༌མཆོག༌གི༌ སྐུན༌དུན༌ལ༌ དྲང༌པོ༌ ཐེའ༌ ཛད༌ད༌ མ༌ནོག༌།"

17 གལ༌ཏེས༌ ང༌དང༌གུན༌ནི༌ མ༌ཤི༌ཀའེ༌ ནང༌ང༌ ཏད༌པ༌ ཡོད༌ཅེས༌པོ༌ གྱུད༌ཏེ༌, དཀོན༌མཆོག༌གི༌ སྐུན༌དུན༌ལ༌ དྲང༌པོ༌ ཐེ༌ཅེས༌ ཙལ༌ལད༌ན༌, ཨིན༌ནའང༌ ཁྲིམས༌ ཕང༌ཅེས༌པོའེ༌ ང༌དང༌གུན༌ནི༌ ནང༌ང༌ སྐྱོན༌ ཐོང༌ངད༌ན༌, ཅི༌ ཏེ༌བོའེ༌ ཏོན༌བོ༌, མ༌ཤི༌ཀའེ༌ ང༌དང༌གུན༌ སྡིག༌པའེ༌ ནང༌ང༌ ཁྲིད༌ཏེ༌ ཁྱེར༌ར༌ ཛད༌ཏེ༌ ཨིན༌ནོག༌ག༌? མ༌ནེ༌ མ༌ནོག༌། 18 ཨིན༌ནའང༌ གལ༌ཏེས༌ ངའེ༌ སྔུན༌ལ༌ ཤིགས༌ཁན༌ནི༌ ཁྲིམས༌པོ༌, ཡང༌སྐྱར༌ རྩིག༌ན༌, ཏེ༌བོའེ༌ ང༌ སྡིག༌ཅན༌ཞིག༌ ཨིན༌ཁན༌བོ༌ ལྟན༌ན༌ནོག༌། 19 ངའེ༌ ཁྲིམས༌ ཚང༌མ༌ སྲུང༌ མ༌ཉན༌ པ༌སང༌, ཏེ༌བོའེ༌ ངའ༌ ཤི༌གོ༌ཤེས༌ ཁྲིམས༌ཅདས༌། སོང༌པ༌སང༌ ཁྲིམས༌སི༌ ཕིའ༌ ང༌ ཤི༌ཏེ༌ ཨིན༌ ཡང༌ན༌ དཀོན༌མཆོག༌གི༌ ཏོན༌ལ༌ མི༌ཚེ༌ ཕུད༌ཅེས༌སི༌ ཕིའ༌, ངའེ༌ ཁྲིམས༌ ཚང༌མ༌ སྲུང༌ཅེས༌ ཕངས༌ཏེ༌ མེད༌། 20 མ༌ཤི༌ཀ༌ རྐྱང༌ཤིང༌ངི༌ཀ༌ རྐྱང༌ང༌ ཛད༌ ཟ༌ནེ༌, ངའེ༌ སྔུན༌ནི༌ མི༌ཚེ༌བོའང༌ རྐྱངས༌ཏེ༌ མེད༌། ཏ༌ནེ༌ཕར༌ལ༌ འི༌ མི༌ཚེའེ༌ ངའེ༌ མན༌པ༌, མ༌ཤི༌ཀ༌ འི༌ ནང༌ང༌ ཞུགས༌སད༌། ཏ༌ ངའེ༌ དཀོན༌མཆོག༌གི༌ སྲས༌སི༌ ནང༌ང༌, ཨིད༌ཤེས༌ ཅོས༌ཏེ༌ འི༌ ཇིག༌རྟེན༌ནི༌ ཟུགས༌པོའེ༌ ནང༌ང༌ དུག༌གད༌། ཁོང༌ངི༌ ངའ༌ ཅེས༌པ༌ ཛད༌ཏེ༌ ཁོང༌རང༌ངི༌ སྲོག༌, ངའེ༌ ཕིའ༌ སལ༌ལ༌ ཛདས༌། 21 ངའེ༌ དཀོན༌མཆོག༌གི༌ ཐུག༌རྗེ༌བོ༌ སྣང༌མེད༌ ཅོ༌ཉན༌ཅེས༌ མ༌ནོག༌། གལ༌ཏེས༌ ཁྲིམས༌གུན༌ སྲུང༌ཅེས༌པོའེ༌, ང༌དང༌གུན༌ དཀོན༌མཆོག༌གི༌ སྐུན༌དུན༌ལ༌ དྲང༌པོ༌ ཐེའད༌ན༌, ཏེ༌ནེ༌ མ༌ཤི༌ཀ༌ ཀྲོངས༌ གོ༌ཤེས༌སི༌ སྒོས༌དོམ༌ མེད༌པ༌ ཨིན༌ནོག༌།