4
1 ངའེ༌ ཟེར༌ཅེས༌པོ༌ ནི༌, ནོར༌སྐལ༌ ལེན༌ཁན༌བོ༌ ཕྲུ༌གུ༌ ཨིན༌ ཟ༌ནེ༌ ཁོ༌ ནོར༌ གང༌པོའེ༌ དག༌པོ༌ ཨིན༌ཏེའང༌, ཁོ༌ ཚེ༌ཡོག༌ ཤིག༌གི༌ སང༌ སོ༌སོ༌ མ༌ནོག༌། 2 ཡང༌ན༌ ཏེ༌ ཕྲུ༌གུ༌བོའ༌ ཏེ༌ཏེ༌ཚོག༌པ༌, ཁོ༌རང༌ དང༌ ཁོའེ༌ ནོར༌ལ༌ ལྟ༌སྟོག༌ ཅོ༌ཁན༌གུན༌ནི༌ ཁའ༌ ཉན༌གོས༌ས༌ནོག༌ ནམ༌ཚོག༌པ༌, ཁོའེ༌ ཨ༌བའེ༌ ལྡམ༌ཁན༌ནི༌ ཏུས༌པོ༌ ལེབ༌ མི༌ལེབ༌། 3 མ༌ཤི༌ཀ༌ སྐྱོད༌དི༌ སང༌ སྔུན༌ལ༌ ཏེན༌ན༌ ཙོགས༌པོ༌ ང༌དང༌གུན༌ ཉམ༌པོ༌ ཡོད༌པིན༌། ང༌དང༌གུན༌ ཏེ༌ ཕྲུ༌གུ༌ ཙོགས༌ལ༌, འི༌ ཇིག༌རྟེན༌ནི༌ ཆོས༌སི༌ ལམ༌ ལུག༌སྲོལ༌གུན༌ནི༌ ཚེ༌ཡོག༌ ཨིན༌པིན༌།
4 ཨིན༌ནའང༌ ལྡམ༌མ༌ ཛད༌ཁན༌ནི༌ ཏུས༌པོ༌ ལེབ༌བ༌ཅིག༌, དཀོན༌མཆོག༌གི༌ ཁོང༌རང༌ངི༌ སྲས༌པོ༌ ལམ༌ཅུག༌ག༌ ཛདས༌། ཁོང༌ བུ༌མོ༌ཞིག༌ནེ༌ ལྟམས༌ཏེ༌ ཡ༌ཧུ༌དཱ༌པའེ༌ ཁྲིམས༌སི༌ ཡོག༌ག༌ མི༌ཚེ༌ ཕུད༌ད༌ ཛདས༌། 5 ཁྲིམས༌སི༌ ཡོག༌པོ༌ ཨིན༌ཁན༌གུན༌ནི༌ རང༌ཝང༌བོ༌ ལོགས༌ཏེ༌ ཉོ༌ཅེས༌ལ༌, དཀོན༌མཆོག༌གི༌ ཁོང༌ ལམ༌ཅུག༌ག༌ ཛདས༌, ཅིའ༌ཟེར༌ན༌ ཁོང༌ ང༌དང༌གུན༌ ཁོང༌ངི༌ སོས༌བུའ༌ ལེན༌ཁན༌ནི༌ ཕྲུ༌གུ༌གུན༌ གྱུར༌ཅེས༌ལ༌ ཐད༌ད༌ ཛད༌ད༌ནོག༌། 6 ང༌དང༌ དཀོན༌མཆོག༌གི༌ ཕྲུ༌གུ༌གུན༌ ཨིན༌ པ༌སང༌, ཁོང༌ངི༌ ཁོང༌རང༌ངི༌ སྲས༌སི༌ ཐུག༌ཉིད༌བོ༌ ང༌དང༌གུན༌ནི༌ སྙིང༌ངི༌ ནང༌ང༌ ལམ༌ཅུག༌ག༌ ཛདས༌, ཡང༌ ཏེན༌ན༌ ཐུག༌ཉིད༌བོའེ༌ "ཨ༌བ༌, ཡབ༌ལེ༌" མོལ༌ཨིན༌ བོད༌ད༌ ཛདས༌། 7 ཏེ༌བོའེ༌ཕིའ༌ ཁྱོ༌ཞ༌གུན༌ ཚེ༌ཡོག༌ག༌ མ༌ལུས༌ས༌, དཀོན༌མཆོག༌ ཁོང༌རང༌ངི༌ ཕྲུ༌གུ༌གུན༌ ཨིན༌ནོག༌། ཁྱོ༌ཞ༌གུན༌ ཁོང༌ངི༌ ཕྲུ༌གུ༌ ཨིན༌ པ༌སང༌, ཁྱོ༌ཞའ༌ ཁོང༌ངི༌ ནོར༌སྐལ༌ ལེན༌ཁན༌གུན༌ནའང༌ ཨིན༌ནོག༌།
གཱ༌ལ༌ཏི༌ཡཱ༌པ༌གུན༌ནི༌ ཕིའ༌ པ༌འུ༌ལུའི༌ ཐུགས༌ཚེར༌།
4:8 ནེ༌ 20
8 དཀོན༌མཆོག༌ ཤེས༌སི༌ སང༌ སྔུན༌ལ༌, ཁྱོ༌ཞའ༌ ཡ༌ཧུ༌དཱ༌པ༌ མན༌ཁན༌གུན༌ དེན༌བའེ༌ དཀོན༌མཆོག༌ མན༌ཁན༌ རིག༌གི༌ ཚེ༌ཡོག༌ ཨིན༌པིན༌། 9 ཨིན༌ནའང༌ ཏ༌ ཁྱོ༌ཞ༌གུན༌ནི༌ དཀོན༌མཆོག༌ ཤེས༌ཏེ༌ ཨིན༌ནོག༌, ཡ༌ ངའེ༌ ཟེར༌གོས༌ དཀོན༌མཆོག༌གི༌ ཁྱོ༌ཞ༌གུན༌ ཁྱེན༌ན༌ ཛད༌ད༌ནོག༌། ཏེ༌ནེ༌ ཅི༌ཕིའ༌ ཁྱོ༌ཞ༌གུན༌ ཡང༌སྐྱར༌ ཆོས༌སི༌ འུ༌ཐུགས༌ དང༌ ཕན༌མི༌ཐོགས༌སི༌ ལམ༌ ལུག༌སྲོལ༌གུན༌ནི༌ ཚེ༌ཡོག༌ གྱུར༌ར༌ལ༌, ལོགས༌ཏེ༌ ཆ༌ཉིན༌རག༌། 10 སྤེར༌ན༌, ཁྱོ༌ཞ༌གུན༌ནི༌ མིག༌སལ༌ལི༌ ཞག༌, ཟླ༌ཝ༌, ནམ༌ཟླ༌ དང༌ ལོ༌ གུན༌ ཙི༌རུག༌། 11 ང༌ ཁྱོ༌ཞ༌གུན༌ནི༌ ཕིའ༌ ཇིགས༌ས༌རག༌, ངའེ༌ ཁྱོ༌ཞའེ༌ ཕིའ༌ རྩོན༌གྲུས༌ ཅོས༌ཏེ༌ ལས༌ ཅོ༌ཁན༌གུན༌ གོད༌ལ༌ སོང༌ཏེ༌ ཨིན༌ཏིག༌དུག༌། 12 ཅེས༌པའེ༌ སྤུན༌གུན༌, ང༌ རང༌ཝང༌ངི༌ ནང༌ང༌ དུག༌ག༌ ཙོགས༌ལ༌, ཁྱོ༌ཞ༌གུན༌ནའང༌ དུག༌ཅེས༌ལ༌ ཞུ༌ཝ༌ ཕུལ༌ལད༌། ཅིའ༌ཟེར༌ན༌ སྔུན༌ལ༌ ཁྱོ༌ཞའ༌ ཡ༌ཧུ༌དཱ༌པ༌ མན༌ཁན༌ ཁྲིམས༌སི༌ ཀ༌ནེ༌ རང༌ཝང༌ ཡོད༌ཁན༌གུན༌ ཙོགས༌, ང༌ གྱུར༌ཏེ༌ ཨིན༌།
ཁྱོ༌ཞ༌གུན༌ནི༌ ངའ༌ ངན༌པ༌ མ༌ནེ༌ མ༌ཅོས༌། 13 ཁྱོ༌ཞ༌གུན༌ལ༌ གྱུས༌ཨིན༌ནོག༌, ངའ༌ ཟུ༌མོ༌ ཡོང༌ཅེས༌པོའེ༌, ཁྱོ༌ཞ༌གུན༌ ཡོད༌ས༌ གོ༌མ༌རང༌ ཡོང༌གོས༌ པ༌སང༌, ངའེ༌ གའ༌མོའེ༌ ནས༌ཚུལ༌ ཁྱོ༌ཞའ༌ ཤད༌པིན༌། 14 ཟུགས༌པོའེ༌ ཐོག༌ནེ༌ ང༌ མ༌ སྐྱོ༌མོ༌ ཡོད༌ པ༌སང༌, ཁྱོ༌ཞ༌གུན༌ནི༌ ངའ༌ ཁམ༌ལོགས༌ཏེ༌ རྩིས༌མེད༌ ཅོ༌ཉན༌ཅེས༌ ཡོད༌པིན༌། ཨིན༌ནའང༌ ཁྱོ༌ཞའེ༌ ང༌ རིན༌མེད༌ མ༌ཅོས༌, ཡ༌ ལོགས༌ཏེ༌ མ༌ཀལས༌། དཀོན༌མཆོག༌གི༌ ཆོགས༌ནེ༌ ཕོ༌ཉ༌, ཡ༌ མ༌ཤི༌ཀ༌ ཡེ༌ཤུ༌ ཁོང༌རང༌ ཙོགས༌ལ༌, གའ༌སུས༌ ཞུས༌ཏེ༌ ངའ༌ ལྟ༌སྟོག༌ ཅོས༌། 15 ཁྱོ༌ཞའེ༌ ནང༌ང༌ ཡོད༌ཁན༌ནི༌ ཏེ༌ ཐད༌པོ༌གུན༌ལ༌ ཅི༌ སོང༌? གལ༌ཏེས༌ ཉན༌པིན༌ན༌, ཁྱོ༌ཞ༌གུན༌ནི༌ རང༌ངི༌ མིག༌གུན༌ ཕིངས༌ཏེ༌ ངའ༌ ཏང༌ཅེས༌ལ༌ ཐད༌པོ༌ དུག༌པིན༌,*4:15 ཆོས༌སི༌ ནང༌ང༌ ཁས༌པ༌ མང༌པོའེ༌ པ༌འུ༌ལུའ༌ མིག༌གི༌ ཟུ༌མོ༌ ཡོད༌ཀྱག༌ སམ༌མ༌ནོག༌། ངའེ༌ ཏེ༌བོའ༌ སྤང༌པོ༌ ཏང༌ ཉན༌ཅེས༌རག༌། 16 ཨིན༌ནའང༌ ཏ༌ ངའེ༌ ཁྱོ༌ཞ༌གུན༌ལ༌ དྲང༌པོ༌ ཤད༌ཅེས༌པོའེ༌ ང༌ ཁྱོ༌ཞ༌གུན༌ནི༌ གྲ༌འོ༌ གྱུར༌ཏེ༌ ཨིན༌ན༌?
17 ཏེ༌ ཟུས༌མའེ༌ ལོབ༌པོན༌གུན༌ནི༌, ཁྱོ༌ཞའེ༌ ཆོགས༌སྐྱོར༌གུན༌ ཐོབ༌ཅེས༌སི༌ ཕིའ༌ མ༌སྲན༌ཏྲེ༌ དོད༌པ༌ ཅོའ༌ནོག༌, ཨིན༌ནའང༌ ལྟ༌ཝ༌ ངན༌པ༌ ཉམ༌པོ༌། ཁྱོ༌ཞ༌གུན༌ནི༌ ཁོང༌ ཅིག༌པོའ༌ ཆོགས༌སྐྱོར༌ ཅོ༌ཅེས༌སི༌ ཕིའ༌, ཁོང༌གུན༌ནི༌ ཁྱོ༌ཞ༌གུན༌ དང༌ ངའེ༌ ནང༌ང༌ བར༌ ཕེས༌ཏེ༌, བྲེལ༌བོ༌ ཤིག༌ཅེས༌ལ༌ དོད༌པ༌ ཅོའ༌ནོག༌། 18 གལ༌ཏེས༌ སམ༌བ༌ ཟང༌པོ༌ ཉམ༌པོ༌ ཨིན༌ན༌, དོད༌པ༌ མ༌སྲན༌ཏྲེ༌ ཅོ༌ནའང༌ གྲིག༌ཏེ༌ ཨིན༌ནོག༌། ཨིན༌ནའང༌ ཏེ༌བོ༌ ང༌ ཁྱོ༌ཞ༌གུན༌ ཉམ༌པོ༌ ཡོད༌ ཟ༌ནེ༌ ཅིག༌པོ༌ མན༌པ༌, ཏུས༌གྱུན༌ ཅོ༌གོ༌ཤེས༌ ཨིན༌ནོག༌། 19 འོ༌, ངའེ༌ ཅེས༌པའེ༌ ཕྲུ༌གུ༌གུན༌, ཀ༌ཟུག༌གི༌ ཨ༌མ༌ཞིག༌ག༌ ཕྲུ༌གུ༌ ཇོར༌ ཟ༌ནེ༌ ཟུ༌མོ༌ ཡོང༌ངད༌, ཏེན༌ན༌ ཙོགས༌སི༌ ཟུ༌མོ༌ ཁྱོ༌ཞ༌གུན༌ནི༌ ཕིའ༌ ཡང༌སྐྱར༌ ངའེ༌ སྙིང༌ངི༌ ནང༌ང༌ རག༌, ནམ༌ཚོག༌པ༌ ཁྱོ༌ཞའེ༌ ནང༌ང༌ མ༌ཤི༌ཀའེ༌ སྕོད༌ལམ༌གུན༌ གང༌པོ༌ ལྡན༌ མི༌ལྡན༌། 20 ང༌ དག༌ས༌ ཁྱོ༌ཞ༌གུན༌ ཉམ༌པོ༌ ཡོད༌ཅེས༌སི༌ མ༌སྲན༌ཏྲེ༌ དོད༌པ༌ ཅོའད༌, ཏེ༌ནེ༌ ངའེ༌ ཁྱོ༌ཞ༌གུན༌ ཉམ༌པོ༌ ང༌རང༌ངི༌ སྤེ༌ར༌ ཏང༌ཚུལ༌བོའེ༌ ནང༌ང༌ གྱུར༌ཇ༌ ཁྱོང༌ཉན༌ཏེ༌ ཡོད༌གྲོ༌། ཨིན༌ནའང༌ ཐག༌རིང༌ང༌ ཡོད༌ཅེས༌པོའེ༌ ང༌ ཧ༌གོའ༌ མེ༌རག༌, ངའེ༌ ཁྱོ༌ཞའ༌ ཀ༌ཟུག༌གི༌ རོགས༌ ཅོ༌ཨིན༌།
ཨབ༌ར༌ཧམ༌མི༌ ཕྲུ༌གུ༌ ཉིས༌།
4:21 ནེ༌ 31
21 ཁྲིམས༌སི༌ ཡོག༌ག༌ དུག༌ཉིན༌ ཡོད༌ཁན༌ ཁྱོ༌ཞ༌གུན༌ནི༌ ངའ༌ ཤོད༌དའང༌། ཅི༌ ཁྲིམས༌སི༌ ནང༌ང༌ ཟེར༌ཏེ༌ ཡོད༌ཁན༌བོ༌, ཁྱོ༌ཞ༌གུན༌ལ༌ ཏན༌ཏན༌ གྱུས༌ཡོད༌ད༌? 22 དམ༌པའེ༌ སུང༌རབས༌སི༌ ནང༌ང༌ མོལ༌ཏེ༌ ཨིན༌ནོག༌, "ཨབ༌ར༌ཧམ༌མ༌ བུ༌ཚ༌ ཉིས༌ ཡོད༌པིན༌, ཅིག༌པོ༌ ནི༌ ཚེ༌ཡོག༌ ཡང༌ ཅིག༌པོ༌ ནི༌ རང༌ཝང༌ཅན༌ བུ༌མོ༌གུན༌ནི༌ ཨིན༌པིན༌།" 23 ཚེ༌ཡོག༌ནེ༌ སྐྱེས༌ཁན༌ནི༌ བུ༌ཚ༌བོ༌, མིའི༌ རྩོན༌གྲུས༌ནེ༌ དཀོན༌མཆོག༌གི༌ ཞལ༌ཆད༌ གྲུབ༌ཅུག༌ཅེས༌པོ༌ ཨིན༌པིན༌, ཨིན༌ནའང༌ རང༌ཝང༌ཅན༌ནི༌ ན༌མ༌ནེ༌ སྐྱེས༌ཁན༌ནི༌ བུ༌ཚ༌བོ༌, དཀོན༌མཆོག༌གི༌ ཞལ༌ཆད༌ ཛད༌ཁན༌ནི༌ བྲས༌བུ༌ ཨིན༌པིན༌།
24 དཀོན༌མཆོག༌གི༌ ཛད༌ཁན༌ནི༌ ཆད༌དོན༌ ཉིས༌ཀོ༌ འི༌ བུ༌མོ༌ ཉིས༌ཀོ༌ ཉམ༌པོ༌ ལྡུར༌ཉན༌ཅེས༌ ཨིན༌ནོག༌། བུ༌མོ༌ ཏང༌པོ༌, ཧཱ༌གར༌ ནི༌ སི༌ནཱའི༌ རི༌ དང༌ སྤེས༌ཏེ༌ ཨིན༌ནོག༌, ཀ༌རུ༌ མི༌གུན༌ལ༌ ཁོང༌གུན༌ ཚེ༌ཡོག༌ གྱུར༌ཅུག༌ཁན༌ནི༌ ཁྲིམས༌པོ༌ ཐོབ༌ཏེ༌ ཨིན༌པིན༌། 25 ཏ༌ ཧཱ༌གར༌ ཨ༌ར༌བིའ༌ ནང༌ང༌ ཡོད༌ཁན༌ནི༌ རི༌ སི༌ནཱའི༌ ཙོགས༌ ཨིན༌ནོག༌, ཀ༌བོ༌ འི༌ཏུས༌སི༌ ཡེ༌རུ༌ཤ༌ལེམ༌མི༌ གྱལ༌ས༌ ཙོགས༌ ཨིན༌, ཡང༌ ཏེ༌ གྱལ༌སའེ༌ མི༌གུན༌ ཁྲིམས༌སི༌ ཚེ༌ཡོག༌ག༌ དུག༌ཅེས༌ལ༌ ཐད༌ད༌ནོག༌། 26 ཨིན༌ནའང༌ ནམ༌ཁའེ༌ ཡེ༌རུ༌ཤ༌ལེམ༌ ནི༌ རང༌ཝང༌ཅན༌ནི༌ བུ༌མོ༌ སཱ༌ར༌ ཙོགས༌ ཨིན༌ནོག༌, ཁོའེ༌ ཕྲུ༌གུ༌གུན༌ ཚེ༌ཡོག༌ མ༌ནོག༌, ཡང༌ ཁོ༌ ང༌དང༌གུན༌ནི༌ ཨ༌མ༌ ཨིན༌། 27 དམ༌པའེ༌ སུང༌རབས༌སི༌ ནང༌ང༌ བྲིའ༌ ཛད༌ཏེ༌ ཨིན༌ནོག༌,
"འོ༌ ཕྲུ༌གུ༌ མེད༌ཁན༌ནི༌ བུ༌མོ༌, ཕྲུ༌གུ༌ མ༌ནེ༌ མ༌སྐྱེས༌ཁན༌ སྐྱིད༌པོ༌ ཅོས༌།
ཕྲུ༌གུ༌ སྐྱེ༌ཅེས༌སི༌ ཟུ༌མོ༌ མ༌ཕོག༌ཁན༌, ཐད༌པོའེ༌ ནང༌ང༌ ཀུ༌ཅོ༌ ཏོང༌།
ཅིའ༌ཟེར༌ན༌ ཏ༌ དག༌ས༌ ནང༌ཚངས༌ མེད༌ཁན༌ནི༌ བུ༌མོའ༌ མག༌པ༌ ཡོད༌ཁན༌ནི༌
བུ༌མོའེ༌ སང༌ མང༌ང༌ ཕྲུ༌གུ༌ མང༌པོ༌ ཡོད༌ཏེ༌ ཨིན༌ནོག༌། †4:27 ཡེ༌ཤ༌ཡཱའེ༌ སྤེ༌ཆའེ༌ 54:1 "
28 ཅེས༌པའེ༌ སྤུན༌གུན༌, ཏ༌ ཁྱོ༌ཞའ༌ ཨི༌སཱག༌ ཙོགས༌ལ༌ དཀོན༌མཆོག༌གི༌ ཞལ༌ཆད༌ ཛད༌ཁན༌ནི༌ ཕྲུ༌གུ༌གུན༌ ཨིན༌ནོག༌། 29 ཨིན༌ནའང༌ མི༌ རྩོན༌གྲུས༌ནེ༌ སྐྱེ༌ཁན༌ནི༌ ཕྲུ༌གུའི༌, ཐུག༌ཉིད༌དི༌ ཐོག༌ནེ༌ སྐྱེ༌ཁན༌ནི༌ ཕྲུ༌གུ༌བོའ༌ ནགས༌ ལྟན༌ཀྱག༌། ཏེན༌ན༌ ཙོགས༌ ནི༌ དག༌སའང༌ བྱུངས༌ཏེ༌ ཨིན༌ནོག༌།
30 ཨིན༌ནའང༌ སུང༌རབས༌སི༌ ཏེ༌བོའེ༌ སྐོར༌ལ༌ ཅི༌ མོལ༌ཏེ༌ དུག༌, "ཚེ༌ཡོག༌ དང༌ ཁོའེ༌ བུ༌ཚ༌ ཉིས༌ཀོ༌ ཕོང༌, ཅིའ༌ཟེར༌ན༌ རང༌ཝང༌ཅན༌ནི༌ བུ༌མོའེ༌ བུ༌ཚའེ༌ ཨིན༌ཁན༌ནི༌ ནོར༌སྐལ༌བོའེ༌ ནང༌ང༌ ཚེ༌ཡོག༌གི༌ བུ༌མོའེ༌ བུ༌ཚའ༌, སྐྱལ༌ལ༌ མ༌ནེ༌ མི༌ཐོབ༌། ‡4:30 གོ༌ཟུག༌ ཟེར༌ཁན༌ནི༌ སྤེ༌ཆའེ༌ 21:10 " 31 ཏེ༌བོའེ༌ཕིའ༌ ཅེས༌པའེ༌ སྤུན༌གུན༌, ང༌དང༌གུན༌ ཚེ༌ཡོག༌གི༌ བུ༌མོའེ༌ ཕྲུ༌གུ༌ མན༌པ༌, རང༌ཝང༌ཅན༌ནི༌ བུ༌མོའེ༌ ཕྲུ༌གུ༌ ཨིན༌ནོག༌།