2
1 ཏེན༌ན༌ ཚུལ༌ལ༌ དཀོན༌མཆོག༌གི༌ ནམ༌ཁའ༌, ཇིག༌རྟེན༌ ཡང༌ ཏེ༌གུན༌ནི༌ ནང༌ང༌ ཡོད༌ཁན༌ ཚང༌མ༌ ཅོའ༌ ཛད༌ཅེས༌པོ༌ གྲུབ༌། 2 དཀོན༌མཆོག༌གི༌ ཛད༌པའེ༌ ཆག༌ལས༌ ཚང༌མ༌ གྲུབ༌ཚར༌པ༌, ཞག༌མ༌ རྡུན༌པའེ༌ ཞག༌ག༌ ཁོང༌ ངལ༌ཚོས༌ཏེ༌ ཞུགས༌། 3 དཀོན༌མཆོག༌གི༌ ཞག༌ རྡུན༌པ༌བོའ༌ ཅིན༌ལབས༌ སལ༌ལ༌ ཛད༌ཏེ༌, ཏེ༌ ཞག༌པོ༌ དམ༌པ༌ ཐེའ༌ ཛདས༌། ཅིའ༌ཟེར༌ན༌ ཆག༌ལས༌ གང༌པོ༌ གྲུབ༌ཚར༌པ༌, ཏེ༌ ཞག༌ག༌ ཁོང༌ ངལ༌ཚོའ༌ ཛད༌ཏེ༌ ཨིན༌པིན༌།
4 ཏེན༌ན༌བོ༌ ནམ༌ཁའ༌ དང༌ ཇིག༌རྟེན༌ ཛད༌ཅེས༌སི༌ ཚིར༌བོ༌ ཨིན༌པིན༌།
ཨ༌དཱམ༌ དང༌ ཧ༌ཝ༌
2:4b ནེ༌ 25
ཡ༌ཝ༌ དཀོན༌མཆོག༌གི༌ ནམ༌ཁའ༌ དང༌ ཇིག༌རྟེན༌ ཛད༌ ཟ༌ནེ༌, 5 ཇིག༌རྟེན༌ནི༌ཀ༌ ཏབ༌ཁན༌ ཡ༌ མ༌ཏབ༌ཁན༌ནི༌ རྩཱ༌ སྐྱེའ༌ མེད༌པིན༌, ཅིའ༌ཟེར༌ན༌ ཡ༌ཝ༌ དཀོན༌མཆོག༌གི༌ ཏ༌རུང༌ཚག༌པ༌ ཇིག༌རྟེན༌ནི༌ཀ༌ ཆར༌པ༌ བབས༌ ཅུག༌ག༌ མ༌ཛད༌ད༌ ཨིན༌པིན༌, ཡང༌ ཇིག༌རྟེན༌ནི༌ཀ༌ སྟོན༌ཐོག༌ བད༌ཁན༌ནི༌ མི༌སུའང༌ མེད༌པིན༌། 6 ཨིན༌ནའང༌ སའེ༌ ནང༌ནེ༌ ཆུ༌མིག༌གི༌ ཆུ༌ བིང༌ཏེ༌ ས༌ཀྱད༌ ཚང༌མ༌ ལོན༌པ༌ སོང༌། 7 ཏེ༌ནེ༌ ཡ༌ཝ༌ དཀོན༌མཆོག༌གི༌ ས༌ཀྱད༌དི༌ ཀ༌ནེ༌ ས༌ ནམས༌ཏེ༌ མི༌ཞིག༌གི༌ ཟོའེ༌ ནང༌ང༌ ཅོའ༌ ཛདས༌། ཁོང༌ངི༌ ཏེ༌ མི༌བོའེ༌ སྣ༌ཁུང༌ངི༌ ནང༌ང༌ ཚེ༌ སལ༌ཁན༌ནི༌ འུགས༌པོ༌ སལ༌ལ༌ ཛད༌པ༌, ཏེ༌ མི༌བོ༌ སྲོག༌ ཡོད༌ཁན༌ནི༌ མི༌ཞིག༌ གྱུར༌།
8 ཏེ༌ནེ༌ ཡ༌ཝ༌ དཀོན༌མཆོག༌གི༌ ཨི༌དན༌ ཟེར༌སའེ༌ ནས༌སའེ༌ ཤར༌ ཆོགས༌ལ༌ ཚས༌ཤིག༌ དབ༌བ༌ ཛདས༌, ཡང༌ ཏེ༌ནང༌ང༌ ཁོང༌ངི༌ ཅོའ༌ ཛད༌ཁན༌ནི༌ མི༌བོ༌ བོར༌ར༌ ཛདས༌། 9 ཡ༌ཝ༌ དཀོན༌མཆོག༌གི༌ ཚས༌པོའེ༌ ནང༌ང༌ ལྕང༌མ༌ སྣ༌མི༌ སྣ༌ཚོགས༌ སྐྱེ༌ ཅུག༌ག༌ ཛདས༌, ཀ༌བོའེ༌ ནང༌ང༌ ལྡེ༌མོ༌ དང༌ ཁ༌ཟས༌ ཞིམ༌པོ༌ ཆགས༌ཁན༌ནི༌ ལྕང༌མ༌གུན༌ ཡོད༌པིན༌། ཏེ༌ ཚས༌སི༌ སྐྱིལ༌ལ༌ སྲོག༌ སལ༌ཁན༌ ཡང༌ ངན༌པ༌ དང༌ ཟང༌པོ༌ ཤེས༌ཤུག༌ཁན༌ནི༌ ལྕང༌མ༌ ཉིས༌ ཡོད༌པིན༌།
10 ཡང༌ ཨི༌དན༌ནི༌ ནས༌ས༌ནེ༌ ལྩངས༌པོ༌ བིངས༌ཏེ༌ གྱུག༌ཁན༌ནི༌ ཆུའི༌ ཚས༌པོའ༌ ཆུ༌ ཏང༌ངད༌པིན༌། ཚས༌སི༌ སྟིང༌ནེ༌ ཏེ༌ ལྩངས༌པོ༌བོ༌ ཁག༌ཞིའི༌ ནང༌ང༌ བེའད༌པིན༌། 11 ཁག༌ ཏང༌པོ༌བོ༌ པི༌ཤོན༌ ཟེར༌ཁན༌ནི༌ ལྩངས༌པོ༌ ཨིན༌པིན༌, ཀ༌བོ༌ ཁོར༌ཨིན༌ སེར༌ ཡོད༌ཁན༌ནི༌ ཧ༌ཝི༌ལའེ༌ ཡུལ༌ གང༌པོའེ༌ ནང༌ང༌ གྱུག༌གད༌པིན༌། 12 ཏེ༌ ཡུལ༌ལི༌ སེར༌བོ༌ གྱལ༌ཤོག༌, ཡང༌ ཏེ༌རུ༌ ཏྲི༌ཞིམ༌ཅན༌ནི༌ མར༌ དང༌ རྡོའ༌ མ༌ རིན༌ཅན༌ ཨོ༌ནེཀས༌ ཟེར༌ཁན༌གུན༌ནའང༌ ཐོབ༌བད༌པིན༌། 13 ཁག༌ ཉིས༌པ༌བོ༌ གི༌ཧོན༌ ཟེར༌ཁན༌ནི༌ ལྩངས༌པོ༌ ཨིན༌པིན༌, ཀ༌བོ༌ ཁོར༌ཨིན༌ ཀུཤ༌ཤེ༌ ཡུལ༌ གང༌པོའེ༌ ནང༌ང༌ གྱུག༌གད༌པིན༌། 14 ཁག༌ སུམ༌པ༌བོ༌ ཀྲི༌གིརིས༌ ཟེར༌ཁན༌ནི༌ ལྩངས༌པོ༌ ཨིན༌པིན༌, ཀ༌བོ༌ ཨ༌ཤེར༌ ནས༌སའེ༌ ཤར༌ ཆོགས༌ནེ༌ གྱུག༌གད༌པིན༌། ཡང༌ ཁག༌ ཞི༌པ༌བོ༌ ཡུཕ༌རེ༌ཀྲས༌ ཟེར༌ཁན༌ནི༌ ལྩངས༌པོ༌ ཨིན༌པིན༌།
15 ཡ༌ཝ༌ དཀོན༌མཆོག༌གི༌ ཁོང༌རང༌ངི༌ ཛད༌ཁན༌ནི༌ མི༌བོ༌ ཨི༌དན༌ནི༌ ཚས༌སི༌ ནང༌ང༌ སྟོན༌ཐོག༌ བད༌ཅེས༌ དང༌ ཏེ༌བོའ༌ ལྟ༌སྟོག༌ ཅོ༌ཅེས༌སི༌ ཕིའ༌ བོར༌ར༌ ཛདས༌། 16 ཡང༌ ཡ༌ཝ༌ དཀོན༌མཆོག༌གི༌ མི༌བོའ༌ བཀའ༌ སལས༌, "འི༌ ཚས༌སི༌ ནང༌ང༌ ཡོད༌ཁན༌ནི༌ ལྕང༌མ༌གུན༌ནེ༌, ཁྱོ༌རང༌ ཐད༌ཁན༌ནི༌ ཁ༌ཟས༌ ཟན༌ནའང༌ གྲིག༌། 17 ཨིན༌ནའང༌ ངན༌པ༌ དང༌ ཟང༌པོ༌ ཤེས༌ཤུག༌ཁན༌ནི༌ ལྕང༌མའེ༌ ཁ༌ཟས༌པོ༌ ཟའ༌ མ༌གོས༌, གལ༌ཏེས༌ ཟའ༌ན༌ ཏེན༌ན༌ ཞག༌ག༌ ཁྱོ༌རང༌ ཤི༌ཨིན༌།"
18 ཏེ༌ནེ༌ ཡ༌ཝ༌ དཀོན༌མཆོག༌གི༌ མོལ༌ལ༌ ཛདས༌, "ཕྲོ༌པ༌ མེད༌ཅེས༌པོ༌ མིའི༌ ཕིའ༌ གྱལ༌ལ༌ཞིག༌ མི༌དུག༌, ངའེ༌ ཁོའ༌ ཟོབ༌ཤེས༌སི༌ རོགས༌ ཅོ༌ཁན༌ཞིག༌ ཅོ༌ཨིན༌། 19 ཡ༌ཝ༌ དཀོན༌མཆོག༌གི༌ སའེ༌ ཉམ༌པོ༌ ཁོང༌རང༌ངི༌ ཆག༌ནེ༌ ཛད༌ཁན༌ནི༌ སེམས༌ཅན༌ དང༌ ཅ༌པ༌ ཚང༌མའ༌, ཅི༌ མིང༌ ཏག༌དུག༌ ཟིགས༌ས༌ལ༌, མི༌བོའེ༌ དུན༌ལ༌ ཁྱོང༌ང༌ ཛདས༌, ཡང༌ ཀ༌ཟུག༌ མིང༌ རིག༌ ཏག༌ནའང༌ ཏེ༌བོ༌ ཏེན༌ན༌བོའེ༌ མིང༌བོ༌ གྱུར༌། 20 ཏེ༌ནེ༌ མི༌བོའེ༌ སྲལ༌ཁན༌ནི༌ སེམས༌ཅན༌, ནམ༌མ༌ འུར༌ཁན༌ནི༌ ཅ༌ དང༌ རིའི༌ སེམས༌ཅན༌ ཚང༌མ༌ལ༌ མིང༌ ཏགས༌། ཨིན༌ནའང༌ ཏེ༌གུན༌ནི༌ ནང༌ནེ༌ ཁོའ༌ ཟོབས༌ཤེས༌ཅན༌ནི༌ ཕྲོ༌པ༌ རོགས༌ ཅོ༌ཁན༌ཞིག༌ མ༌ཐོབ༌།
21 ཏེ༌ནེ༌ ཡ༌ཝ༌ དཀོན༌མཆོག༌གི༌ མི༌བོའ༌ མ༌ ཉིད༌ ལྕིན༌ཏྲེ༌ ཡོང༌ ཅུག༌ག༌ ཛདས༌། ཁོའེ༌ ཟུགས༌པོའེ༌ ནང༌ནེ༌ ཙིབ༌མ༌ཅིག༌ ཕིང༌ང༌ ཛད༌ཏེ༌ ཏེ༌བོ༌ ཤ༌ ཉམ༌པོ༌ ཀབ༌བ༌ ཛདས༌། 22 ཡ༌ཝ༌ དཀོན༌མཆོག༌གི༌ མི༌བོའེ༌ ཀ༌ནེ༌ ཕིང༌ང༌ ཛད༌ཁན༌ནི༌ ཏེ༌ ཙིབ༌མ༌བོའ༌, བུ༌མོ༌ཞིག༌ ཅོའ༌ ཛད༌ཏེ༌ བུ༌ཚའེ༌ དུན༌ལ༌ ཁྱོང༌ང༌ ཛདས༌། 23 ཏེ༌ནེ༌ བུ༌ཚའེ༌ ཟེརས༌, "ཝའོ༌! ཏ༌ འི༌ རུས༌པ༌བོ༌ ངའེ༌ རུས༌པ༌, འི༌ ཤ༌བོ༌ ངའེ༌ ཤ༌ ཨིན༌ནོག༌། ཁོའ༌ བུ༌མོ༌ ཟེར༌ཨིན༌ ཅིའ༌ཟེར༌ན༌ ཁོ༌ བུ༌ཚའེ༌ ཀ༌ནེ༌ ཕིངས༌ཏེ༌ ཨིན༌ནོག༌།" 24 ཏེན༌ན༌ གྱུན༌ཚན༌བོའེ༌ ཕིའ༌ བུ༌ཚ༌ ཁོ༌རང༌ངི༌ ཨ༌བ༌ དང༌ ཨ༌མ༌ནེ༌ བེ༌ཏེ༌ ཁོ༌རང༌ངི༌ ན༌མ༌ ཉམ༌པོ༌ ཛོམ༌མ༌ནོག༌, ཡང༌ ཁོང༌ ཉིས༌ཀོ༌ ཅིག༌ གྱུར༌ཨིན༌། 25 ཏེ༌ཏུས༌ལ༌ བུ༌ཚ༌ དང༌ བུ༌མོ༌ ཉིས༌ཀོ༌ ལྗེར༌ཉལ༌ ཡོད༌ནའང༌, ཁོང༌གུན༌ ཁྲེལ༌ལ༌ མེད༌པིན༌།