6
ཇིག༌རྟེན༌པའེ༌ ངན༌པ༌གུན༌ དང༌ དཀོན༌མཆོག༌གི༌ ཐུགས༌ཚེར༌།
6:1 ནེ༌ 8
1 མི༌གུན༌ ཇིག༌རྟེན༌ནི༌ཀ༌ ཕེལ༌ཅེས༌ གོ༌ཟུག༌ ཟ༌ནེ༌ ཁོང༌གུན༌ལ༌ བུ༌མོ༌ མང༌པོའང༌ སྐྱེས༌། 2 ངན༌པ༌ ཕོ༌ཉ༌གུན༌ནི༌ མིའི༌ བུ༌མོ༌གུན༌ མ༌ཛེས༌མོ༌ ཐོང༌པ༌, ཁོང༌གུན༌ནི༌ ཁོ༌རང༌ ཐད༌ཁན༌ནི༌ བུ༌མོ༌གུན༌ལ༌ ན༌མ༌ ཅོས༌ ཡང༌ ཏེ༌ བུ༌མོ༌གུན༌ནའང༌ ཏེ༌ཟུག༌ ཅོ༌ཅེས༌ལ༌ ཐད༌དད༌པིན༌། 3 ཏེ༌ནེ༌ ཡ༌ཝའེ༌ མོལས༌, "ངའེ༌ མི༌གུན༌ལ༌ ཏང༌ཁན༌ནི༌ ཏེ༌ མི༌ཚེ༌བོ༌ ཁོང༌གུན༌ནི༌ ནང༌ང༌ ཏུས༌གྱུན༌ནི༌ ཕིའ༌ ལུས༌ མི༌ཅུག༌, ཅིའ༌ཟེར༌ན༌ ཁོང༌གུན༌ ཏུས༌གྱུན༌ སོན༌ཏེའ༌ མི༌ལུས༌ཁན༌ནི༌ རིགས༌ནེ༌ ཨིན༌ནོག༌། ཁོང༌གུན༌ ལོ༌ 120 མ༌ནེ༌ སོན༌ཏེའ༌ མི༌ལུས༌།
4 ཏེ༌ཏུས༌ ཡང༌ སྟིང༌ནེའང༌, ནེ༌ཕི༌ལིམ༌ ཟེར༌ཁན༌ནི༌ མི༌ མ༌ ཆེན༌མོ༌གུན༌ ཇིག༌རྟེན༌ནི༌ཀ༌ དུག༌གད༌པིན༌, ཀ༌གུན༌ ངན༌པ༌ ཕོ༌ཉ༌གུན༌ དང༌ མིའི༌ བུ༌མོ༌གུན༌ ཛོམས༌ཏེ༌ སྐྱེ༌ཁན༌ནི༌ ཕྲུ༌གུ༌གུན༌ ཨིན༌པིན༌། ཁོང༌གུན༌ ཏེན༌ན༌ ཏུས༌སི༌ སྤ༌འོ༌གུན༌ དང༌ མག༌གི༌ ནང༌ང༌ ནོལ༌ཁན༌ མིང༌ཅན༌གུན༌ ཨིན༌པིན༌།
5 ཇིག༌རྟེན༌ནི༌ཀ༌ མི༌གུན༌ནི༌ ངན༌པ༌བོ༌ མངས༌ཏེའང༌ རྩོག༌པོ༌ ཡང༌ ཁོང༌གུན༌ནི༌ སམ༌བ༌ དང༌ དོད༌པ༌ ཚང༌མ༌ ཏུས༌གྱུན༌ ངན༌པ༌ ཅོ༌ཅེས༌ ཡོད༌ཁན༌ གུན༌ ཡ༌ཝའེ༌ ཟིགས༌། 6 ཏེ༌ནེ༌ ཁོང༌ངི༌ འི༌ ཇིག༌རྟེན༌ནི༌ཀ༌ མི༌གུན༌ ཅོའ༌ ཛད༌ཁན༌བོའེ༌ཀ༌ ཡ༌ཝའ༌ མ༌སྲན༌ཏྲེ༌ གྱོད༌པ༌ སྐྱེའ༌ ཛདས༌, ཡང༌ ཁོང༌ངི༌ སེམས༌སི༌ ཏིང༌ང༌ སྲན༌ཏྲེ༌ རྡུག༌ངལ༌ བྱུང༌། 7 ཏེ༌བོའེ༌ ཞས༌ཏེ༌ ཡ༌ཝའེ༌ མོལས༌, "ངའེ༌ ཅོ༌ཁན༌ནི༌ མི༌ཚང༌མ༌ ཇིག༌རྟེན༌ནི༌ ཀ༌ནེ༌ མེད༌ཁན༌ ཅོ༌ཨིན༌། མི༌གུན༌ མ༌ཚད༌ སེམས༌ཅན༌ ཆེན༌མོ༌ དང༌ ཆུ༌ངུན༌ ཡང༌ ནམ༌མི༌ ནང༌ང༌ འུར༌ཁན༌ནི༌ ཅ༌ ཚང༌མའང༌ མེད༌ཁན༌ ཅོ༌ཨིན༌། ཏེ༌གུན༌ ཅོ༌ཁན༌བོའེ༌ཀ༌ ངའ༌ མ༌ ཚེར༌ཁ༌ རག༌།" 8 ཨིན༌ནའང༌ ཡ༌ཝའ༌ ནོ༌ཨཱའེ༌ཀ༌ ཐུགས༌ཐདས༌།
ནོ༌ཨཱ༌ དང༌ ཆུ༌ལོག༌གི༌ སྐོར༌།
6:9 ནེ༌ 22
9 འི༌བོ༌ ནི༌ ནོ༌ཨཱའེ༌ མི༌ཚེའེ༌ སྐོར༌ལ༌ རུངས༌པོ༌ ཨིན༌ནོག༌། ཏེ༌ཏུས༌ལ༌ ནོ༌ཨཱ༌ ཅིག༌པོ༌ ནི༌ ཇིག༌རྟེན༌པ༌ ཚང༌མའེ༌ ནང༌ནེ༌ སྐྱོན༌མེད༌ཁན༌ དང༌ མི༌ དྲང༌པོ༌ཞིག༌ ཨིན༌པིན༌། ཁོའེ༌ བྲེལ༌ དཀོན༌མཆོག༌ ཉམ༌པོ༌ མ༌ ཉེ༌མོ༌ ཡོད༌པིན༌། 10 ནོ༌ཨཱའ༌ བུ༌ཚ༌ སུམ༌, ཤེམ༌, ཧེམ༌ དང༌, ཡབ༌ཕེད༌ ཟེར༌ཁན༌གུན༌ ཡོད༌པིན༌།
11 ཏ༌ དཀོན༌མཆོག༌གི༌ འི༌ ཇིག༌རྟེན༌པ༌གུན༌ མ༌ ངན༌པ༌, ཛིང༌མོ༌ དང༌ ནོད༌སྐྱལ༌ཅེས༌ གུན༌ གངས༌ཏེ༌ ཟིགས༌། 12 ཡང༌ དཀོན༌མཆོག༌གི༌ ཇིག༌རྟེན༌བོ༌ ངན༌པའེ༌ གངས༌ཏེ༌ ཟིགས༌, ཅིའ༌ཟེར༌ན༌ ཇིག༌རྟེན༌ནི༌ཀ༌ སྲོག༌ ཡོད༌ཁན༌ ཚང༌མའེ༌ ངན༌པ༌ མི༌ཚེ༌ཞིག༌ ཕུད༌དད༌པིན༌། 13 ཏེ༌ནེ༌ དཀོན༌མཆོག༌གི༌ ནོ༌ཨཱ༌ མོལས༌, "ཇིག༌རྟེན༌ གང༌པོའེ༌ ནང༌ང༌, འུགས༌ ཡོད༌ཁན༌ ཚང༌མའ༌ སྲོའེ༌ གངས༌ཏེ༌, ཅིག༌ དང༌ ཅིག༌ག༌ ནོད༌སྐྱལ༌ པ༌སང༌, ངའེ༌ ཇིག༌རྟེན༌ནི༌ སྲོག༌ ཡོད༌ཁན༌ ཚང༌མ༌ མེད༌ཁན༌ ཅོ༌ཅེས༌ལ༌ ཐག༌ཅད༌ཏེ༌ ཨིན༌།"
14 "ཏེ༌བོའེ༌ཕིའ༌ ཁྱོ༌རང༌ངི༌ གོ༌ཕེར༌ ཟེར༌ཁན༌ནི༌ ཤིང༌ངི༌ མ༌ ཆེན༌མོ༌ གྲུ༌ཟིང༌ཞིག༌ རྩིག༌, ཡང༌ ཏེ༌ནང༌ང༌ ནང༌མིག༌ རིག༌ ཅོས༌། ཏེ༌ནེ༌ ཆུ༌ ནང༌ཀུག༌ག༌ མི༌ཡོང༌ཅེས༌སི༌ ཕིའ༌ ཕི༌ནང༌ ཉིས༌ཀོའ༌ ཏར༌ཀོལ༌ སྐུས༌། 15 གྲུ༌ཟིང༌ངི༌ རིང༌བོ༌ མི༌ཀྲར༌ 135, ཞང༌བོ༌ མི༌ཀྲར༌ 22 དང༌ ཐོན༌བོ༌ མི༌ཀྲར༌ 13 ཡོང༌གོས༌། 16 ཡང༌ ཏེ༌ གྲུ༌ཟིང༌བོའ༌ ཐོག༌གའང༌ ཅོས༌, ཨིན༌ནའང༌ རྩིག༌པ༌ དང༌ ཐོག༌གི༌ ནང༌ང༌ མི༌ཀྲར༌ ཕེད༌དི༌ པར༌ བོར༌གོས༌། གྲུ༌ཟིང༌ངི༌ ནང༌ང༌ ཐོག༌ཚད༌ སུམ༌ ཡང༌ ཆོགས༌ ཅིག༌ག༌ སྒོ༌ ཅོ༌གོས༌།"
17 "ཏ༌, འུགས༌ ཡོད༌ཁན༌ ཚང༌མ༌ མེད༌ཁན༌ ཅོ༌ཅེས༌ལ༌ ངའེ༌ ཇིག༌རྟེན༌ གང༌པོ༌ ཆུ༌ལོག༌གི༌ཆུའི༌ གང༌ཅུག༌ཨིན༌། ཇིག༌རྟེན༌ནི༌ཀ༌ ཡོད༌ཁན༌ ཚང༌མ༌ ཤི༌ཨིན༌། 18 ཨིན༌ནའང༌ ངའེ༌ ཁྱོ༌རང༌ ཉམ༌པོ༌ ཆད༌དོན༌ཞིག༌ ཅོའད༌, ཁྱོ༌རང༌ དང༌ ཁྱོ༌རང༌ངི༌ ན༌མ༌, ཁྱོ༌རང༌ངི༌ བུ༌ཚ༌གུན༌ དང༌ ཁོང༌གུན༌ནི༌ ན༌མ༌གུན༌ གྲུ༌ཟིང༌ངི༌ ནང༌ང༌ ཡོང༌གོས༌། 19 ཡང༌ ཁྱོ༌རང༌ངི༌ སེམས༌ཅན༌ དང༌ ཅ༌ཅིའུ༌ རིགས༌ ཚང༌མའེ༌ ཕོ༌ དང༌ མོ༌ གུན༌ སོན༌ཏེའ༌ ལུས༌ཤེས༌ལ༌ གྲུ༌ཟིང༌ངི༌ ནང༌ང༌ ཁྱོང༌གོས༌། 20 ཅ༌ཅིའུ༌ རིགས༌ ཚང༌མའེ༌ ཆ༌ཅིག༌, སེམས༌ཅན༌ ཆེན༌མོའེ༌ རིགས༌ ཚང༌མའེ༌ ཆ༌ཅིག༌ དང༌, སེམས༌ཅན༌ ཆུ༌ངུན༌ནི༌ རིགས༌ ཚང༌མའེ༌ ཆ༌ཅིག༌, སོན༌ཏེའ༌ ལུས༌ཤེས༌ལ༌ ཁྱོ༌རང༌ངི༌ཀ༌ གྲུ༌ཟིང༌ངི༌ ནང༌ང༌ ཡོང༌ཨིན༌། 21 ཡང༌ ཁྱོ༌རང༌ དང༌ ཏེ༌གུན༌ནི༌ ཟའ༌ཅེས༌སི༌ ཕིའ༌ སྣ༌ཚོགས༌སི༌ ཟ༌རྒྱུ༌ ཚང༌མ༌ གྲུ༌ཟིང༌ངི༌ ནང༌ང༌ སག༌གོས༌།"
22 ཏེ༌ནེ༌ དཀོན༌མཆོག༌གི༌ ཅོས༌ མོལ༌ཁན༌ ཚང༌མ༌ ནོ༌ཨཱའེ༌ ཅོས༌།