14
ཨབ༌རམ༌མི༌ ལོཊ༌ སྐྱོབས༌།
14:1 ནེ༌ 16
1 བ༌བེ༌ལོན༌ནི༌ གྱལ༌པོ༌ ཨམ༌ར༌ཕེལ༌, འེ༌ལ༌སར༌རི༌ གྱལ༌པོ༌ ཨེ༌ར༌ཡོག༌, འེ༌ལེམ༌མི༌ གྱལ༌པོ༌ ཀ༌དོར༌ལ༌འོ༌མེར༌ དང༌ གོའིམ༌མེ༌ གྱལ༌པོ༌ ཀྲི༌གྲལ༌ ཞི༌ཀོ༌, 2 སོ༌དོམ༌མི༌ གྱལ༌པོ༌ བེ༌ར༌, གོ༌མོ༌རའི༌ གྱལ༌པོ༌ བིར༌ཤའ༌, ཨད༌མའེ༌ གྱལ༌པོ༌ ཤི༌ནབ༌, ཟི༌བོ༌ཡིམ༌མི༌ གྱལ༌པོ༌ ཤེམ༌མེ༌བར༌ དང༌ བི༌ལའེ༌ ༼ཡང༌ན༌ ཟོར༌༽རི༌ གྱལ༌པོ༌ ལྔ༌ཀོའེ༌ གྱབ༌གལ༌ལ༌ མག༌ཏང༌ང༌ལ༌ སོང༌། 3 ཏེ༌ གྱལ༌པོ༌ ལྔ༌ཀོའེ༌ མག༌མི༌གུན༌ སི༌དིམ༌མི༌ ལུང༌པའེ༌ ནང༌ང༌ ཛོམས༌ཏེ༌ ཅིག༌གྲིལ༌ སོང༌ཏེ༌ ཡོད༌པིན༌ ༼ཏེ༌བོའ༌ ཚོ༌རུལ༌ལི༌ ལུང༌པའང༌ ཟེར༌ར༌ནོག༌༽། 4 ཏེ༌གུན༌ ལོ༌ ཅུག༌ཉིས༌ གྱལ༌པོ༌ ཀ༌དོར༌ལ༌འོ༌མེར༌རི༌ ངའ༌ཡོག༌ག༌ ཡོད༌པིན༌། ཨིན༌ནའང༌ ལོ༌ ཅུག༌སུམ༌པའེ༌ ནང༌ང༌ ཁོང༌གུན༌ནི༌ ཏེ༌ གྱལ༌པོའེ༌ གྱབ༌གལ༌ ཅོས༌།
5 ལོ༌ ཅུབ༌ཞི༌པའེ༌ ནང༌ང༌ གྱལ༌པོ༌ ཀ༌དོར༌ལ༌འོ༌མེར༌ དང༌ ཁོའེ༌ ཝང༌ངི༌ ཡོག༌ག༌ ཡོད༌ཁན༌ནི༌ གྱལ༌པོ༌གུན༌ནི༌, ཨེཤ༌ཏི༌རོཐ༌ ཀར༌ནེ༌འིམ༌མི༌ ཡུལ༌ལི༌ ནང༌ང༌ རེ༌ཕའེ༌འམ༌པ༌གུན༌ལ༌, ཧམ༌མི༌ ཡུལ༌ལི༌ ནང༌ང༌ ཟུ༌ཟེམ༌པ༌གུན༌ལ༌ ཡང༌ ཤ༌ཝེ༌ ཀི༌རིའ༌ཐ༌ཡེམ༌མི༌ ཡུལ༌ལི༌ ནང༌ང༌ ཨི༌མམ༌པ༌གུན༌ལ༌ ཕམ༌ཀལས༌། 6 མ༌ཚད༌ སིར༌རི༌ རི༌ ཡུལ༌, རི༌སྟོང༌ངི༌ ཐའ༌མ༌ ཡོད༌ཁན༌ནི༌ ཨེལ༌ཕ༌རན༌ ཚོག༌པ༌ དུག༌ཁན༌ནི༌ ཧོར༌པ༌གུན༌ལའང༌ ཕམ༌ཀལས༌། 7 ཏེ༌ནེ༌ ཁོང༌གུན༌ ལོགས༌ཏེ༌ ཨེན༌མིཤ༌པཏ༌ ༼ཡང༌ན༌ ཀ༌དེཤ༌ལ༌༽ ཡོངས༌, ཡང༌ ཏེ༌རུ༌ དུག༌ཁན༌ནི༌ ཨ༌མ༌ལིཀ༌པ༌གུན༌ལ༌ མ༌ཚད༌ ཧ༌ཟ༌ཟོན༌ ཏ༌མར༌རི༌ ནང༌ང༌ དུག༌ཁན༌ནི༌ ཨ༌མོར༌པ༌གུན༌ལའང༌ མ༌སྲན༌ཏྲེ༌ ཕམ༌ཀལས༌།
8-9 ཏེ༌ནེ༌ ཀ༌དོར༌ལ༌འོ༌མེར༌ གྱལ༌པོའ༌ གྱབ༌གལ༌ ཅོ༌ཁན༌ནི༌ སོ༌དོམ༌, གོ༌མོ༌ར༌, ཨད༌མའ༌, ཟི༌བོ༌ཡིམ༌ དང༌ བི༌ལའེ༌ ༼ཡང༌ན༌ ཟོར༌༽ གྱལ༌པོ༌ ལྔ༌ཀོའེ༌ སི༌དིམ༌མི༌ ལུང༌པའེ༌ ནང༌ང༌ ཁོ༌ དང༌ ཁོའ༌ ཆོགས༌སྐྱོར༌ ཅོ༌ཁན༌ནི༌ གྱལ༌པོ༌གུན༌ནི༌ མག༌མི༌ གྱབ༌གལ༌ལ༌ མག༌ཏང༌ང༌ ཡོངས༌། གྱལ༌པོ༌ ལྔའེ༌ གྱབ༌གལ༌ལ༌ གྱལ༌པོ༌ ཞི༌ མག༌ ཏངས༌། 10 ཏ༌ ཏེ༌ ལུང༌པ༌བོ༌ ཏར༌ཀོལ༌ལི༌ ས༌དོང༌ངི༌ གངས༌ཏེ༌ ཡོད༌པིན༌, ཡང༌ སོ༌དོམ༌ དང༌ གོ༌མོ༌རའི༌ གྱལ༌པོའེ༌ མག༌མི༌གུན༌ ཕམ༌ཕོགས༌ཏེ༌ མག༌ནེ༌ ཤོར༌ཏེ༌ ཆ༌ ཟ༌ནེ༌ ཁ༌ཅིག༌ ཏེ༌ ས༌དོང༌གུན༌ནི༌ ནང༌ང༌ བུད༌, ཡང༌ མ༌བུད༌ཁན༌གུན༌ རི༌ཡུལ༌གུན༌ལ༌ ཤོར༌ཏེ༌ སོང༌། 11 གྱལ༌ཐོབ༌ཁན༌ནི༌ གྱལ༌པོ༌ ཞི༌ཀོའེ༌ སོ༌དོམ༌ དང༌ གོ༌མོ༌རའི༌ ནོར༌ དང༌ ཟན༌ ཚང༌མ༌ ཁུར༌ཏེ༌ སོང༌། 12 ཁོང༌གུན༌ནི༌ ཨབ༌རམ༌མི༌ ཚ༌འོ༌ སོ༌དོམ༌མི༌ ནང༌ང༌ དུག༌ཁན༌ ལོཊ༌ དང༌ ཁོའེ༌ གྱུ༌ནོར༌གུན༌ནའང༌ ཁྱེརས༌།
13 ཨིན༌ནའང༌ ཤོར༌ཁན༌གུན༌ནི༌ ནང༌ནེ༌ ཅིག༌, ཨ༌མོར༌པ༌ མམ༌རེའེ༌ ཨིན༌ཁན༌ནི༌ མིང༌ཅན༌ ལྕང༌མ༌གུན༌ནི༌ ཉེ༌མོའ༌ དུག༌ཁན༌ ཨིབ༌རི༌པ༌, ཨབ༌རམ༌ ཡོད༌ས༌ ཡོངས༌ཏེ༌ བྱུང༌ཁན༌གུན༌ ཤདས༌། མམ༌རེ༌ ནོ༌ ཨེཤ༌ཀོལ༌ དང༌ ཨ༌ནེར༌ གུན༌ ཨབ༌རམ༌མི༌ ཆོགས༌པ༌ ཨིན༌པིན༌། 14 ཨབ༌རམ༌མ༌ ཁོའེ༌ ཚ༌འོ༌བོ༌ ཟུམས༌ཏོགས༌ ཟེར༌ཏེ༌ ཚོར༌ར༌ཅིག༌, ཁོའེ༌ ནང༌ཚངས༌སི༌ ནང༌ང༌ སྐྱེས༌ཁན༌, ནོལ༌ཉན༌ཁན༌ནི༌ མི༌ 318 ཛོམ༌ཅེས༌ལ༌ བོདས༌། ཡང༌ ཁོང༌གུན༌ནི༌ དཱན༌ ཟེར༌སའེ༌ ནས༌ས༌ ཚོག༌པ༌ གྱལ༌པོ༌ ཞི༌ཀོའེ༌ མག༌མིའ༌ ཏེད༌ཏེ༌ ཁྱེརས༌། 15 ཏེ༌རུ༌ ཨབ༌རམ༌མི༌ ཁོ༌རང༌ངི༌ མི༌གུན༌ སྡེ༌སྡེ༌ ནང༌ང༌ བགོས༌, ཡང༌ ཚན༌ལ༌ གྲ༌འོ༌གུན༌ནི༌ཀ༌ སྤུང༌གོལ༌ ཅོ༌ཅུགས༌པ༌ ཁོང༌གུན༌ ཤོར༌ཏེ༌ སོང༌། ཨབ༌རམ༌མི༌ མི༌གུན༌ནི༌ དཱ༌མེས༌ཁས༌ གྱལ༌སའེ༌ བྱང༌ ཆོགས༌ལ༌ ཡོད༌ཁན༌ནི༌ ནས༌ས༌ ཧོ༌བ༌ ཚོག༌པ༌ ཏེ༌གུན༌ལ༌ ཏེད༌ཏེ༌ ཁྱེརས༌། 16 ཁོའེ༌ གྱུ༌ནོར༌ ཁྱེར༌ཁན༌ ཚང༌མ༌ ལོགས༌ཏེ༌ ཁྱོངས༌, ཡང༌ ཁོ༌རང༌ངི༌ ཉེན༌ ལོཊ༌ དང༌ ཁོའེ༌ གྱུ༌ནོར༌, ཡང༌ བུ༌མོ༌གུན༌ དང༌ ཞན༌མི༌གུན༌ནའང༌ ལོགས༌ཏེ༌ ཁྱོངས༌།
མེལ༌ཀ༌ཟེ༌དེག༌གི༌ ཨབ༌རམ༌མ༌ ཅིན༌ལབས༌ སལས༌།
14:17 ནེ༌ 24
17 ཨབ༌རམ༌མི༌ གྱལ༌པོ༌ ཀ༌དོར༌ལ༌འོ༌མེར༌ དང༌ ཁོའ༌ རོགས༌ ཅོ༌ཁན༌ནི༌ གྱལ༌པོ༌གུན༌ལ༌ ཕམ༌ཀལ༌ཏེ༌ ལོགས༌ཏེ༌ ཡོང༌ ཟ༌ནེ༌ སོ༌དོམ༌མི༌ གྱལ༌པོ༌, ཤ༌ཝེ༌ ལུང༌པ༌ ༼ཡང༌ན༌ གྱལ༌པོའེ༌ ལུང༌པ༌ ཟེར༌སའེ༌༽, ནང༌ང༌ ཁོའ༌ ཐུག༌ག༌ ཡོངས༌།
18 ཏེ༌ནེ༌ ཀུན༌ཝང༌ དཀོན༌མཆོག༌གི༌ བླ༌མ༌, སེ༌ལམ༌མི༌ གྱལ༌པོ༌ མེལ༌ཀ༌ཟེ༌དེག༌གི༌ ཨབ༌རམ༌མ༌ ཏ༌གི༌ དང༌ ཆང༌ ཁྱོངས༌། 19 ཡང༌ ཁོའ༌ ཅིན༌ལབས༌ སལ༌ཏེ༌ མོལས༌, "ནམ༌ཁའ༌ དང༌ ཇིག༌རྟེན༌ ཉིས༌ཀོ༌ ཛད༌ཁན༌ནི༌ ཀུན༌ཝང༌ དཀོན༌མཆོག༌གི༌ ཁྱོ༌རང༌ང༌ ཅིན༌ལབས༌ སལ༌ཤིག༌། 20 ཁྱོ༌རང༌ང༌ གྲ༌འོ༌གུན༌ནི༌ཀ༌ གྱལ༌ཁའ༌ ཐོབ༌ ཅུག༌ག༌ ཛད༌ཁན༌ནི༌ ཀུན༌ཝང༌ དཀོན༌མཆོག༌ག༌ སྟོད༌པ༌ ཐོབ༌ཤིག༌།", ཡང༌ ཨབ༌རམ༌མི༌ མེལ༌ཀ༌ཟེ༌དེག༌ག༌ ལོགས༌ཏེ༌ ཁྱོང༌ཁན༌ནི༌ གྱུ༌ནོར༌ ཚང༌མའེ༌ རྕུ༌ཁག༌པོ༌ ཏངས༌།
21 སོ༌དོམ༌མི༌ གྱལ༌པོའེ༌ ཨབ༌རམ༌མ༌ ཟེརས༌, "ངའེ༌ མི༌གུན༌ ལོགས༌ཏེ༌ ཏོང༌, ཨིན༌ནའང༌ ལོགས༌ཏེ༌ ཁྱོང༌ཁན༌ནི༌ གྱུ༌ནོར༌ ཚང༌མ༌ བོར༌ནའང༌ གྲིག༌།
22 ཨིན༌ནའང༌ ཨབ༌རམ༌མི༌ སོ༌དོམ༌མི༌ གྱལ༌པོའ༌ ཟེརས༌, "ངའེ༌ ནམ༌ཁའ༌ དང༌ ཇིག༌རྟེན༌ ཛད༌ཁན༌ནི༌ ཡ༌ཝ༌ ཀུན༌ཝང༌ དཀོན༌མཆོག༌གི༌ སྐུན༌དུན༌ལ༌ ནའ༌ ཁུར༌རད༌, 23 ཁྱོ༌རང༌ངི༌ ཨིན༌ཁན༌ ཅི༌ཞིག༌གའང༌ ངའེ༌ མི༌ཁྱེར༌, པ༌བུ༌ ཡ༌ སྐུད༌པ༌ཞིག༌གའང༌, ཅིའ༌ཟེར༌ན༌ ཁྱོ༌རང༌ངི༌, 'ངའེ༌ ཨབ༌རམ༌ ཆུག༌པོ༌ གྱུར༌ཅུགས༌པིན༌' ཟེར༌སྲིད༌ཅེས༌ ཨིན༌ནོག༌། 24 ངའེ༌ མི༌གུན༌ནི༌ ཟའ༌ཁན༌ནི༌ ཁར༌ཇི༌ ཡང༌ ངའ༌ རོགས༌ ཅོ༌ཁན༌ ཨ༌ནེར༌, ཨེཤ༌ཀོལ༌ དང༌, མམ༌རེ༌ གུན༌ནི༌ སྐལ༌ལའེ༌ ནོར༌གུན༌ མན༌པ༌ ངའེ༌ ཡང༌ ཅའང༌ མི༌ཁྱེར༌།