1 ཡོ༌སེབ༌བ༌ ཁོ༌ ཉམ༌པོ༌ ཡོད༌ཁན༌གུན༌ནི༌ དུན༌ལ༌ སེམས༌ཚེར༌ གགས༌ཏེ༌ བོར༌ མ༌ཉན༌པ༌ ཁོའེ༌ ཟེརས༌ "མི༌ཚང༌མ༌ ངའེ༌ དུན༌ནེ༌ སོང༌།" ཏེ༌ནེ༌ ཞན༌སུའང༌ མེད༌ས༌ ཁོ༌རང༌ངི༌ སྤུན༌ལ༌གུན༌ལ༌ ཁོའེ༌ ཁོ༌རང༌ སྔོན༌ཅུགས༌། 2 ཁོ༌ སྲན༌ཏྲེ༌ ངུས༌པ༌ ཨི༌ཇིབ༌པ༌གུན༌ནི༌ ཚོར༌, ཡང༌ གྱལ༌པོའེ༌ ཁར༌ལ༌ ཡོད༌ཁན༌གུན༌ནིའང༌ ཏེ༌ ནས༌ཚུལ༌བོ༌ ཚོར༌།

3 ཡོ༌སེབ༌བི༌ ཁོ༌རང༌ངི༌ སྤུན༌ལ༌གུན༌ལ༌ ཟེརས༌, "ང༌ ཡོ༌སེབ༌ ཨིན༌, ངའེ༌ ཨ༌བ༌ ཏ༌རུང༌ངའང༌ སོན༌ཏེའ༌ ཡོད༌ད༌?" ཨིན༌ནའང༌ ཁོའེ༌ སྤུན༌ལ༌གུན༌ལ༌ ལན༌ཏང༌ མ༌ཉན༌ ཅིའ༌ཟེར༌ན༌ ཁོང༌གུན༌ མ༌སྲན༌ཏྲེ༌ ཇིགས༌།

4 ཏེ༌ནེ༌ ཡོ༌སེབ༌བི༌ ཁོང༌གུན༌ལ༌ ཟེརས༌, "ངའེ༌ དུན༌ལ༌ ཡོང༌།" ཁོང༌གུན༌ ཡོང༌ང༌ཅིག༌ ཁོའེ༌ ཟེརས༌, "ངའ༌ ཁྱོ༌ཞའེ༌ ཨི༌ཇིབ༌བ༌ ཆའ༌ཁན༌ནི༌ བེས༌པ༌གུན༌ལ༌ ཚེ༌ཡོག༌ག༌ ཙོང༌ཁན༌ནི༌ ཁྱོ༌ཞའེ༌ ནོ༌ ཡོ༌སེབ༌ ཨིན༌། 5 ཏ༌ ཚེར༌ མ༌ཚེར༌ ཡང༌ ང༌ ཙོང༌ཅེས༌སི༌ ཕིའ༌ ཁྱོ༌ཞ༌རང༌ང༌ སྐྱོན༌ མ༌ཀལ༌། ཏེ༌བོ༌ སྲོག༌ སྐྱོབ༌ཅེས༌ལ༌ དཀོན༌མཆོག༌གི༌ ཁྱོ༌ཞ༌གུན༌ནི༌ སང༌ སྔུན༌ལ༌ ང༌ ལམ༌ཅུག༌ག༌ ཛད༌ཏེ༌ ཨིན༌ནོག༌། 6 མུ༌གེ༌ ཡོངས༌ཏེ༌ ལོ༌ ཉིས༌ སོང༌ཏེ༌ ཨིན༌ནོག༌ ཏ༌རུང༌ ལོ༌ ལྔ༌ ཞིང༌ལོག༌ཅེས༌ དང༌ སྔ༌ཅེས༌ མི༌ཡོང། 7 འི༌ ཀགས༌པོའེ༌ ཏུས༌སི༌ ནང༌ནེ༌ ང༌དང༌གུན༌ སྐྱོབ༌བ༌ ཛད༌ཏེ༌ ང༌དང༌ངི༌ པུར༌གྱུད༌པོ༌ ལུས༌ཤུགས༌ཅེས༌ལ༌ དཀོན༌མཆོག༌གི༌ ང༌ སྔུན༌ལ༌ ཀལ༌ལ༌ ཛད༌ཏེ༌ ཨིན༌ནོག༌།"

8 "ཏེ༌བོའེ༌ཕིའ༌ ཁྱོ༌ཞ༌གུན༌ནི༌ མན༌པ༌ དཀོན༌མཆོག༌གི༌ ང༌ འི༌རུ༌ ལམ༌ཅུག༌ག༌ ཛད༌ཏེ༌ ཨིན༌ནོག༌། ཁོང༌ངི༌ ང༌ གྱལ༌པོའ༌ ལབ༌ཞའ༌ ཏང༌ཁན༌, གྱལ༌པོའེ༌ ཁར༌རི༌ ཁག༌ཁུར༌པ༌ དང༌ ཨི༌ཇིབ༌ གང༌པོའེ༌ཀ༌ ཝང༌སྲུལ༌པ༌ ཅོའ༌ ཛདས༌། 9 ཏ༌ གྱོགས༌པ༌ ངའེ༌ ཨ༌བ༌ ཡོད༌ས༌ སོང༌ཏེ༌ ཁོང༌ང༌ ཟེར༌, 'ཉེ༌རང༌ངི༌ བུ༌ཚ༌ ཡོ༌སེབ༌བི༌ ཟེར༌ར༌རག༌, དཀོན༌མཆོག༌གི༌ ང༌ ཨི༌ཇིབ༌ གང༌པོའེ༌ཀ༌ ཝང༌སྲུལ༌པ༌ ཅོའ༌ ཛདས༌། གོར༌ མ༌ཅུག༌ག༌ ང༌ ཡོད༌ས༌ སྐྱོད༌ད༌ ཛད༌། 10 ཉེ༌རང༌ ངའེ༌ ཉེ༌མོའ༌ གོ༌ཤེན༌ནི༌ ས༌ཆའེ༌ ནང༌ང༌ ཞུགས༌, ཉེ༌རང༌ངི༌ ཕྲུ༌གུ༌གུན༌, ཚ༌འོ༌ ཚ༌མོ༌ གུན༌, ར༌ལུག༌གི༌ ཁྱུ༌ ཡང༌ ཉེ༌རང༌ང༌ ཡོད༌ཁན༌ ཚང༌མའང༌། 11 ཏེ༌རུ༌ ངའེ༌ ཉེ༌རང༌ང༌ ལྟ༌སྟོག༌ ཅོ༌ཉན༌ ཨིན༌། མུ༌གེ༌ ཏ༌རུང༌ ལོ༌ ལྔ༌ ལུས༌ཤེས༌ ཨིན༌ནོག༌། འི༌རུ༌ མ༌སྐྱོད༌ན༌ ཉེ༌རང༌ དང༌ ཉེ༌རང༌ངི༌ ནང༌ཚངས༌གུན༌ ཟ༌རྒྱུ༌ མེད༌པ༌ སྟོག༌རིའ༌ ཤི༌ཨིན༌།"

12 "ཏ༌ ཁྱོ༌ཞ༌གུན༌ དང༌ ངའེ༌ ནོ༌ བེན༌ཡཱ༌མིན༌ནི༌ ང༌ ཏན༌ཏན༌ ཡོ༌སེབ༌ ཨིན༌ཁན༌བོ༌ ཐོང༌ཏེ༌ ཨིན༌ནོག༌། 13 འི༌རུ༌ ཨི༌ཇིབ༌བི༌ ནང༌ང༌ ང༌ ཙམ༌ཤིག༌གི༌ ཀུས༌པ༌ ཡོད༌ཁན༌ དང༌ ཁྱོ༌ཞ༌གུན༌ནི༌ ཐོང༌ཁན༌ ཚང༌མ༌ ངའེ༌ ཨ༌བའ༌ ཤོད༌, ཡང༌ ཁོང༌ གྱོགས༌པ༌ འི༌རུ༌ ཁྲིད༌ཏེ༌ ཁྱོང༌།"

14 ཁོ༌ ཁོ༌རང༌ངི༌ ནོ༌ བེན༌ཡཱ༌མིན༌ལ༌ ཁྲིལ༌ཏེ༌ ངུས༌ ཡང༌ བེན༌ཡཱ༌མིན༌ནའང༌ ཁོའ༌ ཁྲིལ༌ཏེ༌ ངུས༌། 15 ཡོ༌སེབ༌བི༌ ཁོ༌རང༌ངི༌ ཨ༌ཅོ༌ ཚང༌མ༌ པུག༌ ཏངས༌ཏེ༌ ངུས༌། ཏེ༌ནེ༌ ཁོའེ༌ ཨ༌ཅོ༌གུན༌ནི༌ ཁོ༌ ཉམ༌པོ༌ སྤེ༌ར༌ ཏངས༌།

16 ཡོ༌སེབ༌བི༌ སྤུན༌ལ༌གུན༌ ཡོངས༌ཁན༌ནི༌ ནས༌ཚུལ༌ གྱལ༌པོའ༌ ཚོར༌ར༌ཅིག༌ ཁོ༌ དང༌ ཁོའེ༌ སྤོན༌བོ༌གུན༌ ཐད༌། 17 གྱལ༌པོའེ༌ ཡོ༌སེབ༌བ༌ ཟེརས༌, "ཁྱོ༌རང༌ངི༌ སྤུན༌ལ༌གུན༌ལ༌ ཟེར༌, 'སེམས༌ཅན༌གུན༌ལ༌ སྒལ༌ཀལ༌ཏེ༌ ཀེ༌ནན༌ལ༌ ལོགས༌ཏེ༌ སོང༌, 18 ཡང༌ ཁྱོ༌ཞ༌གུན༌ནི༌ ཨ༌བ༌ དང༌ ཁྱོ༌ཞ༌གུན༌ནི༌ ནང༌ཚངས༌ གུན༌ ཁྲིད༌ཏེ༌ ངའ༌ ཡོད༌ས༌ ལོགས༌ཏེ༌ ཡོང༌། ངའེ༌ ཁྱོ༌ཞ༌གུན༌ལ༌ ཨི༌ཇིབ༌བི༌ ཚང༌མའེ༌སང༌ ས༌ཆ༌ གྱལ༌ཤོག༌པོ༌ ཏང༌ཨིན༌ ཡང༌ ཁྱོ༌ཞ༌གུན༌ནི༌ འི༌ ས༌ཆའེ༌ ཟན༌ གྱལ༌ཤོག༌པོ༌ ཟེན༌།' "

19 "ཁོང༌གུན༌ལ༌ འི༌བོའང༌ ཟེར༌, 'ཁྱོ༌ཞའེ༌ ན༌མ༌, ཕྲུ༌གུ༌ གུན༌ ཞོན༌ཅེས༌ལ༌ ལང༌རེལ༌གུན༌ ཨི༌ཇིབ༌ནེ༌ ཁྱེར༌ ཡང༌ ཁོང༌གུན༌ དང༌ ཨ༌བ༌ ཁྲིད༌ཏེ༌ ཁྱོང༌། 20 ཁྱོ༌ཞའེ༌ ནོར༌གུན༌ བོར༌ཏེ༌ ཡོང༌ཅེས༌ལ༌ ཚེར༌ཁ༌ ཅོ༌ མ༌གོས༌ ཅིའ༌ཟེར༌ན༌ ཨི༌ཇིབ༌བི༌ ཚང༌མའེ༌སང༌ གྱལ༌ཤོག༌ ས༌ཆ༌བོ༌ ཁྱོ༌ཞའེ༌ གྱུར༌ཅེས༌ ཨིན༌ནོག༌།' "

21 ཡ༌ཀོབ༌བི༌ བུ༌ཚ༌གུན༌ནི༌ ཏེན༌ན༌བོ༌ ཅོས༌། གྱལ༌པོའེ༌ བཀའ༌ སལ༌ཁན༌ ནང༌ཞིན༌ ཡོ༌སེབ༌བི༌ ཁོང༌གུན༌ལ༌ ལང༌རེལ༌གུན༌ ཏངས༌ ཡང༌ བེས༌སི༌ ནང༌ང༌ ཟའ༌ཅེས༌སི༌ ཟན༌གུན༌ ཀལས༌། 22 ཁོའེ༌ ཁོང༌ རེ༌རེའ༌ ཀོས༌ལག༌ སོ༌མའེ༌ ཆའ༌ཅིག༌ ཏངས༌ ཨིན༌ནའང༌ བེན༌ཡཱ༌མིན༌ལ༌ མུལ༌ལི༌ པེ༌ནེ༌ སུམ༌གྱ༌ དང༌ ཀོས༌ལག༌ ཆའ༌ ལྔ༌ ཏངས༌། 23 ཁོའེ༌ ཁོ༌རང༌ངི༌ ཨ༌བའེ༌ ཕིའ༌ བུང༌བུ༌ རྕུའི༌ཀ༌ ཨི༌ཇིབ༌བི༌ ཅ༌ལག༌ གྱལ༌ཤོག༌གུན༌ ཀལས༌ ཡང༌ བུང༌མོ༌ རྕུའི༌ཀ༌ གྲུ༌, ཏ༌གི༌ དང༌ ཟའ༌གྱུ༌ གུན༌ ཁོང༌ངི༌ བེས༌སི༌ ཕིའ༌ ཀལས༌། 24 ཏེ༌ནེ༌ ཁོའེ༌ ཁོ༌རང༌ངི༌ སྤུན༌ལ༌གུན༌ ལམ༌ཅུགས༌ ཡང༌ ཁོང༌གུན༌ ཆ༌ ཟ༌ནེ༌ ཁོའེ༌ ལམ༌བར༌ལ༌ ཛིང༌མོ༌ མི༌ཏང༌ཅེས༌ལ༌ ཟེརས༌།

25 ཁོང༌གུན༌ ཨི༌ཇིབ༌ནེ༌ བིང༌ཏེ༌ སོང༌ ཡང༌ ཁོ༌རང༌གུན༌ནི༌ ཨ༌བ༌ ཡ༌ཀོབ༌ ཡོད༌ས༌ ཀེ༌ནན༌ལ༌ ལེབ༌། 26 ཁོང༌གུན༌ནི༌ ཨ༌བའ༌ ཟེརས༌, "ཡོ༌སེབ༌ སོན༌ཏེའ༌ དུག༌ མ༌ཚད༌ ཁོའེ༌ ཨི༌ཇིབ༌ གང༌པོའེ༌ཀ༌ ཝང༌སྲུལ༌ དུག༌།" ཡ༌ཀོབ༌ ཧ༌ལས༌ ཡང༌ ཁོའ༌ ཁོང༌གུན༌ནི༌ཀ༌ ཨིད༌ མ༌ཤེས༌། 27 ཨིན༌ནའང༌ ཁོང༌གུན༌ནི༌ ཡོ༌སེབ༌བི༌ ཁོང༌གུན༌ལ༌ ཟེར༌ཁན༌ ཚང༌མ༌ ཤད༌ད༌ཅིག༌ ཡང༌ ཡོ༌སེབ༌བི༌ ཁོ༌ ཁྱོང༌ཅེས༌ལ༌ ཀལ༌ཁན༌ནི༌ ལང༌རེལ༌གུན༌ ཐོང༌ང༌ཅིག༌ ཁོའེ༌ ཁོང༌གུན༌ནི༌ ཟེར༌ཁན༌གུན༌ དེན༌ཤེས༌ཏེ༌ ཐད༌པོ༌ སོང༌། 28 ཏེ༌ནེ༌ ཡ༌ཀོབ༌བི༌ ཟེརས༌, "ངའེ༌ བུ༌ཚ༌ ཡོ༌སེབ༌ སོན༌ཏེའ༌ ཡོད༌ཁན༌བོ༌ ཏ༌ ང༌ དེན༌ཤེས༌། ང༌ ཤིའི༌ སང༌ སྔུན༌ལ༌ ཁོའ༌ ཐུག༌ག༌ལ༌ ཆ༌གོས༌།"