2
སྣང༌སྟག༌ ཏང༌ཅེས༌ལ༌ སྤང༌ པུདས༌།
2:1 ནེ༌ 4
1 ཏེ༌བོའེ༌ཕིའ༌ ང༌དང༌གུན༌ནི༌ ཚོར༌ཁན༌ནི༌ དེན༌བ༌བོའེ༌ཀ༌ སྣང༌ང༌ སྲན༌ཏྲེ༌ ཏང༌གོས༌། གལ༌ཏེས༌ ཉན༌ མ༌ཉན༌ན༌, ང༌དང༌གུན༌ ཏེ༌བོའེ༌ ཀ༌ནེ༌ ཀུ༌ལེ༌ ཀུ༌ལེའ༌ ཐག༌རིང༌ང༌ ཆ༌སྲིད༌ཅེས༌ ཨིན༌ནོག༌། 2 ངའེ༌ ཏེ༌བོ༌ ཟེར༌རད༌, ཅིའ༌ཟེར༌ན༌ དཀོན༌མཆོག༌གི༌ ཕོ༌ཉ༌གུན༌ གྱུད༌ཏེ༌ ཁྲིམས༌ སལ༌ལ༌ ཛད༌ཁན༌གུན༌ སྟན༌པོ༌ ཅོའ༌ ཛད༌ཏེ༌ ཨིན༌ནོག༌། ཡང༌ ཁྲིམས༌ཅག༌ཁན༌ དང༌ ཁྲིམས༌ ཁའ༌ མ༌ཉན༌ཁན༌ ཚང༌མ༌ལ༌ འོས༌པའེ༌ ཆད༌པ༌ ཕོགས༌ཏེ༌ ཨིན༌ནོག༌། 3 གལ༌ཏེས༌ ང༌དང༌གུན༌ནི༌ ཏེ༌ཙོགས༌སི༌ ཧ༌ལས༌སི༌ ཐར༌པའ༌ སྣང༌སྟག༌ མ༌ཏང༌ནའ༌, ཏེ༌ནེ༌ ཀ༌ཟུག༌གི༌ ང༌དང༌གུན༌ ཏེ༌ ཆད༌པའེ༌ ཀ༌ནེ༌ ཤོར༌ཉན༌ཅེས༌སི༌ སམ༌བ༌ ཏང༌ངད༌, ཀ༌ཐར༌པ༌བོ༌ གོ༌མ༌རང༌ གཙོ༌བོ༌ ཡེ༌ཤུ༌ ཁོང༌རང༌ངི༌ ཤད༌ད༌ ཛདས༌, ཏེ༌ནེ༌ ཚོར༌ཁན༌གུན༌ནི༌ ཏེ༌བོ༌ ང༌དང༌གུན༌ལ༌ ཁྱོངས༌ཏེ༌ ཨིན༌པིན༌། 4 དཀོན༌མཆོག༌གི༌ ལྟས༌, ཧ༌ལས༌ཤེས༌སི༌ ལས༌, ཛད༌པ༌ རིགས༌ མང༌པོ༌ དང༌, དམ༌པའེ༌ ཐུག༌ཉིད༌དི༌ ཁྱུད༌ གུན༌, ཁོང༌རང༌ངི༌ ཐུག༌གོངས༌ ནང༌ཞིན༌ སལ༌ལ༌ ཛད༌ཏེ༌ ལོན༌བོ༌ དྲང༌པོ༌ ཨིན༌ཁན༌ནི༌ སྤང༌པོ༌ སལ༌ལ༌ ཛད༌ད༌ནོག༌།
ཐར༌པ༌ ཆོགས༌ལ༌ ཁྲིད༌ད༌ ཛད༌ཁན༌།
2:5 ནེ༌ 18
5 དཀོན༌མཆོག༌གི༌ ཡོང༌ཅེས༌ཅན༌ནི༌ སོ༌མ༌ ཇིག༌རྟེན༌བོ༌ ཕོ༌ཉ༌གུན༌ནི༌ ཝང༌ངི༌ ཡོག༌ག༌ བོར༌ར༌ མ༌ཛད༌ད༌ ཨིན༌ནོག༌, ཀ༌ ཇིག༌རྟེན༌བོའེ༌ སྐོར༌ལ༌ ངའེ༌ བྲིའད༌། 6 དམ༌པའེ༌ སུང༌རབས༌སི༌ ཁག༌ ཤིག༌གི༌ ནང༌ང༌ མོལ༌དུག༌།
"ཉེ༌རང༌ངི༌ སྣང༌ང༌ སལ༌ལ༌ ཛད༌ཁན༌ནི༌ མི༌གུན༌ལ༌,
རིན༌ ཅི༌ ཡོད༌ཏེ༌ ཨིན༌ནོག༌?
ཅི༌ མི༌གུན༌ལ༌ ཏེ༌ཙོགས༌སི༌ སྣང༌སྟག༌ ཐོབ༌ཅེས༌སི༌ འོས༌པ༌ ཨིན༌ནོག༌ག༌?
7 ཏུས༌ཙ༌པིག༌ཤིག༌གི༌ ཕིའ༌ ཉེ༌རང༌ངི༌ ཁོང༌གུན༌ལ༌ ཀོ༌ས༌
ཕོ༌ཉ༌གུན༌ནི༌ སང༌ ཆུ༌ངུན༌ སལ༌ལ༌ ཛདས༌།
ཏེ༌ནེའང༌ ཉེ༌རང༌ངི༌ མི༌གུན༌ལ༌ སྤལ༌ དང༌
རྩི༌ཝ༌ཅན༌ནི༌ ཐོར༌ཤོག༌པོ༌ སྐོན༌ན༌ ཛདས༌།
8 ཉེ༌རང༌ངི༌ ཅི༌ཚང༌མའེ༌ཀ༌ ཁོང༌གུན༌ལ༌ ཝང༌ སལ༌ལ༌ ཛདས༌། * 2:8 སུང༌གུར༌རི༌ སྤེ༌ཆའེ༌ 8:4 ནེ༌ 6 "
ཏ༌ ཅི༌ཚང༌མའེ༌ཀ༌ ཟེར༌ར༌ཅིག༌, ཅི༌ཞིག༌གའང༌ ཁོང༌གུན༌ནི༌ ཝང༌ནེ༌ ཕི༌ལོག༌ག༌ ལུས༌ཏེ༌ མེད༌པ༌ ཨིན༌ནོག༌། དག༌ས༌ ཚོག༌པ༌ ང༌དང༌གུན༌ནི༌ ཅི༌ཚང༌མ༌ ཁོང༌གུན༌ནི༌ ཝང༌ངི༌ ཡོག༌ག༌ བོར༌ར༌ལ༌ མ༌ཐོང༌ང༌ ཨིན༌ནོག༌། 9 ཨིན༌ནའང༌ ང༌དང༌གུན༌ནི༌ ཡེ༌ཤུ༌ ཐོང༌ང༌ནོག༌ ཀ༌བོའ༌ "ཙ༌པིག༌ཤིག༌གི༌ ཕིའ༌ ཕོ༌ཉ༌གུན༌ནི༌ སང༌ ཆུ༌ངུན༌ ཀོ༌ས༌ སལ༌ལ༌ ཛདས༌།" ཁོང༌ངི༌ ང༌དང༌གུན༌ནི༌ ཕིའ༌ ཤི༌ཅེས༌སི༌ རྡུག༌ངལ༌བོ༌ ཁུར༌ར༌ ཛདས༌, འོ༌ན༌ དཀོན༌མཆོག༌གི༌ ཐུག༌རྗེའེ༌ ཞས༌ཏེ༌ ཡེ༌ཤུའི༌ ཚང༌མའེ༌ ཏོན༌ལ༌ ཤི༌ཅེས༌པོ༌ ཉོང༌ང༌ ཛདས༌ པ༌སང༌, ཁོང༌ང༌ སྤལ༌ དང༌ རྩི༌ཝ༌ཅན༌ནི༌ ཐོར༌ཤོག༌པོ༌ སྐོན༌ན༌ ཛད༌ཏེ༌ ཨིན༌ནོག༌།
10 དཀོན༌མཆོག༌གི༌, ཁོང༌རང༌ངི༌ ཕིའ༌ ཡང༌ ཁོང༌རང༌ གྱུད༌ཏེ༌ ཅི༌ཚང༌མ༌ ཅོའ༌ ཛདས༌། ཁོང༌རང༌ངི༌ ཟིར༌རྗིད༌པོ༌ མི༌ མང༌པོ༌ ཉམ༌པོ༌ བགོའ༌ ཛད༌ཅེས༌ལ༌ ཐབས༌ལྡིང༌ང༌ ཛདས༌། ཁོང༌གུན༌ ཐར༌པའེ༌ ནང༌ང༌ ཁྱོང༌ང༌ ཛད༌ཅེས༌སི༌ ཕིའ༌ ཡེ༌ཤུའི༌ རྡུག༌ངལ༌ གྱུད༌ཏེ༌, ཁོང༌ ཕུན༌སུམ༌ཚོགས༌པ༌ འུ༌སྐྱོང༌ ཛད༌ཅེས༌པོ༌, དཀོན༌མཆོག༌གི༌ ཐག༌ཅད༌ དྲང༌པོ༌བོ༌ ཨིན༌པིན༌། 11 སོང༌པ༌སང༌ ཏ༌ ཡེ༌ཤུ༌ དང༌ ཁོང༌ངི༌ དམ༌པ༌ ཅོའ༌ ཛད༌ཁན༌ མི༌གུན༌ལ༌ ཡབ༌ ཅིག༌ཅིག༌ ཡོད༌ཏེ༌ ཨིན༌ནོག༌། ཏེན༌ན༌བོའེ༌ཕིའ༌ ཡེ༌ཤུའི༌ ཐུག༌ཁྲེལ༌ལ༌ མ༌ཛད༌ད༌, ཏེ༌གུན༌ལ༌ ཁོང༌རང༌ངི༌ སྤུན༌གུན༌ མོལ༌ལ༌ ཛད༌ཨིན༌ ཨིན༌ནོག༌། 12 ཁོང༌ངི༌ དཀོན༌མཆོག༌ག༌ མོལས༌།
"ངའེ༌ ང༌རང༌ངི༌ སྤུན༌གུན༌ལ༌ ཉེ༌རང༌ངི༌ ཚན༌བོ༌ ཤད༌ཨིན༌།
ཛོམས༌ཏེ༌ ཡོད༌ཁན༌ནི༌ སྤུན༌གུན༌ནི༌ ཕྲོའ༌,
ངའེ༌ ཉེ༌རང༌ང༌ སྟོད༌པ༌ ཕུལ༌ཨིན༌། † 2:12 སུང༌གུར༌རི༌ སྤེ༌ཆའེ༌ 22:22 "
13 ཁོང༌ངི༌ འི༌བོའང༌ མོལ༌ལ༌ ཛདས༌,
"ངའེ༌ དཀོན༌མཆོག༌ག༌ ཨིད༌ཤེས༌ ཅོ༌ཨིན༌། ‡ 2:13 ཡེ༌ཤ༌ཡཱའེ༌ སྤེ༌ཆའེ༌ 8:17 "
ཡང༌སྐྱར༌ ཁོང༌ངི༌ མོལས༌,
"འི༌ཀ༌, ང༌ དང༌ དཀོན༌མཆོག༌གི༌ ངའ༌ སལ༌ལ༌ ཛད༌ཁན༌ནི༌ ཕྲུ༌གུ༌གུན༌ ཡོད༌། § 2:13 ཡེ༌ཤ༌ཡཱའེ༌ སྤེ༌ཆའེ༌ 8:18 "
14 དཀོན༌མཆོག༌གི༌ ཕྲུ༌གུ༌གུན༌ ཤ༌ དང༌ ཁྲག༌ག༌ ཅོ༌ཁན༌ནི༌ མི༌རིགས༌ ཨིན༌ པ༌སང༌, སྲས༌སའང༌ ཤ༌ དང༌ ཁྲག༌གི༌ གྱུར༌ར༌ ཛདས༌། མི༌ གྱུར༌ཅེས༌ ཅིག༌པོ༌ གྱུད༌ཏེ༌ ཁོང༌ ཀྲོངས༌ ཉན༌ན༌ནོག༌, ཡང༌ ཀྲོང༌ཤེས༌ ཅིག༌པོ༌ གྱུད༌ཏེ༌ ཁོང༌ངི༌ རྡུད༌གུན༌ནི༌ གོ༌བའེ༌ ཝང༌ མེད༌ཁན༌ ཅོའ༌ ཛད༌ ཉན༌ན༌ནོག༌, ཏེ༌ ཝང༌བོ༌ ནི༌ ཤི༌ཅེས༌པོ༌ ཨིན༌ནོག༌། 15 མི༌ཚེ༌ གང༌པོ༌ ཤི༌ཅེས༌སི༌ ཇིགས༌སི༌ ཚེ༌ཡོག༌ག༌ ཟུམས༌ཏེ༌ ཡོད༌ཁན༌ ཚང༌མ༌, ཁོང༌ ཀྲོངས༌ཤེས༌ ཅིག༌པོ༌ གྱུད༌ཏེ༌ ཐར༌ ཅུག༌ག༌ ཛདས༌།
16 སྲས༌ ཕོ༌ཉ༌གུན༌ལ༌ མན༌པ༌ ཨབ༌ར༌ཧམ༌མི༌ པུར༌གྱུད༌གུན༌ལ༌ རོགས༌ ཛད༌ཅེས༌ལ༌ སྐྱོད༌ད༌ ཛད༌ཁན༌བོ༌, ང༌དང༌གུན༌ལ༌ སལ༌པོ༌ གྱུས༌ཨིན༌ནོག༌། 17 ཏེ༌བོའེ༌ཕིའ༌ དཀོན༌མཆོག༌གི༌ ཞབ༌སྟོག༌གི༌ ནང༌ང༌, སྙིང༌རྗེ༌ཅན༌ དང༌ ཨིད༌ཤེས༌ཅན༌ནི༌ བླ༌མ༌ ཆེན༌མོ༌ གྱུར༌ཅེས༌སི༌ ཕིའ༌, ཁོང༌ ཅི༌ས༌ཐོག༌ནེ༌ ཁོང༌ངི༌ སྤུན༌གུན༌ ཙོགས༌, གྱུར༌ར༌ ཛད༌ཅེས༌པོ༌ ཁག༌ཅན༌ ཨིན༌པིན༌། ཏེ༌ནེ༌ ཁོང༌ངི༌ མི༌གུན༌ནི༌ སྡིག༌པ༌ མེད༌ཁན༌ ཅོའ༌ ཛད༌ཅེས༌ལ༌ སྲོག༌གི༌ ཆོད༌པ༌ ཕུལ༌ཉན༌། 18 ཁོང༌ང༌ ཚོད༌ལྟའེ༌ ནང༌ང༌ རྡུག༌ངལ༌ བྱུང༌ པ༌སང༌, ང༌དང༌གུན༌ལ༌ ཚོད༌ལྟ༌ བྱུང༌ ཟ༌ནེ༌ ཁོང༌ངི༌ རོགས༌ ཛད༌ཐུབ༌ཨིན༌།