4
དཀོན༌མཆོག༌གི༌ ཞལ༌ཆད༌ ཛད༌ཁན༌ནི༌ ངལ༌ཚོ༌།
4:1 ནེ༌ 13
1 ངལ༌ཚོ༌སའེ༌ ནས༌སའེ༌ ནང༌ང༌ ཞུགས༌ཅེས༌སི༌ དཀོན༌མཆོག༌གི༌ ཞལ༌ཆད༌པོ༌ ཏ༌རུང༌ངའང༌ ལུས༌ཏེ༌ ཡོད༌ པ༌སང༌, ང༌དང༌གུན༌ནི༌ ཕྲོ༌ནེ༌ སུ༌ཞིག༌གའང༌ ཏེ༌ ངལ༌ཚོ༌སའེ༌ ནས༌སའེ༌ ནང༌ང༌ ཞུག༌ མ༌ཞུགས༌ས༌, མི༌ལུས༌ཤེས༌སི༌ ཕིའ༌, ཤང༌ ཅོ༌ཤིག༌། 2 ཅིའ༌ཟེར༌ན༌ དཀོན༌མཆོག༌གི༌ ངལ༌ཚོ༌སའེ༌ ནས༌ས༌ གྲལ༌གྲིག༌ ཅོའ༌ ཛད༌ཁན༌ནི༌ གའ༌མོའེ༌ ནས༌ཚུལ༌བོ༌, ང༌དང༌ངི༌ ཕ༌མེས༌པོ༌གུན༌ལ༌ ཤད༌ཁན༌ ཙོགས༌ལ༌ ང༌དང༌གུན༌ནི༌ ཕིའང༌ ཤད༌ཏེ༌ ཨིན༌ནོག༌། ཨིན༌ནའང༌ འི༌བོ༌ ཁོང༌གུན༌ལ༌ ཕན༌ཐོགས༌ཅན༌ཞིག༌ མ༌གྱུར༌, ཅིའ༌ཟེར༌ན༌ ཁོང༌གུན༌ དཀོན༌མཆོག༌གི༌ ཁའ༌ཉན༌ཏེ༌ ཨིད༌ཤེས༌ ཅོ༌ཁན༌གུན༌ ཙོགས༌ མན༌པིན༌། *4:2 འི༌ ལབ༌ཞ༌བོ༌ རྩི༌རུག༌གི༌ སྤེ༌ཆའེ༌ 13 པོའེ༌ ནང༌ང༌ བྲིས༌ཁན༌ནི༌ གྱལ༌རབས༌ དང༌ བྲེལ༌ཏེ༌ ཨིན༌ནོག༌། 3 ང༌དང༌ ཏད༌པ༌ ཅོ༌ཁན༌གུན༌ ཅིག༌པོ༌ ཁོང༌ངི༌ ངལ༌ཚོ༌སའེ༌ ནས༌སའེ༌ ནང༌ང༌ ཆ༌ཉན༌ན༌ནོག༌, ཀ༌ཟུག༌ དཀོན༌མཆོག༌གི༌ མོལ༌ཏེ༌ ཨིན༌ནོག༌,
"ངའེ༌ སྲོའེ༌ ནང༌ང༌ ནའ༌ ཁུར༌པིན༌། 'ངའེ༌ ངལ༌ཚོའེ༌
ནས༌སའེ༌ ནང༌ང༌ ཁོང༌གུན༌ མ༌ནེ༌ ཞུགས༌ མི༌ཉན༌།'†4:3 སུང༌གུར༌རི༌ སྤེ༌ཆའེ༌ 95:11 "
ཞན༌ དཀོན༌མཆོག༌གི༌ ཇིག༌རྟེན༌ ཛད༌དི༌ ཏུས༌ནེ༌ ཕར༌ལ༌, འི༌ ངལ༌ཚོ༌སའེ༌ ནས༌ས༌བོ༌ གྲལ༌གྲིག༌ ཛད༌ཏེ༌ ཨིན༌པིན༌། 4 ང༌དང༌ང༌ འི༌ ངལ༌ཚོ༌སའེ༌ ནས༌ས༌ གྲལ༌གྲིག༌ ཡོད༌ཁན༌བོ༌ གྱུས༌ཨིན༌ནོག༌, ཅིའ༌ཟེར༌ན༌ དམ༌པའེ༌ སུང༌རབས༌སི༌ ནས༌ས༌ཞིག༌གི༌ཀ༌, ཞག༌ རྡུན༌པའེ༌ ཞག༌གི༌ སྐོར༌ལ༌ བྲིའ༌ ཛད༌ཏེ༌ དུག༌, "ཆག༌ལས༌ ཚང༌མ༌ ཛད༌ཏེ༌ སྟིང༌ནེ༌ ཞག༌ རྡུན༌པའེ༌ ཞག༌ག༌ དཀོན༌མཆོག༌ ངལ༌ཚོའ༌ ཛདས༌། ‡4:4 གོ༌ཟུག༌ ཟེར༌ཁན༌ནི༌ སྤེ༌ཆའེ༌ 2:2 " 5 ཨིན༌ནའང༌ སྔུན༌མ༌ ངའེ༌ བྲིས༌ཁན༌ ཙོགས༌ལ༌ དཀོན༌མཆོག༌གི༌ མོལ༌ལ༌ ཛདས༌, "ཁོང༌གུན༌ ངའེ༌ ངལ༌ཚོ༌སའེ༌ ནས༌སའེ༌ ནང༌ང༌ མ༌ནེ༌ ཞུགས༌ མི༌ཉན༌།"
6 དཀོན༌མཆོག༌གི༌ ངལ༌ཚོ༌ས༌བོ༌ ཏ༌རུང༌ངའང༌ མི༌གུན༌ ཡོང༌ཅེས༌ལ༌ ཕེས༌ཏེ༌ ཨིན༌ནོག༌, ཨིན༌ནའང༌ ཁའ༌ མི༌ཉན༌ཅེས༌པོའེ༌ ཞས༌ཏེ༌, གའ༌མོའེ༌ ནས༌ཚུལ༌ གོ༌མ༌རང༌ ཚོར༌ཁན༌གུན༌ ཏེ༌ནང༌ང༌ ཆ༌ མ༌ཉན༌། 7 དཀོན༌མཆོག༌གི༌ ངལ༌ཚོ༌སའེ༌ ནས༌སའེ༌ ནང༌ང༌ ཆ༌ཅེས༌ལ༌ ཡང༌ ཏུས༌ཤིག༌ ལྡམ༌མ༌ ཛདས༌, ཏེ༌ཏུས༌པོ༌ ནི༌ དི༌རིང༌ ཨིན༌ནོག༌། ཏུས༌ མང༌པོའེ༌ སྟིང༌ནེ༌ དཀོན༌མཆོག༌གི༌ གྱལ༌པོ༌ དཱ༌བིད༌ གྱུད༌ཏེ༌ འི༌བོ༌ ཤད༌ད༌ ཛདས༌, ཀ༌ཟུག༌གི༌ ངའེ༌ སྔུན༌ལ༌ བྲིས༌ཏེ༌ ཡོད༌།
"དི༌རིང༌ ཁྱོ༌ཞ༌གུན༌ལ༌ ཁོང༌ངི༌ སུང༌སྐད༌པོ༌ ཚོར༌ ཟ༌ནེ༌,
ཁྱོ༌ཞ༌གུན༌ནི༌ སྙིང༌ སྐྱོང༌པོ༌ གྱུར༌ མ༌ཅུག༌ཤིག༌།"§4:7 སུང༌གུར༌རི༌ སྤེ༌ཆའེ༌ 95:7, 8
8 གལ༌ཏེས༌ ཡོ༌ཤུ༌ཨའ༌ ཨིས༌ར༌ཨེལ༌པ༌གུན༌ལ༌ ཏེ༌ ངལ༌ཚོ༌བོ༌ ཏང༌ཅེས༌སི༌ ནང༌ང༌ ཁྲངས༌པོ༌ ལུས༌པིན༌ན༌, ཏེ༌ནེ༌ དཀོན༌མཆོག༌གི༌ ཞན༌ཡང༌ ཞག༌ཤིག༌གི༌ སྐོར༌ལ༌ སྟིང༌ནེ༌ ཞལ༌ཏ༌ མ༌སལ༌ལ༌ ཡོད༌གྲོ༌། 9 ཏེ༌བོའེ༌ཕིའ༌ ངལ༌ཚོའེ༌ ཏུས༌པོ༌ *4:9 གིརིས༌སི༌ སྐད༌དི༌ ནང༌ང༌ ཤབ༌བད༌དི༌ ངལ༌ཚོ༌ བྲིས༌ཏེ༌ ཡོད༌ཏེ༌ ཨིན༌ནོག༌, ཏོན༌བོ༌ ནི༌ དཀོན༌མཆོག༌གི༌ མི༌གུན༌ནི༌ ངལ༌ཚོ༌ ཉོང༌ ཐུབ༌ཨིན༌, ཀ༌བོ༌ དཀོན༌མཆོག༌གི༌ ཇིག༌རྟེན༌ ཛད༌ཏེ༌ སྟིང༌ནེ༌ གོ༌ཟུག༌ ཛདས༌། ཏ༌རུང༌ངའང༌ དཀོན༌མཆོག༌གི༌ མི༌གུན༌ནི༌ ཕིའ༌ ལུས༌ཏེ༌ ཨིན༌ནོག༌། 10 དཀོན༌མཆོག༌གི༌ ཇིག༌རྟེན༌ ཛད༌ཏེ༌ སྟིང༌ནེ༌ ངལ༌ཚོའ༌ ཛད༌ད༌ ཙོགས༌ལ༌, ཁོང༌ངི༌ ངལ༌ཚོ༌སའེ༌ ནས༌སའེ༌ ནང༌ང༌ ལེབ༌ཁན༌ ཚང༌མའ༌, ཁོང༌རང༌ངི༌ ལས༌གུན༌ནི༌ ཀ༌ནེ༌ ངལ༌ཚོ༌ ཐོབ༌ཨིན༌། 11 སོང༌པ༌སང༌ ངལ༌ཚོ༌སའེ༌ ནས༌སའེ༌ ནང༌ང༌ ལེབ༌ཅེས༌སི༌ ཕིའ༌, ང༌དང༌གུན༌ནི༌ རྩོན༌གྲུས༌ གྱལ༌ལ༌ ཅོ༌ཨིན༌། ཨིན༌ནའང༌ གལ༌ཏེས༌ ང༌དང༌གུན༌ནི༌ དཀོན༌མཆོག༌གི༌ ཁའ༌ མ༌ཉན༌ན༌, ཏེ༌ནེ༌ ང༌དང༌གུན༌ནའང༌ ཨིས༌ར༌ཨེལ༌པ༌གུན༌ ཙོགས༌ལ༌ ཁྲངས༌པོ༌ མི༌ལུས༌།
12 ཏན༌ཏན༌ལ༌ དཀོན༌མཆོག༌གི༌ བཀའ༌གུན༌ སོན༌པོ༌ དང༌ ཤེད༌ཅན༌ ཨིན༌ནོག༌། འི༌བོ༌ ནི༌ ཚང༌མའེ༌སང༌ ཁ༌ ནོན༌པོ༌ཅན༌ནི༌ ཟུར༌ཉིས༌ ཡོད༌ཁན༌ནི༌ ར༌འི༌ སང༌ ནོན༌པོ༌ ཡོད༌ཏེ༌ ཨིན༌ནོག༌, ཏེ༌བོའེ༌ སེམས༌ དང༌ སེམས༌ཉིད༌ ཡང༌ རུས༌པའེ༌ ཐུད༌ དང༌ རུས༌པའེ༌ སྐང༌ གུན༌ ཅད༌ཏེ༌ སོ༌སོ༌ ཛད༌ ཉན༌ན༌ནོག༌། ཏེ༌བོའེ༌ ང༌དང༌གུན༌ནི༌ ནང༌ཀུག༌གི༌ སམ༌ཚུལ༌ དང༌ དོད༌པ༌ གུན༌ ཕི༌ལོག༌ག༌ ཕིང༌ང༌ནོག༌། 13 དཀོན༌མཆོག༌གི༌ ཞངས༌ཁན༌ ཚང༌མའེ༌ ནང༌ནེ༌ ཅི༌ཞིག༌གའང༌ ཁོང༌ནེ༌ སྦས༌ཏེ༌ བོར༌ མི༌ཉན༌། ཁོང༌ངི༌ མིག༌གི༌ དུན༌ལ༌ ཅི༌ཚང༌མ༌ ཀབ༌ མ༌ཀབ༌བ༌ ཕེས༌ཏེ༌ ཡོད༌ཏེ༌ ཨིན༌ནོག༌, ཡང༌ ཁོང༌ངི༌ དུན༌ལ༌ ང༌དང༌གུན༌ནི༌ ལས༌ ཚང༌མའེ༌ རྩི༌རུག༌ ཏང༌གོས༌ཨིན༌།
མ༌ཤི༌ཀ༌ ནི༌ ང༌དང༌གུན༌ནི༌ བླ༌མ༌ ཆེན༌མོ༌ ཞུགས༌ཏེ༌ ཨིན༌ནོག༌།
4:14 ནེ༌ 5:10
14 ཏེ༌ནེ༌ ང༌དང༌གུན༌ལ༌ ནམ༌ཁའེ༌ ནང༌ང༌ ཞུགས༌ཁན༌ དཀོན༌མཆོག༌གི༌ སྲས༌ ཡེ༌ཤུ༌, བླ༌མ༌ ཆེན༌མོ༌ ཀྲག༌པོ༌ཞིག༌ ཡོད༌ པ༌སང༌, ང༌དང༌ངི༌ ཏད༌པའེ༌ སྤང༌པོ༌ ཏང༌ཁན༌བོའེ༌ཀ༌ སྟན༌པོ༌ ཐམས༌ཏེ༌ དུག༌ཤིག༌། 15 ང༌དང༌གུན༌ནི༌ འི༌ བླ༌མ༌ ཆེན༌མོའེ༌, ང༌དང༌གུན༌ སེམས༌སི༌ ནང༌ང༌ འུ༌ཐུགས༌ ཨིན༌ཁན༌བོ༌ ཁྱེན༌ན༌ ཛད༌ད༌ནོག༌། ཅིའ༌ཟེར༌ན༌ ང༌དང༌ ཙོགས༌ལ༌ ཁོང༌ངིའང༌ ཏེན༌ན༌ ཙོགས༌སི༌ ཚོད༌ལྟ༌གུན༌ ཉོངས༌, ཨིན༌ནའང༌ ཁོང༌ངི༌ སྡིག༌པ༌ ཅོའ༌ མ༌ཛདས༌། 16 ཏེན༌ན༌བོའེ༌ཕིའ༌ ང༌དང༌གུན༌ སྙིང༌རྗེ༌ཅན༌ནི༌ དཀོན༌མཆོག༌, ཁྲིས༌སི༌ཀ༌ ཞུགས༌ཏེ༌ ཡོད༌ཁན༌ ཡོད༌ས༌ ཧམ༌པ༌ ཉམ༌པོ༌ ཡོང༌ཤིག༌། ཏེ༌རུ༌ ཁོང༌ང༌ སྙིང༌རྗེ༌ སྐྱེས༌ཏེ༌ ང༌དང༌གུན༌ལ༌ སྒོས༌དོམ༌ ཡོད༌དི༌ ཏུས༌ལ༌ ཁོང༌ངི༌ ཐུག༌རྗེ༌ རོགས༌གུན༌ ཐོབ༌ཨིན༌།
*4:2 4:2 འི༌ ལབ༌ཞ༌བོ༌ རྩི༌རུག༌གི༌ སྤེ༌ཆའེ༌ 13 པོའེ༌ ནང༌ང༌ བྲིས༌ཁན༌ནི༌ གྱལ༌རབས༌ དང༌ བྲེལ༌ཏེ༌ ཨིན༌ནོག༌།
†4:3 4:3 སུང༌གུར༌རི༌ སྤེ༌ཆའེ༌ 95:11
‡4:4 4:4 གོ༌ཟུག༌ ཟེར༌ཁན༌ནི༌ སྤེ༌ཆའེ༌ 2:2
§4:7 4:7 སུང༌གུར༌རི༌ སྤེ༌ཆའེ༌ 95:7, 8
*4:9 4:9 གིརིས༌སི༌ སྐད༌དི༌ ནང༌ང༌ ཤབ༌བད༌དི༌ ངལ༌ཚོ༌ བྲིས༌ཏེ༌ ཡོད༌ཏེ༌ ཨིན༌ནོག༌, ཏོན༌བོ༌ ནི༌ དཀོན༌མཆོག༌གི༌ མི༌གུན༌ནི༌ ངལ༌ཚོ༌ ཉོང༌ ཐུབ༌ཨིན༌, ཀ༌བོ༌ དཀོན༌མཆོག༌གི༌ ཇིག༌རྟེན༌ ཛད༌ཏེ༌ སྟིང༌ནེ༌ གོ༌ཟུག༌ ཛདས༌།