1 མེལ༌ཀ༌ཟེ༌དེག༌ ནི༌ སེ༌ལམ༌ གྱལ༌སའེ༌ གྱལ༌པོ༌ དང༌ ཚང༌མའེ༌སང༌ ཀྲག༌པོ༌ དཀོན༌མཆོག༌གི༌ བླ༌མ༌ ཨིན༌པིན༌། ཨབ༌ར༌ཧམ༌མི༌ གྱལ༌པོ༌གུན༌ནི༌ གྱབ༌གལ༌ལ༌ མག༌ ཏངས༌ཏེ༌ གྱལ༌ཁའ༌ ཐོབ༌ཏེ༌ ལོགས༌ཏེ༌ ཡོངས༌ ཟ༌ནེ༌, མེལ༌ཀ༌ཟེ༌དེག༌ག༌ ཁོ༌ ཐུག༌, ཡང༌ ཁོང༌ངི༌ ཨབ༌ར༌ཧམ༌མ༌ ཅིན༌ལབས༌ སལས༌། 2 ཏེ༌ནེ༌ ཨབ༌ར༌ཧམ༌མི༌ མག༌གི༌ ནང༌ང༌ ཐོབ༌ཁན༌ ནོར༌ ཚང༌མའེ༌ ནང༌ནེ༌ རྕུ༌ཁག༌ཅིག༌, མེལ༌ཀ༌ཟེ༌དེག༌ག༌ ཕུལས༌། མེལ༌ཀ༌ཟེ༌དེག༌ མིང༌བོའེ༌ ཏོན༌ ཏང༌པོ༌ ནི༌, "གྱལ༌པོ༌ དྲང༌པོ༌" ཡང༌ སེ༌ལམ༌མི༌ གྱལ༌པོའེ༌ ཏོན༌བོ༌ ནི༌, "ཞི༌དེའེ༌ གྱལ༌པོ༌" ཨིན༌ནོག༌། 3 ཁོང༌ངི༌ ཨ༌བ༌, ཨ༌མ༌ ཡ༌ ཕ༌མེས༌པོ༌ མ༌ཚད༌, ཁོང༌ སྐྱེ༌ཅེས༌ ཡ༌ ཤི༌ཅེས༌སི༌ སྐོར༌ལ༌ ཅའང༌ ཤད༌རྒྱུ༌ མེད༌ཏེ༌ ཨིན༌ནོག༌། དཀོན༌མཆོག༌གི༌ སྲས༌ ཙོགས༌ལ༌ ཁོང༌ ཏུས༌གྱུན༌ བླ༌མ༌ཞིག༌ ལུས༌།

4 སམ༌བ༌ ཏོང༌ཤིག༌གའང༌, མེལ༌ཀ༌ཟེ༌དེག༌ ཙམ༌ཤིག༌གི༌ ཀྲག༌པོ༌ ཞུགས༌ཏེ༌ མ༌ནོག༌། ཨིས༌ར༌ཨེལ༌ལི༌ ཕ༌མེས༌པོ༌ མིང༌ཅན༌ ཨབ༌ར༌ཧམ༌མིའང༌ མག༌གི༌ ནང༌ང༌ ཐོབ༌ཁན༌ ཚང༌མའེ༌ ནང༌ནེ༌ རྕུ༌ཁག༌ཅིག༌ ཁོང༌ང༌ ཕུལས༌། 5 ཏ༌ མོ༌ཟེས༌སི༌ ཁྲིམས༌ ནང༌ཞིན༌ལ༌, ལི༌ཝི༌ པུར༌གྱུད༌ནེ༌ ཨིན༌ཁན༌ནི༌ བླ༌མ༌གུན༌ནི༌ ཨིས༌ར༌ཨེལ༌པ༌གུན༌ནི༌ ཀ༌ནེ༌ རྕུ༌ཁག༌ཅིག༌ ལྡུ༌ཆོགས༌སད༌པིན༌, ཀ༌གུན༌ནའང༌ ཨབ༌ར༌ཧམ༌མི༌ པུར༌གྱུད༌ ཨིན༌ནོག༌། 6 ཨིན༌ནའང༌ ལི༌ཝི༌པའེ༌ པུར༌གྱུད༌ནེ༌ མན༌ཁན༌ནི༌ མེལ༌ཀི༌ཟེ༌དེག༌གིའང༌ ཨབ༌ར༌ཧམ༌མི༌ ཀ༌ནེ༌ རྕུ༌ཁག༌ཅིག༌ ལེན༌ཏེ༌ དཀོན༌མཆོག༌གི༌ ཞལ༌ཆད༌ ཐོབ༌ཁན༌ནི༌ ཨབ༌ར༌ཧམ༌མའ༌ ཅིན༌ལབས༌ ཏངས༌། 7 ཡང༌ ཐེ༌ཚོམས༌ མ༌ནེ༌ མེད༌པ༌, ཅིན༌ལབས༌ ཏང༌ཁན༌བོ༌ ཅིན༌ལབས༌ ལེན༌ཁན༌བོའེ༌ སང༌ ཆེའ༌ ཨིན༌ནོག༌།

8 རྕུ༌ཁག༌ཅིག༌ ལེན༌ཁན༌ནི༌ བླ༌མ༌གུན༌, ཤིའ༌ནོག༌, ཨིན༌ནའང༌ མེལ༌ཀ༌ཟེ༌དེག༌ བླ༌མ༌གུན༌ནི༌ སང༌ ཀྲག༌ག༌ ཨིན༌ནོག༌, ཅིའ༌ཟེར༌ན༌ སུང༌རབས༌སི༌ ནང༌ང༌ ཁོང༌ ཤི༌ཁན༌ནི༌ སྐོར༌ལ༌ བྲིས༌ཏེ༌ མེད༌ པ༌སང༌, ཁོང༌ ཏུས༌གྱུན༌ སོན༌ཏེའ༌ ལུས༌ཁན༌ ཐེའ༌ནོག༌། 9 འི༌བོའང༌ ཟེར༌ཉན༌ཅེས༌ ཨིན༌ནོག༌, རྕུ༌ཁག༌ཅིག༌ ལེན༌ཁན༌ནི༌ ལི༌ཝི༌པ༌གུན༌ནི༌ མེལ༌ཀ༌ཟེ༌དེག༌ག༌ རྕུ༌ཁག༌ཅིག༌ ཏངས༌ཏེ༌ ཨིན༌ནོག༌, ནམ༌ ཁོང༌གུན༌ནི༌ ཕ༌མེས༌པོ༌ ཨབ༌ར༌ཧམ༌མི༌ མེལ༌ཀ༌ཟེ༌དེག༌ག༌ རྕུ༌ཁག༌ཅིག༌ ཕུལས༌། 10 ཅིའ༌ཟེར༌ན༌ མེལ༌ཀ༌ཟེ༌དེག༌ ཨབ༌ར༌ཧམ༌མ༌ ཐུག༌ ཟ༌ནེ༌, ལི༌ཝི༌པ༌གུན༌ མ༌སྐྱེའ༌ ཨིན༌པིན༌, ཨིན༌ནའང༌ ཁོང༌གུན༌ནི༌ ཕ༌མེས༌པོ༌, ཨབ༌ར༌ཧམ༌མི༌ ཁྲག༌གི༌ ནང༌ང༌ ཁོང༌གུན༌ ཡོད༌ཏེ༌ ཨིན༌པིན༌།

11 གལ༌ཏེས༌ ཁྲིམས༌སི༌ མག༌ལྡན༌ ཨིན༌ཁན༌ནི༌ ལི༌ཝི༌པའེ༌ པུར༌གྱུད༌ བླ༌མའེ༌ ལས༌གུན༌ གྱུད༌ཏེ༌, དཀོན༌མཆོག༌གི༌ དུན༌ལ༌ ཁྲངས༌པོ༌ གྱུར༌ཐུབ༌བད༌པིན༌ན༌, ཏེ༌ནེ༌ ཅི༌ཕིའ༌ དཀོན༌མཆོག༌ག༌ ཡང༌ སོ༌སོ༌ བླ༌མའེ༌ རིག༌ཤིག༌ ཙུག༌ག༌ ཛད༌གོས༌, ཀ༌ བླ༌མ༌བོ༌ ཨ༌རོན༌ནི༌ གྱུད༌ནེ༌ མན༌པ༌ མེལ༌ཀ༌ཟེ༌དེག༌ ཙོགས༌ ཨིན༌པིན༌།

12 ཏ༌ ནམ༌ བླ༌མའེ༌ གྱུད༌བོ༌ གྱུར༌ན༌ ཏེ༌ནེ༌ ཁྲིམས༌སི༌ ནང༌ངའང༌ གྱུར༌ཇ༌ ཡོང༌གོས༌། 13 ངའེ༌ སྤེ༌ར༌ ཏང༌ཁན༌ནི༌ བླ༌མ༌བོ༌ ལི༌ཝི༌ པུར༌གྱུད༌ནེ༌ མན༌པ༌, ཞན༌ཡང༌ པུར༌གྱུད༌ཤིག༌ནེ༌ ཨིན༌ནོག༌, ཀ༌གུན༌ནི༌ ཆོད༌ཁྲི༌ཀ༌ མ༌ནེ༌ ཞབ༌སྟོག༌ མ༌ཞུའ༌ ཨིན༌པིན༌། 14 ངའེ༌ ཟེར༌ཅེས༌སི༌ ཏོན༌བོ༌ ནི༌, ང༌དང༌གུན༌ནི༌ གཙོ༌བོ༌ ཡེ༌ཤུ༌ ཡ༌ཧུ༌དཱའེ༌ པུར༌གྱུད༌ནེ༌ སྐྱོད༌ད༌ ཛད༌ཏེ༌ ཨིན༌ནོག༌། ཡང༌ མོ༌ཟེས༌སི༌, ཏེ༌ པུར༌གྱུད༌ནེ༌ བླ༌མ༌ སྐྱོད༌ཁན༌ནི༌ སྐོར༌ལ༌ མ༌ནེ༌ མོལ༌ལ༌ ཛད༌ཏེ༌ མི༌དུག༌།

15 མེལ༌ཀ༌ཟེ༌དེག༌ ཙོགས༌ལ༌ བླ༌མ༌ སོ༌སོ༌ཞིག༌ བྱུང༌ཅེས༌པོའེ༌, འི༌ གྱུར༌ཇ༌བོ༌ མ༌ སལ༌པོ༌ སོང༌ཏེ༌ ཨིན༌ནོག༌། 16 ཁྲིམས༌ ནང༌ཞིན༌ ལི༌ཝིའི༌ པུར༌གྱུད༌ནེ༌ ཡིན༌ཅེས༌པོའེ༌, གཙོ༌བོ༌ ཡེ༌ཤུ༌ བླ༌མ༌ གྱུར༌ར༌ མ༌ཛདས༌, ཨིན༌ནའང༌ མ༌ནེ༌ ཤིག༌ མི༌ཉན༌ཅེས༌སི༌ ཁྱུད༌ཅན༌ མི༌ཚེའེ༌ ཞས༌ཏེ༌, ཁོང༌ བླ༌མ༌ གྱུར༌ར༌ ཛདས༌། 17 དམ༌པའེ༌ སུང༌རབས༌སི༌ ནང༌ང༌ ཁོང༌ངི༌ སྐོར༌ལ༌, "མེལ༌ཀ༌ཟེ༌དེག༌ ཙོགས༌ལ༌ ཉེ༌རང༌ ཏུས༌གྱུན༌ནི༌ ཕིའ༌ བླ༌མ༌ ཨིན༌" མོལ༌ཏེ༌ ཡོད༌ཏེ༌ ཨིན༌ནོག༌། *7:17 སུང༌གུར༌རི༌ སྤེ༌ཆའེ༌ 110:4

18 འོ༌ན༌, བླ༌མ༌ གྱུར༌ཅེས༌ལ༌, སྔུན༌མའེ༌ སྒོས༌དོམ༌གུན༌ ཐེན༌ཏེ༌ མེད༌ཏེ༌ ཨིན༌ནོག༌, ཅིའ༌ཟེར༌ན༌ ཏེ༌བོ༌ འུ༌ཐུགས༌ དང༌ ཕན༌མི༌ཐོགས༌ ཡོད༌པིན༌། 19 ཁྲིམས༌སི༌ ཅི༌ཞིག༌གའང༌ ཕུན༌སུམ༌ཚོགས༌པ༌ ཅོ༌ མ༌ཉན༌། ཨིན༌ནའང༌ ཏ༌ དག༌ས༌ ང༌དང༌གུན༌ལ༌ སྔུན༌ནི༌ སང༌ རེ༌ཝ༌ མང༌ང༌ ཀྲག༌པོ༌ཞིག༌ ཡོད༌ཏེ༌ ཨིན༌ནོག༌, ཀ༌བོའེ༌ ང༌དང༌གུན༌ དཀོན༌མཆོག༌ དང༌ ཉེ༌མོའ༌ ཁྱེར༌ར༌ནོག༌།

20 དཀོན༌མཆོག༌གི༌ ནའ༌ ཁུར༌ར༌ ཛད༌ཏེ༌ འི༌བོ༌ སྟན༌པོ༌ ཛདས༌། ཨ༌རོན༌ནི༌ པུར༌གྱུད༌ ཏེ༌ཙོགས༌སི༌ ནའ༌ མ༌ཁུར༌ར༌ བླ༌མ༌ གྱུར༌ཏེ༌ ཨིན༌ནོག༌། 21 ཨིན༌ནའང༌ ཡེ༌ཤུ༌ ནའ༌ ཉམ༌པོ༌ བླ༌མ༌ གྱུར༌ར༌ ཛདས༌, ནམ༌ ཁོང༌ང༌ དཀོན༌མཆོག༌གི༌ མོལས༌,

23 སྔུན༌མའེ༌ ཚིར༌ཀའེ༌ ནང༌ང༌, བླ༌མ༌ མང༌པོ༌ཞིག༌ ཡོད༌ཏེ༌ ཨིན༌ནོག༌, ཅིའ༌ཟེར༌ན༌ ཤི༌ཅེས༌པོའེ༌ ཁོང༌གུན༌ལ༌ བླ༌མའེ༌ ལས༌པོ༌ ཏུས༌གྱུན༌ནི༌ ཕིའ༌ ཅོ༌ མ༌ཉན༌། 24 ཨིན༌ནའང༌ ཡེ༌ཤུ༌ ཏུས༌གྱུན༌ སོན༌ཏེའ༌ ལུས༌ པ༌སང༌, ཁོང༌ངི༌ བླ༌མའེ༌ ཆག༌ལས༌པོ༌ ཏུས༌གྱུན༌ ལུས༌ས༌ ཛད༌ཨིན༌། 25 ཏེ༌བོའེ༌ཕིའ༌ ཁོང༌ གྱུད༌ཏེ༌, དཀོན༌མཆོག༌གི༌ཀ༌ ཡོང༌ཁན༌གུན༌ ཁོང༌ངི༌ ཏུས༌གྱུན༌ནི༌ ཕིའ༌ སྐྱོབ༌ ཐུབ༌ཨིན༌། ཏེ༌ མི༌གུན༌ནི༌ ཕིའ༌ དཀོན༌མཆོག༌ག༌ ཞུ༌ཝ༌ ཕུལ༌ཅེས༌ལ༌, ཁོང༌ ཏུས༌གྱུན༌ ཞུགས༌ས༌ ཛད༌ད༌ནོག༌།

26 ཏེ༌ཙོགས༌སི༌ བླ༌མ༌ ཆེན༌མོའེ༌ ང༌དང༌ངི༌ སྒོས༌དོམ༌གུན༌ གྲུབ༌ ཅུག༌ག༌ནོག༌། ཁོང༌ ནི༌, དམ༌པ༌, སྐྱོན༌མེད༌, རྩང༌མ༌, སྡིག༌ཅན༌གུན༌ནེ༌ སོ༌སོ༌ ཕེའ༌ ཛད༌ཁན༌ དང༌ ནམ༌ཁའེ༌ ནང༌ང༌ རྩི༌ཝ༌ ཆེ༌ཤོག༌ཅན༌ནི༌ ཀོ༌ས༌ ཐོབ༌བ༌ ཛད༌ཁན༌བོ༌ ཞུགས༌ཏེ༌ ཨིན༌ནོག༌། 27 ཞན༌ བླ༌མ༌ ཆེན༌མོ༌གུན༌ ཙོགས༌ལ༌ ཁོང༌ང༌ གོ༌མ༌ ཁོ༌རང༌ངི༌ སྡིག༌པ༌, ཡང༌ ཏེ༌ནེ༌ ཞན༌མི༌གུན༌ནི༌ སྡིག༌པའེ༌ ཕིའ༌, ཞག༌ཏང༌ སྲོག༌གི༌ ཆོད༌པ༌ ཕུལ༌གོས༌ མེད༌པ༌ ཨིན༌ནོག༌། ཅིའ༌ཟེར༌ན༌ ཡེ༌ཤུའི༌ ཁོང༌རང༌ ལན༌ཅིག༌ མི༌ཚང༌མའེ༌ ཕིའ༌ སྲོག༌གི༌ ཆོད༌པ༌ ཕུལ༌ལ༌ ཛདས༌། 28 ཁྲིམས༌སི༌ འུ༌ཐུགས༌ཅན༌ནི༌ བླ༌མ༌ ཆེན༌མོ༌གུན༌ སྐོའ༌ནོག༌། ཨིན༌ནའང༌ ཁྲིམས༌སི༌ སྟིང༌ནེ༌ དཀོན༌མཆོག༌གི༌ ནའ༌ ཉམ༌པོ༌ ཁོང༌རང༌ངི༌ སྲས༌ ལྡམ༌མ༌ ཛདས༌, ཡང༌ ཁོང༌ངི༌ སྲས༌པོ༌ ཕུན༌སུམ༌ཚོགས༌པའེ༌ བླ༌མ༌ ཆེན༌མོ༌ ཏུས༌གྱུན༌ནི༌ ཕིའ༌ ཅོའ༌ ཛདས༌།