8
ལོག༌ཡེམ༌ ཅོ༌ཁན༌ནི༌ བུ༌མོ༌།
8:1 ནེ༌ 11
1 ཏེ༌ནེ༌ གཙོ༌བོ༌ ཡེ༌ཤུ༌ ཨོ༌ལིཝ༌ཝི༌ རི༌ ཟེརས༌སའེ༌ ནས༌ས༌ སྐྱོད༌ཏེ༌ ཞུགས༌ས༌ ཛདས༌, 2 ནམ༌ལངས༌ས༌ཅིག༌ ཁོང༌ ལོགས༌ཏེ༌ ཆོད༌ཁང༌ང༌ སྐྱོདས༌། མི༌ཚང༌མ༌ ཁོང༌ ཡོད༌ས༌ ཛོམས༌, ཡེ༌ཤུ༌ མི༌ཚོགས༌ལ༌ ལབ༌ཞ༌ སལ༌ཅེས༌ལ༌ སའེ༌ཀ༌ ཞུགས༌། 3 ཏེན༌ན༌ ཏུས༌ལ༌ ཆོས༌ཁྲིམས༌ལ༌ ཁས༌པ༌གུན༌ དང༌ ཕ༌རུ༌ཤི༌པ༌གུན༌ནི༌ བུ༌མོ༌ཞིག༌ ཁྱོངས༌ ཀ༌བོ༌ ཁོ༌རང༌ངི༌ ཞིད༌མད༌ མན༌པ༌ ཡང༌ མི༌ཞིག༌ ཉམ༌པོ༌ ལུས༌བྲེལ༌ ཅོ༌ཨིན༌ ཟུམས༌ཏེ༌ ཨིན༌པིན༌, ཡང༌ ཁོའ༌ མི༌ཚོགས༌སི༌ དུན༌ལ༌ ལང༌ཅུགས༌།
4 ཁོང༌གུན༌ནི༌ ཡེ༌ཤུའ༌ ཟེརས༌, "ལོབ༌པོན༌ལེ༌, འི༌ བུ༌མོ༌བོ༌ ལོག༌ཡེམ༌ ཅོ༌ཨིན༌ ཟུམས༌པིན༌། 5 མོ༌ཟེས༌སི༌ ཁྲིམས༌ ནང༌ཞིན༌ལ༌, འི༌ཙོགས༌སི༌ བུ༌མོའ༌ རྡོའ༌ གྱབས༌ཏེ༌ སད༌ཅེས༌སི༌ ང༌དང༌ང༌ བཀའ༌ ཡོད༌, ཨིན༌ནའང༌ ཉེ༌རང༌ངི༌ ཅི༌ མོལ༌ལད༌?"
6 ཁོང༌གུན༌ནི༌ འི༌ ཏྲི༌ཝ༌བོ༌ ཡེ༌ཤུའ༌ བཀའ༌ཁྲིམས༌ནེ༌ གལ༌ཅེས༌སི༌ ཉད༌གལ༌ ཀལ༌ཅེས༌ལ༌ ཏྲིས༌།
ཨིན༌ནའང༌ ཡེ༌ཤུའི༌ ཨུ༌ སྒུས༌ཏེ༌ ཛི༌གུ༌ ཉམ༌པོ༌ སའེ༌ཀ༌ བྲིའ༌ ཛད༌ཅེས༌ གོ༌ཟུག༌། 7 ཁོང༌གུན༌ནི༌ ཡང༌ དང༌ ཡང༌ ཁོང༌ང༌ ཏྲི༌ཨིན༌ དུགས༌པ༌ ཁོང༌ངི༌ ཨུ༌ སྟགས༌ཏེ༌ ཁོང༌གུན༌ལ༌ མོལས༌, "ཁྱོ༌ཞའེ༌ ཕྲོ༌ནེ༌ དག༌ས༌ ཚག༌པ༌ སྡིག༌པ༌ མ༌ནེ༌ མ༌ཅོའ༌ ཡོད༌ཁན༌བོའ༌ གོ༌མ༌ འི༌ བུ༌མོ༌བོའ༌ རྡོའ༌ གྱབ༌ཅུག༌།" 8 ཡང༌སྐྱར༌ ཁོང༌ངི༌ ཨུ༌ སྒུས༌ཏེ༌ སའེ༌ཀ༌ བྲིའ༌ ཛདས༌།
9 ཏེ༌བོ༌ ཚོར༌ར༌ཅིག༌, ཏྲི༌ཝ༌ ཏྲི༌ཁན༌གུན༌ རེ༌རེ༌ ཅོས༌ཏེ༌ ཏེ༌ཀ༌ནེ༌ སོང༌, རྒད༌པོ༌གུན༌ནེ༌ གོ༌ཟུགས༌ཏེ༌ ཏེ༌ཏེ༌ཚོག༌པ༌ ནམ༌ ཡེ༌ཤུ༌ ཅིག༌པོ༌ མ༌ནེ༌ ལངས༌ཏེ༌ ཡོད༌ཁན༌ནི༌ བུ༌མོ༌ ཡོད༌ས༌ མ༌ལུས༌། 10 ཡེ༌ཤུ༌ ཞངས༌ཏེ༌ ཁོའ༌ མོལས༌, "བུ༌མོ༌, ཁོང༌ ཚང༌མ༌ ཀ༌རུ༌ སོང༌? སུ༌ཞིག༌གིའང༌ ཁྱོ༌རང༌ང༌ སྲོག༌གི༌ ཉེས༌ཆད༌ མ༌ཀལ༌ས༌?"
11 ཁོའེ༌ ཟེརས༌, "གཙོ༌བོ༌ལེ༌, སུ༌ཞིག༌གིའང༌ ཅའང༌ མ༌ཅོས༌།"
ཏེ༌ནེ༌ ཡེ༌ཤུའི༌ མོལས༌, "ངེའང༌ སྐྱོན༌ མི༌ཀལ༌། སོང༌, ཏ༌ནེ༌ཕར༌ལ༌ སྡིག༌པ༌ མ༌ཅོ༌"༽།
སྐྱབ༌གོན༌ ཡེ༌ཤུ༌ ནི༌ ཇིག༌རྟེན༌ནི༌ འོད༌།
8:12 ནེ༌ 30
12 གཙོ༌བོ༌ ཡེ༌ཤུའི༌ མི༌གུན༌ལ༌ ལབ༌ཞ༌ སལ༌ཨིན༌ མོལས༌, "ང༌ ནི༌ ཇིག༌རྟེན༌པ༌གུན༌ནི༌ ཕིའ༌ འོད༌ ཨིན༌། ངའེ༌ སྟིང༌རང༌ནེ༌ བྲངས༌ཁན༌གུན༌ མུན༌གྲིག༌གི༌ ནང༌ང༌ མི༌གྲུལ༌, ཅིའ༌ཟེར༌ན༌ ཐའ༌མེད༌པའེ༌ མི༌ཚེའེ༌ ཆོགས༌ལ༌ ཁྲིད༌ཁན༌ནི༌ འོད༌ ཁོང༌གུན༌ནི༌ ནང༌ང༌ ཡོད༌ཏེ༌ ཨིན༌ནོག༌།"
13 ཏེ༌བོ༌ ཚོར༌ར༌ཅིག༌ ཕ༌རུ༌ཤི༌པ༌གུན༌ནི༌ ཡེ༌ཤུའ༌ ཟེརས༌, "ཁྱོ༌རང༌ངི༌ རང༌ངི༌ ཕིའ༌ སྤང༌པོ༌ ཏངས༌པ༌ ཁྲིམས༌ ནང༌ཞིན༌ ཁྱོ༌རང༌ངི༌ སྤང༌པོ༌བོ༌ རིན༌མེད༌ ཐེའ༌ནོག༌།"
14 ཡེ༌ཤུའི༌ ཁོང༌གུན༌ལ༌ ལན༌སལས༌, "ངའེ༌ ང༌རང༌ངི༌ སྐོར༌ལ༌ སྤང༌པོ༌ ཏང༌ངད༌ནའང༌ ངའེ༌ སྤང༌པོ༌བོ༌ རིན༌མེད༌ མན༌ ཅིའ༌ཟེར༌ན༌ ང༌ ཀ༌ནེ༌ ཡོངས༌ཏེ༌ ཨིན༌, ཡང༌ ཀ༌རུ༌ ཆ༌ཅེས༌ ཨིན༌ ང༌ གྱུས༌ཡོད༌། ཨིན༌ནའང༌ ཁྱོ༌ཞ༌གུན༌ལ༌ ཏེ༌གུན༌ གྱུས༌མེད༌། 15 ཁྱོ༌ཞ༌གུན༌ནི༌ མིའི༌ སམ༌ཚུལ༌ ནང༌ཞིན༌ ཤགས༌ ཅད༌དུག༌, ཨིན༌ནའང༌ ངའེ༌ སུའང༌ ཤགས༌ ཅད༌ད༌མེད༌། 16 གལ༌ཏེས༌ ཁྲིམས༌ཅད༌ན༌ ངའེ༌ ཁྲིམས༌ཅད༌པོ༌ དྲང༌པོ༌ ཡོང༌ཨིན༌ ཅིའ༌ཟེར༌ན༌ ཁྲིམས༌ཅད༌ ཟ༌ནེ༌ ང༌ ཅིག༌པོ༌ མེད༌, ང༌ ཀལ༌ལ༌ ཛད༌ཁན༌ནི༌ ཡབ༌ ང༌ ཉམ༌པོ༌ ཡོད༌། 17 ཁྱོ༌ཞའེ༌ ཁྲིམས༌སི༌ ནང༌ང༌ བྲིའ༌ ཛད༌ཏེ༌ དུག༌ 'མི༌ ཉིས༌སི༌ སྤང༌པོ༌ ཏང༌ན༌, སྐྱོན༌བོ༌ དེན༌བ༌ ཐེན༌' 18 ངའེ༌ ང༌རང༌ངི༌ ཕིའ༌ སྤང༌པོ༌ ཏང༌ངད༌, ཡང༌ ངའེ༌ སྤང༌པོ༌ ཉིས༌པ༌ ནི༌ ང༌ ཀལ༌ལ༌ ཛད༌ཁན༌ནི༌ ཡབ༌ ཨིན༌།"
19 ཏེ༌ནེ༌ ཕ༌རུ༌ཤི༌པ༌གུན༌ནི༌ ཡེ༌ཤུའ༌ ཏྲིས༌, "ཁྱོ༌རང༌ངི༌ ཡབ༌ ཀ༌རེ༌?"
ཡེ༌ཤུའི༌ ལན༌སལས༌, "ཁྱོ༌ཞ༌གུན༌ནི༌ ང༌ མ༌ཤེས༌ ཡ༌ ངའེ༌ ཡབ༌བའང༌། གལ༌ཏེས༌ ཁྱོ༌ཞའེ༌ ང༌ ཤེས༌པིན༌ན༌ ངའེ༌ ཡབ༌བའང༌ ཤེས༌ཏེ༌ ཡོད༌གྲོ༌།" 20 ཆོད༌ཁང༌ངི༌ བུལ༌ལྡུས༌ ཕུལ༌སའེ༌ སྒམ༌མི༌ དུན༌ལ༌ ལབ༌ཞ༌ སལ༌ཏུས༌ ཁོང༌ངི༌ ཏེ༌ སྤེ༌ར༌གུན༌ མོལ༌ལ༌ ཛདས༌། ཨིན༌ནའང༌ སུ༌ཞིག༌གིའང༌ ཁོང༌ མ༌ཟུམས༌ ཅིའ༌ཟེར༌ན༌ ཁོང༌ངི༌ ཏུས༌པོ༌ ཏ༌རུང༌ མ༌ལེབ༌བ༌ ཨིན༌པིན༌།
21 ཡེ༌ཤུའི༌ ཡང༌སྐྱར༌ ཁོང༌གུན༌ལ༌ མོལས༌, "ང༌ ཆའད༌, ཁྱོ༌ཞའེ༌ ང༌ ཙལ༌ཨིན༌, ཨིན༌ནའང༌ ཁྱོ༌ཞའ༌ ཁྱོ༌ཞའེ༌ སྡིག༌པའེ༌ ནང༌ང༌ ཤི༌ཨིན༌། ཀ༌རུ༌ ང༌ ཆའད༌ ཁྱོ༌ཞ༌ ཏེ༌རུ༌ ཡོང༌ མི༌ཉན༌།"
22 ཡ༌ཧུ༌དཱ༌པའེ༌ འུ༌སྐྱོང༌གུན༌ནི༌ ཟེརས༌, "ཅི༌ ཁོའེ༌ ཁོ༌རང༌ སད༌ཅེས༌ ཨིན༌ནོག༌ག༌? ཏེ༌བོའེ༌ཕིའ༌ ཁོའེ༌ 'ཀ༌རུ༌ ང༌ ཆའད༌ ཁྱོ༌ཞའ༌ ཡོང༌ མི༌ཉན༌' ཟེར༌ཏེ༌ ཨིན༌ནོག༌ག༌?"
23 ཡེ༌ཤུའི༌ ཏ༌རུང༌ངའང༌ མོལས༌, "ཁྱོ༌ཞ༌གུན༌ ཡོག༌ནེ༌ ཨིན༌ནོག༌, ཡང༌ ང༌ སྟག༌ནེ༌ ཨིན༌། ཁྱོ༌ཞ༌གུན༌ འི༌ ཇིག༌རྟེན༌ནེ༌ ཨིན༌ནོག༌, ང༌ འི༌ ཇིག༌རྟེན༌ནེ༌ མན༌། 24 ངའེ༌ ཁྱོ༌ཞ༌གུན༌ལ༌ ཟེར༌པིན༌, ཁྱོ༌ཞའ༌ ཁྱོ༌ཞའེ༌ སྡིག༌པའེ༌ ནང༌ང༌ ཤི༌ཨིན༌། གལ༌ཏེས༌ ཁྱོ༌ཞའེ༌ ང༌ ཏེན༌ན༌བོ༌ ཨིན༌ ཟེར༌ཁན༌བོའ༌ དེན༌ མ༌ཤེས༌ན༌, ཁྱོ༌ཞའ༌ ཁྱོ༌ཞའེ༌ སྡིག༌པའེ༌ ནང༌ང༌ ཤི༌ཨིན༌།"
25 ཁོང༌གུན༌ནི༌ ཏྲིས༌, "ཁྱོ༌རང༌ སུ༌ ཨིན༌?"
ཡེ༌ཤུའི༌ མོལས༌, "ང༌ ཏེན༌ན༌བོ༌ ཨིན༌ ཀ༌ཟུག༌ གོ༌མ༌ནེ༌ ཕར༌ལ༌ ངའེ༌ ཁྱོ༌ཞ༌གུན༌ལ༌ ཟེར༌རད༌པིན༌། 26 ཁྱོ༌ཞའེ༌ སྐོར༌ལ༌ ང༌ ཟེར༌རྒྱུ༌ དང༌ ཤགས༌ ཅོ༌རྒྱུ༌ མང༌པོ༌ ཡོད༌, ཨིན༌ནའང༌ ངའེ༌ མི༌ཅོ༌། ངའེ༌ ང༌ ཀལ༌ལ༌ ཛད༌ཁན༌ནི༌ ཀ༌ནེ༌ ཚོར༌ཁན༌གུན༌ ཇིག༌རྟེན༌པ༌གུན༌ལ༌ ཤད༌དད༌ ཡང༌ ཁོང༌ ནི༌ ཨིད༌ཤེས༌ཅན༌ ཞུགས༌ཏེ༌ ཨིན༌།" 27 ཁོང༌ངི༌ དཀོན༌མཆོག༌ ཡབ༌བི༌ སྐོར༌ལ༌ མོལ༌ཁན༌བོ༌ འུ༌སྐྱོང༌གུན༌ནི༌ ཧ༌ མ༌གོ༌།
28 ཏེ༌ནེ༌ ཡེ༌ཤུའི༌ མོལས༌, "ཁྱོ༌ཞའེ༌ མི༌རིགས༌སི༌བུ༌ རྐྱང༌ཤིང༌ངི༌ཀ༌ སྟག༌ ཟ༌ནེ༌, ཁྱོ༌ཞ༌གུན༌ལ༌ ང༌ ཏེན༌ན༌བོ༌ ཨིན༌ཁན༌ གྱུས༌ཆེན༌། ངའེ༌ ང༌རང༌ངི༌ ཅའང༌ ཅོའ༌མེད༌, ཨིན༌ནའང༌ ཡབ༌བི༌ ང༌ ལབ༌བ༌ ཛད༌ཁན༌བོ༌ ཟེར༌རད༌། 29 ཡང༌ ང༌ ཀལ༌ལ༌ ཛད༌ཁན༌བོ༌ ང༌ ཉམ༌པོ༌ ཡོད༌, ཁོང༌ངི༌ ང༌ ཅིག༌པོ༌ ཕངས༌ཏེ༌ བོར༌ར༌ མ༌ཛདས༌ ཅིའ༌ཞུ༌ན༌ ངའེ༌ ཏུས༌གྱུན༌ ཁོང༌ ཐུགས༌ཐད༌ཁན༌བོ༌ ཅོའད༌།" 30 ཡེ༌ཤུའི༌ ཏེ༌ ཞལ༌ཏ༌གུན༌ མོལ༌ཨིན༌ ཡོད༌ ཟ༌ནེ༌ མི༌ མང༌པོའེ༌ ཁོང༌ངི༌ཀ༌ ཏད༌པ༌ ཅོས༌།
ཨབ༌ར༌ཧམ༌ ཡ༌ རྡུད༌གུན༌ནི༌ གོ༌བའེ༌ པུར༌གྱུད༌།
8:31 ནེ༌ 47
31 གཙོ༌བོ༌ ཡེ༌ཤུའི༌ ཁོང༌ངི༌ཀ༌ ཏད༌པ༌ ཁྱོང༌ཁན༌ནི༌ ཡ༌ཧུ༌དཱ༌པ༌གུན༌ལ༌ མོལས༌, "གལ༌ཏེས༌ ཁྱོ༌ཞ༌ ངའེ༌ ལབ༌ཞ༌གུན༌ནི༌ཀ༌ སྟན༌པོ༌ དུག༌ན༌, ཁྱོ༌ཞའ༌ ངའེ༌ དེན༌བའེ༌ ལོབ༌ཕྲུགས༌གུན༌ ཨིན༌། 32 ཏེ༌ནེ༌ ཁྱོ༌ཞའ༌ དཀོན༌མཆོག༌གི༌ དེན༌བ༌བོ༌ ཧ༌གོ༌ ཐུབ༌ཨིན༌ ཡང༌ ཏེན༌ན༌ དེན༌བ༌བོའེ༌ ཁྱོ༌ཞའ༌ རང༌ཝང༌ ཏང༌ཨིན༌།"
33 ཁོང༌གུན༌ནི༌ ལན༌ཏངས༌, "ང༌ཞའ༌ ཨབ༌ར༌ཧམ༌མི༌ པུར༌གྱུད༌ ཨིན༌ ཡང༌ མ༌ནེ༌ ཚེ༌ཡོག༌ག༌ མ༌ལུས༌ས༌ ཨིན༌པིན༌། ཉེ༌རང༌ངི༌ ང༌ཞའ༌ རང༌ཝང༌ ཐོབ༌ཨིན༌ ཟེར༌ཅེས༌སི༌ ཏོན༌བོ༌ ཅི༌ ཨིན༌།"
34 ཡེ༌ཤུའི༌ ཁོང༌གུན༌ལ༌ མོལས༌, "ངའེ༌ ཁྱོ༌ཞའ༌ དེན༌བ༌ དེན༌བ༌ ཟེར༌རད༌, སྡིག༌པ༌ ཅོ༌ཁན༌ ཚང༌མ༌ སྡིག༌པའེ༌ ཚེ༌ཡོག༌ ཨིན༌ནོག༌། 35 ཡང༌ ཚེ༌ཡོག༌ སྤོན༌བོའེ༌ ནང༌མི༌ མ༌ནེ༌ མི༌གྱུར༌, ཨིན༌ནའང༌ བུ༌ཚ༌ ཏུས༌གྱུན༌ ནང༌ཚངས༌སི༌ ཁག༌ཞིག༌ ཨིན༌ནོག༌། 36 གལ༌ཏེས༌ སྲས༌སི༌ ཁྱོ༌ཞ༌གུན༌ལ༌ རང༌ཝང༌ ཏང༌ན༌ ཁྱོ༌ཞ༌གུན༌ལ༌ དེན༌བའ༌ རང༌ཝང༌ ཐོབ༌ཨིན༌། 37 ཁྱོ༌ཞའ༌ ཨབ༌ར༌ཧམ༌མི༌ པུར༌གྱུད༌ ཨིན༌ཁན༌བོ༌ ངའེ༌ ཤེས༌སད༌, ཏེ༌ནེའང༌ ཁྱོ༌ཞའེ༌ ང༌ སད༌ཅེས༌སི༌ རྩོན༌གྲུས༌ ཅོ༌རུག༌ ཅིའ༌ཟེར༌ན༌ ཁྱོ༌ཞ༌གུན༌ནི༌ སེམས༌སི༌ ནང༌ང༌ ངའེ༌ ལབ༌ཞའེ༌ ཕིའ༌ ནས༌ས༌ མེད༌ཏེ༌ ཨིན༌ནོག༌། 38 ཡབ༌བི༌ དུན༌ལ༌ ཡོད༌ ཟ༌ནེ༌ ཐོང༌ཁན༌གུན༌ ངའེ༌ ཁྱོ༌ཞའ༌ ཤད༌དད༌, ཨིན༌ནའང༌ ཁྱོ༌ཞ༌གུན༌ནི༌ ཁྱོ༌ཞའེ༌ ཨ༌བའེ༌ ཀ༌ནེ༌ ཚོར༌ཁན༌གུན༌ ཅོའ༌ནོག༌།"
39 ཁོང༌གུན༌ནི༌ ལན༌ཏངས༌, "ང༌ཞའེ༌ ཨ༌བ༌ ཨབ༌ར༌ཧམ༌ ཨིན༌།"
ཡེ༌ཤུའི༌ ཁོང༌གུན༌ལ༌ མོལས༌, "གལ༌ཏེས༌ ཁྱོ༌ཞ༌གུན༌ ཨབ༌ར༌ཧམ༌མི༌ པུར༌གྱུད༌ ཨིན༌པིན༌ན༌ ཁྱོ༌ཞེའང༌ ཨབ༌ར༌ཧམ༌ ཙོགས༌སི༌ ལས༌གུན༌ ཅོའད༌གྲོ༌། 40 ངའེ༌ ཁྱོ༌ཞ༌གུན༌ལ༌ དཀོན༌མཆོག༌ནེ༌ ཚོར༌ཁན༌ནི༌ དྲང༌པོའེ༌ སྤེ༌ར༌གུན༌ ཤད༌ པ༌སང༌, ཁྱོ༌ཞའེ༌ ང༌ སད༌ཅེས༌སི༌ རྩོན༌གྲུས༌ ཅོ༌རུག༌། ཨབ༌ར༌ཧམ༌མི༌ ཏེ༌ཟུག༌ མ༌ནེ༌ མ༌ཅོས༌། 41 ཁྱོ༌ཞའེ༌ ཨ༌བའེ༌ ཅོ༌ཁན༌ནི༌ ལས༌གུན༌ ཁྱོ༌ཞའེ༌ ཅོའ༌ནོག༌།"
ཁོང༌གུན༌ནི༌ ཡེ༌ཤུའ༌ ཟེརས༌, "ང༌ཞ༌གུན༌ ན༌ལུ༌ མན༌, དཀོན༌མཆོག༌ ཁོང༌རང༌ཙ༌ ང༌ཞའེ༌ ཡབ༌ ཨིན༌།"
42 ཡེ༌ཤུའི༌ ཁོང༌གུན༌ལ༌ མོལས༌, "གལ༌ཏེས༌ ཁྱོ༌ཞ༌གུན༌ནི༌ ཡབ༌, དཀོན༌མཆོག༌ ཨིན༌པིན༌ན༌, ཁྱོ༌ཞའེ༌ ང༌ ཅམས༌པ༌ ཅོའད༌གྲོ༌, ཅིའ༌ཟེར༌ན༌ ང༌ དཀོན༌མཆོག༌ནེ༌ ཡོངས༌ཏེ༌ དག༌ས༌ འི༌ཀ༌ ཡོད༌། ང༌ འི༌ཀ༌ ང༌རང༌ངི༌ ཝང༌ཆའེ༌ ནང༌ང༌ ཡོངས༌ཏེ༌ མན༌, ཁོང༌ངི༌ ང༌ ཀལ༌ལ༌ ཛད༌ཏེ༌ ཨིན༌། 43 ཅིའ༌, ཁྱོ༌ཞའ༌ ངའེ༌ སྤེ༌ར༌གུན༌ ཧ༌ མ༌གོ༌ ཨིན༌ནོག༌? ཅིའ༌ཟེར༌ན༌ ཁྱོ༌ཞའ༌ ངའེ༌ ལབ༌ཞ༌གུན༌ལ༌ ཏད༌པ༌ ཅོའ༌ལ༌ ཐད༌ད༌ མ༌ནོག༌། 44 ཁྱོ༌ཞ༌གུན༌ནི༌ ཨ༌བ༌ ནི༌ རྡུད༌གུན༌ནི༌ གོ༌བ༌ ཨིན༌ནོག༌, ཡང༌ ཁྱོ༌ཞའ༌ ཁྱོ༌ཞའེ༌ ཨ༌བའེ༌ དོད༌པ༌ ནང༌ཞིན༌ ལས༌གུན༌ ཅོའ༌ ཐད༌ད༌ནོག༌། ཁོ༌ ཇིག༌རྟེན༌ ཆགས༌པ༌ནེ༌ ཕར༌ལ༌ མི༌སད༌ཞིག༌ ཨིན༌, ཡང༌ དཀོན༌མཆོག༌གི༌ དེན༌བའེ༌ ལབ༌ཞ༌གུན༌ལ༌ ནཕ༌རད༌ ཅོའ༌ནོག༌, ཁོའེ༌ ནང༌ང༌ དྲང༌པོ༌ ཅའང༌ མེད༌ཏེ༌ ཨིན༌ནོག༌། ཁོའེ༌ ཟུན༌ ཏང༌ ཟ༌ནེ༌ ཁོ༌རང༌ངི༌ སྐད༌ ཏངས༌ཏེ༌ ཨིན༌ནོག༌ ཅིའ༌ཟེར༌ན༌ ཁོ༌ ཟུན༌ཇན༌ ཡང༌ ཟུན༌གུན༌ནི༌ ཨ༌བ༌ ཨིན༌ནོག༌། 45 ཨིན༌ནའང༌ ངའེ༌ དཀོན༌མཆོག༌གི༌ དེན༌བའེ༌ ལབ༌ཞ༌ ཤད༌ཅེས༌པོའེ༌ ཁྱོ༌ཞ༌གུན༌ནི༌ ངའེ༌ཀ༌ དེན༌ཤེས༌ས༌ མ༌ནོག༌། 46 ཁྱོ༌ཞའེ༌ ཕྲོ༌ནེ༌ སུའི༌ ང༌ སྡིག༌པའེ༌ ལས༌ ཅོས༌ཏེ༌ ནོངས༌ཅན༌ ཨིན༌ཁན༌བོ༌ ལྟན༌ ཐུབ༌ཨིན༌? གལ༌ཏེས༌ དཀོན༌མཆོག༌གི༌ དེན༌བའེ༌ ལབ༌ཞ༌ ངའེ༌ ཁྱོ༌ཞའ༌ ཤད༌དད༌ན༌, ཏེ༌ནེ༌ ཁྱོ༌ཞ༌གུན༌ནི༌ ངའེ༌ཀ༌ ཏད༌པ༌ ཅིའ༌ ཅོའ༌མེད༌? 47 དཀོན༌མཆོག༌གི༌ ཨིན༌ཁན༌གུན༌ནི༌ ཁོང༌ངི༌ མོལ༌ཁན༌ ཚང༌མ༌ ཉན༌ན༌ནོག༌, ཨིན༌ནའང༌ ཁྱོ༌ཞའེ༌ མི༌ཉན༌ཅེས༌སི༌ གྱུན༌ཚན༌བོ༌ ནི༌ ཁྱོ༌ཞ༌གུན༌ དཀོན༌མཆོག༌གི༌ མ༌ནོག༌།"
གཙོ༌བོ༌ ཡེ༌ཤུ༌ ཨབ༌ར༌ཧམ༌མི༌ སང༌ ཀྲག༌པོ༌།
8:48 ནེ༌ 59
48 ཡ༌ཧུ༌དཱ༌པ༌གུན༌ནི༌ ལན༌ཏངས༌, "ང༌ཞའེ༌ ཁྱོ༌རང༌ ས༌མར༌རི༌ཡཱ༌པ༌ ཡང༌ ཁྱོ༌རང༌ངི༌ ནང༌ང༌ རྡུད༌ ཞུགས༌ཏེ༌ ཨིན༌ནོག༌ ཟེར༌ཁན༌བོ༌ དེན༌བ༌ མ༌ནོག༌ག༌?
49 ཡེ༌ཤུའི༌ མོལས༌, "ངའེ༌ ནང༌ང༌ རྡུད༌ ཞུགས༌ཏེ༌ མེད༌། ངའེ༌ ང༌རང༌ངི༌ ཡབ༌བ༌ རྩི༌ཝ༌ ཅོའད༌, ཨིན༌ནའང༌ ཁྱོ༌ཞ༌གུན༌ནི༌ ང༌ རྩི༌ཝ༌ ཅོའ༌ མི༌དུག༌། 50 ངའེ༌ ང༌རང༌ང༌ རྩི༌ཝ༌ ཙལ༌ལ༌ མེད༌། འོ༌ན༌ ངའ༌ རྩི༌ཝ༌ ཙལ༌ལ༌ ཛད༌ཁན༌ཞིག༌ ཡོད༌ ཡང༌ ཁོང༌ ནི༌ ཁྲིམས༌ཅད༌ ཛད༌ཁན༌བོ༌ ཨིན༌། 51 ངའེ༌ ཁྱོ༌ཞའ༌ དེན༌བ༌ དེན༌བ༌ ཟེར༌རད༌, ངའེ༌ ལབ༌ཞ༌གུན༌ལ༌ ཁའ༌ ཉན༌ཁན༌གུན༌ མ༌ནེ༌ མི༌ཤི༌།"
52 ཁོང༌གུན༌ནི༌ ཁོང༌ང༌ ཟེརས༌, "ཏ༌ ང༌ཞའ༌ ཧ༌གོ༌ ཁྱོ༌རང༌ངི༌ ནང༌ང༌ རྡུད༌ ཞུགས༌ཏེ༌ ཡོད༌ཏེ༌ ཨིན༌ནོག༌། ཨབ༌ར༌ཧམ༌ ཀྲོངས༌ ཡང༌ ཏེན༌ན༌ ཙོགས༌ལ༌ ཞན༌ ལུང༌སྟོན༌པ༌གུན༌ནའང༌, ཨིན༌ནའང༌ ཁྱོ༌རང༌ངི༌ ཟེར༌ར༌ནོག༌ ཁྱོ༌རང༌ངི༌ ལབ༌ཞའ༌ ཁའ༌ ཉན༌ཁན༌གུན༌ མ༌ནེ༌ མི༌ཤི༌། 53 ཁྱོ༌རང༌ ཅི༌ ང༌ཞའེ༌ ཕ༌མེས༌པོ༌ ཨབ༌ར༌ཧམ༌མི༌ སང༌ ཇིགས༌པོ༌ ཨིན༌ན༌? ཁོང༌ ཀྲོངས༌ ཡང༌ ལུང༌སྟོན༌པ༌གུན༌ནའང༌, ཁྱོ༌རང༌ རང༌དང༌རང༌ སུ༌ ཨིན༌ སམ༌མ༌རག༌།"
54 ཡེ༌ཤུའི༌ མོལས༌, "གལ༌ཏེས༌ ངའེ༌ ང༌རང༌ང༌ རང༌སྟོད༌ ཏང༌ན༌ ཏེ༌ སྟོད༌པ༌བོ༌ ཏོན༌མེད༌ ཨིན༌ནོག༌། ངའེ༌ ཡབ༌བི༌ ངའ༌ སྤལ༌ སལ༌ཨིན༌, ཁྱོ༌ཞའེ༌ ཁོང༌ང༌ ཁྱོ༌ཞའ༌ རང༌ངི༌ དཀོན༌མཆོག༌ ཟེར༌དུག༌། 55 ཁྱོ༌ཞའེ༌ ཁོང༌ ཤེས༌ས༌ མ༌ནོག༌ ཨིན༌ནའང༌ ངའེ༌ ཁོང༌ ཤེས༌སད༌། གལ༌ཏེས༌ ངའེ༌ ཤེས༌ས༌མེད༌ ཟེར༌ན༌ ངའང༌ ཁྱོ༌ཞ༌གུན༌ ཙོགས༌ལ༌ ཟུན༌ཇན༌ གྱུར༌ཨིན༌། ཨིན༌ནའང༌ ངའེ༌ ཁོང༌ ཤེས༌སད༌ ཡང༌ ངའེ༌ ཁོང༌ངི༌ བཀའ༌ ཁའ༌ཉན༌ནད༌། 56 ཁྱོ༌ཞའེ༌ ཕ༌མེས༌པོ༌ ཨབ༌ར༌ཧམ༌མི༌ ངའེ༌ ཏུས༌པོ༌ ཐོང༌ཅེས༌སི༌ སྐོར༌ལ༌ སམ༌ ཟ༌ནེ༌ ཁོང༌ མ༌སྲན༌ཏྲེ༌ ཐད༌། ཁོང༌ངི༌ ཏེ༌བོ༌ ཐོང༌ ཡང༌ མ༌ ཐད༌པོ༌ སོང༌།"
57 ཡ༌ཧུ༌དཱ༌པ༌གུན༌ནི༌ ཡེ༌ཤུའ༌ ཟེརས༌, "ཁྱོ༌རང༌ངི༌ ལོ༌ ཏ༌རུང༌ ལྔབ༌ཅུའང༌ མ༌སོང༌, ཁྱོ༌རང༌ངི༌ ཨབ༌ར༌ཧམ༌ ཐོང༌ ཟེར༌ཏེ༌ ཀ༌ཟུག༌གི༌ ཟེར༌རད༌།"
58 ཡེ༌ཤུའི༌ ཁོང༌གུན༌ལ༌ མོལས༌, "ངའེ༌ ཁྱོ༌ཞའ༌ དེན༌བ༌ དེན༌བ༌ ཟེར༌རད༌, ང༌ ནི༌ ཨབ༌ར༌ཧམ༌ མ༌སྐྱེའེ༌ སང༌ སྔུན༌ལ༌ ཡོད༌པིན༌ *8:58 ཡ༌ཧུ༌དཱ༌པ༌གུན༌ནི༌ ཡེ༌ཤུའི༌, 'ང༌ ནི༌ ཨབ༌ར༌ཧམ༌ མ༌སྐྱེས༌སི༌ སང༌ སྔུན༌ལ༌ ཡོད༌པིན༌' ཟེར༌ཅེས༌པོ༌ ཡེ༌ཤུའི༌ ཁོང༌རང༌ དཀོན༌མཆོག༌ ཨིན༌ ཟེར༌ཁན༌བོ༌ ཧ༌གོའད༌པིན༌། ཏེ༌བོའེ༌ཕིའ༌ ཁོང༌གུན༌ལ༌ སྲོ༌ ཡོངས༌ཏེ༌ ཡེ༌ཤུ༌ སད༌ཅེས༌ ཅོས༌། །" 59 ཏེ༌བོ༌ ཚོར༌ར༌ཅིག༌ ཡ༌ཧུ༌དཱ༌པ༌གུན༌ནི༌ ཁོང༌ སད༌ཅེས༌ལ༌ རྡོའ༌ ཁུརས༌, ཨིན༌ནའང༌ ཡེ༌ཤུ༌ ཁོང༌གུན༌ནེ༌ ཨིབས༌ཏེ༌ ཆོད༌ཁང༌ནེ༌ བིངས༌ཏེ༌ སྐྱོདས༌།
*8:58 8:58 ཡ༌ཧུ༌དཱ༌པ༌གུན༌ནི༌ ཡེ༌ཤུའི༌, 'ང༌ ནི༌ ཨབ༌ར༌ཧམ༌ མ༌སྐྱེས༌སི༌ སང༌ སྔུན༌ལ༌ ཡོད༌པིན༌' ཟེར༌ཅེས༌པོ༌ ཡེ༌ཤུའི༌ ཁོང༌རང༌ དཀོན༌མཆོག༌ ཨིན༌ ཟེར༌ཁན༌བོ༌ ཧ༌གོའད༌པིན༌། ཏེ༌བོའེ༌ཕིའ༌ ཁོང༌གུན༌ལ༌ སྲོ༌ ཡོངས༌ཏེ༌ ཡེ༌ཤུ༌ སད༌ཅེས༌ ཅོས༌།