21
ཡེ༌ཤུ༌ ལོབ༌ཕྲུགས༌ རྡུན༌ལ༌ ཇལ༌།
21:1 ནེ༌ 14
1 ཏི༌བེ༌རི༌ཡཱས༌སི༌ ཚོའེ༌ ཐའ༌མ༌ ཡང༌ ལན༌ཅིག༌ གཙོ༌བོ༌ ཡེ༌ཤུའི༌ ཁོང༌རང༌ ལོབ༌ཕྲུགས༌གུན༌ལ༌ སྔོན༌ ཅུག༌ག༌ ཛདས༌, ཏེ༌བོ༌ འི༌ཟུག༌གི༌ བྱུངས༌། 2 ཤི༌མོན༌ པི༌ཏྲར༌, ཚག༌ཕྲུག༌ ཟེར༌ཁན༌ནི༌ ཐོ༌མཱས༌, གཱ༌ལིལ༌ལིའི༌ ཡུལ༌ཇོངས༌སི༌ ཀ༌ནཱ༌པ༌ ན༌ཐན༌ནི༌འེལ༌, ཟེ༌བེད༌དིའི༌ བུ༌ཚ༌ ཉིས༌ཀོ༌ དང༌ ཡང༌ ལོབ༌ཕྲུགས༌ ཉིས༌སའང༌ ཏེ༌རུ༌ ཛོམས༌ཏེ༌ ཡོད༌པིན༌།
3 ཏེན༌ན༌ ཏུས༌ལ༌ ཤི༌མོན༌ པི༌ཏྲར༌རི༌ ཁོང༌གུན༌ལ༌ ཟེརས༌, "ང༌ ཉ༌ ཟུམ༌མ༌ ཆའད༌།"
ཁོང༌གུན༌ནི༌ ཟེརས༌, "ང༌ཞའང༌ ཉམ༌པོ༌ ཡོང༌ཨིན༌།" ཏེ༌བོ༌ ཟེར༌ཏེ༌ ཁོང༌གུན༌ གྲུ༌ཟིང༌ངི༌ ནང༌ང༌ ཞོན༌ཏེ༌ སོང༌, ཨིན༌ནའང༌ ཏེ༌ ཚན༌ གང༌པོ༌ ཁོང༌གུན༌ལ༌ ཉ༌ མ༌ནེ༌ མ༌ཁད༌།
4 ནམ༌ལངས༌ས༌ཅིག༌ ཡེ༌ཤུ༌ ཚོའེ༌ ཐའ༌མ༌ ཞངས༌ཏེ༌ ཡོད༌པིན༌, ཨིན༌ནའང༌ ལོབ༌ཕྲུགས༌གུན༌ནི༌ ཁོང༌ ཡེ༌ཤུ༌ ཨིན༌ཁན༌བོ༌ ངོ༌ མ༌ཤེས༌། 5 ཡེ༌ཤུའི༌ ཁོང༌གུན༌ལ༌ བོད༌ད༌ ཛད༌ཏེ༌ མོལས༌, "ཛ༌འོ༌གུན༌ ཁྱོ༌ཞའ༌ ཉ༌ མ༌ཐུབ༌བ༌?"
ཁོང༌གུན༌ནི༌ ཟེརས༌, "མ༌ཐུབ༌།"
6 ཡེ༌ཤུའི༌ ཁོང༌གུན༌ལ༌ མོལས༌, "ཁྱོ༌ཞའེ༌ ཉ༌དོལ༌བོ༌ གྲུ༌ཟིང༌ངི༌ ཡས༌ ཆོགས༌ལ༌ ཕོང༌ཤིག༌, ཏེ༌ནེ༌ ཁྱོ༌ཞའ༌ ཉ༌ ཐུབ༌ཨིན༌།"
ཁོང༌གུན༌ནི༌ ཡེ༌ཤུའི༌ མོལ༌ཁན༌བོ༌ ཅོས༌, ཡང༌ འི༌ཟམ༌ ཉ༌ མ༌མང༌པོ༌ ཁད༌, ཉ༌དོལ༌བོ༌ གྲུ༌ཟིང༌ངི༌ ནང༌ང༌ ཐེན༌ཏེ༌ ཁྱོང༌ མ༌ཉན༌།
7 ཏེ༌ནེ༌ ཡེ༌ཤུའི༌ ལོབ༌ཕྲུགས༌ ཅེས༌པ༌བོའེ༌, ཤི༌མོན༌ པི༌ཏྲར༌ལ༌ ཟེརས༌, "ཁོང༌ ནི༌ གཙོ༌བོ༌ལེ༌ ཨིན༌ནོག༌།" ཏེ༌བོ༌ ཚོར༌ར༌ཅིག༌ ཤི༌མོན༌ པི༌ཏྲར༌རི༌ ཁོ༌རང༌ངི༌ ཀོས༌པོ༌ གོནས༌ ༼ཀ༌བོ༌ ཁོའེ༌ སྔུན༌ལ༌ ཉ༌ ཟུམ༌ཅེས༌སི༌ ཕིའ༌ ཕུད༌ཏེ༌ ཡོད༌པིན༌༽ ཡང༌ ཆུའི༌ ནང༌ང༌ ལྕེབས༌ཏེ༌ ཐའ༌མ༌ སོང༌། 8 ཞན༌ ལོབ༌ཕྲུགས༌གུན༌ནི༌ ཉ༌ གངས༌ཁན༌ནི༌ ཉ༌དོལ༌བོ༌ གྲུ༌ཟིང༌ང༌ ཏགས༌ ཡང༌ དྲུད༌ཨིན༌ པི༌ཏྲར༌རི༌ སྟིང༌རང༌ནེ༌ གྲུ༌ཟིང༌བོ༌ ཁྱོངས༌, ཁོང༌གུན༌ ཚོའེ༌ ཐའ༌མ༌ནེ༌ མ༌ ཐག༌རིང༌ང༌ མེད༌པིན༌, ཧ༌ལམ༌ མི༌ཀྲར༌ 92 ཟམ༌ཤིག༌། 9 ཡང༌ ཐའ༌མ༌ ལེབ༌བ༌ཅིག༌, ཁོང༌གུན༌ནི༌ སོལ༌ལེ༌ མེ༌ཀ༌ ཉ༌ དང༌ ཏ༌གི༌ གུན༌ ཐོང༌།
10 ཡེ༌ཤུའི༌ ཁོང༌གུན༌ལ༌ མོལས༌, "ཁྱོ༌ཞ༌གུན༌ནི༌ དག༌ས༌ ཟུམ༌ཁན༌ནི༌ ཉ༌ ཁ༌ཅིག༌ འི༌ཀ༌ ཁྱོང༌།" 11 ཤི༌མོན༌ པི༌ཏྲར༌ གྲུ༌ཟིང༌ངི༌ ནང༌ང༌ སོང༌ཏེ༌ ཉ༌དོལ༌བོ༌ ཆུའི༌ ཐའ༌མ༌ ཚོག༌པ༌ དྲུད༌ཏེ༌ ཁྱོངས༌, ཀ༌བོ༌ ཉ༌ ཆེན༌མོ༌ 153 གངས༌ཏེ༌ ཡོད༌པིན༌, ཉ༌ ཏེ༌ཟམ༌ མང༌པོ༌ ཡོད༌ཏེའང༌ ཉ༌དོལ༌བོ༌ མ༌ཆའད༌།
12 ཡེ༌ཤུའི༌ ཁོང༌གུན༌ལ༌ མོལས༌, "ཆིན༌ནན༌ ཟའ༌ལ༌ ཡོང༌ཤིག༌།" ལོབ༌ཕྲུགས༌གུན༌ནི༌ ཕྲོ༌ནེ༌ སུ༌ཞིག༌གིའང༌ ཁོང༌ང༌ "ཉེ༌རང༌ སུ༌ ཨིན༌?" ཟེར༌ཏེ༌ ཏྲི༌ཅེས༌སི༌ ཧམ༌པ༌ མ༌ཡོངས༌། ཁོང༌གུན༌ལ༌ ཁོང༌ གཙོ༌བོ༌ ཞུགས༌ཏེ༌ ཨིན༌ཁན༌བོ༌ ཤེས༌ཏེ༌ ཨིན༌པིན༌། 13 ཡེ༌ཤུ༌ མེ༌ ཡོད༌ས༌ སྐྱོད༌ཏེ༌ ཏ༌གི༌ ནམས༌ཏེ༌ ཁོང༌གུན༌ལ༌ སལས༌, ཏེན༌ན༌ ཙོགས༌ ཁོང༌ངི༌ ཉ༌ ཉམ༌པོ༌ ཅོའ༌ ཛདས༌། 14 ཡེ༌ཤུ༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ཞངས༌ཏེ༌ སྟིང༌ནེ༌ ལན༌ སུམ༌པ༌ ལོབ༌ཕྲུགས༌གུན༌ལ༌ ཇལ༌ ཅུག༌ག༌ ཛད༌ཏེ༌ ཨིན༌པིན༌།
ཡེ༌ཤུ༌ དང༌ ཤི༌མོན༌ པི༌ཏྲར༌།
21:15 ནེ༌ 25
15 ཁོང༌གུན༌ནི༌ ཆིན༌ནན༌ དོན༌ ཚར༌ར༌ཅིག༌, གཙོ༌བོ༌ ཡེ༌ཤུའི༌ ཤི༌མོན༌ པི༌ཏྲར༌ལ༌ ཏྲིའ༌ ཛདས༌, "ཤི༌མོན༌ ཡོ༌ཧཱ༌ནན༌ནི༌ བུ༌ཚ༌, དེན༌བ༌ ཁྱོ༌རང༌ངི༌ ང༌ ཁོང༌གུན༌ནི༌ སང༌ མང༌ང༌ ཅམས༌པ༌ ཅོའ༌དའ༌?"
ཁོའེ༌ ལན༌ཏངས༌, "ཅོའད༌ལེ༌, གཙོ༌བོ༌ ངའེ༌ ཉེ༌རང༌ང༌ ཅམས༌པ༌ ཅོ༌ཁན༌བོ༌ ཉེ༌རང༌ངི༌ ཁྱེན༌ན༌ནོག༌།"
ཡེ༌ཤུའི༌ ཁོའ༌ མོལས༌, "ངའེ༌ ལུག༌གུན༌ ཚོས༌།" 16 ཡེ༌ཤུའི༌ ཡང༌སྐྱར༌ ཁོའ༌ ཏྲིའ༌ ཛདས༌, "ཤི༌མོན༌ ཡོ༌ཧཱ༌ནན༌ནི༌ བུ༌ཚའ༌, དེན༌བ༌ ཁྱོ༌རང༌ངི༌ ང༌ ཅམས༌པ༌ ཅོའ༌དའ༌?"
ཁོའེ༌ ལན༌ཏངས༌, "ཅོའད༌ལེ༌, ཀྱེ༌ གཙོ༌བོ༌ ངའེ༌ ཉེ༌རང༌ང༌ ཅམས༌པ༌ ཅོ༌ཁན༌བོ༌ ཉེ༌རང༌ངི༌ ཁྱེན༌ན༌ནོག༌།"
ཡེ༌ཤུའི༌ ཁོའ༌ མོལས༌, "ཏེ༌ནེ༌ ངའེ༌ ལུག༌གུན༌ ཉ༌ར༌ ཅོས༌།"
17 ཁོང༌ངི༌ ལན༌ སུམ༌པ༌ ཁོའ༌ ཏྲིའ༌ ཛདས༌, "ཡོ༌ཧཱ༌ནན༌ནི༌ བུ༌ཚ༌ ཤི༌མོན༌, ཁྱོ༌རང༌ངི༌ ང༌ ཅམས༌པ༌ ཅོའ༌དའ༌?"
ཡེ༌ཤུའི༌ ཁོའ༌ ལན༌ སུམ༌པ༌ 'ཁྱོ༌རང༌ངི༌ ང༌ ཅམས༌པ༌ ཅོའ༌དའ༌' མོལ༌ཏེ༌ ཏྲིའ༌ ཛདས༌པ༌ པི༌ཏྲར༌ལ༌ སེམས༌སི༌ ནང༌ང༌ ཕོག༌, པི༌ཏྲར༌རི༌ ཟེརས༌, "གཙོ༌བོ༌ ཉེ༌རང༌ང༌ ཅི༌ཚང༌མ༌ ཁྱེན༌ན༌ནོག༌, ངའེ༌ ཉེ༌རང༌ང༌ ཅམས༌པ༌ ཅོ༌ཁན༌བོ༌ ཉེ༌རང༌ངི༌ ཁྱེན༌ན༌ནོག༌།"
ཡེ༌ཤུའི༌ ཁོའ༌ མོལས༌, "ངའེ༌ ལུག༌གུན༌ ཚོས༌།"
18 ཡེ༌ཤུའི༌ མོལས༌, "ངའེ༌ ཁྱོ༌རང༌ང༌ དེན༌བ༌ དེན༌བ༌ ཟེར༌རད༌, ཁྱོ༌རང༌ ཁྱོག༌ཏོང༌ ཡོད༌ ཟ༌ནེ༌, ཁྱོ༌རང༌ རང༌ངི༌ ཀོས༌ལག༌ གོན༌ཏེ༌ ཀ༌རུ༌ ཆེན༌ སམ༌ནའང༌ ཆའད༌པིན༌, ཨིན༌ནའང༌ སྒས༌ས༌ཅིག༌ ཁྱོ༌རང༌ངི༌ ལག༌པ༌ རྐྱང༌ཨིན༌ ཡང༌ ཞན༌མ༌ཞིག༌གི༌ སྐོན༌ཏེ༌ ཁྱོ༌རང༌ མ༌ཐད༌ཁན༌ནི༌ ས༌ཆ༌གུན༌ལ༌ ཁྲིད༌ཏེ༌ ཁྱེར༌ཨིན༌།" 19 ཡེ༌ཤུའི༌ པི༌ཏྲར༌ ཤི༌ཚུལ༌བོ༌ གྱུད༌ཏེ༌ དཀོན༌མཆོག༌ག༌ སྤལ༌ ཁྱོང༌ཅེས༌པོ༌ ཁོའ༌ ཧ༌གོ༌ཅེས༌ལ༌ ཏེ༌བོ༌ མོལས༌། ཏེ༌ནེ༌ ཡེ༌ཤུའི༌ ཁོའ༌ མོལས༌, "ངའེ༌ སྟིང༌རང༌ནེ༌ བྲོངས༌།"
20 པི༌ཏྲར༌རི༌ གྱབ༌ ལོགས༌ཏེ༌ ལྟས༌པ༌ ཡེ༌ཤུའི༌ ཅེས༌པ༌ ཛད༌ཁན༌ནི༌ ལོབ༌ཕྲུགས༌པོ༌ ཁོང༌གུན༌ནི༌ གྱབ༌ནེ༌ ཡོང༌ངད༌པིན༌, ཁོ༌ ཕི༌ཏོག༌གི༌ དོན༌ཏང༌ངི༌ ཏུས༌ལ༌ ཡེ༌ཤུའ༌ ཉེས༌ཏེ༌ "ཀྱེ༌ གཙོ༌བོ༌ ཉེ༌རང༌ང༌ ངོ༌ལོག༌ ཅོ༌ཅེས༌ཅན༌བོ༌ སུ༌ ཨིན༌" ཟེར༌ཏེ༌ ཏྲིས༌ཁན༌ནི༌ ལོབ༌ཕྲུགས༌པོ༌ ཨིན༌། 21 པི༌ཏྲར༌རི༌ ཁོ༌ ཐོང༌ཏེ༌ ཡེ༌ཤུའ༌ ཏྲིས༌, "ཀྱེ༌ གཙོ༌བོ༌ ཁོའ༌ ཅི༌ ཆེན༌?"
22 ཡེ༌ཤུའི༌ ལན༌སལས༌, "གལ༌ཏེས༌ ངའེ༌ ང༌ ལོགས༌ཏེ༌ ཡོང༌ཡོང༌ ཚག༌པ༌ ཁོ༌ སོན༌ཏེའ༌ བོར༌ར༌ ཐད༌ན༌ ཁྱོ༌རང༌ང༌ ཅི༌ རག༌? ཁྱོ༌རང༌ ངའེ༌ སྟིང༌རང༌ནེ༌ བྲོངས༌།" 23 ཏེ༌བོའེ༌ཕིའ༌ སྤུན༌གུན༌ནི༌ ནང༌ང༌ འི༌ ལོབ༌ཕྲུགས༌པོ༌ མ༌ནེ༌ མི༌ཤི༌ཅེས༌ ཨིན༌ནོག༌ ཟེར༌ཏེ༌ འུ༌ཡ༌ གྱུག༌། ཨིན༌ནའང༌ ཡེ༌ཤུའི༌ ཁོ༌ མ༌ནེ༌ མི༌ཤི༌ མོལ༌ཏེ༌ མན༌པིན༌, ཁོང༌ངི༌, "གལ༌ཏེས༌ ངའེ༌ ང༌ ལོགས༌ཏེ༌ ཡོང༌ཡོང༌ ཚག༌པ༌ ཁོ༌ སོན༌ཏེའ༌ བོར༌ར༌ ཐད༌ན༌ ཁྱོ༌རང༌ང༌ ཅི༌ རག༌?" ཅིག༌པོ༌ མོལ༌ཏེ༌ ཨིན༌པིན༌།
24 ཏེན༌ན༌ ལོབ༌ཕྲུགས༌པོ༌ ནི༌ འི༌ སྤེ༌ཆའེ༌ ནང༌ང༌ འི༌ ཚང༌མའེ༌ སྐོར༌ལ༌ བྲིས༌ཏེ༌ སྤང༌པོ༌ ཏང༌ཁན༌བོ༌ ཨིན༌, ཡང༌ ང༌ཞ༌གུན༌ལ༌ ངའེ༌ སྤང༌པོ༌གུན༌ དེན༌བ༌ ཨིན༌ཁན༌བོ༌ གྱུས༌ཡོད༌། 25 ཡེ༌ཤུའི༌ ཞན༌ མང༌པོ༌ ཆག༌ལས༌སའང༌ ཛད༌ཏེ༌ ཨིན༌ནོག༌། གལ༌ཏེས༌ ཏེ༌ ཚང༌མ༌ བྲིས༌ཏེ༌ ཨིན༌པིན༌ན༌, ངའེ༌ སམ༌མ༌རག༌ འི༌ ཇིག༌རྟེན༌ གང༌པོའེ༌ ནང༌ང༌ ཏེ༌ སྤེ༌ཆ༌གུན༌ བོར༌སའེ༌ ནས༌ས༌ མེད༌གྲོ༌།།