1 ཏེ༌ཏུས༌ལ༌ རོམ༌མི༌ གྱལ༌པོ༌ ཨའུ༌གུས༌དུས༌སི༌ རོམ༌ གྱལ༌སྲིད༌དི༌ ཡོག༌ག༌ ཡོད༌ཁན༌ནི༌ ཡུལ༌ ཚང༌མའེ༌ མི༌ཀྲངས༌ རྩི༌ཅེས༌ལ༌ བཀའ༌ ཏངས༌། 2 ༼ཀྱི༌རི༌ནི༌འུས༌ སི༌རི༌ཡཱ༌ ཡུལ༌ཇོངས༌སི༌ ཀའ༌ལོན༌ འིན༌ནི༌ ཏུས༌ལ༌, འི༌ མི༌ཀྲངས༌ རྩི༌ཅེས༌པོ༌ ཏང༌པོ༌རང༌ ཨིན༌པིན༌༽ 3 ཡང༌ མི༌ཚང༌མ༌ མིང༌ ཅུག༌ཅེས༌ལ༌ རང༌རང༌ངི༌ ཕ༌མེས༌པོའེ༌ ཡུལ༌ལ༌ སོང༌། 4 ཡོ༌སེབ༌ གྱལ༌པོ༌ དཱ༌བིད༌དི༌ པུར༌གྱུད༌ནེ༌ ཨིན༌པ༌, ཁོའང༌ གཱ༌ལིལ༌ལི༌ ཡུལ༌ཇོངས༌སི༌ ན༌ཙ༌རེད༌ གྲོང༌ཁྱེར༌ནེ༌, ཡ༌ཧུ༌དཱ༌ ཡུལ༌ཇོངས༌སི༌ དཱ༌བིད༌དི༌ གྲོང༌ཁྱེར༌ བེད༌ལེ༌ཧེམ༌མ༌ སོང༌། 5 ཡོ༌སེབ༌བི༌ ན༌མའ༌ ཏྲིས༌ཏེ༌ ཨིན༌ཁན༌ནི༌ མིར༌ཡམ༌, ཀ༌བོའ༌ ཕྲུ༌གུ༌ ཇོར༌ཅེས༌ ཡོད༌པིན༌, ཁོ༌ ཉམ༌པོ༌ མིང༌ ཅུག༌ཅེས༌ལ༌ ཁྱེརས༌།

6 ཏེ༌རུ༌ ཡོད༌ཏུས༌, ཕྲུ༌གུ༌ ཇོར༌ཅེས༌སི༌ ཏུས༌པོ༌ ལེབ༌། 7 ཡང༌ མིར༌ཡམ༌མ༌ གོ༌མ༌ ཕྲུ༌གུ༌, བུ༌ཚ༌ཞིག༌ ལྟམས༌། ཁོའེ༌ ཕྲུ༌གུ༌ རས༌སི༌ ནང༌ང༌ ཏུམས༌ཏེ༌ བྲེས༌སི༌ ནང༌ང༌ བོརས༌, ཅིའ༌ཟེར༌ན༌ ཁོང༌གུན༌ལ༌ བྲང༌ས༌ དུག༌སའེ༌ ནང༌ མ༌ཐོབ༌བ༌ ཨིན༌པིན༌།

8 ཏེ༌ ཚན༌ལ༌, ཉེ༌ཁོར༌རི༌ ཐང༌ཞིག༌གི༌ཀ༌ ལུག༌རྫི༌གུན༌ དུགས༌ཏེ༌ ཁོང༌རང༌ངི༌ ལུག༌གུན༌ སྲུང༌ངད༌པིན༌། 9 གཙོ༌བོའེ༌ ཕོ༌ཉ༌ཞིག༌ ཁོང༌གུན༌ནི༌ ཇལ༌, ཡང༌ གཙོ༌བོའེ༌ ཟིར༌རྗིད༌དི༌ ཁོང༌གུན༌ ཡོད༌སའེ༌ ཉེ༌ཁོར༌རི༌ ནས༌ས༌ འོད༌ཅན༌ གྱུར༌པ༌, ཁོང༌གུན༌ སྲན༌ཏྲེ༌ ཇིགས༌། 10 ཨིན༌ནའང༌ ཕོ༌ཉའེ༌ ཁོང༌གུན༌ལ༌ མོལས༌, "མ༌ཇིགས༌ཤིག༌, ངའེ༌ མི༌ཚང༌མ༌ལ༌ མ༌ གའ༌མོ༌ ཁྱོང༌ཅེས༌ཅན༌ནི༌ གའ༌མོའེ༌ ནས༌ཚུལ༌ ཤད༌དད༌། 11 དི༌རིང༌ ཁྱོ༌ཞའེ༌ ཕ༌མེས༌པོའེ༌ གྱལ༌པོ༌ དཱ༌བིད༌དི༌ གྲོང༌ཁྱེར༌རི༌ ནང༌ང༌ སྐྱབ༌གོན༌བོ༌ ཁྲུངས༌ཏེ༌ ཨིན༌། ཁོང༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌, གཙོ༌བོ༌བོ༌ ཨིན༌། 12 ཡང༌ ཏེ༌བོའེ༌ སྟགས༌པོ༌ ནི༌ ཁྱོ༌ཞ༌གུན༌ལ༌ ཕྲུ༌གུ༌ཞིག༌ རས༌སི༌ ནང༌ང༌ ཏུམས༌ཏེ༌, བྲེས༌སི༌ ནང༌ང༌ ཉལ༌ཏེ༌ ཐོང༌ཨིན༌།"

13 ཧུན༌མེད༌ལ༌ ནམ༌ཁའེ༌ ཕོ༌ཉའེ༌ ཚོགས༌ ཆེན༌མོ༌ཞིག༌ སྔོན༌ཏེ༌, ཏེ༌ ཕོ༌ཉ༌ ཉམ༌པོ༌ དཀོན༌མཆོག༌ག༌ སྟོད༌པ༌ ཕུལ༌ཨིན༌ མོལས༌,

15 ཁོང༌གུན༌ བོར༌ཏེ༌ ཕོ༌ཉ༌གུན༌ ནམ༌ཁའ༌ ལོགས༌ཏེ༌ སྐྱོད༌ད༌ཅིག༌, ལུག༌རྫི༌གུན༌ནི༌ ཅིག༌ དང༌ ཅིག༌ག༌ ཟེརས༌, "ཏ༌ གཙོ༌བོའེ༌ ང༌དང༌ང༌ མོལ༌ཁན༌ བྱུང༌ཁན༌གུན༌ ལྟའ༌ལ༌ ང༌དང༌ བེད༌ལེ༌ཧེམ༌མ༌ ཆེན༌།"

16 ཏེ༌ནེ༌ ཁོང༌གུན༌ གྱོགས༌པ༌ སོང༌ཏེ༌, མིར༌ཡམ༌, ཡོ༌སེབ༌ དང༌ བྲེས༌སི༌ ནང༌ང༌ ཉལ༌ཁན༌ ཕྲུ༌གུ༌བོ༌ ཇལ༌། 17 ཕྲུ༌གུ༌ ཇལ༌ཏེ༌ སྟིང༌ནེ༌ ལུག༌རྫི༌གུན༌ནི༌ ཕྲུ༌གུའི༌ སྐོར༌ལ༌ མོལ༌ཁན༌ནི༌ ནས༌ཚུལ༌བོ༌ ཚང༌མ༌ལ༌ ཤདས༌། 18 ལུག༌རྫི༌གུན༌ནི༌ ཤད༌ཁན༌གུན༌ ཚོར༌ཁན༌ནི༌ མི༌ ཚང༌མ༌ ཧ༌ལས༌། 19 ཨིན༌ནའང༌ མིར༌ཡམ༌མི༌ བྱུང༌ཁན༌ ཚང༌མ༌ སྙིང༌ངི༌ ནང༌ང༌ ཁུར༌ཏེ༌ ཡང༌ ཏེ༌ ཚང༌མའེ༌ སྐོར༌ལ༌ སམ༌བ༌ ཏང༌ཨིན༌ དུགས༌། 20 ལུག༌རྫི༌གུན༌ནི༌ ཚོར༌ཁན༌ དང༌ ཐོང༌ཁན༌ ཚང༌མའེ༌ ཕིའ༌ དཀོན༌མཆོག༌ག༌ སྟོད༌པ༌ ཕུལ༌ཨིན༌ ལོགས༌ཏེ༌ སོང༌, ཅིའ༌ཟེར༌ན༌ ཏེ༌གུན༌ ཕོ༌ཉའེ༌ མོལ༌ཁན༌ ནང༌ཞིན༌ དྲན༌དྲའ༌ ཡོད༌པིན༌། 21 ཞག༌ རྒྱད༌པའེ༌ ཞག༌ག༌, ནམ༌ ཕྲུ༌གུའ༌ སུན༌ནད༌ ཅོ༌ཅེས༌སི༌ ཏུས༌ ཨིན༌པིན༌, ཕྲུ༌གུའི༌ ཚན༌ལ༌ ཡེ༌ཤུ༌ ཏགས༌, ཀ༌ཟུག༌ ཕྲུ༌གུ༌ མིར༌ཡམ༌མི༌ ཅང༌ཁོག༌ག༌ ཆགས༌སི༌ སང༌ སྔུན༌ལ༌ ཕོ༌ཉའེ༌, ཏེ༌ མིང༌བོ༌ ཏག༌ག༌ ཛད༌ཅེས༌ལ༌ མོལ༌ཏེ༌ ཨིན༌པིན༌།

22 ལུང༌སྟོན༌པ༌ མོ༌ཟེས༌སི༌ བཀའ༌ཁྲིམས༌ ནང༌ཞིན༌ ཕྲུ༌གུ༌ སྐྱེས༌ཏེ༌ སྟིང༌ནེ༌ ཨ༌མ༌ རྩང༌མ༌ ཆ༌ཅེས༌སི༌ ཏུས༌ ཚང༌ང༌ཅིག༌, ཡོ༌སེབ༌ དང༌ མིར༌ཡམ༌མི༌ ཕྲུ༌གུ༌བོ༌ གཙོ༌བོ༌ དཀོན༌མཆོག༌གི༌ ཨིན༌ཁན༌ ལྟན༌ཅེས༌སི༌ ཕིའ༌ ཡེ༌རུ༌ཤ༌ལེམ༌མི༌ ཆོད༌ཁང༌ང༌ ཁྱེརས༌། 23 ༼གཙོ༌བོའེ༌ བཀའ༌ཁྲིམས༌སི༌ ནང༌ང༌ བྲིས༌ཏེ༌ དུག༌, "བུ༌ཚ༌ གོ༌བུ༌ ཚང༌མ༌ གཙོ༌བོའ༌ སྟད༌ཁན༌བོ༌ ལྟན༌གོས༌།"༽ 24 ཏེ༌ནེ༌ གཙོ༌བོའེ༌ བཀའ༌ཁྲིམས༌སི༌ ནང༌ཞིན༌, "ཕུར༌གོན༌ ཀར༌པོ༌ ཆ༌ཅིག༌ ཡ༌ ཕུར༌གོན༌ནི༌ ཕྲུ༌གུ༌ ཉིས༌" ཁོང༌གུན༌ནི༌ སྲོག༌ཆོད༌ལ༌ ཕུལས༌།" 25 ཏེན༌ན༌ ཏུས༌ལ༌ ཡེ༌རུ༌ཤ༌ལེམ༌མི༌ ནང༌ང༌ ཤི༌མི༌འོན༌ ཏད༌པ༌ཅན༌ དང༌ དྲང༌པོ༌ མི༌ཞིག༌, ཁོ༌ ཨིས༌ར༌ཨེལ༌པ༌གུན༌ལ༌ ཐར༌པ༌ ཁྱོང༌ཁན༌ནི༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ སྐྱོད༌ཅེས༌ལ༌ སྲུངས༌ཏེ༌ ཡོད༌པིན༌། ཡང༌ དམ༌པའེ༌ ཐུག༌ཉིད༌ ཁོ༌ ཉམ༌པོ༌ ཡོད༌པིན༌། 26 དམ༌པའེ༌ ཐུག༌ཉིད༌དི༌ ཁོའ༌ ནམ༌ཚོག༌པ༌ ཁོའེ༌ གཙོ༌བོ༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ མི༌ཇལ༌ ཏེ༌ཏེ༌ཚོག༌པ༌ ཁོ༌ མི༌ཤི༌ མོལ༌ཏེ༌ སྔོན༌ ཅུག༌ག༌ ཛདས༌། 27 དམ༌པའེ༌ ཐུག༌ཉིད༌དི༌ ཤི༌མི༌འོན༌ ཆོད༌ཁང༌ང༌ ཁྱེར༌ར༌ ཛདས༌། བཀའ༌ཁྲིམས༌སི༌ ལུག༌སྲོལ༌ ནང༌ཞིན༌ ཕྲུ༌གུའ༌ ཅོ༌གོ༌ཤེས༌པོ༌ ཅོའ༌ལ༌ ཕ༌མ༌ ཉིས༌ཀོའེ༌ ཡེ༌ཤུ༌ ཆོད༌ཁང༌ང༌ ཁྱོང༌ང༌ཅིག༌, 28 ཤི༌མི༌འོན༌ནི༌ ཕྲུ༌གུ༌ ལག༌པའེ༌ ནང༌ང༌ ཁུར༌ཏེ༌ དཀོན༌མཆོག༌ག༌ སྟོད༌པ༌ ཕུལ༌ཨིན༌ ཟེརས༌,

33 ཁོང༌ངི༌ སྐོར༌ལ༌ མོལ༌ཁན༌གུན༌ ཚོར༌ཏེ༌ ཕྲུ༌གུའི༌ ཨ༌བ༌ དང༌ ཨ༌མ༌ ཧ༌ལས༌། 34 ཏེ༌ནེ༌ ཤི༌མི༌འོན༌ནི༌ ཁོང༌གུན༌ལ༌ ཅིན༌ལབས༌ སལ༌ཏེ༌, ཨ༌མ༌ མིར༌ཡམ༌མ༌ མོལས༌, "དཀོན༌མཆོག༌གི༌ ཐབས༌ལྡིངས༌ ནང༌ཞིན༌ འི༌ ཕྲུ༌གུ༌བོ༌ གྱུད༌ཏེ༌ ཨིས༌ར༌ཨེལ༌པ༌ མང༌པོ༌ཞིག༌ གྱེལ༌ཅེས༌ ཡང༌ མང༌པོ༌ཞིག༌ག༌ ཐར༌པ༌ ཐོབ༌ཨིན༌། ཁོང༌ དཀོན༌མཆོག༌གི༌ ཆོགས༌ནེ༌ ཨིན༌ཁན༌བོ༌ མི༌གུན༌ལ༌ ཧ༌གོ༌ཏེའང༌ མང༌པོའེ༌ ཁོང༌ང༌ གྱབ༌གལ༌ ཅོ༌ཨིན༌། 35 ཏེ༌བོའེ༌ ཞས༌ཏེ༌ མི༌ མང༌པོའེ༌ སྙིང༌ངི༌ ཐིལ༌ལི༌ སམ༌ཚུལ༌གུན༌ སྔོན༌ཅུག༌ག༌ ཛད༌ཨིན༌ ཡང༌ ཁྱོ༌རང༌ངི༌ སེམས༌ལའང༌ ར༌འི༌ ཟུག༌ཁན༌ ཙོགས༌ ཚེར༌ཁ༌ ཡོང༌ཨིན༌།"

36 ཨ༌ཤེར༌རི༌ སྡེ༌ནེ༌ ཨིན༌ཁན༌ནི༌ ཕ༌ནུ༌འེལ༌ལི༌ བུ༌མོ༌ ཨན༌ནཱ༌, མ༌ རྒད༌མོ༌ ལུང༌སྟོན༌མ༌ཞིག༌ ཡོད༌པིན༌། ན༌མ༌ ཅོས༌ཏེ༌ ལོ༌ རྡུན༌ནི༌ སྟིང༌ནེ༌ ཁོའེ༌ མག༌པ༌ ཤི༌། 37 ཨ༌ནེ༌ མ༌རང༌མོ༌ གྱུར༌ཏེ༌ སྟིང༌ནེ༌ ཁོའེ༌ ཡང༌སྐྱར༌ ན༌མ༌ མ༌ཅོས༌། ཁོ༌ ཆོད༌ཁང༌ནེ༌ མ༌ནེ༌ མ༌བིང༌ང༌, ཚན༌ དང༌ ཉི༌མ༌ དཀོན༌མཆོག༌ག༌ ཅོལ༌ཨིན༌, ཉེ༌ནས༌ ༼ཡང༌ན༌ རོ༌ཟཱ༌༽ དུགས༌ཏེ༌ མོས༌ལམ༌ ཞུའད༌པིན༌། ཏ༌ ཁོའ༌ ལོ༌ 84 ཆའད༌པིན༌, 38 ཤི༌མི༌འོན༌ནི༌ ཡོ༌སེབ༌ དང༌ མིར༌ཡམ༌མ༌ སྤེ༌ར༌ ཏངས༌ས༌ ཁོ༌ ཡོངས༌ཏེ༌ དཀོན༌མཆོག༌ག༌ ཐུག༌རྗེ༌ཆེ༌ ཞུ༌ཨིན༌, ཁོའེ༌ ཡེ༌རུ༌ཤ༌ལེམ༌པ༌གུན༌ལ༌ ཐར༌པ༌ ཐོབ༌ཅེས༌ལ༌ སྲུངས༌ཏེ༌ ཡོད༌ཁན༌ ཚང༌མ༌ལ༌ ཕྲུ༌གུ༌བོའེ༌ སྐོར༌ལ༌ ཤདས༌།

39 གཙོ༌བོའེ༌ བཀའ༌ཁྲིམས༌སི༌ སྒོས༌དོམ༌ ནང༌ཞིན༌ ཅོ༌ ཚར༌ར༌ཅིག༌ ཡོ༌སེབ༌ དང༌ མིར༌ཡམ༌ གཱ༌ལིལ༌ལིའི༌ ཡུལ༌ཇོངས༌, ཁོ༌རང༌གུན༌ནི༌ གྲོང༌ཁྱེར༌ ན༌ཙ༌རེད༌ལ༌ ལོགས༌ཏེ༌ སྐྱོདས༌། 40 ཡང༌ ཕྲུ༌གུ༌ ལྡན༌ཏེ༌ ཤེད༌ཅན༌ གྱུར༌། ཁོང༌ ཤེས༌རབས༌སི༌ གངས༌ཏེ༌ དཀོན༌མཆོག༌གི༌ ཐུག༌རྗེ༌ ཁོང༌ངི༌ཀ༌ ཡོད༌པིན༌།

41 གཙོ༌བོ༌ ཡེ༌ཤུའི༌ ཕ༌མ༌ ལོ༌ཞུང༌ པེ༌སག༌གི༌ ཏུས༌ཆེན༌ རྩིའ༌ལ༌ ཡེ༌རུ༌ཤ༌ལེམ༌མ༌ སྐྱོད༌དད༌པིན༌། 42 ཡེ༌ཤུའ༌ གུང༌ལོ༌ ཅུག༌ཉིས༌ ཆ༌ ཟ༌ནེ༌ ལུག༌སྲོལ༌ ནང༌ཞིན༌ ཁོང༌གུན༌ ཡེ༌རུ༌ཤ༌ལེམ༌ གྱལ༌ས༌ ཏུས༌ཆེན༌ རྩིའ༌ སྐྱོདས༌། 43 ཏུས༌ཆེན༌ རྩི༌ ཚར༌ཏེ༌ ཁོང༌གུན༌ རང༌ཡུལ༌ལ༌ ལོག༌ཏེ༌ ཆའ༌ ཟ༌ནེ༌ བུ༌ཚ༌ ཡེ༌ཤུ༌ ཕ༌མ༌ ཉམ༌པོ༌ མ༌ཆའ༌ ཡེ༌རུ༌ཤ༌ལེམ༌མ༌ ཞུགས༌, ཨིན༌ནའང༌ ཁོང༌ངི༌ ཕ༌མའ༌ ཏེ༌བོ༌ གྱུས༌ མ༌སོང༌། 44 ཁོང༌གུན༌ནི༌ ཡེ༌ཤུ༌ ཕྲོ༌པ༌གུན༌ ཉམ༌པོ༌ ཡོད༌གྲོ༌ སམ༌ཏེ༌ ཞག༌ཅིག༌གི༌ ལམ༌ གྲུལ༌ཏེ༌ སྟིང༌ནེ༌ ཉེན༌ དང༌ ཛ༌འོ༌ གུན༌ནི༌ ཕྲོའ༌ ཕྲུ༌གུ༌བོ༌ ཙལ༌ཅེས༌ གོ༌ཟུག༌།

45 མ༌ཐོབ༌ པ༌སང༌ ཡེ༌རུ༌ཤ༌ལེམ༌མ༌ ལོག༌ཏེ༌ ཁོང༌ ཙལ༌ལ༌ སོང༌། 46 ཞག༌ སུམ༌པའེ༌ ཞག༌ག༌ ཁོང༌ ཆོད༌ཁང༌ངི༌ ནང༌ང༌ ཆོས༌ ཤད༌ཁན༌ནི༌ གེར༌གན༌གུན༌ནི༌ ཕྲོའ༌ ཞུགས༌ཏེ༌ ཁོང༌གུན༌ལ༌ ཉན༌ཨིན༌ ཏྲི༌ཝ༌ ཏྲི༌ཨིན༌ ཐོང༌། 47 ཁོང༌ངི༌ མོལ༌ལ༌ ཚོར༌ཁན༌ ཚང༌མ༌ ཁོང༌ངི༌ རིག༌པ༌ དང༌ ཁས༌པ༌ ལན༌ སལ༌ཁན༌བོའེ༌ཀ༌ ཧ༌ལས༌།

48 ཁོང༌གུན༌ ཉམ༌པོ༌ ཡེ༌ཤུ༌ ཐོང༌ང༌ཅིག༌ ཕ༌མ༌ ཧ༌ལས༌ ཡང༌ ཨ༌མའེ༌ ཁོང༌ང༌ ཟེརས༌, "བུ༌ཚ༌, ཁྱོ༌རང༌ངི༌ ང༌ཞའ༌ འི༌ཟུག༌ ཅིའ༌ ཅོས༌པིན༌། ཁྱོ༌རང༌ངི༌ ཨ༌བ༌ དང༌ ངའེ༌ ཚེར༌ཁའ༌ ཉམ༌པོ༌ ཁྱོ༌རང༌ ཙལ༌པིན༌"

49 ཡེ༌ཤུའི༌ ཁོང༌གུན༌ལ༌ མོལས༌, "ཁྱོ༌ཞའེ༌ ཅི༌ཕིའ༌ ངའ༌ ཙལ༌པིན༌། ངའེ༌ ཡབ༌བི༌ ཁང༌པའེ༌ ནང༌ང༌ ང༌ དུག༌གོ༌ཤེས༌པོ༌ གྱུས༌མེད༌ད༌?" 50 ཨིན༌ནའང༌ ཁོང༌ངི༌ མོལ༌ཁན༌བོ༌ ཕ༌མ༌ ཉིས༌ཀོའ༌ ཧ༌མ༌གོ༌།

51 ཏེ༌ནེ༌ ཡེ༌ཤུ༌ ཁོང༌གུན༌ ཉམ༌པོ༌ ན༌ཙ༌རེད༌ལ༌ ལོགས༌ཏེ༌ སྐྱོདས༌, ཡང༌ ཕ༌མའེ༌ ཁའ༌ཉན༌ན༌ ཛདས༌། ཁོང༌ངི༌ ཨ༌མའེ༌ བྱུང༌ཁན༌ ཚང༌མ༌ རིན༌ཅན༌ ཅོས༌ཏེ༌ ཁོ༌རང༌ངི༌ སེམས༌སི༌ ནང༌ང༌ ཁུར༌ཏེ༌ དུགས༌། 52 ཡེ༌ཤུ༌ ཤེས༌རབས༌ དང༌ སྐུ༌ཟུགས༌སི༌ ནང༌ང༌ ལྡན༌ན༌ ཛདས༌, ཁོང༌ང༌ མི༌གུན༌ནེ༌ རྩི༌ཝ༌ ཡང༌ དཀོན༌མཆོག༌ ཁོང༌ངི༌ཀ༌ ཐུག༌ཉེས༌ས༌ ཛདས༌།