10
ལོབ༌ཕྲུགས༌ རྡུན༌ཅུ༌དོན༌ཉིས༌ ཀལ༌ལ༌ ཛདས༌།
10:1 ནེ༌ 20
1 ཏེ༌ སྟིང༌ནེ༌ གཙོ༌བོའེ༌ ཞན༌ ལོབ༌ཕྲུགས༌ རྡུན༌ཅུ༌དོན༌ཉིས༌ ལྡམ༌མ༌ ཛདས༌ ཡང༌ ཁོང༌གུན༌ ཉིས༌ཉིས༌ ཅོས༌ཏེ༌ ཁོང༌ངི༌ སང༌ སྔུན༌ལ༌ ཁོང༌ སྐྱོད༌ཅེས༌ཅན༌ནི༌ གྲོང༌ཁྱེར༌ དང༌ ནས༌ས༌ ཚང༌མ༌ལ༌ ཀལ༌ལ༌ ཛདས༌། 2 ཡེ༌ཤུའི༌ ཁོང༌གུན༌ལ༌ མོལས༌, "སྟོན༌ཐོག༌ མང༌པོ༌ཞིག༌ རྔ༌ ཆོག༌ཆོག༌ དུག༌, ཨིན༌ནའང༌ སྟོན༌ཐོག༌ རྔ༌ཁན༌ནི༌ ལས༌མི༌ མ༌ ཉུ༌ངུན༌ཞིག༌ མ༌ནེ༌ མི༌དུག༌། ཏེ༌བོའེ༌ཕིའ༌ སྟོན༌ཐོག༌གི༌ དག༌པོ༌ དཀོན༌མཆོག༌ག༌ སྟོན༌ཐོག༌ རྔ༌ཁན༌ནི༌ ལས༌མི༌ མང༌ང༌ ཀལ༌ལ༌ ཛད༌ཅེས༌ལ༌ ཞུ༌ཝ༌ ཕུལ༌། 3 ཏ༌ སོང༌ ངའེ༌ ཁྱོ༌ཞའ༌ ཤང༌ཀུའི༌ ཕྲོའ༌ ལུ༌གུ༌ ཙོགས༌ལ༌ ལམ༌ཅུག༌གད༌། 4 ཁོ༌མགས༌ ཡ༌ ཇོ༌ལ༌ ཡ༌ པ༌བུ༌ མ༌ཁུར༌, ཡང༌ ལམ༌མ༌ མི༌གུན༌ལ༌ ལོན༌སྲུལ༌ཨིན༌ དུགས༌ཏེ༌ ཏུས༌ གོད༌ལ༌ མ༌ཏང༌།"
5 "ཁྱོ༌ཞ༌ ཁང༌པ༌ཞིག༌གི༌ ནང༌ང༌ ཆའ༌ཅིག༌ གོ༌མ༌རང༌ ཟེར༌, 'དཀོན༌མཆོག༌གི༌ ཞི༌དེ༌ ཏེ༌ ཁང༌པ༌བོའ༌ སལ༌ཤིག༌།' 6 ཏེ༌ ཁང༌པའེ༌ ནང༌ང༌ ཞི༌དེ༌ཅན༌ མི༌ཞིག༌ ཡོད༌ན༌, དཀོན༌མཆོག༌གི༌ ཞི༌དེ༌ ཁོའ༌ སལ༌ཨིན༌། གལ༌ཏེས༌ མེད༌ན༌, ཏེ༌ ཞི༌དེ༌བོ༌ ཁྱོ༌ཞའ༌ ལོགས༌ཏེ༌ ལེབ༌ཨིན༌། 7 ཁྱོ༌ཞའ༌ ཅི༌ ཏང༌ཁན༌བོ༌ ཟེན༌ ཐུང༌ཨིན༌ ཏེན༌ན༌ ཁང༌པའེ༌ ནང༌ང༌ དུག༌, ཅིའ༌ཟེར༌ན༌ ལས༌ ཅོ༌ཁན༌ནི༌ མིའ༌ ལ༌ཆའ༌ ཐོབ༌ཅེས༌ འོས༌པ༌ ཨིན༌ནོག༌། ཁང༌པ༌ ཅིག༌ནེ༌ ཅིག༌ག༌ གྲུལ༌ཨིན༌ མི༌དུག༌།"
8 "གྲོང༌ཁྱེར༌ཞིག༌ག༌ ལེབ༌བ༌ཅིག༌ ཁྱོ༌ཞའ༌ གའ༌སུས༌ ཅོ༌ན༌ ཁོང༌གུན༌ནི༌ ཏང༌ཁན༌ནི༌ ཟན༌གུན༌ ཟོ༌། 9 ཏེ༌རུ༌ ཡོད༌ཁན༌ནི༌ ནད༌པ༌གུན༌ ཕན༌ཅུག༌ ཡང༌ ཁོང༌གུན༌ལ༌, 'དཀོན༌མཆོག༌གི༌ གྱལ༌སྲིད༌ ཁྱོ༌ཞའེ༌ ཉེ༌མོ༌ ཨིན༌ནོག༌' ཟེར༌ཏེ༌ ཤོད༌། 10 ཨིན༌ནའང༌ གྲོང༌ཁྱེར༌ཞིག༌གི༌ ནང༌ང༌ ལེབས༌ཏེ༌ སུ༌ཞིག༌གིའང༌ ཁྱོ༌ཞ༌ གའ༌སུས༌ མ༌ཅོ༌ན༌, ཏེ༌ གྲོང༌ཁྱེར༌རི༌ ལམ༌མི༌ཀ༌ སོང༌ ཡང༌ ཟེར༌, 11 'ང༌ཞའེ༌ པ༌བུའ༌ ཇར༌ཁན༌ནི༌ ཁྱོ༌ཞའེ༌ གྲོང༌ཁྱེར༌རི༌ ཐལ༌བ༌བོའང༌ ཕིས༌ཏེ༌ ང༌ཞའེ༌ ཁྱོ༌ཞ༌གུན༌ དཀོན༌མཆོག༌གི༌ ཆད༌པའེ༌ ཕིའ༌ བོར༌ཏེ༌ ཨིན༌ཁན༌བོ༌ ལྟན༌ནད༌། ཏེ༌ནེའང༌ འི༌བོ༌ ཧ༌གོ༌གོས༌: དཀོན༌མཆོག༌གི༌ གྱལ༌སྲིད༌ ཉེ༌མོ༌ ཨིན༌ནོག༌།' 12 ངའེ༌ ཁྱོ༌ཞའ༌ ཟེར༌རད༌, དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ ཞག༌ག༌, སོ༌དོམ༌ གྲོང༌ཁྱེར༌རི༌ མི༌ངན༌པ༌གུན༌ནི༌ སང༌ ཏེ༌ གྲོང༌ཁྱེར༌རི༌ མི༌གུན༌ལ༌ ཆད༌པ༌ མང༌ང༌ སྲན༌ཏྲེ༌ ཕོག༌ཨིན༌།"
13 "ཀོ༌ར༌ཟིན༌པ༌ དང༌ བེད༌སའི༌ད༌པ༌ གུན༌ ཁྱོ༌ཞ༌གུན༌ལ༌ ཙམ༌ཤིག༌གི༌ ཇིགས༌ནང༌ མ༌ནོག༌། གལ༌ཏེས༌ ཁྱོ༌ཞའེ༌ ནང༌ང༌ ལྟན༌ཁན༌ནི༌ ཛད༌པ༌གུན༌, ཏཱ༌ཡིར༌ དང༌ སི༌དཱོན༌ གྲོང༌ཁྱེར༌ ངན༌པ༌གུན༌ནི༌ ནང༌ང༌ ལྟན༌པིན༌ན༌, ཁོང༌གུན༌ནི༌ སྡིག༌པ༌ སྤངས༌ཏེ༌ གྱོད༌པ༌ ཅོས༌ཏེ༌ ཕ༌ཙའ༌ གོན༌ཏེ༌, གོག༌ཐལ༌ ཡོག༌ཨིན༌ རྡུག༌པོ༌ ཅོས༌ཏེ༌ ཡོད༌གྲོ༌། 14 ཨིན༌ནའང༌ དཀོན༌མཆོག༌གི༌ ཁྲིམས༌ཅད༌དི༌ ཞག༌ག༌, ཏཱ༌ཡིར༌ དང༌ སི༌དཱོན༌པ༌ གྲོང༌ཁྱེར༌རི༌ མི༌ངན༌པ༌གུན༌ནི༌ སང༌ ཁྱོ༌ཞའ༌ ཆད༌པ༌ མང༌ང༌ སྲན༌ཏྲེ༌ ཕོག༌ཨིན༌། 15 ཝ༌ ཀ༌ཕར༌ན༌ཧུམ༌པ༌གུན༌ ཅི༌ ཁྱོ༌ཞའ༌, རྩི༌ཝ༌ ཏངས༌ཏེ༌ ནམ༌ཁའ༌ ཁྱེར༌ར༌ ཛད༌ཨིན༌ སམ༌མ༌ རག༌ག༌? མ༌ནེ༌ མི༌ཐེན༌། ཁྱོ༌ཞ༌གུན༌ ཉལ༌ཝའེ༌ ནང༌ང༌ ཕང༌ང༌ ཛད༌ཨིན༌།"
16 ཡེ༌ཤུའི༌ ཁོང༌ངི༌ ལོབ༌ཕྲུགས༌གུན༌ལ༌ མོལས༌, "ཁྱོ༌ཞའེ༌ ལོན༌ ཉན༌ཁན༌གུན༌ནི༌ ངའང༌ ཉན༌ཏེ༌ ཨིན༌ནོག༌, ཡང༌ ཁྱོ༌ཞའེ༌ ལོན༌ མ༌ཉན༌ཁན༌གུན༌ནི༌ ངའང༌ མ༌ཉན༌ན༌ ཨིན༌ནོག༌། ང༌ མ༌ཉན༌ཁན༌གུན༌ནི༌ ང༌ ཀལ༌ལ༌ ཛད༌ཁན༌བོའ༌ མ༌ཉན༌ན༌ ཨིན༌ནོག༌།"
17 ཏེ༌ནེ༌ རྡུན༌ཅུ༌དོན༌ཉིས༌པོ༌ སྐྱིད༌པོ༌ ཉམ༌པོ༌ ལོགས༌ཏེ༌ ལེབས༌ཏེ༌ ཟེརས༌, "གཙོ༌བོ༌, ཉེ༌རང༌ངི༌ ཚན༌ནི༌ ནང༌ང༌, རྡུད༌ ཚང༌མེའང༌ ང༌ཞའེ༌ ཁའ༌ཉནས༌།"
18 ཡེ༌ཤུའི༌ ཁོང༌གུན༌ལ༌ མོལས༌, "ཤེ༌ཏན༌ སྐམ༌ལག༌ ཙོགས༌ལ༌ ནམ༌ཁའེ༌ ནང༌ནེ༌ བུད༌ད༌ལ༌ ངའེ༌ ཐོང༌། 19 ལྟོས༌, ངའེ༌ ཁྱོ༌ཞ༌གུན༌ལ༌ རུལ༌ དང༌ སྡིག༌པ༌རཱ༌ཙེ༌ *10:19 ཧིན༌དི༌ སྐད༌དི༌ ནང༌ང༌ བིད༌ཆུའ༌ ཟེར༌ར༌ནོག༌ གུན༌ རྐང༌ཡོག༌ག༌ ནན༌ཅེས༌སི༌ ཝང༌ ཡང༌ ང༌དང༌གུན༌ནི༌ གྲ༌འོ༌ ཤེ༌ཏན༌ནི༌ ཝང༌ ཚང༌མ༌ མེད༌ཁན༌ ཅོ༌ཅེས༌སི༌ ཁྱུད༌དའང༌ ཏངས༌ཏེ༌ ཨིན༌ ཡང༌ ཁྱོ༌ཞ༌གུན༌ལ༌ སུ༌ཞིག༌གིའང༌ ནོད༌སྐྱལ༌ མི༌ཉན༌། 20 རྡུད༌གུན༌ ཁྱོ༌ཞའེ༌ ཁའ༌ ཉན༌ཁན༌བོའེ༌ཀ༌ གའ༌མོ༌ མ༌ཅོ༌, ཨིན༌ནའང༌ ཁྱོ༌ཞ༌གུན༌ནི༌ མིང༌ ནམ༌ཁའེ༌ ནང༌ང༌ བྲིས༌ཏེ༌ ཨིན༌ཁན༌བོའེ༌ཀ༌ གའ༌མོ༌ ཅོས༌།
ཡེ༌ཤུའི༌ ཡབ༌ དཀོན༌མཆོག༌ག༌ སྟོད༌པ༌ ཕུལ༌ལ༌ ཛདས༌།
10:21 ནེ༌ 24
21 ཏེན༌ན༌ ཏུས༌ལ༌ གཙོ༌བོ༌ ཡེ༌ཤུ༌ དམ༌པའེ༌ ཐུག༌ཉིད༌ གྱུད༌ཏེ༌ གའ༌མོའེ༌ གངས༌ཏེ༌ མོལས༌, "ངའེ༌ ཡབ༌ ནམ༌ཁའ༌ དང༌ ཇིག༌རྟེན༌ནི༌ གཙོ༌བོ༌ལེ༌, ངའེ༌ ཉེ༌རང༌ང༌ སྟོད༌པ༌ ཕུལ༌ལད༌ ཅིའ༌ཟེར༌ན༌ ཉེ༌རང༌ངི༌ དྲང༌པོ༌ ལམ༌བོ༌ ཁས༌པ༌ དང༌ ཡོན༌ཏན༌ཅན༌གུན༌ནེ༌ སྦས༌ཏེ༌, ཕྲུ༌གུ༌ ཙོགས༌ ཡོད༌ཁན༌གུན༌ལ༌ སྔོན༌ ཅུག༌ག༌ ཛདས༌། འོ༌ན༌ ཡབ༌ལེ༌ ཏེ༌ཟུག༌ ཛད༌ཅེས༌པོའ༌ ཉེ༌རང༌ ཐུགས༌ཐད༌།"
22 "ངའེ༌ ཡབ༌ དཀོན༌མཆོག༌གི༌ ཝང༌ཆ༌ ཚང༌མ༌ ངའ༌ སྟད༌ད༌ ཛད༌ཏེ༌ ཨིན༌། ཡབ༌བི༌ མ༌ནེ༌ ཞན༌སུའང༌ བུ༌ཚ༌ ངོ༌ མི༌ཤེས༌, ཡང༌ བུ༌ཚའེ༌ མ༌ནེ༌ ཞན༌སུའང༌ ཡབ༌ ངོ༌ མི༌ཤེས༌, ཨིན༌ནའང༌ ངའེ༌ ལྡམ༌ཁན༌གུན༌ལ༌ ཡབ༌ སྔོན༌ཅུག༌ཨིན༌།"
23 ཏེ༌ནེ༌ ལོབ༌ཕྲུགས༌གུན༌ ཆོགས༌ལ༌ གྱུར༌ཏེ༌ ཞན༌མ༌གུན༌ལ༌ ཚོར༌ མ༌ཅུག༌ག༌ མོལས༌, "ངའེ༌ ཅོ༌ཁན༌གུན༌ ཐོང༌ཁན༌ནི༌ ཁྱོ༌ཞའེ༌ མིག༌གུན༌ ཅིན༌ལབས༌ཅན༌ ཨིན༌། 24 ངའེ༌ ཁྱོ༌ཞའ༌ དེན༌བ༌ ཟེར༌རད༌, ཁྱོ༌ཞ༌གུན༌ལ༌ ཐོང༌ཁན༌ དང༌ ཚོར༌ཁན༌ གུན༌, སྔུན༌མའེ༌ ལུང༌སྟོན༌པ༌ དང༌ གྱལ༌པོ༌ མང༌པོ༌ཞིག༌གི༌ ཐོང༌ཅེས༌ དང༌ ཚོར༌ཅེས༌སི༌ དོད༌པ༌ ཡོད༌ནའང༌ མ༌ཐོང༌ང༌ ཡང༌ མ༌ཚོར༌ར༌ ཨིན༌པིན༌།"
ས༌མར༌རི༌ཡཱ༌པ༌ ཟང༌པོའེ༌ རུངས༌།
10:25 ནེ༌ 37
25 ཆོས༌ཁྲིམས༌ལ༌ ཁས༌པ༌ཞིག༌ ལངས༌ཏེ༌ གཙོ༌བོ༌ ཡེ༌ཤུའ༌ ཚོད༌ལྟ༌ཅེས༌ལ༌ ཏྲིས༌, "ལོབ༌པོན༌ལེ༌, ཐའ༌མེད༌པའེ༌ མི༌ཚེ༌ ནོར༌སྐལ༌ལ༌ ཐོབ༌ཅེས༌སི༌ ཕིའ༌ ངའེ༌ ཅི༌ ཅོ༌གོས༌?"
26 ཡེ༌ཤུའི༌ ཁོའ༌ མོལས༌, "བཀའ༌ཁྲིམས༌སི༌ སྤེ༌ཆ༌གུན༌ནི༌ ནང༌ང༌ ཅི༌ བྲིའ༌ ཛད༌ཏེ༌ དུག༌། ཁྱོ༌རང༌ངི༌ ཏེ༌གུན༌ནི༌ ནང༌ནེ༌ ཅི༌ ཧ༌གོ༌?"
27 ཁོའེ༌ ལན༌ཏངས༌, "གཙོ༌བོ༌ དཀོན༌མཆོག༌ག༌ སྙིང༌ གང༌པོ༌, སེམས༌ གང༌པོ༌, སྟོབས༌ གང༌པོ༌ དང༌ སམ༌བ༌ གང༌པོ༌ནེ༌ ཅམས༌པ༌ ཅོས༌ †10:27 ཁྲིམས༌སི༌ སྤེ༌ཆ༌ ཉིས༌པའེ༌ 6:5 , ཡང༌ རང༌ང༌ ཅམས༌པ༌ ཅོ༌ཁན༌ ཙོགས༌ ཁྱོ༌རང༌ངི༌ ཁྱིམ༌ཚེས༌པའང༌ ཅམས༌པ༌ ཅོས༌། ‡10:27 ཁྲིམས༌སི༌ སྤེ༌ཆ༌ ཏང༌པོའེ༌ 19:18 "
28 ཡེ༌ཤུའི༌ ཁོའ༌ མོལས༌, "ཁྱོ༌རང༌ངི༌ ལན༌ དྲང༌པོ༌ ཏངས༌། ཏ༌ ཏེན༌ན༌ ཙོགས༌ ཅོ༌ན༌ ཐའ༌མེད༌པའེ༌ མི༌ཚེ༌ ཐོབ༌ཨིན༌།"
29 ཁོའེ༌ ཁོ༌རང༌ ཤེས༌རབས༌ཅན༌ ཨིན༌ཁན༌བོ༌ ལྟན༌ཅེས༌ལ༌ ཡེ༌ཤུའ༌ ཏྲིས༌, "ངའེ༌ ཁྱིམ༌ཚེས༌ སུ༌ ཨིན༌ནོག༌?"
30 ཡེ༌ཤུའི༌ རུངས༌ གྱུད༌ཏེ༌ ལན༌སལས༌, "ཡ༌ཧུ༌དཱ༌པ༌ཞིག༌ ཡེ༌རུ༌ཤ༌ལེམ༌ནེ༌ ཐུར༌ལ༌ ཡེ༌རི༌ཀོའ༌ སོང༌, ཁོའ༌ ལམ༌མ༌ ཅག༌པའེ༌ སྤུང༌གོལ༌ ཅོས༌ཏེ༌ ལྗེར༌ཉལ༌ ཅོས༌ ཡང༌ ཁོའ༌ སྲན༌ཏྲེ༌ རྡུངས༌ཏེ༌ ཤི༌ཅེས༌ལ༌ བོརས༌། 31 ཏེན༌ན༌ ལམ༌ནེ༌ ཡ༌ཧུ༌དཱ༌པའེ༌ བླ༌མ༌ཞིག༌ སོང༌, ཡང༌ ཁོ༌ ཐོང༌ང༌ཅིག༌ རོགས༌ ཅོའེ༌ སང༌ ཁོ༌ ལམ༌མི༌ འ༌ངོ༌ ཆོགས༌ནེ༌ སོང༌། 32 ཏེན༌ན༌ ཙོགས༌ལ༌ ཆོད༌ཁང༌ངི༌ ནང༌ང༌ ཞབ༌སྟོག༌ ཞུ༌ཁན༌ ལི༌ཝི༌ཞིག༌ ཏེ༌ཀ༌ ལེབས༌ཏེ༌ ཁོ༌ ཐོང༌ང༌ཅིག༌ ཁོའང༌ ལམ༌མི༌ འ༌ངོ༌ ཆོགས༌ནེ༌ སོང༌། 33 ཨིན༌ནའང༌ ས༌མར༌རི༌ཡཱ༌པ༌ བེས༌པ༌ཞིག༌ ཏེ༌ཀ༌ ལེབ༌ ཡང༌ ཁོའེ༌ ཕོག༌ཁན༌ནི༌ མི༌བོ༌ ཐོང༌ང༌ཅིག༌ ཁོའེ༌ཀ༌ སྙིང༌རྗེ༌ སྐྱེས༌། 34 ཁོའེ༌ དུན༌ལ༌ སོང༌ཏེ༌ ཾཾཾཾཾམ༌ཁའ༌གུན༌ གྱལ༌ཅེས༌ལ༌ མར༌ནག༌ དང༌ རྒུན༌ཆང༌ ལུགས༌ཏེ༌ རས༌ ལག༌མོ༌ སྲིལས༌། ཏེ༌ནེ༌ ཁོ༌རང༌ངི༌ བུང༌བུའི༌ཀ༌ སྐྱོན༌ཏེ༌ བེས༌ཁང༌ང༌ ཁྱེར༌ཏེ༌ ཁོའ༌ ལྟ༌སྟོག༌ ཅོས༌། 35 སྟིང༌མ༌ཞག༌པོ༌ ཁོའེ༌ བེས༌ཁང༌ སྲུལ༌ཁན༌བོའ༌ མུལ༌ལི༌ པེ༌ནེ༌ ཉིས༌ ཏངས༌ཏེ༌, 'འི༌ མི༌བོའ༌ ལྟ༌སྟོག༌ ཅོས༌, འི༌ སང༌ མང༌ང༌ ཆ༌ན༌ ང༌ ལོགས༌ཏེ༌ ཡོང༌ང༌ཅིག༌ ཁྱོ༌རང༌ང༌ ཏང༌ཨིན༌' ཟེརས༌།"
36 "ཏེ༌ སུམ༌མི༌ ཕྲོ༌ནེ༌ ཅག༌པའེ༌ སྤུང༌གོལ༌ ཅོ༌ཁན༌ མི༌བོའེ༌ ཁྱིམ༌ཚེས༌པ༌བོ༌ ཁྱོ༌རང༌ངི༌ སུ༌ ཨིན༌ནོག༌ སམ༌མ༌རག༌?"
37 ཆོས༌ཁྲིམས༌ལ༌ ཁས༌པ༌བོའེ༌ ལན༌ཏངས༌, "ཁོའ༌ སྙིང༌རྗེ༌ ལྟན༌ཁན༌བོ༌།" ཡེ༌ཤུའི༌ ཁོའ༌ མོལས༌, "སོང༌ཏེ༌ ཏེན༌ན༌ ཙོགས༌ ཅོས༌།"
ཡེ༌ཤུ༌ མིར༌ཡམ༌ དང༌ མར༌ཐཱའེ༌ ཁང༌པ༌ སྐྱོདས༌།
10:38 ནེ༌ 42
38 གཙོ༌བོ༌ ཡེ༌ཤུ༌ དང༌ ཁོང༌ངི༌ ལོབ༌ཕྲུགས༌གུན༌ ཡེ༌རུ༌ཤ༌ལེམ༌མ༌ སྐྱོད༌ ཟ༌ནེ༌ གམ༌ཡུལ༌ཞིག༌ག༌ ལེབ༌, ཏེ༌རུ༌ མར༌ཐཱ༌ ཟེར༌ཁན༌ནི༌ བུ༌མོ༌ཞིག༌གི༌ ཁོང༌ང༌ ཁོ༌རང༌ངི༌ ཁང༌པའ༌ གའ༌སུས༌ ཞུས༌། 39 ཁོའེ༌ ནོ༌མོ༌ མིར༌ཡམ༌ གཙོ༌བོའེ༌ ཞབས༌སི༌ དུན༌ལ༌ དུགས༌ཏེ༌ ཁོང༌ངི༌ ལབ༌ཞ༌གུན༌ལ༌ ཉན༌ནད༌པིན༌། 40 ཨིན༌ནའང༌ ཡེ༌ཤུའ༌ དོན༌ཏང༌ གྱས༌པ༌ གྲལ༌གྲིག༌ ཅོ༌ཅེས༌སི༌ ནང༌ང༌ མར༌ཐཱ༌ ཨེལ༌ཏེ༌ ལུས༌། ཁོ༌ ཡེ༌ཤུ༌ ཡོད༌ས༌ ཡོངས༌ཏེ༌ ཟེརས༌, "གཙོ༌བོ༌ལེ༌, ངའེ༌ ནོ༌མོའེ༌ ང༌རང༌ ཅིག༌པོའ༌ ལས༌ ཚང༌མ༌ ཅོ༌ ཅུག༌ཁན༌བོའ༌ སྣང༌ང༌ སལ༌ལ༌ མེད༌ད༌? ཁོའ༌ ངའ༌ ཡ༌ཏོ༌ ཅོས༌ མོལ༌ལའང༌།"
41 ཨིན༌ནའང༌ གཙོ༌བོའེ༌ ཁོའ༌ མོལས༌, "མར༌ཐཱ༌, མར༌ཐཱ༌, ཏེ༌ ལས༌ མང༌པོའེ༌ ཕིའ༌ ཁྱོ༌རང༌ངི༌ ཚེར༌ཁ༌ ཅོས༌ཏེ༌ ཁྱོ༌རང༌ ཨེལ༌དུག༌། 42 ཨིན༌ནའང༌ ལས༌ ཅིག༌ཅིག༌ ནི༌ ཁག༌ཅན༌ ཨིན༌ ཡང༌ མིར༌ཡམ༌མི༌ ཏེ༌བོ༌ ལྡམས༌ཏེ༌ ཨིན༌ནོག༌, ཁོའེ༌ ཀ༌ནེ༌ ཏེ༌བོ༌ སུའང༌ ཀོགས༌ཏེ༌ ཁྱེར༌ མི༌ཉན༌།"