1 ཞག༌ དྲུག༌གི༌ སྟིང༌ནེ༌, གཙོ༌བོ༌ ཡེ༌ཤུའི༌ པི༌ཏྲར༌, ཡ༌ཀོབ༌ དང༌ ཁོའེ༌ ནོ༌ ཡོ༌ཧཱ༌ནན༌ ཁྲིད༌ཏེ༌ སུའང༌ མེད༌ས༌ རི༌ ཐོན༌པོ༌ཞིག༌གི༌ཀ༌ སྐྱོདས༌། 2 ཏེ༌རུ༌ ཁོང༌གུན༌ནི༌ དུན༌ལ༌ ཡེ༌ཤུའི༌ སྐུ༌ཟུགས༌ གང༌པོ༌ གྱུར༌ཏེ༌, ཁོང༌ངི༌ ཞལ༌དོང༌ ཉི༌མའེ༌ ཟེར༌ ཙོགས༌ ཡང༌ ཁོང༌ངི༌ ནམ༌ཟ༌ ཀར༌པོ༌ ལྡང༌ཤན༌ གྱུར༌། 3 ཧུན༌མེད༌ལ༌ ཁོང༌གུན༌ནི༌ ལུང༌སྟོན༌པ༌ མོ༌ཟེས༌ དང༌ ཨེ༌ལི༌ཡཱའེ༌ ཡེ༌ཤུ༌ ཉམ༌པོ༌ ཞལ༌ཏ༌ སལ༌ཨིན༌ ཇལ༌།

4 པི༌ཏྲར༌རི༌ ཡེ༌ཤུའ༌ ཟེརས༌, "གཙོ༌བོ༌ལེ༌, ང༌ཞའ༌ འི༌ཀ༌ ཡོད༌ཅེས༌པོ༌ མ༌གྱལ༌ལ༌ སོང༌། གལ༌ཏེས༌ ཉེ༌རང༌ ཐུགས༌ཐད༌ན༌ ངའེ༌ ཞུགས༌ས༌ སུམ༌ རྩིག༌ཨིན༌, ཉེ༌རང༌ངི༌ ཕིའ༌ ཅིག༌, མོ༌ཟེས༌སི༌ ཕིའ༌ ཅིག༌, ཡང༌ ཨེ༌ལི༌ཡཱའེ༌ ཕིའ༌ ཅིག༌།"

5 ཁོའེ༌ ཏེ༌གུན༌ ཟེར༌ཨིན༌ ཡོད༌ ཟ༌ནེ༌, སྲིན༌ ལྡང༌ཤན༌ཞིག༌གི༌ ཁོང༌གུན༌ ཀབས༌ ཡང༌ སྲིན༌ནི༌ ནང༌ནེ༌ སུང༌སྐད༌ཅིག༌གི༌ མོལས༌, "འི༌བོ༌ ངའེ༌ ཅེས༌པའེ༌ བུ༌ཚ༌ ཨིན༌, ཁོ༌ ཉམ༌པོ༌ ང༌ མ༌སྲན༌ཏྲེ༌ ཐད༌པོ༌ ཨིན༌, ཁོའེ༌ ཟེར༌ཁན༌གུན༌ལ༌ ཉོན༌།" 6 ཏེ༌བོ༌ ཚོར༌ར༌ཅིག༌ ལོབ༌ཕྲུགས༌གུན༌ མ༌སྲན༌ཏྲེ༌ ཇིགས༌ཏེ༌ ཁལ༌བུག༌ག༌ གྱེལ༌།

7 ཨིན༌ནའང༌ ཡེ༌ཤུ༌ སྐྱོད༌ཏེ༌ ཁོང༌གུན༌ལ༌ ཆག༌ཐུག༌ག༌ ཛད༌ཏེ༌ མོལས༌, "ལོང༌ཤིག༌ ཇིགས༌ མ༌ཇིགས༌།" 8 ཁོང༌གུན༌ནི༌ གོ༌ སྟགས༌ཏེ༌ ལྟའ༌ཅིག༌ ཡེ༌ཤུ༌ ཅིག༌པོ༌ མ༌ནེ༌ མ༌ཐོང༌།

9 རི༌ནེ༌ བབས༌ཏེ༌ སྐྱོད༌ཨིན༌ ཡོད༌ ཟ༌ནེ༌, ཡེ༌ཤུའི༌ ཁོང༌གུན༌ལ༌ བཀའ༌ སལས༌, "མི༌རིགས༌སི༌བུ༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ལང༌ང༌ ཛད༌ཏེ༌ མ༌ནེ༌, ཁྱོ༌ཞའ༌ ཐོང༌ཁན༌བོ༌ སུའང༌ མ༌ཤད༌།"

10 ལོབ༌ཕྲུགས༌གུན༌ནི༌ ཁོང༌ང༌ ཏྲིས༌, "ཏེ༌ནེ༌ ཆོས༌ཁྲིམས༌ལ༌ ཁས༌པ༌གུན༌ནི༌ མ༌ཤི༌ཀ༌ སྐྱོད༌དི༌ སང༌ སྔུན༌ལ༌ ལུང༌སྟོན༌པ༌ ཨེ༌ལི༌ཡཱ༌ སྐྱོད༌གོས༌ ཅིའ༌ ཟེར༌ཏེ༌ ཨིན༌ནོག༌།"

11 ཡེ༌ཤུའི༌ ལན༌སལས༌, "ཏན༌ཏན༌ལ༌, ཅི༌ཚང༌མ༌ གྲལ༌གྲིག༌ ཅོ༌ཅེས༌ལ༌ ཨེ༌ལི༌ཡཱ༌ སྔུན༌ལ༌ ཡོང༌གོས༌། 12 ངའེ༌ ཁྱོ༌ཞའ༌ ཟེར༌རད༌, ཨེ༌ལི༌ཡཱ༌ ཡོང༌ ཚར༌ཏེ༌ ཨིན༌, ཨིན༌ནའང༌ ཁོང༌གུན༌ནི༌ ཁོ༌ ངོ༌མ༌ཤེས༌ ཡང༌ ཁོ༌ ཉམ༌པོ༌ ཅོ༌ཨིན༌ སམ༌ཁན༌ ཚང༌མ༌ ཅོས༌། ཏེན༌ན༌ ཙོགས༌ལ༌ མི༌རིགས༌སི༌བུའང༌ ཁོང༌གུན༌ནི༌ ལག༌ནེ༌ རྡུག༌ངལ༌ ཉོང༌གོས༌ཨིན༌།" 13 ཏེ༌ནེ༌ ཡེ༌ཤུའི༌ ཁྲུས༌སལ༌ཁན༌ ཡོ༌ཧཱ༌ནན༌ནི༌ སྐོར༌ལ༌ མོལ༌ཏེ༌ ཨིན༌ཁན༌བོ༌ ལོབ༌ཕྲུགས༌གུན༌ལ༌ ཧ༌གོ༌།

14 ཁོང༌གུན༌ རི༌ནེ༌ བབས༌ཏེ༌ མི༌ཚོགས༌ ཡོད༌ས༌ སྐྱོད༌ད༌ཅིག༌, མི༌ཞིག༌ ཡེ༌ཤུའི༌ དུན༌ལ༌ ཡོངས༌ཏེ༌ པིག༌དོང༌ ཙུགས༌ཏེ༌ 15 ཞུས༌, "གཙོ༌བོ༌ལེ༌, ངའེ༌ བུ༌ཚའེ༌ཀ༌ སྙིང༌རྗེ༌ ཛད༌དའང༌ ཇུ༌ཇུ༌། ཁོ༌ གྱེལ༌ཏེ༌ ཟུགས༌པོ༌ གང༌པོ༌ དར༌ཨིན༌ ནགས༌ སྲན༌ཏྲེ༌ ཐོང༌དུག༌། ལན༌ མང༌པོ༌ ཁོ༌ མེ༌ ཡང༌ ཆུའི༌ ནང༌ང༌ གྱེལ༌། 16 ཉེ༌རང༌ངི༌ ལོབ༌ཕྲུགས༌གུན༌ ཡོད༌ས༌ ཁྱོངས༌པིན༌ ཨིན༌ནའང༌ ཁོང༌གུན༌ནི༌ ཁོའ༌ ཕན༌ཅུག༌ མ༌ཉན༌།"

17 ཡེ༌ཤུའི༌ མོལས༌, "ཏད༌པ༌ མེད༌ཁན༌ དང༌ མི༌རབས༌ ངན༌པ༌, ནམ༌ཚོག༌པ༌ ང༌ ཁྱོ༌ཞ༌གུན༌ ཉམ༌པོ༌ དུག༌? ནམ༌ཚོག༌པ༌ ངའེ༌ ཁྱོ༌རང༌གུན༌ལ༌ སྲན༌གོས༌? བུ༌ཚ༌བོ༌ འི༌ཀ༌ ང༌ ཡོད༌ས༌ ཁྱོང༌།" 18 ཡེ༌ཤུའི༌ རྡུད༌པོའ༌ ཁའ༌སྐྱེའ༌ ཛད༌པ༌ ཁོ༌ ཕྲུ༌གུའི༌ ནང༌ནེ༌ བིང༌ཏེ༌ སོང༌ ཡང༌ ཏེན༌ན༌མལ༌ལ༌ ཕྲུ༌གུ༌བོ༌ གྱལ༌།

19 ཏེ༌ནེ༌ ལོབ༌ཕྲུགས༌གུན༌ ཡེ༌ཤུ༌ ཡོད༌ས༌ ཡོངས༌ཏེ༌ སུའང༌ ཚོར༌ མ༌ཅུག༌ག༌ ཏྲིས༌, "ང༌ཞ༌གུན༌ལ༌ རྡུད༌པོ༌ ཅིའ༌ ཕིང༌ མ༌ཉན༌ན༌ ཨིན༌ནོག༌?"

20 ཁོང༌ངི༌ ལན༌སལས༌, "ཅིའ༌ཟེར༌ན༌ ཁྱོ༌ཞའ༌ དཀོན༌མཆོག༌གི༌ ནང༌ང༌ ཏད༌པ༌ མངས༌ཏེའང༌ ཆུ༌ངུན༌ ཡོད༌ཏེ༌ ཨིན༌ནོག༌། ངའེ༌ ཁྱོ༌ཞའ༌ དེན༌བ༌ ཟེར༌རད༌, གལ༌ཏེས༌ ཁྱོ༌ཞའ༌ ཉུང༌སྐར༌རི༌ ས༌འོན༌ ཆུ༌ངུན༌ ཟམ༌ཤིག༌གི༌ ཏད༌པ༌ ཡོད༌ན༌ འི༌ རི༌བོ༌ འི༌ཀ༌ནེ༌ འ༌ཀ༌ སོང༌ ཟེར༌ན༌ ཆེན༌, ཡང༌ ཁྱོ༌ཞ༌གུན༌ལ༌ ཅོ༌ མི༌ཉན༌ཅེས༌ ཅའང༌ མི༌ཡོང༌།"

21 *17:21 སྔུན༌མའེ༌ གིརིས༌སི༌ སྤེ༌ཆའེ༌ ནང༌ང༌ 17:21 བོ༌ བྲིས༌ཏེ༌ མེད༌ཏེ༌ ཨིན༌ནོག༌། ཨིན༌ནའང༌ སྟིང༌མ༌གུན༌ནི༌ ནང༌ང༌ "ཨིན༌ནའང༌ འི༌ཙོགས༌སི༌ རྡུད༌གུན༌ མོས༌ལམ༌ དང༌ ཉེ༌ནས༌ལ༌ དུག༌ཅེས༌ གྱུད༌ཏེ༌ མ༌ཚོགས༌ ཕིང༌ ཉན༌ན༌ མ༌ནོག༌" ཐུད༌ཏེ༌ ཨིན༌ནོག༌། 22 ལོབ༌ཕྲུགས༌ ཅུག༌ཉིས༌པོ༌ གཱ༌ལིལ༌ལིའི༌ ཡུལ༌ཇོངས༌སི༌ ནང༌ང༌ ཛོམ༌ཏེ༌ ཡོད༌ཏུས༌, ཁོང༌གུན༌ལ༌ ཡེ༌ཤུའི༌ མོལས༌, "མི༌རིགས༌སི༌བུའ༌ ངོ༌ལོག༌ ཅོས༌ཏེ༌ གྲ༌འོ༌གུན༌ནི༌ ལག༌ག༌ སྟད༌ཨིན༌ 23 ཁོང༌གུན༌ནི༌ ཁོ༌ སད༌ཨིན༌ ཡང༌ ཞག༌ སུམ༌པའེ༌ ཞག༌ག༌ སོན༌ཏེའ༌ ལངས༌ཤུག༌ག༌ ཛད༌ཨིན༌།" ལོབ༌ཕྲུགས༌གུན༌ནི༌ སེམས༌ ཚེར༌ཁའེ༌ གངས༌།

24 གཙོ༌བོ༌ ཡེ༌ཤུ༌ དང༌ ཁོང༌ངི༌ ལོབ༌ཕྲུགས༌གུན༌ ཀ༌ཕར༌ན༌ཧུམ༌མི༌ གྱལ༌ས༌ ལེབ༌བ༌ཅིག༌, ཆོད༌ཁང༌ངི༌ ཁྲལ༌ ལྡུ༌ཁན༌བོ༌ པི༌ཏྲར༌ ཡོད༌ས༌ ཡོངས༌ཏེ༌ ཏྲིས༌, "ཁྱོ༌རང༌ངི༌ ལོབ༌པོན༌ནི༌ ཆོད༌ཁང༌ངི༌ ཕིའ༌ ཁྲལ༌ ཤལ༌ལ༌ མ༌ནོག༌ག༌?"

25 པི༌ཏྲར༌རི༌ ཟེརས༌, "ཤལ༌ལ༌ ཛད༌ད༌ནོག༌།" པི༌ཏྲར༌ ནང༌ང༌ ཡོང༌ང༌ཅིག༌ ཁོའེ༌ ཟེར༌རི༌ སང༌ སྔུན༌ལ༌ ཡེ༌ཤུའི༌ ཏྲིའ༌ ཛདས༌, "ཤི༌མོན༌, ཅི༌ སམ༌མ༌རག༌? ཇིག༌རྟེན༌ནི༌ གྱལ༌པོ༌གུན༌ནི༌ ཁྲལ༌ སུའི༌ ཀ༌ནེ༌ ལེན༌དུག༌, ཁོ༌རང༌ངི༌ ཕྲུ༌གུ༌ ཀ༌ནེ༌ ལེན༌དུག༌ག༌ ཡ༌ ཞན༌མའེ༌ ཀ༌ནེ༌?"

26 པི༌ཏྲར༌རི༌ ལན༌ཏངས༌, "ཞན༌མ༌གུན༌ནི༌ ཀ༌ནེ༌།" ཡེ༌ཤུའི༌ མོལས༌, "ཏེ༌ནེ༌ ཕྲུ༌གུ༌གུན༌ནི༌ ཁྲལ༌ ཤལ༌ མ༌གོས༌། 27 ཨིན༌ནའང༌ ཁོང༌གུན༌ལ༌ ང༌ཏི༌ཀ༌ སྲོ༌ མི༌ཡོང༌ཅེས༌སི༌ ཕིའ༌ ཚོའ༌ སོང༌ཏེ༌ ཉ༌ཀུག༌ ཏོང༌, ཡང༌ ཉ༌ གོ༌མ༌ ཟུམ༌ཁན༌བོའེ༌ ཁའ༌ ཕེས༌, ཏེ༌ནང༌ང༌ ཁྱོ༌རང༌ང༌ མུལ༌ལི༌ པེ༌ནེ༌ཞིག༌ ཐོབ༌ཨིན༌། ཏེ༌བོ༌ ཁྱེར༌ཏེ༌ ང༌དང༌ ཉིས༌ཀོའེ༌ ཁྲལ༌ ཁོང༌གུན༌ལ༌ ཤོལ༌།"