2
ཨེ༌ཕེ༌སས༌སི༌ ཆོས༌ཚོགས༌ལ༌ ཞུ༌ལོན༌།
2:1 ནེ༌ 7
1 ཨེ༌ཕེ༌སས༌སི༌ ནང༌ང༌ ཡོད༌ཁན༌ནི༌ ཆོས༌ཚོགས༌སི༌ ཕོ༌ཉའ༌ འི༌བོ༌ བྲིས༌།
"འི༌ ལོན༌བོ༌ ལག༌པ༌ ཡས༌པའེ༌ ནང༌ང༌ སྐར༌མ༌ རྡུན༌ ཁུར༌ཏེ༌ སེར༌རི༌ འོད༌སྟགས༌ རྡུན༌ནི༌ ཕྲོའ༌ གྲུལ༌ཨིན༌ ཡོད༌ཁན༌ནི༌ ཆོགས༌ནེ༌ ཨིན༌། 2 ཁྱོ༌ཞའེ༌ ཀགས༌པོའེ༌ སྐབས༌ལ༌ རྩོན༌གྲུས༌ སྲན༌ཏྲེ༌ ཡང༌ སྙིང༌རུས༌ ཉམ༌པོ༌ ལས༌ ཅོ༌ཅེས༌གུན༌ ངའ༌ གྱུས༌ཡོད༌། ཁྱོ༌ཞའེ༌ མི༌ངན༌གུན༌ སྲན༌ མ༌ཐུབ༌ཁན༌བོའང༌ ང༌ གྱུས༌ཡོད༌, ཀ༌གུན༌ནི༌ ཡེ༌ཤུའི༌ སྐུ༌ཚབས༌ ཨིན༌ ཟེར༌རད༌ ཨིན༌ནའང༌ མ༌ནོག༌། ཁྱོ༌ཞའེ༌ སྟག༌ཅད༌ ཅོས༌ཏེ༌ ཏེ༌གུན༌ ཟུན༌བ༌ ཨིན༌ཁན༌བོ༌ ཤེས༌ཏེ༌ ཨིན༌ནོག༌། 3 ཁྱོ༌ཞའེ༌ ངའེ༌ ཕིའ༌ ཟོད༌པ༌ ཉམ༌པོ༌ བར༌དོ༌ ཁུར༌ཨིན༌ ཡང༌ ང༌ ཕང༌ མ༌ཕང༌ང༌ ངའེ༌ གྱབ༌ནེ༌ གྲུལས༌།
4 ཨིན༌ནའང༌ ཁྱོ༌ཞ༌གུན༌ནི༌ ང༌ གོ༌མ༌ ཙོགས༌སི༌ ཅམས༌པ༌ མི༌ཅོ༌ཅེས༌སི༌ ཕིའ༌ ངའེ༌ ཁྱོ༌ཞུའ༌གུན༌ནི༌ གྱབ༌གལ༌ལ༌ སྐྱོན༌ ཀལ༌ལད༌། 5 ཁྱོ༌ཞ༌གུན༌ མ༌ ཐོན༌པོ༌ནེ༌ བུད༌ཏེ༌ ཨིན༌ཁན༌བོ༌ ཨིད༌ཏུ༌ ཅོས༌། གྱོད༌པ༌ ཅོ༌ཤིག༌, ཡང༌ སྔུན༌མ༌ ཙོགས༌ལ༌ ལས༌གུན༌ ཅོ༌ཤིག༌། གལ༌ཏེས༌ གྱོད༌པ༌ མ༌ཅོ༌ན༌, ང༌ ཡོངས༌ཏེ༌ ཁྱོ༌ཞ༌གུན༌ནི༌ འོད༌སྟགས༌པོ༌ ནས༌སའེ༌ ཀ༌ནེ༌ ཐེན༌ཨིན༌། 6 ཨིན༌ནའང༌ ཁྱོ༌ཞ༌གུན༌ནི༌ ནི༌ཀོ༌ལ༌འི༌པ༌གུན༌ནི༌ ལས༌ ངན༌པ༌གུན༌ལ༌ ནཕ༌རད༌ ཅོ༌རུག༌, ངེའང༌ ཏེ༌བོའ༌ ནཕ༌རད༌ ཅོའད༌, ཏེ༌ ལས༌པོའ༌ སྟོད༌པ༌ ཐོབ༌ཅེས༌སི༌ འོས༌པ༌ ཨིན༌ནོག༌།
7 ནམ༌ཅོག༌ ཡོད༌ཁན༌གུན༌ནི༌ ཉོན༌ཤིག༌། དཀོན༌མཆོག༌གི༌ ཐུག༌ཉིད༌དི༌ ཆོས༌ཚོགས༌གུན༌ལ༌ མོལ༌ཁན༌གུན༌ ཉོན༌ཤིག༌། གྱལ༌ཁའ༌ ཐོབ༌ཁན༌གུན༌ལ༌ དཀོན༌མཆོག༌གི༌ ཚས༌སི༌ ནང༌ང༌ སྐྱེ༌ཁན༌ནི༌, སྲོག༌གི༌ ལྕང༌མའེ༌ ཤིང༌ཏོག༌ ཟའ༌ཅེས༌ལ༌ ཐོབ༌ཏང༌ ངའེ༌ ཏང༌ཨིན༌།
སྨིར༌ནཱ༌ ཆོས༌ཚོགས༌ལ༌ ཞུ༌ལོན༌།
2:8 ནེ༌ 11
8 འི༌ ཨི༌གེ༌བོ༌ སྨིར༌ནཱའེ༌ ནང༌ང༌ ཡོད༌ཁན༌ ཆོས༌ཚོགས༌སི༌ ཕོ༌ཉ༌ བྲིས༌།
འི༌ ལོན༌བོ༌ ཏང༌པོ༌ དང༌ སྟིང༌ཇུག༌ ཨིན༌ཁན༌ ཡང༌ ཤི༌ཏེ༌ མེད༌པིན༌ ཨིན༌ནའང༌ ཏ༌ དག༌ས༌ སོན༌པོ༌ ཡོད༌ཁན༌བོའེ༌ ཆོགས༌ནེ༌ ཨིན༌། 9 ཁྱོ༌ཞ༌གུན༌ལ༌ རྡུག༌ངལ༌ དང༌ རྡུག༌པོ༌ ཡོད༌ཁན༌བོ༌ ང༌ གྱུས༌ཡོད༌, ཨིན༌ནའང༌ སེམས༌ཉིད༌དི༌ ཐོག༌ནེ༌ ཁྱོ༌ཞ༌གུན༌ ཆུག༌པོ༌ དུག༌། ཁོ༌རང༌གུན༌ལ༌ ཡ༌ཧུ༌དཱ༌པ༌ ཟེར༌ཁན༌གུན༌ནི༌, ཁྱོ༌ཞ༌གུན༌ནི༌ སྕོད༌པའེ༌ སྐོར༌ལ༌ ངན༌པ༌ ཟེར༌ཁན༌བོའང༌ ང༌ གྱུས༌ཡོད༌། ཁོང༌གུན༌ དཀོན༌མཆོག༌གི༌ མན༌པ༌, ཤེ༌ཏན༌ནི༌ ཆོས༌ཚོགས༌ ཨིན༌ནོག༌། 10 ཁྱོ༌ཞ༌གུན༌ལ༌ རྡུག༌ངལ༌ ཐོང༌ཅེས༌ཅན༌བོའ༌ མ༌ཇིགས༌ཤིག༌། ངའེ༌ ཟེར༌རད༌, རྡུད༌དི༌ གོ༌བའེ༌ ཁྱོ༌ཞ༌གུན༌ནི༌ ཏད༌པའ༌ སྟག༌ཅད༌ ཅོ༌ཅེས༌སི༌ ཕིའ༌ ཁྱོ༌ཞའ༌ ཙོན༌ཁང༌ངི༌ ནང༌ང༌ ཀག༌ཨིན༌, ཡང༌ ཁྱོ༌ཞའ༌, ཞག༌མ༌ རྕུ༌ ཚག༌པ༌ ནགས༌ ལྟན༌ཨིན༌། ཤི༌ཅེས༌ ཡོད༌ནའང༌ གལ༌ཏེས༌ ཁྱོ༌ཞ༌གུན༌ ཏད༌པའེ༌ ནང༌ང༌ སྟན༌པོ༌ དུག༌ན༌, ངའེ༌ ཁྱོ༌ཞ༌གུན༌ལ༌ ཐའ༌མེད༌པའེ༌ མི༌ཚེའེ༌ ཐོར༌ཤོག༌པོ༌ ཏང༌ཨིན༌།
11 ནམ༌ཅོག༌ ཡོད༌ཁན༌གུན༌ནི༌ ཉོན༌ཤིག༌, དཀོན༌མཆོག༌གི༌ ཐུག༌ཉིད༌དི༌ ཆོས༌ཚོགས༌གུན༌ལ༌ མོལ༌ཁན༌བོ༌ ཉོན༌ཤིག༌། གྱལ༌ཁའ༌ ཐོབ༌ཁན༌གུན༌ལ༌ ཤི༌ཅེས༌ ཉིས༌པ༌ ཟེར༌ཁན༌ནི༌ ཐའ༌མེད༌པའེ༌ ཆད༌པ༌ ཕོག༌ཅེས༌སི༌ ཐོང༌ངོམས༌ མི༌ཡོང༌།
པེར༌ག༌མུམ༌མི༌ ཆོས༌ཚོགས༌ལ༌ ཞུ༌ལོན༌།
2:12 ནེ༌ 17
12 འི༌ ཨི༌གེ༌བོ༌ པེར༌ག༌མུམ༌མི༌ ཆོས༌ཚོགས༌སི༌ ཕོ༌ཉ༌ བྲིས༌།
འི༌ ལོན༌བོ༌, ཁའ༌ ཉིས༌ཅན༌ནི༌ ར༌འི༌ ནོན༌པོ༌ ཨིན༌ཁན༌བོའེ༌ ཆོགས༌ནེ༌ ཨིན༌། 13 ཁྱོ༌ཞའ༌ དུགས༌ཏེ༌ ཡོད༌སའེ༌ ནས༌སའ༌ ཤེ༌ཏན༌ནི༌ ཁྲིས༌སི༌ ས༌ཀྱད༌ ཨིན༌ཁན༌བོ༌ ང༌ གྱུས༌ཡོད༌། ཨིན༌ནའང༌ ཁྱོ༌ཞའེ༌ ཏད༌པ༌ མ༌ཕང༌ང༌ ངའེ༌ མིང༌ངི༌ ནང༌ང༌ དྲང༌པོ༌ དུགས༌ ནམ༌ ངའེ༌ ལོ༌ཁྱེལ༌ཅན༌ནི༌ སྤང༌པོ༌ ཨན༌ཏི༌པས༌སའང༌ ཁྱོ༌ཞའེ༌ གྱལ༌སའེ༌ ནང༌ང༌ སདས༌, ཀ༌རུ༌ ཤེ༌ཏན༌ནི༌ ཝང༌སྲུལ༌ལད༌པིན༌།
14 ཨིན༌ནའང༌ ངའ༌ ཁྱོ༌ཞའེ༌ གྱབ༌གལ༌ལ༌ སྐྱོན༌ ཀལ༌ཅེས༌ ཁ༌ཅིག༌ ཡོད༌། ཁྱོ༌ཞའེ༌, ལུང༌སྟོན༌པ༌ བཱ༌ལའམ༌མི༌ ལབ༌ཞ༌ ཏང༌ཁན༌ ཕྲོ༌པ༌ ཁ༌ཅིག༌གི༌ གྱབ༌གལ༌ ཅོའ༌ མི༌རུག༌། བཱ༌ལའམ༌མི༌ གྱལ༌པོ༌ བ༌ལག༌ག༌ ཨིས༌ར༌ཨེལ༌པ༌གུན༌ལ༌ སྐུན༌དྲ༌ ཆོད༌པ༌ ཕུལ༌ཁན༌ནི༌ ཟན༌གུན༌ ཟའ༌ཅེས༌ དང༌ ལུས༌བྲེལ༌ ངན༌པ༌ ཅོ༌ཅུགས༌ཏེ༌ སྡིག༌པའེ༌ ནང༌ང༌ གྱེལ༌ ཅུག༌ཅེས༌པོ༌ ལབས༌། 15 ཏེན༌ན༌ ཙོགས༌ལ༌, ཁྱོ༌ཞ༌གུན༌ནི༌ ཕྲོའ༌ ནི༌ཀོ༌ལ༌འི༌པ༌གུན༌ནི༌ ལབ༌ཁན༌ནི༌ ལམ༌ ངན༌པའེ༌ཀ༌ གྲུལ༌ཁན༌ རིག༌གའང༌ ཡོད༌ཏེ༌ ཨིན༌ནོག༌། 16 གྱོད༌པ༌ ཅོ༌ཤིག༌, ཏེ༌ མན༌ན༌ ང༌ གྱོགས༌པ༌ ཁྱོ༌ཞ༌གུན༌ནི༌ཀ༌ ཡོངས༌ཏེ༌ ངའེ༌ ཁའེ༌ ནང༌ནེ༌ བིང༌ཁན༌ནི༌ ར༌འི༌ ཉམ༌པོ༌ ཏེ༌གུན༌ནི༌ གྱབ༌གལ༌ལ༌ ནོལ༌ཨིན༌།
17 ནམ༌ཅོག༌ ཡོད༌ཁན༌གུན༌ནི༌ ཉོན༌ཤིག༌, དཀོན༌མཆོག༌གི༌ ཐུག༌ཉིད༌དི༌ ཆོས༌ཚོགས༌གུན༌ལ༌ མོལ༌ཁན༌གུན༌ ཉོན༌ཤིག༌། གྱལ༌ཁའ༌ ཐོབ༌ཁན༌གུན༌ལ༌ ངའེ༌ སང༌ཝའེ༌ ཏ༌གི༌ མན༌ན༌ ཟེར༌ཁན༌བོ༌ དང༌ མིང༌ སོ༌མ༌ སྐོས༌ཁན༌ནི༌ རྡོའ༌ ཀར༌པོ༌ ཏང༌ཨིན༌, ཏེན༌ན༌ རྡོའ༌ ཐོབ༌ཁན༌བོའ༌ མ༌ནེ༌ ཡང༌སུའང༌ ཏེ༌ མིང༌བོ༌ མི༌ཤེས༌།
ཐི༌འ༌ཏི༌རཱའི༌ ཆོས༌ཚོགས༌ལ༌ ཞུ༌ལོན༌།
2:18 ནེ༌ 29
18 འི༌ ཨི༌གེ༌བོ༌ ཐི༌འ༌ཏི༌རཱའི༌ ཆོས༌ཚོགས༌སི༌ ཕོ༌ཉ༌ བྲིས༌།
འི༌ ལོན༌བོ༌, དཀོན༌མཆོག༌གི༌ བུ༌ཚ༌ ཀ༌བོའེ༌ མིག༌གུན༌ མེ༌ལྡབ༌ ཙོགས༌ ཡང༌ རྐང༌པ༌གུན༌, ལག༌ལག༌ ར༌གན༌ ཙོགས༌ ཡོད༌ཁན༌བོའེ༌ ཆོགས༌ནེ༌ ཨིན༌། 19 ཁྱོ༌ཞ༌གུན༌ནི༌ ཅེས༌པ༌, ཏད༌པ༌, ཞབ༌སྟོག༌ ཅོ༌ཅེས༌, ཡང༌ སྙིང༌རུས༌ ཉམ༌པོ༌ ལས༌ ཅོ༌ཁན༌གུན༌ ང༌ གྱུས༌ཡོད༌, ཀ༌གུན༌ ཁྱོ༌ཞ༌གུན༌ནི༌ དག༌ས༌ སྔུན༌ནི༌ སང༌ མང༌ང༌ ཅོ༌ཨིན༌ ཡོད༌ཏེ༌ ཨིན༌ནོག༌།
20 ཨིན༌ནའང༌ ངའ༌ ཁྱོ༌ཞ༌གུན༌ནི༌ གྱབ༌གལ༌ལ༌ སྐྱོན༌ ཀལ༌ཅེས༌ རིག༌གའང༌ ཡོད༌: ཁྱོ༌ཞ༌གུན༌ནི༌ ལུང༌སྟོན༌མ༌ ཨིན༌ ཟེར༌ཁན༌ནི༌ བུ༌མོ༌ ཡེ༌ཟི༌བེལ༌ལི༌ གྱབ༌གལ༌ ཅོའ༌ མི༌རུག༌། ཁོ༌རང༌ངི༌ ལབ༌ཞ༌ གྱུད༌ཏེ༌, ཁོའེ༌ ངའེ༌ ཞབ༌སྟོག༌པ༌གུན༌ལ༌ ལུས༌བྲེལ༌ ངན༌པ༌ ཅོ༌ཅེས༌ དང༌ སྐུན༌དྲ༌ ཆོད༌པ༌ ཕུལ༌ཁན༌གུན༌ ཟའ༌ཅེས༌ ལབས༌ཏེ༌, སྡིག༌པའེ༌ ཆོགས༌ལ༌ ཁྲིད༌ཏེ༌ ཁྱེར༌དུག༌། 21 ངའེ༌ ཏེ༌ བུ༌མོ༌བོའ༌ གྱོད༌པ༌ ཅོ༌ཅེས༌སི༌ སྐབས༌ ཏངས༌པིན༌, ཨིན༌ནའང༌ ཁོའ༌ གྱོད༌པ༌ ཅོ༌ཉིན༌ མི༌དུག༌པིན༌། 22 ཏེན༌ན༌བོའེ༌ཕིའ༌ ངའེ༌ ཏེ༌ བུ༌མོ༌བོའ༌ ཟུ༌མོ༌ ཡོང༌ཅུག༌ཨིན༌, ཡང༌ གལ༌ཏེས༌ ཏེ༌ བུ༌མོ༌ ཉམ༌པོ༌ ལུས༌བྲེལ༌ ཅོ༌ཁན༌གུན༌ནི༌ གྱོད༌པ༌ མ༌ཅོ༌ན༌, ཁོང༌གུན༌ནའང༌ སྲན༌ཏྲེ༌ ནགས༌བར༌དོ༌ ཐོང༌ཨིན༌། 23 ངའེ༌ ཏེ༌ བུ༌མོའེ༌ ལོབ༌ཕྲུགས༌གུན༌ལ༌ ཆད༌པ༌ ཏངས༌ཏེ༌ ཤི༌ཅུག༌ཨིན༌། ཏེ༌ནེ༌ ང༌, སྙིང༌ དང༌ སམ༌བ༌ གུན༌ལ༌ སྟག༌ཅད༌ ཅོ༌ཁན༌ ཡང༌ ཚང༌མ༌ལ༌ རང༌རང༌ངི༌ ལས༌སི༌ ནང༌ཞིན༌ བྲས༌བུ༌ ཏང༌ཁན༌ ཨིན༌ཁན༌བོ༌ ཆོས༌ཚོགས༌གུན༌ནི༌ ཧ༌གོ༌ ཐུབ༌ཨིན༌། 24-25 ཨིན༌ནའང༌ ཐི༌འ༌ཏི༌རཱའི༌ ཆོས༌ཚོགས༌སི༌ ནང༌ང༌ ཡེ༌ཟི༌བེལ༌ལི༌ ལབ༌ཞ༌གུན༌ནི༌ ལམ༌མི༌ཀ༌ མ༌གྲུལ༌ཁན༌ ཡང༌, ཤེ༌ཏན༌ནི༌ སང༌ཝའེ༌ ལབ༌ཞ༌ ཨིན༌ ཟེར༌ཁན༌ནི༌ ཐོང༌ངོམས༌ མ༌ཆའ༌ ལུས༌ཏེ༌ ཡོད༌ཁན༌གུན༌ལ༌ ངའེ༌, ང༌ ཡོང༌ཡོང༌ ཚག༌པ༌ ངའེ༌ ནང༌ང༌ ཏད༌པ༌ སྟན༌པོ༌ བོར༌ཅེས༌སི༌ སང༌ ཐེ༌བ༌ ཅའང༌ ཟེར༌ར༌མེད༌།
26 སྟིང༌ཇུག༌ ཚག༌པ༌ ངའེ༌ ལབ༌ཞའ༌ ཁའ༌ཉན༌ཁན༌གུན༌ལ༌ གྱལ༌ཁའ༌ ཐོབ༌ཨིན༌། ངའེ༌ ཏེ༌གུན༌ལ༌ མིར༌གྱུད༌ ཚང༌མའེ༌ཀ༌ ཝང༌ཆ༌ ཏང༌ཨིན༌།
27 "ཏེ༌གུན༌ནི༌ ལྕགས༌སི༌ བེར༌ཀ༌ ཉམ༌པོ༌ ཝང༌སྲུལ༌ཏེ༌
ཟ༌མ༌ ཙོགས༌ལ༌ ཏུམ༌པ༌ཏུམ༌པའེ༌ ནང༌ང༌ ཅག༌ཨིན༌"* 2:27 སུང༌གུར༌རི༌ སྤེ༌ཆའེ༌ 2:9
28 ཁོང༌གུན༌ལ༌ ཏེན༌ན༌ ཙོགས༌སི༌ ཝང༌ཆའ༌ ཐོབ༌ཨིན༌ ཀ༌ཟུག༌གི༌ ངའ༌, ང༌རང༌ངི༌ ཡབ༌བི༌ ཀ༌ནེ༌ ཐོབ༌ཏེ༌ ཨིན༌། ངའེ༌ ཏེ༌གུན༌ལ༌ ནམ༌ལངས༌སི༌ སྐར༌མའང༌ ཏང༌ཨིན༌། 29 ནམ༌ཅོག༌ ཡོད༌ཁན༌གུན༌ནི༌ ཉོན༌ཤིག༌, དཀོན༌མཆོག༌གི༌ ཐུག༌ཉིད༌དི༌ ཆོས༌ཚོགས༌གུན༌ལ༌ མོལ༌ཁན༌གུན༌ ཉོན༌ཤིག༌།