14
མི༌ 144,000 དང༌ ལུ༌གུ༌།
14:1 ནེ༌ 5
1 ཏེ༌ནེ༌ ངའེ༌ ལྟའ༌ཅིག༌ ཟི༌ཡོན༌ ཟེར༌ཁན༌ནི༌ རི༌ཀ༌ ཏེན༌ན༌ ལུ༌གུ༌བོ༌ ཞངས༌ཏེ༌ ཐོང༌, ཡང༌ ཐོད༌པའེ༌ཀ༌ ལུ༌གུ༌ དང༌ ཁོང༌ངི༌ ཡབ༌བི༌ ཚན༌ བྲིའ༌ ཛད༌ཁན༌ནི༌ མི༌ 144,000 ཁོང༌ ཉམ༌པོ༌ དུག༌། 2 ཡང༌ ང༌ ནམ༌ཁའ༌ནེ༌ སྐད༌ ཀྲག༌པོ༌ཞིག༌ ཚོར༌ ཀ༌བོ༌ ཤེད༌ཅན༌ གྱུག༌ཁན༌ནི༌ ཆུ༌ སྐད༌ ཀྲག༌པོ༌ ཡ༌ ངད༌ཅན༌ བྲུག༌ལྡིར༌ཁན༌ ཙོགས༌ རག༌པིན༌། ཏེ༌ སྐད༌པོ༌ ནི༌ མི༌ མང༌པོ༌ཞིག༌གི༌ ཏར༌ མང༌པོ༌ཅན༌ནི༌ རོལ༌མོ༌ རོལ༌ཁན༌ ཙོགས༌ རག༌པིན༌།
3 ཁོང༌གུན༌ནི༌ ཞུགས༌ཁྲིས༌, སྲོག༌ ཡོད༌ཁན༌ ཞི༌ཀོ༌ དང༌ འུ༌སྐྱོང༌གུན༌ནི༌ དུན༌ལ༌ ལུ༌ སོ༌མ༌ཞིག༌ ཏངས༌། ཏེ༌ ལུ༌བོ༌ དཀོན༌མཆོག༌གི༌ སྐྱོབ༌བ༌ ཛད༌ཁན༌ 144,000 མི༌གུན༌ མ༌སྟོགས༌, སུའང༌ བྱང༌ ཆོག༌ག༌ མི༌དུག༌། 4 ཁོང༌གུན༌ དམ༌པ༌, བུ༌མོ༌ ཉམ༌པོ༌ ལུས༌བྲེལ༌ མ༌ནེ༌ མེད༌ཁན༌ དང༌ ལུ༌གུ༌ ཀ༌རུ༌ ཆ༌ནའང༌ ཁོང༌ངི༌ སྟིང༌རང༌ནེ༌ ཆའད༌པིན༌། ཡང༌ ཁོང༌གུན༌ མི༌གུན༌ནི༌ ཕྲོ༌ནེ༌ ཉོའ༌ ཛད༌ཏེ༌ སྟོན༌ཐོག༌གི༌ གྲུ༌ གོ༌མ༌བོ༌ ཙོགས༌ལ༌ དཀོན༌མཆོག༌ དང༌ ལུ༌གུའ༌ ཕུལ༌ལ༌ ཛདས༌། 5 ཁོང༌གུན༌ནི༌ ཁའ༌ནེ༌ ཟུན༌ མ༌ནེ༌ མ༌བིང༌, ཡང༌ ཁོང༌གུན༌ སྐྱོན༌མེད༌ཁན༌ ཨིན༌ནོག༌།
ཕོ༌ཉ༌ སུམ༌།
14:6 ནེ༌ 13
6 ཏེ༌ནེ༌ ངའེ༌ ནམ༌མི༌ སྐྱིལ༌ལ༌ འུར༌ཨིན༌ ཡོད༌ཁན༌ནི༌ ཞན༌ ཕོ༌ཉ༌ཞིག༌ ཐོང༌། ཁོའེ༌ ཐའ༌ མ༌ནེ༌ མེད༌ཁན༌ནི༌ གའ༌མོའེ༌ ནས༌ཚུལ༌བོ༌, ཇིག༌རྟེན༌པ༌ ཚང༌མའ༌ ཤད༌དུག༌ ཀ༌བོ༌ གྱལ༌ཁམས༌, མི༌རིགས༌, སྐད༌རིགས༌ དང༌ མི༌གུན༌ ཨིན༌ནོག༌། 7 ཡང༌ ཏེ༌ ཕོ༌ཉ༌བོའེ༌ སྐད༌ ཆེན༌མོའེ༌ ནང༌ང༌ མོལས༌, "ཏ༌ དཀོན༌མཆོག༌གི༌ ཁྲིམས༌ཅད༌དི༌ ཏུས༌ ལེབས༌པ༌, ཁོང༌ང༌ ཇིགས༌ཤིག༌ ཡང༌ རྩི༌ཝ༌ ཅོ༌ཤིག༌། ནམ༌ཁའ༌, ས༌ཀྱད༌, གྱ༌ཚོ༌ དང༌ ཆུའི༌ ཆུ༌མིག༌ གུན༌ ཛད༌ཁན༌ནི༌ དཀོན༌མཆོག༌ག༌ ཅོལ༌ཤིག༌།"
8 ཕོ༌ཉ༌ ཏང༌པོའེ༌ སྟིང༌རང༌ནེ༌ ཞན༌ཡང༌ ཕོ༌ཉ༌ཞིག༌ སྐྱོད༌ཏེ༌ མོལས༌, "བ༌བེ༌ལོན༌ནི༌ གྱལ༌ས༌ མིང༌ཅན༌ ངན༌པ༌བོ༌ ཤིགས༌ཏེ༌ མེད༌, ཀ༌བོའེ༌ ཇིག༌རྟེན༌ནི༌ གྱལ༌ཁམས༌ ཚང༌མའེ༌ མི༌གུན༌ལ༌, ཁོའེ༌ ལུས༌བྲེལ༌ལི༌ དོད༌པ༌ ངན༌པའེ༌ ཆང༌བོ༌ ཐུང༌ཅུགས༌།"
9 ཁོང༌གུན༌ནི༌ སྟིང༌རང༌ནེ༌ ཕོ༌ཉ༌ སུམ༌པ༌བོ༌ སྐྱོད༌ཏེ༌ མ༌ སྐད༌ ཆེན༌མོ༌ ཉམ༌པོ༌ མོལས༌, "སུ༌ཞིག༌གི༌ ཏེ༌ ཇིགས༌ནང༌ཅན༌ནི༌ སེམས༌ཅན༌ དང༌ ཁོའེ༌ སྐུན༌དྲའ༌ ཅོལ༌ན༌, ཡ༌ ཁོའེ༌ སྟགས༌པོ༌ ཁོ༌རང༌གུན༌ནི༌ ཐོད༌པ༌ ཡ༌ ལག༌པའེ༌ཀ༌ ཅོ༌ཅུག༌ན༌, 10 ཁོང༌གུན༌ལ༌ དཀོན༌མཆོག༌གི༌ ཐུགས༌སྲོའེ༌ རྒུན༌ཆང༌བོ༌ ཐུང༌གོས༌ཨིན༌, ཀ༌བོ༌ ཁོང༌ངི༌ ཐུགས༌སྲོའེ༌ དོན༌སྐྱོག༌གི༌ ནང༌ང༌ ཅའང༌ མ༌སྲེ༌ཁན༌ ཀར༌བ༌ ལུག༌ག༌ ཛད༌ཏེ༌ ཨིན༌། ཡང༌ ཁོང༌གུན༌ལ༌ དཀོན༌མཆོག༌གི༌ དམ༌པའེ༌ ཕོ༌ཉ༌ དང༌ ལུ༌གུའི༌ སྐུན༌དུན༌ལ༌ མེ༌ དང༌ མུ༌ཟི༌ མེའ༌ ཞེན༌ཨིན༌ ཡོད༌ཁན༌གུན༌ནི༌ ནང༌ང༌ རྡུག༌ངལ༌ ཐོང༌ཨིན༌། 11 ཁོང༌གུན༌ནི༌ ནགས༌སི༌ ཏུད༌པ༌བོ༌ ཏུས༌གྱུན༌ནེ༌གྱུན༌ བིང༌ཨིན༌ དུག༌ཨིན༌། ངལ༌ཚོ༌ མ༌ནེ༌ མེད༌པ༌, ཁོང༌གུན༌ལ༌ ཉིན༌ཚན༌ གང༌པོ༌ བར༌དོ༌ ཐོང༌ཨིན༌, ཅིའ༌ཟེར༌ན༌ ཁོང༌གུན༌ནི༌ ཇིགས༌ནང༌ཅན༌ནི༌ སེམས༌ཅན༌ དང༌ ཏེ༌བོའེ༌ སྐུན༌དྲའ༌ ཅོལས༌, ཡང༌ ཁོའེ༌ མིང༌ངི༌ སྟགས༌པོ༌ ཁོ༌རང༌གུན༌ནི༌ཀ༌ ཅོ༌ཅུགས༌།
12 ཏེན༌ན༌བོའེ༌ཕིའ༌ དཀོན༌མཆོག༌གི༌ མི༌གུན༌ནི༌ ནགས༌བར༌དོ༌གུན༌ ཟོད༌པ༌ ཉམ༌པོ༌ ཁུར༌ཏེ༌ དཀོན༌མཆོག༌གི༌ བཀའ༌གུན༌ ཉན༌ཅེས༌ དང༌ ཏད༌པ༌བོ༌ ཡེ༌ཤུའི༌ ནང༌ང༌ སྟན༌པོ༌ བོར༌གོས༌།
13 ཏེ༌ནེ༌ ངའེ༌ ནམ༌ཁའ༌ནེ༌ སྐད༌ཅིག༌གི༌ ཟེར༌ཨིན༌ ཚོར༌, "འི༌བོ༌ བྲིས༌, ཏ༌ནེ༌ཕར༌ལ༌ གཙོ༌བོའེ༌ཀ༌ ཏད༌པ༌ ཅོ༌ཅེས༌པོའེ༌ ཤི༌གོས༌ཁན༌གུན༌ ཅིན༌ལབས༌ཅན༌ ཨིན༌།" དམ༌པའེ༌ ཐུག༌ཉིད༌དི༌ མོལས༌, "འོ༌ན༌ དེན༌བའ༌, ཁོང༌གུན༌ལ༌ ཅིན༌ལབས༌ ཏན༌ཏན༌ ཐོབ༌ཨིན༌། ཁོང༌གུན༌ལ༌ ལས༌ ཀགས༌པོ༌གུན༌ནེ༌ ངལ༌ཚོ༌ ཐོབ༌ཨིན༌ ཅིའ༌ཟེར༌ན༌ ཁོ༌རང༌གུན༌ནི༌ ལས༌ ཟང༌པོའེ༌ བྲས༌བུ༌ ནམ༌ཁའེ༌ ནང༌ང༌ ཁོང༌ ཉམ༌པོ༌ ལེབ༌ཨིན༌།"
ཇིག༌རྟེན༌ནི༌ སྟོན༌ཐོག༌།
14:14 ནེ༌ 20
14 ཏེ༌ནེ༌ ངའེ༌ སྲིན༌ ཀར༌པོ༌ཞིག༌ ཐོང༌, ཡང༌ ཏེ༌ སྲིན༌ནི༌ཀ༌ ཞུགས༌ཏེ༌ ཡོད༌ཁན༌བོ༌ མི༌རིགས༌སི༌བུ༌ *14:14 དཱ༌ནི༌ཨེལ༌ལི༌ སྤེ༌ཆའེ༌ 7:13 ཙོགས༌ དུག༌། ཁོང༌ངི༌ ཨུའི༌ཀ༌ སེར༌རི༌ ཐོར༌ཤོག༌ དང༌ ཆག༌ག༌ ཟོར༌ར༌ ནོན༌པོ༌ཞིག༌ ནམས༌ཏེ༌ དུག༌།
15 ཏེ༌ནེ༌ ཞན༌ཡང༌ ཕོ༌ཉ༌ཞིག༌གི༌, ནམ༌ཁའེ༌ ཆོད༌ཁང༌ངི༌ ནང༌ནེ༌ བིང༌ཏེ༌ སྐད༌ ཆེན༌མོ༌ ཉམ༌པོ༌ སྲིན༌ནི༌ཀ༌ ཞུགས༌ཁན༌བོའ༌ མོལས༌, "ཉེེ༌རང༌ངི༌ ཟོར༌ར༌ ཉམ༌པོ༌ རྔའ༌ ཛད༌, ཅིའ༌ཟེར༌ན༌ ཏུས༌པོ༌ རན༌ཏེ༌ ཇིག༌རྟེན༌ནི༌ཀ༌ སྟོན༌ཐོག༌པོ༌ ཚོས༌ཏེ༌ ཡོད༌ཏེ༌ ཨིན༌ནོག༌།" 16 སྲིན༌ནི༌ཀ༌ ཞུགས༌ཁན༌ནི༌ ཁོང༌རང༌ངི༌ ཟོར༌ར༌ ཇིག༌རྟེན༌ནི༌ཀ༌ གྱབས༌པ༌ ཇིག༌རྟེན༌ གང༌པོ༌ རྔས༌ཏངས༌།
17 ཏེ༌ སྟིང༌ནེ༌ ཡང༌ ཕོ༌ཉ༌ཞིག༌ ནམ༌ཁའེ༌ ཆོད༌ཁང༌ངི༌ ནང༌ནེ༌ བིང༌ཏེ༌ སྐྱོདས༌, ཁོང༌ངི༌ ལག༌གའང༌ ཟོར༌ར༌ ནོན༌པོ༌ཞིག༌ དུག༌། 18 ཏེ༌ནེ༌ མེ༌ཀ༌ ཝང༌ ཡོད༌ཁན༌ ཡང༌ ཕོ༌ཉ༌ཞིག༌ ཆོད༌ཁྲི༌ དུན༌ནེ༌ སྐྱོད༌ཏེ༌ ཟོར༌ར༌ ནོན༌པོ༌ ནམས༌ཏེ༌ ཡོད༌ཁན༌ནི༌ ཕོ༌ཉ༌ མོལས༌, "ཉེ༌རང༌ང༌ ཡོད༌ཁན༌ནི༌ ཟོར༌ར༌ ནོན༌པོ༌བོ༌ ཀོལ༌ཏེ༌ ཇིག༌རྟེན༌ནི༌ རྒུན༌ནི༌ ལྕང༌མ༌གུན༌ནི༌ ཀ༌ནེ༌ རྒུན༌གུན༌ ལྡུས༌, ཅིའ༌ཟེར༌ན༌ ཏེ༌གུན༌ ཚོས༌ཏེ༌ དུག༌།" 19 ཡང༌ ཏེ༌ ཕོ༌ཉ༌བོའེ༌ ཁོ༌རང༌ངི༌ ཟོ༌ར༌བོ༌ ཇིག༌རྟེན༌ནི༌ཀ༌ སྲུལ༌ཏེ༌ རྒུན༌གུན༌ ལྡུས༌ཏེ༌, ཁུའ༌ ཕིང༌ང༌ལ༌ དཀོན༌མཆོག༌གི༌ ཐུགས༌སྲོའེ༌ རྒུན༌ ཙིར༌ཅེས༌སི༌ ནས༌ས༌ ཆེན༌མོའེ༌ ནང༌ང༌ ཕངས༌། 20 ཏེ༌ རྒུན༌ ཙིར༌སའེ༌ ནས༌ས༌བོ༌ གྱལ༌ས༌ནེ༌ ཕི༌ལོག༌ག༌ ཡོད༌པིན༌། ཁོང༌གུན༌ནི༌ ཁྲག༌པོ༌, རྒུན༌ ཙིར༌སའེ༌ ནས༌ས༌ནེ༌ ཧ༌ལམ༌ ཀི༌ལོ༌མི༌ཀྲར༌ 300 ཚག༌པ༌ གྱུགས༌, ཡང༌ ཁྲག༌གི༌ ཐོན༌པོ༌ རྟའེ༌ སྲབས༌ ཚོག༌པ༌ ལེབ༌།